Luka 9

1Ma-ngkơi jơ hôi jư̆t-bea hê cro gơnoăr bơtău jơnư̆m wăl, Kơnràñ e ma ƀòn gô gơnăp-gơnoăr î gơnoăr-pran rlo lơ̆gay cà-ràk gừn lơi sămƀeah kòp jê, 2sŏng gư̆n Kơnràñ pơđơ ƀòn gô tơlôh swà lơi tơs tơnggư̆t bơh lơgơ Yang Tơm Trồ î lơi sămƀeah cro kòp jê. 3Kơnràñ tơs î ƀòn gô: “Bư̆ng iyà jơno găy nơ̆m gung swà — ơ̆ mư̆ng, ơ̆ kơdô̆ng, ơ̆ ƀăñ, ơ̆ jên-priè — kŭng bư̆ng iyà băl bea blah ao. 4Oh mi mơ̆t nơ̆m hîh cro găy, păl ăm anẵu gư̆n gừn bơh anẵu gư̆n tơlôh swà. 5Tơm jơ găy mà ƀòn gô ơ̆ wă-rẵu oh mi, gừn tơm jơ swà tơlôh bơh nơ̆m ƀòn dơng rơ̆, păl katôh buh bơh nơ̆m jư̆ng oh mi gư̆ptî jơno lơh cư̆ng tơmdră î ƀòn gô.” 6Tîgư̆n la tơm tô̆ swà gung, lơ̆gay cro bơtê swà găn kơp lang ƀòn, tơs bơtău jơno niem î sămƀeah kòp jê kơp anẵu.

7Tơm tô̆ bơtao oh-Herôt kơnău gư̆t bơh lơ̆gay bră ndăng tom tơlôh, ông mơrêh-mơrăñ ngăn, bơh nhẵư hê cro tơs lah Jăng sŏng bơh anẵu sơ̆t jîng wăl, 8mơya du pơnah gừn tơs lah Êli sŏng tơlôh sơđah, hôm du pơnah nde e lah du hôi nơ̆m lơ̆gay cro gơnoăr-hwơr bơh rai yo sŏng jîng wăl. 9Mơya Herôt tơs: “Ăñ sŏng păc găl Jăng lờt, hôm cro dô la mơ̆t cro mà ăñ kơnău lơ̆gay bră tîgư̆n bơh gô?” Sŏng gư̆n ông jôi kơp jơno tơmtom Yang Jesu.

10Tơm tô̆ lơ̆gay cro gơnoăr bơtău swà trê, ƀòn gô tơs wăl ma Kơnràñ lơ̆gay bră gô sŏng lơh. Gừn ma-ngkơi jơ lơboh ƀòn gô swà băl, Kơnràñ ndăp-ndơ trê nơ̆m ƀòn dơng sơnăn la Ƀetsaiđa. 11Mơya tơm tô̆ tơmpôl lang bol khăi gư̆t đăl dî, gừn ƀòn gô swà jăt Kơnràñ. Kơnràñ wă-rẵu ƀòn gô, tơs tơnggư̆t ma ƀòn gô bơh lơgơ Yang Tơm Trồ, î Kơnràñ dŏng tơwai lơ̆gay cro kơñ dî sămƀeah. 12Brê mhău sơntơm ñô̆ng, jơ gư̆n, dơ̆ jư̆t-bea hê cro gơnoăr bơtău swà trôh, ƀòn gô tơs î Kơnràñ lah: “Dăn cro bơtău pơđơ tơmpôl lang bol lơi tơm tô̆ swà mơ̆t nơ̆m kơ̆p ƀòn î ƀòn êt tĕdơ dô, ƀòn gô digơlăn jôi anẵu bĭc î jơno sa, bơh nơ̆m dô, ƀòn mơ̆n ndăng ăm nhòng du-anẵu ƀlang ngêt-ngờt.” 13Mơya Kơnràñ tơs î ƀòn gô: “Oh mi păl e ƀòn gô sa.” Mơya ƀòn gô kla dẵư: “Ơ̆ tom jơno găy anẵu ƀòn hî khăi rlo prăm-lăm ƀăñ î bea-lăm ka — bulah ƀòn hî swà tăc jơno sa e dư̆ng rơ̆ cro lang bol dô.” 14(Bơh tom mơñ prăm-rbô cro-klo.) Kơnràñ tơs î lơ̆gay cro bơtê mơ̆n: “Păl pơđơ ƀòn gô nggui nteàh lơi sa băl kơp tơmpôl nhăm prăm-jư̆t hê.” 15Ƀòn gô lơh-jăt tîgư̆n, e ma lơ̆gay tơmpôl lang bol nggui nteàh lơi sa. 16Ma-ngkơi jơ dưñ prăm-lăm ƀăñ î bea-lăm ka, ngẵư măt cŭngsî trồ, Kơnràñ ưnngai bơh jơno sa gư̆n, sŏng gư̆n pêh ƀăñ, dờp ma lơ̆gay cro bơtê lơi tơmpà ma tơmpôl lang bol. 17Lơ̆gay cro sa hơm lề, gừn lơ̆gay jơno nkah hôm dî săc wăl ma ƀòn gô la jư̆t-bea bai ƀăñ lề.

