Mak 15

1Ƀăt nơ̆m brê ang drư̆m, dơ̆ lơ̆gay cro gơnoăr ăn jơno duh-khoai sŏng pẵư du jơno bơyê bră î lơ̆gay cro kwăng kra băl î lơ̆gay cro gơnoăr cêh gư̆m lơ̆gay Tơmpôl jơnư̆m Juđa. Gừn ma-ngkơi tơm jơ căp Yang Jesu, ƀòn gô iyà Kơnràñ swà gừn jao ma Pilat. 2Pilat lùp Kơnràñ lah: “Mê tom iyŏ la Bơtao lang bol Juđa ya?” Mơya tơm jơ kla dẵư ông, Kơnràñ tơs lah: “Sătan ông tơs tîgư̆n.” 3Sŏng gư̆n lơ̆gay cro gơnoăr ăn jơno duh-khoai yă glài Kơnràñ khăi jơno. 4Jơ gư̆n, Pilat khao lùp te Kơnràñ, lah: “Mê ơ̆ kla wăl dẵư jơno găy ya? Lăng cĕ, ƀòn gô ndăng yă glài mê khăi gư̆t nhẵư!” 5Mơya Yang Jesu ơ̆ tom kla dẵư jơno găy te ơ̆, tien gơs Pilat dưñ lơh ndrăt-ndròt.

6Pơnah nde, nơ̆m nge bơjư̆m sa swà-găn, gô ờs dơm hồ ma lang bol du hôi cro ăm jam mà ƀòn gô răc-dăn. 7Jơ gư̆n, tom du hôi cro dî sơnăn la Ƀaraƀa ndăng kŏng ăm jam băl î lơ̆gay cro lơh jơno sơlô̆ng-sơlăng, la lơ̆gay cro tìs-glài tơngsơ̆t cro nơ̆m jơno sơlô̆ng-sơlăng. 8Ma-ngkơi jơ hoa găp trôh, tơmpôl lang bol sơntơm răc-dăn ông gư̆ptî ông ờs dơm lơh ma ƀòn gô. 9Jơ gư̆n, Pilat lùp ƀòn gô, lah: “Ƀòn mê tom kơñ ăñ hồ khăt-gơboh Bơtao lang bol Juđa ma lơ̆gay ƀòn mê ya?” 10Bơh ông gư̆t lah lơ̆gay cro gơnoăr ăn jơno duh-khoai sŏng phi jao Kơnràñ bơh nùs tơmngañ. 11Mơya lơ̆gay cro gơnoăr ăn jơno duh-khoai bơtrôt tơmpôl lang bol lơi bơh gư̆n, ông gư̆n păl hồ khăt-gơboh Ƀaraƀa ma ƀòn gô. 12Mơya, tơm tô̆ lùp wăl, Pilat tơs î ƀòn gô lah: “Tîgư̆n, ăñ păl lơh tîgay î cro mà ƀòn mê sơnăn la Bơtao lang bol Juđa dô?” 13Jơ gư̆n, lang bol dreo dơng te lah: “Pư̆ng cĕ gô cŭngsî sî pư̆ng.” 14Mơya, Pilat tơs î ƀòn gô lah: “Bơh jơno bờk-mơsăk găy cro dô sŏng lơh?” Mơya, lang bol sî dreo dơng rlo lah: “Pư̆ng cĕ gô cŭng sî pư̆ng.” 15Jơ gư̆n, bơh kơñ lơh niem-nùs lang bol, Pilat sŏng hồ khăt-gơboh Ƀaraƀa ma lang bol î ông pơđơ iyà Yang Jesu swà lơi ma-ngkơi tơm jơ pơng lơh, gừn Kơnràñ kŏng pư̆ng điñ.

16Jơ gư̆n, tơmpôl lĭñ hwa Kơnràñ mơ̆t nơ̆m ƀlang hîh (rơ̆ la ƀlang hîh cro kwăng dơng) î hôi lơ̆gay tơmpôl lĭñ jơnư̆m wăl. 17Sŏng gư̆n ƀòn gô tơngcù ma Kơnràñ du blah ao pơcăñ, sŏng gư̆n tơngđoa ma Kơnràñ du-lăm sơgăl bơh î lẵu ƀòn gô sŏng tañ, 18gừn ƀòn gô sơntơm lùp còp-să Kơnràñ lah: “Jong-rơ Bơtao lang bol Juđa!” 19Sŏng gư̆n, ƀòn gô pơng nơ̆m găl Kơnràñ bơh î mư̆ng gư̆m soh nơ̆m Kơnràñ, gư̆m cơdơn krô̆ng nteàh duh-khoai Kơnràñ. 20Dơ̆ ƀòn gô sŏng tơngyŏ-tơnghiel Kơnràñ lờt, ƀòn gô hồ bơh sî să Kơnràñ du blah ao pơcăñ î tơngcù wăl jơno Kơnràñ ma kơnràñ dê, sŏng gư̆n iyà Kơnràñ swà lơi ƀòn gô pư̆ng điñ Kơnràñ cŭngsî sî pư̆ng. 21Ƀòn gô kơ̆p du hôi cro swà gung năy, sơnăn la Simôn, cro Siren (bàp Aleksandrơ dê î Ruphus), bơh ƀòn tơm trôh, lơi gô tî sî pư̆ng Kơnràñ dê.

22Ƀòn gô iyà Kơnràñ trôh nơ̆m Gôgôtha (du-anẵu mà gô dî gơtha la “Anẵu katîng kơ̆ndoh-găl”). 23Ƀòn gô e ma Kơnràñ ñô alăk bơyoă băl î cai-trô̆, mơya Kơnràñ ơ̆ ñô. 24Sŏng gư̆n ƀòn gô pư̆ng điñ Kơnràñ gư̆m tơmpà găp ôi-ao Kơnràñ dê bơh î jơno tă khà ma mơ̆n, lăng cro găy dî pơnah găy. 25Jơ gư̆n la jơ dơ̆ păy, ƀòn gô pư̆ng điñ Kơnràñ. 26Dô la plừk kapan lơh nên glài Kơnràñ dê, sŏng dî cêh lah: “Bơtao lang bol Juđa.” 27Ƀòn gô kŭng pư̆ng điñ bea hê cro kơntô̆ng băl î Kơnràñ, du hôi ăm mađah ma, hôm cro tò ăm mađah eo Kơnràñ. 28(Jơno Sră-Goh sŏng dî jîng tơlôh iyŏ ngăn, lah: “Kơnràñ kