Luka 2

1Bră tơmtom nhòng lơ̆gay nge gư̆n, rơ̆ la sră gơnoăr cêh bơh Sesa Augustơ sŏng tơs tơnggư̆t kơp dunya lơi swì lăng khà lang bol. 2Bră swì lăng khà lang bol dơ̆ sơm dô tơlôh tơm tô̆ Kirinius la cro kwăng dơng ăt-bồ ƀòn dơng lơgơ Siri. 3Lơ̆gay gừn swà gung lơi cêh sơnăn nơ̆m sră, kơp cro swà trê nơ̆m ƀòn hîh tơm dêh mơ̆n. 4Jôsep kŭng swà bơh ƀòn Galile, tơlôh nơ̆m ƀòn dơng Nasaret trôh lơgơ Juđe, mơ̆t nơ̆m ƀòn dơng Dabit, anẵu dî sơnăn la Ƀêtlehem, bơh ông gôtrê mađah hîh nhă gư̆m nŏk-noi Dabit, 5lơi cêh sơnăn nơ̆m sră băl î Mari, la cro sŏng hăư bo î mơ̆n, ndăng tơwă. 6Bră tơmtom nơ̆m jơ ƀòn gô ndăng ăm nơ̆m dô, rơ̆ la nge gô jê bơda sŏng trôh. 7Gô bơda du hôi kon klo, la kon sơm mơ̆n dê, gừn gô klăm kon bơh î bơtơi koh jîng thơk, sŏng gư̆n ăn kon êt nơ̆m bong khơ̆, bơh ơ̆ tom anẵu ma ƀòn gô nơ̆m hîh ơpah bĭc. 8Kŭng nơ̆m bơlao gư̆n, tom tơmpôl cro jư belàt ndăng ăm nơ̆m ƀlang srăy, nơ̆m brê tơmăng ăm lăng jư mpôl belàt ƀòn gô. 9Du hôi cro gơndrơh Yang dê sơđah tơlôh sơđàp ƀòn gô, jơno ang gơcrà Yang bơ ang tĕdơ ƀòn gô, gừn ƀòn gô ndrăt-ndròt î jơno kơ̆mbrit ngăn. 10Cro gơndrơh tơs î ƀòn gô lah: Bư̆ng kơ̆mbrit, bơh lăng dô, ăñ iyà ma ƀòn mê du-lăm Jơno Niem sơhờp-sờhơn ngăn, jơno pơndrơ rơ̆ rơp e ma lơ̆gay cro. 11Bơh nge dô, anẵu ƀòn dơng Dabit, Bơtao Dŏng-Klàs sŏng dî bơda ma ƀòn mê, Kơnràñ la Yang Dŏng Klàs, la Yang! 12Gừn dô la têl sơđah ma ƀòn mê: “Ƀòn mê rơp jôi tom du hôi kon êt klăm bơh î thơk bơtơi, bĭc ăm nơ̆m bong khơ̆.” 13Sơni-sơna, du tơmpôl cro lĭñ bơh trồ sơđah-să băl î cro gơndrơh rơ̆ jong-rơ Yang Tơm Trồ, lah:

14“Jơno ang gơklŏ gôtrê ma Yang Tơm Trồ nơ̆m anẵu yơng cŭngsî trồ,

gừn nteàh ù, lơngăp-lơnge nhòng lơ̆gay cro gôtrê ma jơno niem Yang.”