18Bră tơmtom nơ̆m jơ Kơnràñ ndăng hôi-dăn dêh, lơ̆gay cro bơtê ờs swà băl î Kơnràñ, gừn Kơnràñ lùp ƀòn gô lah: “Lang bol tơs ăñ la măt cro?” 19Tơm tô̆ kla dẵư, ƀòn gô tơs lah: “La Jăng Ƀaptis, hôm du pơnah nde tơs cro bơtău la Êli, mơya pơnah nde te tơs cro bơtău la du hôi nơ̆m lơ̆gay cro gơnoăr-hwơr rai yo jîng wăl.” 20Sŏng gư̆n Kơnràñ lùp te ƀòn gô: “Hôm oh mi tơs ăñ la măt cro?” Jơ gư̆n, tơm tô̆ Pier kla dẵư, ông tơs: “Cro bơtău la Bơtao Dŏng-Klàs Yang Tơm Trồ dê.” 21Mơya lơi khă krañ-cê ƀòn gô, Kơnràñ tơs pơđơ bư̆ng tơs bră dô î cro găy, 22tơm tô̆ tơs lah: “Kon-Mơnùs păl kŏng khăi jơno gleh-glăr, kŏng lơ̆gay kwăng kra, lơ̆gay cro gơnoăr ăn jơno duh-khoai, î lơ̆gay cro bơtău jơno-bơlăm khan lơi căư, sŏng gư̆n rơp kŏng tơngsơ̆t cĕ, gừn trôh nge dơ̆ păy rơp jîng wăl.” 23Sŏng gư̆n Kơnràñ tơs î lơ̆gay ƀòn gô: “Dilah cro găy kơñ swà jăt ăñ gừn păl lơi căư să tơm mơ̆n, kơp nge tî sî pư̆ng mơ̆n gừn jăt ăñ. 24Bơh dilah cro găy kơñ dŏng jơno jîng mơ̆n gừn cro rơ̆ rơp roh gô, hôm dilah cro găy bơh ăñ kŏng roh jơno jîng mơ̆n, gừn cro rơ̆ rơp dŏng-klàs dî gô. 25Bơh du hôi cro dî jơno kwơ găy, tơm tô̆ gô dî lơ̆gay dunya, mơya lơh tơngroh dêh hala lơh roh sătan mơ̆n? 26Bơh dilah cro găy ƀasmăt bơh ăñ î jơno tơs ăñ, gừn Kon-Mơnùs rơp ƀasmăt bơh cro gư̆n tơm tô̆ Kơnràñ trôh nơ̆m jơno gơklŏ mơ̆n dê, băl jơno gơklŏ Bàp dê î lơ̆gay cro gơndrơh sang-goh. 27Mơya iyŏ ngăn, ăñ tơs î oh mi, tom nhẵư hê cro nơ̆m tơmpôl cro ndăng ñă sơ dô, la tơmpôl cro nên-nôn ngăn rơp ơ̆ rlo jơno sơ̆t trôh dî jơ tơmpơl lơgơ Yang Tơm Trồ.”

