Mak 16

1Tơm tô̆ nge Saƀat sŏng swà găn, Mari Madơlen, Mari mơi Jakơ, î Salôme, tăc sơnăm ƀôhơ̆ lơi tơm jơ trôh anẵu, ƀòn gô digơlăn bŏng ƀùc Kơnràñ. 2Bơh tơmdrư̆m-tơmmờt nge dơ̆ dul nơ̆m poh, ƀòn gô swà trôh nơ̆m anẵu mơ̆ntô ƀùc tơm tô̆ măttơnge tơlôh bơang. 3Ƀòn gô bơyê băl î găp lah: “Cro găy rơp tơlơ̆ khô̆k lô̆ bơh mpông mơ̆ntô ƀùc ma ƀòn mơ̆n?” 4Tơm tô̆ ngẵư lăng cŭngsî, ƀòn gô tơmpơl lah khô̆k lô̆ sŏng dî tơlơ̆ lờt, bulah gô dơng ngăn. 5Gừn tơm tô̆ sŏng mơ̆t nơ̆m mơ̆ntô ƀùc, ƀòn gô tơmpơl du hôi cro pơnu cù ao bẵu ndăng nggui ăm mađah ma, gừn ƀòn gô kơ̆mbrit-kơ̆mbròt ngăn. 6Mơya cro gư̆n tơs î ƀòn gô lah: “Bư̆ng kơ̆mbrit. Ƀòn e ndăng jôi Jesu cro Nasaret, Bơtao sŏng kŏng pư̆ng điñ cŭngsî sî pư̆ng. Kơnràñ sŏng dî lơh jîng wăl lờt! Kơnràñ ơ̆ ăm nơ̆m dô. Lăng cĕ anẵu mà cro sŏng ăn ƀùc Kơnràñ. 7Bulah tîgư̆n, swà cĕ, tơs ma lơ̆gay cro bơtê Kơnràñ î Pier lah: ‘Kơnràñ rơp swà lai oh mi trôh nơ̆m Galile. Nơ̆m gư̆n, oh mi rơp tơmpơl Kơnràñ’, gư̆ptî Kơnràñ sŏng tơs î oh mi.”

8Dơ̆ sŏng tơlôh makin, ƀòn gô cơplŏk bơh mơ̆ntô ƀùc, bơh jơno ntơ-să î ndrăt-ndròt ngăn nơ̆m ƀòn gô. Gừn ƀòn gô ơ̆ tơs jơno găy î cro găy tài bơh ƀòn gô kơ̆mbrit-kơ̆mbròt ngăn. 9(Tơmdrư̆m-tơmmờt nge dơ̆ dul nơ̆m poh, Tơm tô̆ jîng wăl lờt, Kơnràñ sơđah tơlôh lai ngăn ma Mari Madơlen, la cro mà Kơnràñ sŏng tơmprơh poh hê cà tơlôh. 10Cro-ua gư̆n swà tơs wăl ma lơ̆gay cro bơh lai ƀua ăm î Kơnràñ nơ̆m jơ ƀòn gô ndăng moat-jrum î ñim-rèa. 11Hôm ƀòn gô, tơm jơ kơnău lah Kơnràñ jơ dô ndăng jîng î sătan mò dî lăng tơmpơl, gừn ơ̆ don.

12Jơ gư̆n, ma-ngkơi lơ̆gay bră gư̆n, Kơnràñ sơđah tơlôh nơ̆m nhòng rồp-să nde ma bea hê cro nơ̆m khà ƀòn gô ndăng jơ swà jư̆ng swà trê nơ̆m ƀòn tơm. 13Gừn bea hê ƀòn gư̆n, ma-ngkơi jơ blăc trê wăl, tơs wăl ma lơ̆gay cro bơtê hôm wăl, mơya ƀòn gô ơ̆ don bea hê ƀòn gư̆n.

14Mơya, dơ̆t-lŭi ma-ngkơi, Kơnràñ sơđah tơlôh ma jư̆t-dul hê cro bơtê tơm jơ ƀòn gô ndăng nggui sa nơ̆m kaƀang, Kơnràñ ƀoah-đas jơno ơ̆ don gư̆m jơno kơdăng nùs ƀòn gô dê bơh ƀòn gô ơ̆ don lơ̆gay cro sŏng tơmpơl Kơnràñ ma-ngkơi jơ Kơnràñ sŏng dî jîng wăl bơh anẵu sơ̆t. 15Kơnràñ ƀăn pơđơ ƀòn gô lah: “Tơm tô̆ swà trôh lam kơp dunya, bơtău cĕ Jơno Niem ma kơp jơno mon bơjîng. 16Cro găy don î kŏng lơh ƀaptem rơp dî dŏng-klàs, hôm cro găy ơ̆ don rơp kŏng lơh-glài. 17Lơ̆gay têl phadêh dô rơp swà băl î lơ̆gay cro dî jơno don: E sơnăn ăñ, ƀòn gô rơp tơmprơh lơ̆gay cà. Ƀòn gô rơp tơs lơ̆gay jơno tơs mhăy. 18Ƀòn gô rơp kơ̆p beh, gư̆m bulah ƀòn gô ñô jơno găy khêh-bơtăng, nên-nôn ngăn lah gô ơ̆ lơh sồt-rmañ găy trôh ƀòn gô. Ƀòn gô rơp ăn tê cŭngsî lơ̆gay cro lơbăn-lơñô gừn lơ̆gay cro gư̆n rơp dî ƀeah.”

19Ma-ngkơi jơ Yang Jesu sŏng tơs î ƀòn gô, Kơnràñ dî iyà trê cŭngsî trồ î nggui mađah ma Yang Tơm Trồ. 20Hôm lơ̆gay ƀòn gư̆n, ma-ngkơi tơm jơ sŏng tơlôh swà, ƀòn gô swà bơtău lơ̆gay kơp anẵu, nơ̆m tơm jơ Yang lơh bră băl î ƀòn gô î lơh cư̆ng ma jơno Yang bơh î lơ̆gay têl phadêh iyà tơmjăt. Amen.)