Luka 4

1Yang Jesu bîng-jut Yang Hwîng Goh, bơh dà Jôđăn swà trê, gừn dî Yang Hwîng Goh lơboh ăm nơ̆m ƀlang cas, 2lơi kŏng cà-ràk pơlum nơ̆m puôn-jư̆t nge. Tơm kơp lơ̆gay nge gư̆n, Kơnràñ ơ̆ sa jơno găy gừn Kơnràñ jơgloh ma-ngkơi jơ lơ̆gay nge dô gừn lơ̆. 3Sŏng gư̆n cà-ràk tơs î Kơnràñ lah: “Dilah ông la kon Yang Tơm Trồ gừn păl pơđơ lô̆ dô lơi gô sơlôh jîng ƀăñ cĕ.” 4Yang Jesu kla dẵư î gô: “Tom jơno cêh lah; ‘Cro nde jîng ơ̆ dî nư̆ng kơnơm ƀăñ sa gời ờ.’” 5Sŏng gư̆n tơm tô̆ sŏng bơlăm Kơnràñ swà cŭngsî yơng, gô sơđah ma Kơnràñ lơ̆gay lơgơ nơ̆m dunya nư̆ng du a yoa. 6Cà-ràk tơs î Kơnràñ; “Ăñ rơp e ma mê lơ̆gay gơnoăr bră dô, băl î jơno gơklŏ gô, bơh gô sŏng dî jao ma ăñ, gừn ăñ digơlăn e gô ma kơp cro găy dilah ăñ kơñ. 7Tîrơ̆ gừn, dilah ông cun-khoai sơđàp măt ăñ, gừn lơ̆gay dunya dô rơp la jơno mê.” 8Lơi kla dẵư, Yang Jesu tơs î gô: “Tom jơno cêh lah: ‘Mê păl duh-khoai cĕ Yang la Yang Tơm Trồ mê dê, î nư̆ng duh bră du hôi Kơnràñ gời.’” 9Tîrơ̆ gừn, gô bơlăm Kơnràñ swà trôh Jerusalem, lơi Kơnràñ ăm cŭngsî tơkang hîh duh-khoai, gừn gô tơs î Kơnràñ lah: “Dilah ông la Kon Yang Tơm Trồ, păl sơndŏng să bơh anẵu dô cĕ. 10Bơh tom jơno cêh lah:

‘Kơnràñ rơp pơđơ ma lơ̆gay cro gơndrơh Kơnràñ bơh kon, lơi pồ kơđu kon,’

11gừn lah: ‘Ƀòn gô rơp ăn mê nơ̆m tê,

kơ̆mbrit jư̆ng kon sơndăc nơ̆m lô̆ mơ̆n.’”

12Lơi kla dẵư, Yang Jesu tơs î gô, lah: “Tom jơno cêh: ‘Mê ơ̆ dî lòng Yang la Yang Tơm Trồ mê dê.’”

13Ma-ngkơi jơ lơh sŏng lơ̆gay bră pơlum ơn-ñai, Cà-ràk lơi căư Kơnràñ, cang dơ̆ nde.

14Yang Jesu trê wăl Galile nơ̆m jơno gơnăp-gơnoăr bơh Yang Hwîng Goh, gừn jơno pơndrơ bơh Kơnràñ lam lơ̆gay tĕdơ ƀòn. 15Kơnràñ bơtău nơ̆m lơ̆gay hîh jơnư̆m lang bol, dî lơ̆gay cro jong-rơ.

16Kơnràñ swà trôh Nasaret, anẵu Kơnràñ sŏng dî rong-siem, gừn jăt jơno dơm lơh sătan, Kơnràñ swà mơ̆t hîh jơnư̆m nơ̆m nge Saƀat sŏng ñă atẵy lăng đŏk dơng dẵư. 17Sră bôt cro gơnoăr-hwơr Esai sŏng dî jao ma Kơnràñ, gừn tơm tô̆ pẵư sră bôt. Kơnràñ jôi tơmpơl anẵu mà jơno dî cêh tîdô lah:

18“Hwîng Yang dê ăm cŭngsî ăñ,

bơh Kơnràñ sŏng bŏng mơñà ma ăñ lơi ăñ bơtău Jơno Niem ma cro kơsòt.

