Luka 8

1Bră tom tơlôh nơ̆m tô̆ tơnge ma-ngkơi gư̆n, Kơnràñ kŭng kư̆ sơntơm swà gung lêh ƀòn dơng dô, ƀòn êt năy, bơtău tơngkah kŭng gư̆ptî tơs tơnggư̆t jơno niem bơh lơgơ Yang Tơm Trồ dê, î Jư̆t-bea hê cro gơnoăr bơtău swà băl î Kơnràñ, 2băl î du pơnah cro-ua năy la tơmpôl cro sŏng dî sămƀeah klàs sơ hwîng cà lơh î jơno kòp jê: Mari, cro dî sơnăn la Madơlen, mà bơh mò tom poh-lăm cà mơsăk sŏng tơlôh makin; 3Jannơ, bo-ua Cusa, cro jư lăng jini-jơno Herôt dê; Susanơ; gư̆m khăi cro-ua nde, ƀòn gô duh bră tơmpôl jơnư̆m Kơnràñ dê bơh î lơ̆gay jini-jơno ƀòn gô prăp iyà.

4Tơm tô̆ tơmpôl lang bol khăi bơjư̆m wăl bơh kơp ƀòn dơng swà trôh băl î Yang jesu, Kơnràñ tơs bơtău bơh î jơno pơ̆niyô: 5“Du hôi cro sêh gơ swà tơlôh lơi sêh gơ mơ̆n dê, gừn nơ̆m jơ gô sêh, du pơnah gơ ru malik gung, kŏng jă nteàh jư̆ng î sêm trồ sa lơ̆ pơnah gơ gư̆n. 6Khà gơ nde ru nơ̆m lô̆, gư̆n-jîng tơm tô̆ hon dơng, khà gư̆n kŏng rău-răñ, bơh ơ̆ tom suh. 7Khà nde te ru nơ̆m nhòng pôm lẵu, gừn tơm tô̆ hon dơng, gừn lẵu lơh gô rềt lơ̆. 8Gừn du khà nde ru nơ̆m anẵu ù niem, gư̆n-jîng tơm tô̆ hon dơng, gô tơlôh công nha rlo du-rhieng dơ̆ te.” Ma-ngkơi jơ tơs sŏng lơ̆gay jơno rơ̆, Kơnràñ hôi dơng: “Cro găy dî tua lơi iet, păl iet cĕ.”

9Ma-ngkơi gư̆n, lơ̆gay cro bơtê Kơnràñ lùp Kơnràñ: “Jơno pơ̆niyô gư̆n la amơh?” 10Kơnràñ kla dẵư: “Oh mi sŏng dî e gời jơno lơi wơng gư̆t lơ̆gay jơno ndăp-ndơ gôtrê bơh lơgơ Yang Tơm Trồ, mơya î cro nde gừn ngui jơno pơ̆niyô, lơi ‘tơm tô̆ lăng, ƀòn gô ơ̆ tơmpơl, gừn tơm tô̆ iet, ƀòn gô ơ̆ wơng.’ 11Jơno pơ̆niyô gư̆n la tîdô: Gơ la jơno niem Yang Tơm Trồ. 12Kơp anẵu malik gung la tơmpôl cro sŏng kơnău, mơya sŏng gư̆n cà-ràk trôh gừn kơntô̆ng dưñ jơno niem bơh nơ̆m nùs ƀòn gô, lơi ma ƀòn gô ơ̆ don lơi dî dŏng-klàs. 13Lơ̆gay anẵu nơ̆m lô̆ sơđah bơh tơmpôl cro tơm tô̆ ƀòn gô sŏng kơnău, gừn î jơno sơhờp, ƀòn gô don jơno niem. Mơya ƀòn gô ơ̆ tom reah; rơ̆ la tơmpôl cro don nư̆ng du-yoa gời, gừn nơ̆m jơ kŏng lòng trôh, gừn ƀòn gô lơi căư. 14Hôm du pơnah gơ sŏng ru nhòng kơp pôm lẵu, gừn anẵu dô la tơmpôl cro sŏng kơnău, gừn tơm tô̆ kư̆ pơnjăt te jơno lơh-jăt rai dô, ƀòn gô kŏng lơh gô rềt lơ̆ bơh lơ̆gay kơlôi kơ̆mbrit, jơno kơnhơ̆p-mơ̆nda î jơno ham-kơñ rai dô, gừn ƀòn gô ơ̆ tơlôh bơkao jîng gơ dî. 15Mơya gôtrê bơh pơnah gơ nơ̆m ù niem, dô la tơmpôl cro bơh î nùs-nhơ̆m tơpăt ngăn gư̆m lơbăn niem, ma-ngkơi jơ kơnău jơno niem gừn ƀòn gô prăp kơđư̆ng dưñ î tơlôh công nha nơ̆m jơno ăt-ăl kŏng-ăt.