15Bră tơmtom nơ̆m jơ lơ̆gay cro gơndrơh sŏng swà pleh bơh ƀòn gô hao trê cŭngsî trồ, tơmpôl cro lăng jư belàt tơs băl î găp; “Iyŏ ngăn, ƀòn mơ̆n păl swà trôh nơ̆m anẵu Ƀêtlehem gừn lăng jơno pơndrơ gư̆n la jơno mhăy tơmtom, mà Yang sŏng e tơnggư̆t ma ƀòn mơ̆n.” 16Ƀòn gô sơbăc-sơbăng swà gung, sŏng gư̆n tơmtom dî băl Mari gư̆m Jôsep, băl î kon êt ndăng bĭc ăm nơ̆m bong khơ̆. 17Ma-ngkơi jơ tơmpơl, ƀòn gô tơs wăl bơh jơno bơtău sŏng dî e tơnggư̆t ma mơ̆n bơh kon êt dô. 18Dilah cro găy kơnău kŭng kŏng ndrăt-ndròt bơh lơ̆gay jơno dî tơs wăl ma mơ̆n bơh lơ̆gay cro jư belàt. 19Hôm Mari kư̆ sơdơ lơ̆gay jơno rơ̆, kơlôi-sơnư̆ng nhòng nùs mơ̆n. 20Sŏng gư̆n tơmpôl cro lăng jư belàt trê wăl, đas-sờ î jong-rơ Yang Tơm Trồ bơh lơ̆gay jơno mà ƀòn gô sŏng kơnău î tơmpơl, jăt gư̆ptî jơno sơhờp sŏng dî tơs tơnggư̆t ma ƀòn gô. 21Tơm tô̆ pham nge lơi koh kato ma kon êt sŏng dî lơh lờt, gừn sơnăn kon êt rơ̆ dî hôi la Jesu, la sơnăn sŏng dî tơmoh bơh cro gơndrơh lai jơ kon êt dî bơ̆n nhòng klô̆ng mơi. 22Gừn tơm tô̆ lơ̆gay nge rao goh ƀòn gô jăt jơno-bơlăm Môise sŏng dî lơh jăt, ƀòn gô iyà kon êt swà lêh nơ̆m Jerusalem lơi lơboh ăn ma Yang 23(gư̆ptî sŏng cêh nơ̆m jơno-bơlăm Yang dê, lah: “Lơ̆gay kon klo dơ̆ sơm rơp dî sơnăn la sang-goh ma Yang”), 24gừn lơi ăn jơno duh-khoai jăt gư̆ptî jơno dî bơtău nơ̆m jơno-bơlăm Yang: “du yô sêm kơ̆ntơp hala bea-lăm sêm kơ̆ntơp kon.” 25Gừn lăng năy, tom du hôi cro nơ̆m anẵu Jerusalem, sơnăn ông la Simeôn, cro-klo dô tơpăt-durư̆ng î ngăc-ngăr, ndăng ăm cang jơno mơ̆ndơm-mơ̆nieng lang bol Israel, î Yang Hwîng Goh ăm băl î ông. 26Jơno sŏng dî e tơnggư̆t ma ông bơh Yang Hwîng Goh la rơp ơ̆ tơmpơl jơno sơ̆t lai jơ ông digơlăn tơmpơl Bơtao Dŏng-Klàs Yang dê. 27Gừn bơh Yang Hwîng Goh, ông swà mơ̆t nơ̆m hîh duh-khoai, dơ̆ mơi bàp iyà kon êt Jesu trôh lơi cro nde lơh jăt jơno ờs dờm nơ̆m jơno-bơlăm trôh kon êt rơ̆, 28ông pồ kon êt nơ̆m tê, jong-rơ Yang Tơm Trồ gừn ông tơs lah:

29“Khoai Yang, jơ dô, Kơnràñ ndăng e cro dê̆-gơna Kơnràñ sơ̆t lơngăp-lơnge jăt gư̆ptî jơno tơs Kơnràñ dê.

30Bơh măt kon sŏng tơmpơl jơno dŏng-klàs Kơnràñ dê,

31mà Kơnràñ sŏng rcăng sơđàp măt lơ̆gay lang bol.

32Jơno ang ma jơno e tơnggư̆t sơđah trôh î lơ̆gay lang bol bơdih, î jơno gơklŏ e ma lang bol Israel Kơnràñ dê.”

