Luka 1

1Bơh tom khăi cro sŏng grat pran cêh jơno tơs wăl bơh lơ̆gay bră dî lơh tơngsŏng nhòng tĕdơ ƀòn mơ̆n, 2jăt gư̆ptî tơmpôl cro bơh dơ̆ sơm gôjîng tom măt lơ̆gay cro lơh cư̆ng î dŏng bră nơ̆m jơno Yang sŏng lơi wăl ma ƀòn mơ̆n, 3gư̆n-jîng tơm tô̆ sŏng lăng swì lơ̆gay bră bơh dơ̆ sơm dubă nê̆-năn, ăñ tơmpơl niem rlo ngăn ma ăñ lơi cêh wăl jăt jơno rơndăp ma ƀòn ông, ơ ông Theôphil păl duh kơ̆mbrit, 4lơi e tơmpôl ông digơlăn gư̆t nê̆-năn bơh lơ̆gay jơno niem mà mơ̆n sŏng dî ƀăn mơntău.

5Nơ̆m rai bơtao Herôt, bơtao lơgơ Juđe, tom du hôi cro gơnoăr ăn jơno duh-khoai năy sơnăn la Sacari, gôtrê mađah tơmpôl Aƀija. Bo-ua ông gôtrê nŏk-noi lơ̆gay kon so Arôn, gừn sơnăn mò la Elisaƀet. 6Lơ̆gay bea hê ua klo la tơpăt-durư̆ng sơđàp măt Yang Tơm Trồ, bơh jîng ơ̆ anẵu ƀoah-đas dî nhòng kơp jơno-bơlăm băl î jơno pơđơ bơlăm Yang dê. 7Ƀòn gô ơ̆ dî kon bơh Elisaƀet kŏng kơnên, î lơ̆ bea hê sŏng dơng năm.

8Bră sŏng tơmtom nơ̆m nge ông lơh gơnoăr bră ăn jơno duh-khoai sơđàp măt Yang Tơm Trồ nơ̆m jơno rơndăp tơmpôl mơ̆n dê. 9Jăt jơno ờs dơm tơmpôl cro ăn jơno duh-khoai, ông dî săc-rwơh mơ̆t nơ̆m nhòng hîh duh-khoai Yang Tơm Trồ dê lơi su kơlhô. 10Lơ̆gay tơmpôl khăi lang bol ăm jờh makin hôi-dăn nơ̆m dơ̆ ông su kơlhô. 11Jơ gư̆n, du hôi cro gơndrơh Yang sơđah-să î ông, ñă mađah ma kaƀang duh-khoai su kơlhô. 12Xacari kŏng ndrăt ntơ-să tơm tô̆ tơmpơl cro gơndrơh, gừn jơno kơ̆mbrit-kơ̆mbròt trơ̆p gom ông. 13Mơya cro gơndrơh tơs î ông lah: Ơ Sacari, bư̆ng kơ̆mbrit, bơh jơno hôi-dăn ông sŏng dî kơnău lờt, gừn bo-ua ông, Elisaƀet rơp bơda ma ông du hôi kon klo, gừn ông rơp ăn sơnăn măt kon la Jăng. 14Gư̆n rơp la jơno sơhờp-sờhơn, hơn-sờ ngăn ma ông, gừn khăi cro rơp sơhờp-sờhơn kơnơm bơh jơno bơda kon êt dê. 15Bơh kon êt rơp dî kingam sơđàp măt Yang Tơm Trồ, gô ơ̆ dî ñô alăk hala jơno găy lơh jîng mañơ̆l, gừn gô rơp dî bîng-jut Yang Hwîng Goh ƀăt bơh nơ̆m klô̆ng mơi mơ̆n. 16Gô rơp lơh khăi kon so Israel blăc trê wăl ma Yang la Yang Tơm Trồ ƀòn gô. 17Sătan gô rơp swà sơđàp măt Yang î nùs-nhim gư̆m gơnăp-gơnoăr Êli dê, lơi lơh nùs bàp blăc trê wăl î kon, gừn cro ơ̆ don trôh î jơno jăk-sai cro tơpăt-durư̆ng — lơi rcăng ma Yang du lang bol sŏng dî rcăng.

18Sacari tơs î cro gơndrơh lah: “Amơh lơh mà ăñ rơp gư̆t đăl dî jơno gư̆n? Bơh ăñ kra sŏng, î bo-ua ăñ sŏng dơng năm:” 19Lơi kla dẵư, cro gơndrơh tơs î ông lah: “Ăñ la Gabriel, la cro ñă sơđàp măt Yang Tơm Trồ, ăñ dî pơđơ trôh tơs î ông gừn iyà jơno sơhờp-sờhơn dô ma ông. 20Kơhea cĕ dô, ông rơp kŏng kơmblău gừn ơ̆ tơs dî trôh dî nge lơ̆gay bră năy tơlôh, tài bơh ông sŏng ơ̆ don jơno ăñ, la lơ̆gay jơno rơp tơlôh iyŏ dî ngăn nơ̆m ñăm tô̆ tơnge ƀòn gô.” 21Lang bol ndăng ăm cang Sacari, gừn ƀòn gô tơmpơl phadêh tơm tô̆ ông ăm jŏ oăn nhòng hîh duh-khoai. 22Mơya dơ̆ swà tơlôh makin, ông ơ̆ rgê răk-sa dî î ƀòn gô, gừn ƀòn gô wơng lah ông sŏng tơmpơl jơno e tơnggư̆t lai nhòng hîh duh-khoai, hôm ông kư̆ lơh têl ma ƀòn gô mà kŭng hôm kơmblău. 23Bră tom tơlôh tơm tô̆ lơ̆gay nge duh bră ăn jơno duh-khoai gô dê lơ̆ sŏng, ông swà gung trê nơ̆m hîh mơ̆n.

24Mơya ma-ngkơi lơ̆gay nge gư̆n, bo-ua ông Elisaƀet, tơwă, gừn mò ămpôn să nhòng prăm kơnnhe, tơs 25lah: “Yang sŏng lơh tîgư̆n ma ăñ, nơ̆m lơ̆gay nge mà kơnràñ kơñ-kơloh ăñ, lơi ămpôn cĕ jơno ƀasmôh ƀasmăt ăñ dê nhòng lơ̆gay kơp cro.”

26Trôh kơnnhe dơ̆ pro, cro gơndrơh Gabriel dî Yang Tơm Trồ pơđơ trôh nơ̆m du ƀòn dơng nơ̆m bơlao Galile, sơnăn ƀòn dơng la Nasaret. 27Tơmtom du hôi cro ua-drôh sŏng tơm lùp î cro-klo dî sơnăn la Jôsep, gôtrê mađah nŏk-noi Dabit, hôm sơnăn măt cro ua-drôh la Mari. 28Tơm tô̆ trôh tơmtom ua-drôh, cro gơndrơh tơs lah: “Niem să ma e bơh dî lơnge, Yang ăm băl î e.” 29Mơya mò ơ̆ sô̆k ăm bơh lơ̆gay jơno tơs gư̆n gư̆m kơlôi-sơnư̆ng jơno còp-să dô gơtha jơno găy. 30Sŏng gư̆n cro gơndrơh tơs î gô lah: “Ơ Mari, dăn bư̆ng kơ̆mbrit, bơh e sŏng dî jơno sơmah sơđàp măt Yang Tơm Trồ. 31Lăng dô, e rơp tơwă nhòng klô̆ng mơ̆n sŏng gư̆n bơda du hôi kon klo, gừn e rơp sơnăn măt kon êt la Jesu. 32Kon klo gư̆n rơp gôjîng dơng màng-ryŭ gư̆m rơp dî sơnăn la kon Bơtao Yơng Rlo, gừn Yang la Yang Tơm Trồ rơp e ma Kơnràñ sơban Dabit, ông-pang kơnràñ dê. 33Kơnràñ rơp ăt-bồ nơ̆m hîh nhă Jakôp trôh dî miek miek, gừn lơgơ Kơnràñ dê rơp la ơ̆ dơ̆ găy dơ̆t lôi.” 34Mari tơs î cro gơndrơh lah: “Bră gư̆n rơp tơlôh mơmơh tîgay, tơm tô̆ ăñ hôm dahrăư gư̆t du hôi cro klo?” 35Lơi kla wăl dẵư, cro gơndrơh tơs î gô: “Yang Hwîng Goh rơp trôh cŭngsî e î gơnăp-gơnoăr Bơtao Yơng Rlo Lơ̆ rơp tơmbàk gơbù e. Gư̆n-jîng, Kon sang-goh bơda tơlôh rơp dî sơnăn la Kon Yang Tơm Trồ. 36Lăng cĕ năy, Elisaƀet, cro găp să e dê — mò kŭng sŏng dî tơwă du hôi kon klo tơm tô̆ mò dơng năm, gừn tơwă rơ̆ ndăng dî pro kơnnhe nhòng mò, la cro kŏng pơndrơ la kơnên. 37Bơh ơ̆ tom bră găy Yang Tơm Trồ ơ̆ lơh dî.” 38Jơ gư̆n, Mari kla dẵư lah: “Ăñ dô, cro dê̆-gơna ua Yang dê. Dăn bră tom tơlôh ma ăñ jăt gư̆ptî jơno Kơnràñ tơs.” Sŏng gư̆n cro gơndrơh swà pleh bơh sơ gô.

39Nơ̆m lơ̆gay nge gư̆n, Mari ƀrừ ñă î nùs sơbăc-sơbăng, gô swà hao nơ̆m ƀòn yồ, trôh nơ̆m du ƀòn dơng bơlao mađah Juđa, 40sŏng gư̆n, gô mơ̆t nơ̆m hîh Sacari î còp-să Elisaƀet. 41Bră tom tơlôh dơ̆ Elisaƀet kơnău Mari còp-să, kon êt nhòng klô̆ng mò coh cơdoh sơhờp-sờhơn, hôm Elisaƀet dî bîng-jut Yang Hwîng Goh. 42Mò pẵư dơng dẵư mà tơs lah; “E dî lơnge ngăn nhòng tĕdơ cro-ua, kon nơ̆m klô̆ng e kŭng dî lơnge. 43Bơh sơgăy mà jơno dô trôh ma ăñ, rơ̆ la mơi Yang ăñ sŏng trôh î ăñ? 44Bơh lăng năy, ƀăt tơm tô̆ dẵư còp-să e trôh anẵu tua ăñ, kơmom êt nơ̆m klô̆ng ăñ sŏng coh cơdoh nơ̆m jơno sơhờp-sờhơn. 45Lơnge ma cro don lah lơ̆gay jơno bơh Yang sŏng dî tơs î mơ̆n rơp tơlôh iyŏ dî ngăn.” 46Sŏng gư̆n Mari tơs lah:

“Hwîng-soan ăñ jong-rơ Yang,

47hwîng-nùs ăñ sơhờp-sờhơn anẵu Yang Tơm Trồ la Yang Dŏng-Klàs ăñ jê.

48Bơh Kơnràñ sŏng sơdơ trôh jơno lŭi-lan cro dê̆-gơna ua Kơnràñ dê.

Bơh lăng năy, bơh dî jơ dô, kơp rai rơp mơnê ăñ la cro dî lơnge.

49Bơh Bơtao gơnăp-gơnoăr sŏng lơh lơ̆gay bră dơng ma ăñ;

sơnăn Kơnràñ la sang-goh,

50nùs kơñ-kơloh Kơnràñ dê gôtrê bơh rai dô trôh rai nde jăt bơh tơmpôl cro găy duh kơ̆mbrit Kơnràñ.

51Kơnràñ sŏng lơh lơ̆gay bră gơnăp-gơnoăr bơh î kơ̆mpang tê Kơnràñ dê;

Kơnràñ sŏng lơh ma tơmpôl cro pơnhừ să kơ̆mprah-kơ̆mprĭng jăt lơ̆gay jơno kơlôi nhòng nùs gô dê.

52Kơnràñ tơngroh lơ̆gay gơnoăr bră bơtao bơh sơ sơban ƀòn gô,

gừn pồ tơmpôl cro lŭi-lan cŭngsî.

53Kơnràñ lơh cro jơgloh bîng-tăl jơno niem,

gừn tơmprơh cro kơnhơ̆p swà trê tê gời.

54Kơnràñ sŏng dŏng-kơl Israel, cro dê̆-gơna Kơnràñ dê,

lơi dî sơdơ wăl nùs kơñ-kơloh.

55Jăt gư̆ptî Kơnràñ sŏng tơs î ông-pang ƀòn hî — î Abraham gư̆m î nŏk-noi gô trôh miek miek.”

56Mari ăm î mò nhòng păy kơnnhe, sŏng gư̆n gô blăc trê nơ̆m hîh mơ̆n.

57Trôh tô̆ tơnge Elisaƀet lơi mò păl bơda kon sŏng trôh, gừn mò sŏng bơda du hôi kon klo. 58Lơ̆gay ƀòn tĕdơ î cro nơ̆m hîh mò dî kơnău lah Yang dî nùs sơmah kơñ-kơloh Kơnràñ dubă dơng ơnàng ma mò, gừn ƀòn gô sơhờp băl î mò.