16Ma-ngkơi jơ su đeng, ơ̆ tom cro găy kơtrơ̆p gô wăl bơh î thô̆ng hala ăn lơi nơ̆m phôm cơnờng. Ala sơgư̆n, cro nde ăn gô cŭngsî jư̆ng đeng lơi tơmpôl cro lơbà mơ̆t digơlăn tơmpơl jơno ang. 17Bơh ơ̆ tom jơno găy dî ăn pôn-ndăp mà ơ̆ kŏng sơđah makin, kŭng ơ̆ tom jơno ndăp-ndơ găy mà nên-nôn ngăn ơ̆ kŏng sơđah tơlôh î pẵư tơlôh makin mađàp loh-lang. 18Gư̆n-jîng, păl kơhea bơh bră oh mi kơnău, bơh cro găy dî rơp dî e te, hôm cro găy ơ̆ dî, tien gơs jơno cro rơ̆ kơlôi mơ̆n dî kŭng rơp kŏng dưñ tă bơh sơ gô.”

19Dơ̆ gư̆n mơi î lơ̆gay oh Kơnràñ trôh î Kơnràñ, mơya ƀòn gô ơ̆ trôh en dî Kơnràñ tài bơh tơmpôl lang bol. 20Sŏng gư̆n, bră rơ̆ dî tơs tơnggư̆t ma Kơnràñ, lah: “Mơi cro bơtău băl lơ̆gay oh cro bơtău ndăng ñă ăm makin, kơñ tơmtom Kơnràñ.” 21Mơya tơm tô̆ kla dẵư, Kơnràñ tơs î ƀòn gô: “Dô la mơi ăñ î oh mi ăñ, la tơmpôl cro kơnău î lơh jăt jơno tơs Yang Tơm Trồ.”

22Bră tơmtom nơ̆m du-nge năy, Kơnràñ băl î lơ̆gay cro bơtê mơ̆n lơbà hao nơ̆m du-lăm ahẵu, gừn Kơnràñ tơs î ƀòn gô: “Ƀòn mơ̆n păl swà găn mamằ dà manăy.” Sŏng gư̆n ƀòn gô lơboh ahẵu swà. 23Nơ̆m dơ̆ ƀòn gô hôm pai ahẵu gừn Kơnràñ bĭc. Tơmjăt bơh gư̆n, du-yoa cal kơbôt kơdang ngăn pôh jư nơ̆m dàlîng, ƀòn gô kŏng dà mơ̆t bîng nơ̆m ahẵu î gleh-glăr ngăn. 24Ƀòn gô trôh en ble Kơnràñ lôh, lah: “Ơ cro bơtău! Ơ cro bơtău! Ƀòn mơ̆n mơñ sơ̆t dô!” Mơya tơm tô̆ Kơnràñ lôh atẵy, Kơnràñ tơmprơh cal î dà sơn-gàc pran, gừn cal ñă wăl î jơno tĕdơ gôjîng ngêt-ngờt. 25Kơnràñ tơs î ƀòn gô: “Jơno don oh mi anẵu găy?” Nơ̆m jơno kơ̆mbrit-kơ̆mbròt, ƀòn gô ndrăt-ndròt tơs băl î găp: “Cro bơtău la măt cro mà rgê pơđơ e cal rbơ̆t î dà, gừn gô păl don jăt cro bơtău?”