33Bàp î mơi kon êt gừn ndrăt-ndròt nơ̆m lơ̆gay jơno găy ông tơs bơh kon êt. 34Sŏng gư̆n Simeôn e lơnge ma ƀòn gô gừn tơs î Mari, mơi kon êt lah: “Lăng năy, kon êt dô sŏng dî lơh nên ma jơno sơ̆mpĭñ blă hala jơno rơndôh ñă wăl khăi cro nơ̆m Israel, gư̆m lơh du têl sơđah kŏng cro nde tơs tơmdră wăl — 35pơnah nde: du ƀĕ đao rơp srăp blôh hwîng-soan sătan gô — lơi ma jơno kơlôi-sơnư̆ng nhòng nùs khăi dî sơđah tơlôh.” 36Nơ̆m gư̆n kŭng tom cro-ua gơnoăr hwơr Anne, kon ua Phanuel, gôtrê mađah nŏk-noi Ase. Mò dơng năm ngăn, sŏng jîng î bo-klo poh năm bơh hôm ăm ua-drôh mò dê. 37Sŏng gư̆n mò ăm mơ̆ndro trôh dî jơ dô dî pham-jư̆t puôn năm, mà ơ̆ tơlôh bơh hîh duh-khoai, kư̆ duh bră tơnge î tơmăng î jơno ăt sa gư̆m hôi-dăn. 38Tơm tô̆ tom măt nơ̆m jơ gư̆n, mò pẵư dẵư ưnngai Yang Tơm Trồ, gừn tơs bơh kon êt e ma lơ̆gay cro hôm ăm cang jơno dŏng tơwai Jerusalem dê. 39Tơm tô̆ ƀòn gô lơh sŏng lơ̆gay bră jăt jơno-bơlăm Yang dê, ƀòn gô blăc trê wăl nơ̆m lơgơ Galile, trê nơ̆m ƀòn dơng mơ̆n dê la Nasaret.

40Kon êt khơñ dơng î gôjîng pran-kơdăng, dî bîng jơno jăk-sai, î jơno sơmah e gời bơh Yang Tơm Trồ ăm cŭngsî kon êt rơ̆.

41Kơp năm, mơi bàp Kơnràñ swà trôh nơ̆m Jerusalem lơi Bơjư̆m-Sa Swà-Găn. 42Tơm tô̆ Kơnràñ dî tăl jư̆t-bea năm, ƀòn gô swà nơ̆m gư̆n jăt tô̆ tơnge lơh nên trôh jơ bơjư̆m-sa jăt ờs dờm. 43Ma-ngkơi jơ nhẵư nge bơjư̆m gư̆n sŏng lờt, dơ̆ ƀòn gô ndăng swà gung blăc trê, kon êt Jesu hôm ăm wăl nơ̆m Jerusalem mà mơi bàp Kơnràñ ơ̆ tom gư̆t. 44Mơya kư̆ tôn-lah Kơnràñ ăm nơ̆m tơmpôl swà gung, gừn ƀòn gô swà lơ̆ du-nge gung, sŏng gư̆n sơntơm jôi Kơnràñ nơ̆m anẵu găp să î bơyô. 45Gừn tơm tô̆ ơ̆ jôi tom, ƀòn gô blăc trê wăl nơ̆m Jerusalem, pơnjăt te swà jôi Kơnràñ. 46Bră tơmtom gư̆n la păy nge ma-ngkơi, ƀòn gô tơmpơl Kơnràñ nơ̆m hîh duh-khoai, ndăng nggui ăm nhòng lơ̆gay cro bơtău jơno-bơlăm, mƀà iet kơnău ƀòn gô mƀà lùp ƀòn gô. 47Lơ̆gay cro iet kơnău Kơnràñ gừn ndrăt-ndròt bơh jơno gư̆t wơng kŭng gư̆ptî jơno tơs hăư î Kơnràñ. 48Mơi bàp hal-apàl tơm tô̆ tơmpơl Kơnràñ, gừn mơi Kơnràñ tơs î Kơnràñ lah: “Ơ kon, ngglơh kon lơh gleh mơi bàp tîdô teh? Lăng dô, bàp kon î mơi sŏng moat-jrum jê-kơkua jôi lăng kon.” 49Kơnràñ tơs î ƀòn gô lah: “No-gwơh mơi Bàp jôi lăng kon? Mơi bàp ơ̆ gư̆t lah kon păl ăm nơ̆m hîh Bàp kon ơ̆h?” 50Mơya ƀòn gô ơ̆ wơng jơno mà Kơnràñ tơs î ƀòn gô. 51Sŏng gư̆n Kơnràñ swà jư băl î mơi bàp, trê trôh nơ̆m ƀòn dơng Nasaret, gừn duh bră ƀòn gô. Hôm mơi Kơnràñ kah sơdơ lơ̆gay bră rơ̆ nơ̆m nhòng nùs mơ̆n.

52Yang Jesu kư̆ sơlơ nge sơlơ jăk-sai î să-jăn sơlơ dơng, kŭng gư̆ptî nơ̆m jơno niem-nùs sơđàp măt Yang Tơm Trồ î cro nde.