59Bră tơmtom nơ̆m nge dơ̆ pham, ƀòn gô trôh lơi koh kato ma kon êt, gừn ƀòn gô kơñ sơnăn gô jăt sơnăn bàp gô, la Sacari. 60Kla wăl dẵư bră rơ̆, mơi gô tơs lah: “Ơ̆ iyŏ, mơya kon êt rơp dî sơnăn la Jăng.” 61Ƀòn gô tơs î mò lah: “Ơ̆ tom cro găy nơ̆m nhòng nŏk-noi mò mà dî tơmoh sơnăn tîgư̆n.” 62Ƀòn gô e têl lùp cro bàp gô, lăng ông kơñ sơnăn măt ma kon la amơh. 63Ma-ngkơi jơ pơđơ iyà trôh du păng kapan, ông cêh lah: “Sơnăn kon êt la Jăng.” Lơ̆gay ndrăt-ndròt lơ̆. 64Ƀăt jơ gư̆n, yôi î lơm-piet ông pẵư tơlôh, sŏng gư̆n ông pẵư dẵu jong-rơ Yang Tơm Trồ. 65Jơno kơ̆mbrit-kơ̆mbròt trôh nơ̆m lơ̆gay tơmpôl cro ăm anẵu tĕdơ ƀòn gô, gừn lơ̆gay bră gư̆n dî kơnău lîng-lang nơ̆m kơp ƀòn yồ yơng lơgơ Juđe. 66Kơp cro kơnău tơmpơl gừn prăp nơ̆m nùs mơ̆n, lùp dêh lah: “Ma-ngkơi dô, kon êt dô rơp gôjîng mơmơh tîgay?” Bơh ngăn tê Yang ăm băl î gô.

67Sacari, bàp kon êt, dî bîng-jut Yang Hwîng Goh, gừn tơs hwơr, lah:

68“Jong-rơ Yang la Yang Tơm Trồ Israel,

bơh Kơnràñ sŏng trôh còp î lơh jơno dŏng tơwai ma lang bol Kơnràñ dê.

69Kơnràñ sŏng tơng yŏk ma ƀòn hî du-lăm ngkăy dŏng-klàs

nhòng hîh Dabit, cro dê̆-gơna Kơnràñ dê

70(gư̆ptî Kơnràñ sŏng tơs bơh rai yo nơ̆m dẵư lơ̆gay cro gơnoăr-hwơr sang-goh Kơnràñ dê),

71la jơno dŏng-klàs bơh cro tơmdră ƀòn hî,

î klàs bơh tê lơ̆gay cro tơcao-gơget ƀòn hî,

72lơi sơđah nùs kơñ-kơloh bơh î ông-pang ƀòn hî,

î lơi sơdơ wăl jơno hăư-băl sang-goh nơ̆m Kơnràñ,

73rơ̆ la jơno hăư pơngon mà Kơnràñ sŏng sràt-să băl î Abraham, ông-pang ƀòn hî, lơi e ma ƀòn hî

74tơm tô̆ sŏng dî dŏng-klàs bơh tê cro bờk-mơsăk mơ̆n,

lơi ma dŏng bră Kơnràñ dubă ơ̆ kơ̆mbrit.

75Nơ̆m jơno sang-goh î tơpăt-durư̆ng sơđàp măt Kơnràñ, tăl lơ̆gay nge ƀòn hî dê.

76Hôm kon, ơ kon ăñ jê, kon rơp dî sơnăn la cro gơnoăr-hwơr Bơtao Yơng Rlo,

bơh kon rơp swà sơđàp măt Yang lơi was gung ma Kơnràñ;

77lơi iyà jơno đăl gư̆t dŏng-klàs ma lang bol Kơnràñ

nơ̆m jơno hồ toh lơ̆gay tồi-glài ƀòn gô,

78kơnơm bơh nùs sơmah-kơloh ăt-ăl bơh Yang Tơm Trồ ƀòn mơ̆n,

bơh gư̆n, ang ndrư̆m bơh cŭngsî yơng sơđah makin rơp trôh còp ƀòn mơ̆n,

79lơi bơang-ang lơ̆gay cro hôm nggui nơ̆m anẵu ñô̆ng î nơ̆m anẵu jơno sơ̆t,

lơi iyà bơlăm kơ̆mpang jư̆ng ƀòn mơ̆n mơ̆t nơ̆m gung lơngăp-lơnge.”

80Kon êt sơlơ têh dơng gừn pran-kơdăng nơ̆m hwîng-nùs, gô ăm nơ̆m ƀlang-càs trôh dî nge sơđah-să gô sơđàp lang bol Israel.