26Sŏng gư̆n ƀòn gô pai ahẵu trôh nơ̆m lơgơ Jerase, la anẵu ăm tơm-en băl î lơgơ Galile. 27Tơm tô̆ kơnràñ lơbà swà mamằ, du hôi cro năy bơh ƀòn dơng rơ̆ swà tơlôh wă-rẵu Kơnràñ, cro gư̆n kŏng cà lơh. Bơh du tô̆ tơnge jŏ ngăn, cro gư̆n ơ̆ cù ao tơm pha, kŭng ơ̆ jîng ăm nơ̆m hîh, mơya ăm anẵu mơ̆ntô ƀùc. 28Dơ̆ tơmpơl Yang Jesu, cro gư̆n kơkrẵy dơng, cun-khoai sơđàp Kơnràñ î tơs dơng dẵư: “Ơ, Jesu, kon Yang Tơm Trồ Dơng Rlo Lơ̆, ăñ î Kơnràñ tom bră găy? Ăñ rôn dăn Kơnràñ, dăn bư̆ng lơh gleh-glăr ăñ.” 29Bơh Kơnràñ sŏng e gơnoăr pơđơ ma hwîng cà tơlôh bơh cro-klo rơ̆. Bơh khăi dơ̆ gô tơmpìt bơklơ̆n gô, hôm gô sŏng kŏng săy-srê̆ căp î tơngdẵu kơ̆nsàng anôh, bulah e gô kŏng ăm jư, gừn bơh cà-ràk, kơp dơ̆ tư̆ng tĕ lơ̆ săy-srê̆, gô kŏng lơboh nơ̆m ƀlang-càs. 30Jơ gư̆n, Yang Jesu lùp gô lah: “Sơnăn mê la amơh?” Gô kla dẵư lah: “Mpôl lĭñ,” bơh tom khăi cà mơ̆t nơ̆m să gô. 31Sŏng gư̆n ƀòn gô kư̆ rôn dăn Kơnràñ lơi Kơnràñ bư̆ng e gơnoăr pơđơ ma ƀòn gô păl swà anẵu trôm jrô hùc. 32Nơ̆m gư̆n tom du mpôl sư khăi ngăn ndăng sa nơ̆m grồi yồ, ƀòn gô dăn Kơnràñ lơi Kơnràñ e gơnoăr ƀòn gô mơ̆t nơ̆m mpôl sư. Gừn Kơnràñ e gơnoăr ƀòn gô. 33Bơh gư̆n la, tơm tô̆ sŏng tơlôh bơh cro-klo, tơmpôl cà mơ̆t nơ̆m mpôl sư; sŏng gư̆n lơ̆gay mpôl toat bơh anẵu grồi yồ sơ̆m plô̆ng lêh nơ̆m dà î kŏng sơ̆t lơhăp. 34Ma-ngkơi jơ tơmpôl cro ăm jư sư tơmpơl bră mhăy tơmtom, gừn ƀòn gô toat ămpôn î tơs wăl bră rơ̆ nơ̆m ƀòn dơng gư̆m nơ̆m ƀòn êt. 35Gư̆n-jîng, lang bol jà găp trôh lơi lăng bră sŏng tơlôh, ƀòn gô trôh nơ̆m anẵu Yang Jesu gừn tơmpơl cro klo, mà tơmpôl cà sŏng tơlôh, ndăng nggui nơ̆m anẵu jư̆ng Yang Jesu, dî cù ao tơm pha, î tơngoh ang, gừn ƀòn gô kơ̆mbrit. 36Tơmpôl cro sŏng tơmpơl tơs wăl ma ƀòn gô amơh tîgay mà cro kŏng cà lơh sŏng dî sămƀeah. 37Lơ̆gay lang bol nơ̆m ƀòn Jerase dăn Kơnràñ tơlôh bơh anẵu ƀòn gô, bơh ƀòn gô kơ̆mbrit-kơ̆mbròt ngăn. Gư̆n-jîng, Kơnràñ hao nơ̆m ahẵu gừn tơmblăc swà trê. 38Cro-klo, mà tơmpôl cà sŏng tơlôh klàs, răc-dăn Kơnràñ lơi ăm băl î Kơnràñ, mơya Kơnràñ e gô trê, tơs lah: 39“Păl swà trê anẵu hîh mê gừn tơs wăl lơ̆gay bră Yang Tơm Trồ sŏng lơh ma mê.” Sŏng gư̆n gô swà gung tơs tơnggư̆t kơp ƀòn dơng lơ̆gay bră Yang Jesu sŏng lơh ma mơ̆n.

