Luka 5

1Bră tom tơlôh tơm tô̆ lang bol khăi kơ̆njềt tơmpìt tĕdơ Kơnràñ lơi iet kơnău jơno Yang Tơm Trồ, gừn Kơnràñ ndăng ñă ăm nơ̆m bơ dà Genesaret. 2Kơnràñ tơmpơl bea-lăm ahẵu ndăng kăt ăm en mà dà, hôm lơ̆gay cro lơh ka, dơ̆ rơ̆ sŏng jư bơh ahẵu lờt, ƀòn gô ndăng pîh sơnñol. 3Kơnràñ hao lêh du-lăm nơ̆m bea-lăm ahẵu, mà ahẵu gư̆n la Simôn dê, Kơnràñ pơđơ ông pai ƀrău wĭc mamằ dàlîng dư̆ng-iè. Ma-ngkơi jơ nggui nteàh, Kơnràñ bơtău tơngkah ma lang bol bơh nơ̆m ahẵu. 4Dơ̆ Kơnràñ bơtău sŏng lờt, Kơnràñ tơs î Simôn: “Lơboh cĕ ahẵu trôh anẵu dà jrô sŏng gư̆n tơngduh sơnñol amî dê nteàh lơi kơ̆p du buh ka.” 5Tơm tô̆ kla dẵư, Simôn tơs lah: “Ơ cro bơtău, bulah lơh bră miek du măng, ƀòn hî sŏng ơ̆ kơ̆p dî jơno găy, mơya kơnău jăt jơno cro bơtău, ăñ rơp tơngduh sơnñol.” 6Ma-ngkơi jơ lơh bră gư̆n, ƀòn gô kơ̆p dî khăi ngăn ka, hôm sơnñol ƀòn gô dê gừn mơñ tĕ. 7Ƀòn gô lơh têl ma lơ̆gay cro bơyô lơh sơnñol ăm nơ̆m ahẵu nde trôh tơmdŏng mơ̆n, lơ̆gay cro gư̆n trôh gừn kơtô̆k ka lêh cŭngsî bîng lơ̆ bea-lăm ahẵu tien gơs gô mơñ krăm. 8Mơya, tơm tô̆ tơmpơl tîgư̆n, Simôn Pier cun kơrsơ̆p să nteàh nơ̆m anẵu krô̆ng Yang Jesu, tơs lah: “Khoai Yang, dăn tơlôh bơh dî ăñ, bơh ăñ la cro tồi-glài.” 9Bơh jơno ndrăt-ndròt gôgom tĕdơ ông gừn lơ̆gay cro ăm băl ông tài bơh du buh ka ma ƀòn gô sŏng lơh kơ̆p dî, 10kŭng gư̆p tîgư̆n bơh î Jakơ gư̆m Jăng, la lơ̆gay kon klo Seƀeđe dê, ƀòn gô la lơ̆gay bơyô lơh sơnñol î Simôn dê. Yang Jesu tơs î Simôn: “Bư̆ng kơ̆mbrit! Bơh dô lêh ma-ngkơi amî rơp la tê drăng sơnñol cro.” 11Ma-ngkơi jơ lơboh ahẵu swà mamằ, gừn lơi căư lơ̆gay jơno, ƀòn gô swà jăt Kơnràñ.