Kơnràñ sŏng pơđơ ăñ tơs tơnggư̆t jơno khăt-gơboh ma cro kŏng jam,

gừn jơno sămƀeah ma cro ñô̆ng măt,

lơi lơboh cro kŏng rôn-bơklơ̆n trôh jơno khăt-gơboh,

19gừn lơi tơs tơnggư̆t prăm jơno niem Yang dê.”

20Ma-ngkơi jơ sră bôt kla wăl ma cro dŏng bră, Kơnràñ ăm nggui. Lơ̆gay măt cro nhòng hîh jơnư̆m gừn ngơ lăng nê̆ Kơnràñ. 21Tîrơ̆ gừn, Kơnràñ sơntơm tơs î ƀòn gô lah: “Nge dô, jơno Sră-Goh trôh anẵu tua oh mi rôh lŏ gư̆n sŏng tơlôh iyŏ dî ngăn.” 22Lơ̆gay cro ăm gừn lơh cư̆ng niem bơh Kơnràñ gừn ƀòn gô ndrăt-ndròt lai lơ̆gay jơno sơmah tơlôh bơh nơ̆m dẵư Kơnràñ, gừn ƀòn gô tơs băl: “Dô ơ̆-iyŏ la kon klo Jôsep ơ̆h?” 23Kơnràñ tơs î ƀòn gô: “Iyŏ ngăn oh mi rôh lŏ rơp tơs î ăñ jơno tơs pơ̆nđĭk dô: ‘Ơ cro lơh sơnăm, păl sămƀeah sătan mơ̆n cĕ. Gư̆t nhẵư bră ma ƀòn hî kơnău ông lơh nơ̆m Kapenaum, gừn kŭng păl lơh anẵu dô, nơ̆m ƀòn tơm mơ̆n cĕ.’” 24Tîrơ̆ gừn Kơnràñ tơs: “Iyŏ ngăn, ăñ tơs î oh mi rôh lŏ, lah ơ̆ tom cro gơnoăr-hwơr găy dî wă-rẵu anẵu ƀòn tơm mơ̆n dê. 25Ăñ tơs î oh mi bơh jơno tom ngăn, lah khăi cro mơ̆ndro ăm anẵu Israel nơ̆m rai Êli, tơm tô̆ trồ kŏng tơ̆l khơh nơ̆m păy năm pro kơnnhe, jơ rơ̆, jơno jơgloh-dơng tơlôh nhòng lơ̆gay lơgơ, 26ma Êli ơ̆ dî pơđơ swà trôh î lơ̆gay cro nhòng khà ƀòn gô, rlo swà trôh Sarepta, nơ̆m ƀòn dơng, trôh băl du hôi cro-ua mơ̆ndro. 27Kŭng tom khăi cro kŏng kòp dun ăm nơ̆m Israel, nơ̆m rai cro gơnoăr-hwơr Elise, gừn ơ̆ tom cro găy nơ̆m khà ƀòn gô dî sămƀeah; rlo Naaman, cro Siri.” 28Tơm tô̆ kơnău lơ̆gay jơno rơ̆, kơp cro nhòng hîh jơnư̆m bîng-jut jơno tơcao, 29Ma-ngkơi ñă atẵy, ƀòn gô pơtĕo Kơnràñ tơlôh makin ƀòn dơng, gừn hwa Kơnràñ trôh mamîng anẵu grồi yồ nơ̆m gư̆n ƀòn dơng, lơi tư̆ng Kơnràñ duh nteàh. 30Mơya Kơnràñ lơi căư ma-ngkơi jơ swà găn bơh nhòng ƀòn gô.