40Tơm tô̆ Yang Jesu swà trê, du tơmpôl lang bol khăi wă-rẵu Kơnràñ, bơh lơ̆gay cro kŭng ndăng ăm cang Kơnràñ. 41Gừn lăng năy, du hôi cro swà trôh, sơnăn ông la Jeru, ông la cro ăt-bồ hîh jơnư̆m. Cun tơmbĭc să nơ̆m anẵu jư̆ng Yang Jesu, ông hôi-dăn Kơnràñ swà trôh hîh mơ̆n. 42Bơh du hôi kon ua kơloh ngăn î ông, pơngăp jư̆t-bea năm, kon êt ndăng lơhăp. Tơm tô̆ Kơnràñ swà nơ̆m gung, tơmpôl lang bol sơlèt kơ̆njềt tĕdơ Kơnràñ.

43Tom du hôi cro-ua î jơno kòp jê hua mham sŏng jư̆t-bea năm, bulah roh lơ̆ priè jơno dờp ma cro gơnoăr lơh sơnăm, mơya ơ̆ tom cro găy digơlăn sămƀeah dî ma gô. 44Bơh î jơno swà en bơh ma-ngkơi Yang Jesu, mò tơbi nơ̆m tieng ao Kơnràñ, gừn ƀăt jơ gư̆n, kòp mham ơ̆ tom hua te. 45Yang Jesu tơs: “Mơ̆t cro la cro sŏng tơbi nơ̆m să ăñ?” Mơya cro găy kŭng khan, Pier pẵư dẵư tơs: “Ơ cro bơtău, tài bơh khăi ngăn tơmpôl lang bol ăm tĕdơ î sơlèt kơ̆njềt cro bơtău.” 46Mơya Yang Jesu tơs: “Du hôi cro găy gư̆n sŏng tơbi nơ̆m să ăñ, bơh ăñ gư̆t gơnăp-gơnoăr bơh mơ̆n sŏng tơlôh makin.” 47Jơ gư̆n, tơm tô̆ cro-ua gư̆t đăl lah gô sŏng ơ̆ ămpôn dî, gừn mò ntơ să swà trôh gừn ma-ngkơi jơ tơmbĭc să nteàh sơđàp Kơnràñ, gô tơs tơnggư̆t wăl sơđàp măt lơ̆gay lang bol tài bơh jơno găy mà mò sŏng tơbi nơ̆m să Kơnràñ gừn gô sŏng dî ƀeah ƀăt jơ gư̆n amơh. 48Kơnràñ tơs î mò: “Ơ kon ua, jơno don nơ̆m kon sŏng dî sămƀeah kon. Swà trê cĕ nơ̆m jơno lơngăp-lơnge.”

49Tơm tô̆ Kơnràñ hôm dăng tơs, cro găy gư̆n bơh nơ̆m hîh cro ăt-bồ hîh jơnư̆m trôh tơs lah: “Kon ua ông sơ̆t lờt. Bư̆ng lơh mơwăl cro bơtău te.” 50Mơya tơm tô̆ Yang Jesu kơnău jơno gư̆n, Kơnràñ kla dẵư î ông: “Bư̆ng kơ̆mbrit; păl dî jơno don gời gừn kon ua rơp dî dŏng-klàs.” 51Tơm tô̆ swà trôh nơ̆m hîh lờt, Kơnràñ ơ̆ e cro găy mơ̆t î Kơnràñ, nư̆ng sî Pier, Jăng, Jakơ, băl mơi î bàp kon êt. 52Lơ̆gay cro ndăng ñim-rèa, î pŏ nùs bơh kon êt, mơya Kơnràñ tơs: “Bư̆ng ñim, bơh kon êt hôm dahrăư sơ̆t, mà nư̆ng ndăng bĭc gời.” 53Ƀòn gô tơngyŏ-tơnghiel Kơnràñ, bơh gư̆t lah kon êt sơ̆t lờt. 54Mơya ma-ngkơi jơ iyà tê kon êt, Kơnràñ hôi dơng, lah: “Ơ Kon êt, păl lôh cĕ.” 55Hwîng kon êt trê wăl gừn kon êt ƀăt jơ gư̆n lôh nggui jai, sŏng gư̆n Kơnràñ pơđơ e kon êt sa. 56Mơi bàp kon êt ndrăt-ndròt ngăn, mơya Kơnràñ ƀăn tơngkah ƀòn gô ơ̆ tơs î cro găy bơh bră sŏng tơlôh.