Luka 3

1Mơ̆t nơ̆m năm dơ̆ jư̆t-prăm nơ̆m rai bơtao Sesa Tiƀerius, tơm tô̆ Ƀônsơ Pilat ndăng lơh jîng kwăng dơng ăt-bồ lơgơ Juđe, Herôt lơh jîng bơtao ăt-bồ nơ̆m lơgơ Galile, hôm Philip, oh klo ông lơh jîng bơtao ăt-bồ nơ̆m lơgơ Iture băl î lơgơ Trakônit, î Lisanias lơh jîng bơtao ăt-bồ nơ̆m lơgơ Aƀilen. 2Nơ̆m tô̆ tơnge Anne băl î Kaiphe dî gơnoăr bră cro gơnoăr bơlăm-găl ăn jơno duh-khoai dơng — tom jơno Yang Tơm Trồ sŏng trôh î Jăng, kon klo Xacari, ăm nơ̆m ƀlang-càs. 3Sŏng gư̆n, ông swà trôh kơp anẵu tĕdơ dà măy Jôđăn, tơs bơtău gơnoăr lơh ƀaptem bơh jơno tơcao mbư̆ng glài lơi dî sơmah toh glài. 4Gư̆ptî jơno sŏng cêh nơ̆m sră bơh jơno cro gơnoăr-hwơr Esai lah:

“Tom dẵu cro hôi dreo dơng nơ̆m ƀlang-càs lah:

‘Păl was cĕ gung ma Yang,

lơh tơpăt lơ̆gay gung kalhŏk-kalhăk ma Kơnràñ.

5Lơ̆gay kalhŏk jrô rơp dî bơbua bîng,

lơ̆gay yồ grồi rơp dî pŏk tư̆ng duh lơ̆,

gung rkwêt-rkwe rơp dî jîng tơpăt niem,

gung kalhŏk-kalhăk rơp lơh tơpăt duwang.

6Gừn lơ̆gay poăc-să rơp tơmpơl jơno dŏng-klàs Yang Tơm Trồ dê.’”

7Gừn, Jăng tơs î tơmpôl lang bol swà trôh lơi kŏng ông lơh ƀaptem, lah: “Ơ tơmpôl nŏk-noi beh tơ̆nglơ năy, măt cro sŏng tơs tơnggư̆t ma ƀòn mê lơi toat ămpôn klàs bơh jơno tơcao dơng mơñ trôh teh? 8Gư̆n-jîng, păl ple-đău dî păl î jơno tơcao mbư̆ng glài, gừn bư̆ng kơlôi dêh tơs î sătan mơ̆n lah: ‘Ƀòn mơ̆n dî Abraham la ông-pang,’ bơh ăñ tơs î ƀòn mê gư̆t lah Yang Tơm Trồ digơlăn rơndôn kon so Abraham bơh lơ̆gay lô̆ tơliê dô. 9Pơnah nde, du-lăm sung kŭng ndăng ăn en tơm-si lờt; Gư̆n-jîng, sî găy ơ̆ tơlôh ple niem gừn kŏng kăl î mbư̆ng nơ̆m oềs.” 10Lang bol lùp ông lah: “Tîgư̆n, ƀòn hî păl lơh jơno găy teh?” 11Lơi klă wăl dẵư, ông tơs î ƀòn gô lah: “Cro găy dî bea blah ao, păl e ma cro ơ̆ dî; gừn cro găy dî jơno sa, cro rơ̆ kŭng păl lơh gư̆ptî gư̆n.” 12Tơmpôl cro lơboh-dia kŭng swà trôh lơi kŏng lơh ƀaptem; gừn ƀòn gô lùp ông lah: “Ơ cro bơtău, ƀòn hî păl lơh jơno găy teh?” 13Ông tơs î ƀòn gô lah: “Bư̆ng rê̆ khăi rlo khà dơnău sŏng dî pơđơ ma oh mi.” 14Du pơnah tơmpôl lĭñ kŭng lùp ông, lah: “Hôm ƀòn hî, ƀòn hî păl lơh jơno găy?” Ông tơs î ƀòn gô: “Bư̆ng rhŭng-rhăng dưñ tơmpìt kơp jini-jơno găy, kŭng bư̆ng tơs bơcĕ, gừn păl sơh nùs cĕ î jên-priè tô̆ tơnge mơ̆n dê.”