31Kơnràñ swà nơ̆m Kapenaum, du ƀòn dơng gôtrê lơgơ Galile, gừn Kơnràñ bơtău ma lang bol nơ̆m nge Saƀat. 32Ƀòn gô ndrăt-ndròt mađàp jơno bơtău Kơnràñ dê, bơh jơno bơtău Kơnràñ e tơnggư̆t băl î gơnăp-gơnoăr. 33Nhòng hîh jơnư̆m, tom du hôi cro kŏng hwîng cà sơmơ̆-sơmĭñ lơh, gừn cro rơ̆ kơkrẵy dơng dẵư: 34“Ơ! Jesu cro Nasaret, ƀòn hî î Kơnràñ tom bră găy ya? Kơnràñ trôh lơi lơh tơngroh ƀòn hî ơ̆h? Ăñ gư̆t Kơnràñ la măt cro — la Bơtao Sang-Goh Yang Tơm Trồ dê.” 35Yang Jesu ƀoah-đas gô, lah: “Ăm-ƀơt cĕ, gừn tơlôh bơh nơ̆m să cro dô!” Tîrơ̆ la ma-ngkơi jơ pồ sơmprah cro pơnu duh nơ̆m ù băt nhòng anẵu tơmpôl jơnư̆m, cà tơlôh bơh să cro pơnu, ơ̆ lơh ma pơnu dô jơno têl sồt-rmañ găy. 36Jơno kơ̆mbrit-kơ̆mbròt trôh nơ̆m cŭngsî lơ̆gay cro, gừn ƀòn gô tơm tơs băl î găp, lah: “Jơno niem găy gư̆n yơ, tien gơs î gơnăp-gơnoăr gư̆m gơnoăr-pran, ông rơ̆ pơđơ ma cà-ràk, gừn ƀòn gô păl tơlôh.” 37Tieng pơndrơ bơh Kơnràñ lam lơ̆gay anẵu nơ̆m ƀòn tĕdơ.

38Ma-ngkơi gư̆n, tơm tô̆ sŏng ñă atẵy tơlôh bơh hîh jơnư̆m, Kơnràñ mơ̆t nơ̆m hîh Simôn. Mơya, mơi bo-ua Simôn ndăng kòp kơjơ̆ ngăn kŏng jê, gừn ƀòn gô dăn Kơnràñ sămƀeah ma mò. 39Ñă sơn king să cŭng mò, Kơnràñ tơmprơh jơno kòp, î gô tơlôh bơh nơ̆m să mò, sŏng gư̆n mò khơñ ngăn ñă atẵy duh bră ƀòn gô.

40Dơ̆ măt tơnge ñăp, lơ̆gay kơp cro bulah kŏng kòp jê î tăl jơno kòp jê, cro nde lơboh ƀòn gô trôh ma Kơnràñ, sŏng gư̆n Kơnràñ sămƀeah ƀòn gô tơm tô̆ ăn tê cŭngsî kơp cro nơ̆m khà gư̆n. 41Lơ̆gay cà-ràk kŭng tơlôh bơh khăi cro, tơm tô̆ hôi dơng ma tơs lah: “Kơnràñ la kon Yang Tơm Trồ!” Gừn bơh dubă ƀoah-đas, Kơnràñ ơ̆ e gơnoăr ƀòn gô tơs, bơh ƀòn gô sŏng gư̆t Kơnràñ la Yang Dŏng-Klàs.

42Dơ̆ sơntơm mơ̆t nge mhăy, ma-ngkơi jơ tơlôh bơh nơ̆m anẵu gư̆n, Kơnràñ swà trôh du-anẵu ngêt-ngờt, hôm lang bol kư̆ swà jôi Kơnràñ, gừn ƀòn gô sŏng swà trôh dî jơ tơmtom Kơnràñ gừn bơkô̆ Kơnràñ ăm wăl, ơ̆ e swà tơlôh bơh ƀòn gô. 43Mơya Kơnràñ tơs î ƀòn gô, lah: “Ăñ kŭng păl bơtău jơno niem bơh lơgơ Yang Tơm Trồ ma khăi ƀòn dơng nde te, bơh ăñ dî pơđơ swà bơh jơno dô.”

44Sŏng gư̆n Kơnràñ pơnjăt te bơtău nơ̆m lơ̆gay hîh jơnư̆m lơgơ Juđe.