12Bră tơmtom dơ̆ Kơnràñ ndăng ăm du-anẵu ƀòn dơng năy, gừn lăng tò, du hôi cro să-jăn bîng kòp dun. Tơm tô̆ tơmpơl Yang Jesu, gô cun măt nteàh hôi-dăn î Kơnràñ, lah: “Khoai Yang, dilah Yang kơñ, Kơnràñ digơlăn lơh ăñ dî lơhiê.” 13Yang Jesu e tê tơbi nơ̆m să gô, tơs: “Ăñ kơñ, lơhiê cĕ jờh.” Ƀăt jơ gư̆n, kòp dun ha-ău thơ̆t bơh amî gư̆n. 14Sŏng gư̆n Kơnràñ ƀăn tơngkah amî bư̆ng tơs î cro găy, tơblơ̆ wăl: “Swà cĕ sơđah-să mơ̆n ma cro gơnoăr ăn jơno duh-khoai î ăn jơno duh-khoai bơh bră dî lơhiê amî dê jăt gư̆p Môise sŏng bơtău tơs, lơi lơh cư̆ng ma ƀòn gô.” 15Mơya, jơno pơndrơ bơh Kơnràñ wăl hôm tơlôh lam anẵu rlo te, tîrơ̆ la tơmpôl lang bol khăi bơlăm găp trôh lơi iet Kơnràñ bơtău tơs gư̆m dî sămƀeah bơh kơp kòp jê mơ̆n dê. 16Mơya Kơnràñ ờs pleh măt mơ̆t anẵu ngêt-ngờt gừn hôi-dăn.

17Bră tơmtom mơ̆t du-nge năy, nơ̆m dơ̆ Kơnràñ ndăng bơtău tơs, gừn tom lơ̆gay cro Pharisi î cro bơtău jơno-bơlăm nggui nơ̆m gư̆n, la lơ̆gay cro sŏng trôh bơh kơp ƀòn dơng-êt nơ̆m lơgơ Galile î Juđe, kŭng gư̆ptî bơh ƀòn dơng Jerusalem, gư̆m Gơnăp-Gơnoăr Yang dê ăm cŭngsî Kơnràñ sămƀeah cro kòp jê. 18Lăng tò, du khà cro tung du hôi cro-klo bĭc nơ̆m cơnờng; gư̆n la cro kŏng kwềt-kơte, ƀòn gô ndăng jôi gung tung lơboh cro rơ̆ mơ̆t nơ̆m nhòng lơi ăn sơđàp măt Yang Jesu. 19Tơm tô̆ ơ̆ jôi dî gung iyà amî rơ̆ mơ̆t tài bơh tơmpôl khăi, gừn kơnơm hao lêh cŭngsî tơkang hîh, pŏ tơkang hîh, ƀòn gô sŏng tơngduh amî gư̆n bĭc nơ̆m cơnờng jư nteàh nhòng kơp cro, sơđàp măt Yang Jesu. 20Tơm tô̆ tơmpơl jơno don ƀòn gô dê, Kơnràñ tơs lah: “Ơ cro, tồi-glài amî sŏng dî toh lờt.” 21Lơ̆gay cro bơtău jơno-bơlăm î cro Pharisi sơntơm ƀoah-yoam, lah: “Sơnăn dô la măt cro mà tơs jơno sơmăm tìs î Yang Tơm Trồ gư̆n năy? Măt cro tom dî gơnoăr toh glài rlo du hôi Yang Tơm Trồ?” 22Mơya Yang Jesu gư̆t jơno kơlôi ƀòn gô dê, gừn lơi kla wăl dẵư, Kơnràñ tơs î ƀòn gô: “Ngglơh ƀòn ông ƀoah-yoam nhòng nùs mơ̆n tîgư̆n teh? 23Seng găy tơs la ƀoan rlo: ‘Tồi-glài amî sŏng dî hồ’ hala tơs ‘Ñă atẵy cĕ î lơbà swà’? 24Mơya lơi ƀòn ông gư̆t lah Kon-Mơnùs nơ̆m ù dî gơnoăr toh glài,” — Kơnràñ tơs î cro kwềt-kơte — “Ăñ pơđơ amî, ñă atẵy cĕ, bôt wăl cơnờng mơ̆n gư̆m swà trê cĕ nơ̆m hîh amî dê.” 25Ƀăt jơ gư̆n, amî gư̆n ñă atẵy mađàp măt ƀòn gô, ma-ngkơi jơ bôt cơnờng mà amî ờs bĭc ăm cŭngsî, gừn amî swà trê nơ̆m hîh mơ̆n, dẵư jơno jong-rơ ma Yang Tơm Trồ. 26Jơno ndrăt-ndròt gôgom tĕdơ kơp cro, gừn ƀòn gô jong-rơ Yang Tơm Trồ, nùs bîng kơ̆mbrit-kơ̆mbròt, tơs lah: “Nge dô ƀòn mơ̆n sŏng tơmpơl lơ̆gay bră phadêh-phadai.”