15Pơnah nde, bơh lang bol ndăng cang kơnơm gừn bơh lơ̆gay kơlôi-sơnư̆ng nơ̆m nùs mơ̆n bơh Jăng, ơ̆ gư̆t ông iyŏ ngăn la Yang Dŏng-Klàs ơ̆h. 16Jăng sŏng hăư wăl dẵư tơm tô̆ tơs î lơ̆gay cro: “Ăñ lơh ƀaptem ma oh mi bơh î dà, mơya Bơtao mơñ trôh dî gơnăp-gơnoăr rlo ma ăñ, la Bơtao mà ăñ ơ̆ dî păl hồ săy cơkhŏ ma Kơnràñ; Kơnràñ rơp lơh ƀaptem ma oh mi rôh lŏ bơh î Yang Hwîng Goh gư̆m bơh î oềs te, 17la Bơtao iyà đông nhòng tê Kơnràñ lơi gơ̆m prah lơhiê niem ƀlang kôi mơ̆n, î prăp lơi kôi-mi nơ̆m hîh tơ̆m mơ̆n, mơya Kơnràñ rơp su kơn-sièp bơh î oềs ơ̆ tom tư̆ng sơ̆t dî oềs ờ.”

18Gư̆n-jîng, ngăn nhòng jơ bơtău tơngkah khăi jơno nde, ông tơs bơtău Jơno Niem ma lang bol. 19Mơya bơtao oh Herôt, ma-ngkơi jơ kŏng Jăng ƀoah-đas bơh bră Herôdias, la bo-ua oh mơ̆n, gư̆m bơh lơ̆gay bră mơsăk nde mà bơtao sŏng lơh, 20tien gơs sŏng lơh bơtăl du bră dô mơ̆t lơ̆gay nơ̆m bră mơsăk mơ̆n, rơ̆ la ông gư̆n e kơ̆p Jăng tơmơ̆t hîh jam ñô̆ng.

21Mơya nơ̆m jơ lơ̆gay cro kŏng lơh ƀaptem, bră tom tơlôh rơ̆ la Yang Jesu kŭng kŏng lơh ƀaptem, gừn nơ̆m jơ Kơnràñ ndăng hôi-dăn, lơ̆gay dăp trồ dî pẵư tơlôh. 22Sŏng gư̆n Yang Hwîng Goh răp jư cŭngsî Kơnràñ nơ̆m rồp-să gư̆ptî sêm kơ̆ntơp, gừn tom dẵư trôh bơh cŭng trồ lah: “Kon la Kon kơñ-kơloh Ăñ jê, Ăñ niem-nùs bơh Kon.”

23Tơm tô̆ sơntơm gơnoăr bră, să tơm Yang Jesu dî pơngăp păy-jư̆t năm (jăt gư̆ptî cro nde kơlôi) Kơnràñ la kon Jôsep, Jôsep kon Heli, 24Heli kon Mattat, Mattat kon Lebi, Lebi kon Melci, Melci kon Jannai, Jannai kon Jôsep. 25Jôsep kon Matathias, Matathias kon Amôs, Amôs kon Nahum, Nahum kon Etli, Etli kon Naghe, 26Naghe kon Maat, Maat kon Matathias, Matathias kon Semein, Semein kon Jôsek, Jôsek kon Jôđa, 27Jôđa kon Jôanan, Jôanan kon Resa, Resa kon Xôrôƀaƀel, Xôrôƀaƀel kon Salathiel, Salathiel kon Neri, 28Neri kon Melci, Melci kon Ađi, Ađi kon Kôsam, Kôsam kon Elmađam, Elmađam kon Erơ, 29Erơ kon Jôsue, Jôsue kon Eliese, Eliese kon Jôrim, Jôrim kon Matthat,; Matthat kon Lebi, 30Lebi kon Simeôn, Simeôn kon Juđa, Juđa kon Jôsep, Jôsep kon Jônam, Jônam kon Eliakim, 31Eliakim kon Melea, Melea kon Menna, Menna kon Mattatha, Mattatha kon Nathan, Nathan kon Dabit, 32Dabit kon Jese, Jese kon Ôƀet, Ôƀet kon Ƀôô, Ƀôô kon Salmôn, Salmôn kon Naasôn, 33Naasôn kon Aminađap, Aminađap kon Atmin, Atmin kon Arơni, Arơni kon Hesrôn, Hesrôn kon Pheres, Pheres kon Juđa, 34Juđa kon Jakôp, Jakôp kon Isăk, Isăk kon Abraham, Abraham kon Thare, Thare kon Nakôr, 35Nakôr kon Seruk, Seruk kon Rehu, Rehu kon Pelek, Pelek kon Heber, Heber kon Sala, 36Sala kon Kainam, Kainam kon Arpaksat, Arpaksat kon Sem, Sem kon Nôe, Nôe kon Lemek, 37Lemek kon Metusela, Metusela kon Enŏk, Enŏk kon Jeret, Jeret kon Mahalalel, Mahalalel kon Kenan, 38Kenan kon Enôt, Enôt kon Set, Set kon Ađam, Ađam kon Yang Tơm Trồ.