28Bră tơmtom pơngăp pham nge ma-ngkơi lơ̆gay jơno rơ̆, tơm tô̆ bơlăm pier băl Jăng î Jakơ, Kơnràñ hao nơ̆m yồ lơi hôi-dăn. 29Jơno tom tơlôh nơ̆m jơ Kơnràñ ndăng hôi-dăn, rơ̆ la să-jăn Kơnràñ bơgăl phadêh, gừn ôi-ao Kơnràñ gôjîng ang gơcrà ƀlăk. 30Gừn năy, bea hê cro ndăng răk-sa băl î Kơnràñ, rơ̆ la Môise î Êli, 31mà ƀòn gô dî gư̆t đăl nơ̆m jơno gơklŏ, ndăng tơs bơh jơno sơ̆t Kơnràñ, la jơno Kơnràñ mơñ lơh sơlôh gôjîng iyŏ ngăn nơ̆m anẵu Jerusalem. 32Pier î tơmpôl cro băl î ông ndăng kơjơ̆ măt bĭc ngăn, mơya tơm tô̆ phơu kah-rngăl wăl, ƀòn gô tơmpơl jơno gơklŏ Kơnràñ î bea hê cro ndăng ăm ñă î Kơnràñ. 33Bră tom tơlôh tơm tô̆ bea hê cro gư̆n swà pleh bơh sơ Kơnràñ, Pier tơs î Yang Jesu lah: “Ơ cro bơtău, ngăn la niem ma ƀòn mơ̆n lơi ăm nơ̆m dô, ƀòn hî digơlăn tơngñă păy-lăm kơjang: Du-lăm ma cro bơtău, du-lăm ma Môise î du-lăm ma Êli.” (Ông ơ̆ gư̆t mơ̆n ndăng tơs jơno găy.) 34Mơya tơm tô̆ ông ndăng tơs tîgư̆n, du khô̆k tô̆ tơlôh sơđah î tơmbàk ƀòn gô, ƀòn gô kơ̆mbrit-kơ̆mbròt tơm tô̆ ƀòn gô mơ̆t nhòng khô̆k tô̆. 35Sŏng gư̆n bơh nhòng khô̆k tô̆ kơnău tơlôh jơno tơs, lah: “Dô la Kon Ăñ, la cro sŏng dî săc-rwơh. Păl iet Gô.” 36Tơm tô̆ dẵư gư̆n lơ̆ gừn nư̆ng hôm wăl du hôi Yang Jesu. Ƀòn gô ăm rngăp, gừn ơ̆ tom cro găy tơs bơh kơp jơno găy mà mơ̆n sŏng tơmpơl nơ̆m lơ̆gay nge gư̆n.

37Bră tom tơlôh nơ̆m nge ma-ngkơi, tơm tô̆ ƀòn gô bơh cŭng yồ jư, du tơmpôl lang bol khăi trôh tơmtom Kơnràñ. 38Gừn lăng năy, du hôi cro bơh tơmpôl lang bol khăi tơs dơng lah: “Ơ cro bơtău, dăn cro bơtău kah trôh kon klo ăñ dê, bơh gô la kon klo dơ̆ dul ăñ jê. 39Lăng dô, du hôi hwîng kơ̆p jư kon êt gừn kon êt kư̆ ăm kơkrẵy miek, sŏng gư̆n gô tơngblă kon êt kơbồt-kơtăl cơdoh băl tơlôh kơmbôh yôi. Gô gư̆n ơ̆ tơlôh klàs bơh kon êt, kư̆ lơh gleh kon êt ak-ồt. 40Ăñ sŏng dăn lơ̆gay cro bơtê cro bơtău lơi lơh mơmơh ƀòn gô tơmprơh hwîng cĕ, mơya ƀòn gô ơ̆ dî gơnoăr.” 41Dơ̆ klă dẵư, Yang Jesu tơs: “Ơ iyôi nŏk-noi ơ̆ don î roh gời, ăñ rơp ăm î ƀòn mê î kŏng-ăt ƀòn mê trôh dî jơ găy? Swà lơboh kon klo mê trôh nơ̆m dô.” 42Tơm tô̆ kon êt trôh, cà sơntat gô nơ̆m ù gừn lơh gô gôjîng kơbồt-kơtăl cơdoh. Mơya Yang Jesu đas cà hwîng î sămƀeah kon êt, sŏng gư̆n Kơnràñ jao wăl gô ma bàp gô. 43Lơ̆gay kŏng hal-apàl nơ̆m jơno gơnăp-gơnoăr gơklŏ Yang Tơm Trồ dê. Mơya nơ̆m jơ lơ̆gay cro kŭng hôm ndăng ndrăt-ndròt nơ̆m lơ̆gay bră Kơnràñ lơh, gừn Kơnràñ tơs î lơ̆gay cro bơtê mơ̆n: 44“Oh mi păl lơi lơ̆gay jơno dô nơ̆m tua mơ̆n: Bơh Kon-Mơnùs mơñ kŏng nap nơ̆m tê cro nde.” 45Mơya, ƀòn gô ơ̆ wơng jơno gư̆n gư̆m bră dô ờs ndăng kŏng tơmbàk thơ̆t gôtrê î ƀòn gô, gư̆n-jîng ƀòn gô ơ̆ wơng dî gô, ƀòn gô kơ̆mbrit wăl lơi ơ̆ khơ̆n lùp î Kơnràñ bơh jơno rơ̆.