27Ma-ngkơi lơ̆gay bră rơ̆, Kơnràñ tơlôh bơh gư̆n î lăng nê̆-năn du hôi cro lơboh-dia sơnăn Lebi ndăng nggui nơ̆m anẵu lơboh-dia, sŏng gư̆n Kơnràñ tơs î ông lah: “Jăt cĕ ăñ!” 28Gư̆n la ma-ngkơi jơ ñă atẵy, lơi căư kơp jơno, ông swà jăt Kơnràñ.

29Lebi pẵư du jơno ñô sa dơng lơi ma Kơnràñ nơ̆m hîh mơ̆n, gừn tom du lang bol khăi cro lơboh-dia băl î tơmpôl cro nde ndăng nggui nơ̆m kaƀang sa băl î ƀòn gô. 30Hôm lơ̆gay cro Pharisi î cro bơtău jơno-bơlăm ƀòn gô dê ƀoah-yoam î lơ̆gay cro bơtê Kơnràñ dê, lah: “Tài bơh jơno găy mà ƀòn ông ñô sa băl î tơmpôl lơboh-dia î lơ̆gay cro tồi-glài?” 31Lơi klă dẵư, Yang Jesu tơs î ƀòn gô lah: “Cro pran-kơdăng ơ̆ tom cang kơnơm bơh cro gơnoăr sơnăm, mơya cro kòp jê gừn kơñ. 32Ăñ ơ̆ trôh lơi hôi jà cro tơpăt-durư̆ng, mà la cro tom glài trôh î jơno tơcao tư̆ng-glài.”

33Mơya gừn, ƀòn gô tơs î Kơnràñ: “Lơ̆gay cro bơtê Jăng dê ờs ăt sa î ăn lơ̆gay jơno hôi-dăn; cro bơtê cro Pharisi dê kŭng tîgư̆n. Hôm cro ƀòn ông dê kư̆ sa î ñô.” 34Kơnràñ kla dẵư î ƀòn gô: “Ƀòn ông ơ̆ digơlăn kơ̆p cro năc ăm ñô sa tơmhòp ăt să nơ̆m jơ cro bơtô ndăng ăm î ƀòn gô, ngăn ơ̆? 35Mơya ngăn rơp trôh nge jơ mà cro bơtô dî iyà swà bơh ƀòn gô. Dơ̆ gư̆n, nơ̆m lơ̆gay nge rơ̆, ƀòn gô rơp ăt sa.” 36Sŏng gư̆n Kơnràñ kŭng tơs ma ƀòn gô du-lăm jơno pơ̆niyô gư̆ptî dô: “Ơ̆ cro găy sĩh lêh blah ao yo blieng bơtơi crề dưñ bơh blah ao mhăy. Mơya dilah lơh tîgư̆n, gừn rơp lơh tĕ ao mhăy, gừn blieng bơtơi mà dưñ bơh ao mhăy kŭng rơp ơ̆ durư̆ng î ao yo. 37Gừn ơ̆ cro găy prăp ăn alăk mhăy nơ̆m lĭñ kato yo. Mơya dilah lơh tîgư̆n, gừn alăk mhăy rơp lơh bơcah lĭñ kato, alăk rơp hua lơ̆ makin, lĭñ kŭng rơp kŏng roh. 38Tơblơ̆ wăl, păl prăp ăn alăk mhăy nơ̆m lĭñ kato mhăy. 39Ma-ngkơi jơ ñô alăk yo, ơ̆ cro găy kơñ ñô alăk mhăy, bơh cro rơ̆ tơs lah: ‘Alăk yo la bơkah rlo.’”