46Ma-ngkơi gư̆n, nhòng ƀòn gô tơlôh jîng jơno tơmbơkai lơi lăng cro găy nhòng pơnah ƀòn gô la dơng rlo. 47Mơya bơh Yang Jesu gư̆t jơno katîng khà nơ̆m nùs ƀòn gô, gừn ma-ngkơi jơ iyà wăl du hôi kon êt, Kơnràñ ăn kon êt gư̆n en đàp mơ̆n, 48gừn tơs î ƀòn gô: “Dilah cro găy e sơnăn ăñ wă-rẵu kon êt dô, gừn cro rơ̆ wă-rẵu ăñ; gừn dilah cro găy wă-rẵu ăñ, gừn cro gư̆n wă-rẵu Bơtao sŏng pơđơ ăñ. Bơh cro găy la êt rlo nơ̆m lơ̆gay oh mi, gừn cro gư̆n la dơng rlo ngăn.”

49Tơm tô̆ Jăng kla dẵư, ông tơs: “Ơ cro bơtău, ƀòn hî tơmpơl tom cro e sơnăn cro bơtău tơmprơh cà gừn ƀòn hî sŏng cơkhă wăl cro gư̆n, bơh cro gư̆n ơ̆ swà băl î ƀòn mơ̆n.” 50Mơya Yang Jesu tơs î ông: “Bư̆ng cơkhă, bơh cro găy ơ̆ iyŏ la cro tơmdră î oh mi gừn ñă ma đah oh mi.”

51Bră tom tơlôh la nơ̆m jơ mơñ trôh en nge Kơnràñ dî iyà cŭngsî trồ, gừn Kơnràñ lơh nên lơi swà trôh nơ̆m ƀòn dơng Jerusalem. 52Kơnràñ pơđơ lơ̆gay cro kŏng pơđơ swà sơđàp măt Kơnràñ, gừn tơm tô̆ swà, ƀòn gô mơ̆t nhòng du ƀòn êt cro Samari lơi rcăng bră ma Kơnràñ. 53Mơya cro nde ơ̆ wă-rẵu Kơnràñ bơh đah Kơnràñ la ndăng swà trôh Jerusalem. 54Lơ̆gay cro bơtê la Jakơ î Jăng, tơm tô̆ tơmpơl tîgư̆n, ƀòn gô tơs: “Khoai Yang, Kơnràñ kơñ ƀòn hî pơđơ e oềs bơh trồ jư su oềs sa ƀòn gô ơ̆h?” 55Mơya ma-ngkơi tơm tô̆ tơmblăc wăl, Kơnràñ ƀoah-đas ƀòn gô, 56sŏng gư̆n ƀòn gô swà lêh nơ̆m ƀòn nde.

57Tơm tô̆ ƀòn gô ndăng swà nơ̆m gung, du hôi cro năy tơs î Kơnràñ: “Ăñ rơp jăt cro bơtău kơp anẵu găy cro bơtău swà.” 58Yang Jesu tơs î gô: “Pî̀ dî trôm î sêm trồ dî kơ̆nson, mơya Kon-Mơnùs ơ̆ dî anẵu sơn găl.” 59Kơnràñ tơs î du hôi cro nde: “Swà jăt cĕ ăñ.” Mơya cro gư̆n tơs: “Khoai Yang, dăn e gơnoăr ăñ swà trê lơi tăp bàp ăñ lai.” 60Mơya Kơnràñ tơs î gô lah: “Lơi cĕ tơmpôl cro sơ̆t tăp tơmpôl cro sơ̆t ƀòn gô. Hôm tơm tô̆ mê tơlôh swà, păl tơs tơnggư̆t lơgơ Yang Tơm Trồ.” 61Bơh gư̆n, du hôi cro nde te tơs: “Khoai Yang, ăñ rơp jăt Kơnràñ, mơya lai ngăn e gơnoăr ăñ trê tơngăc tơmpôl cro nơ̆m hîh ăñ.” 62Mơya Yang Jesu hăư: “Ơ̆ cro găy, tơm tô̆ sŏng e tê mơ̆n mơ̆t ngăl mà hôm ngơ lăng wăl ma-ngkơi, la ơ̆ dî păl mơ̆t nơ̆m lơgơ Yang Tơm Trồ.”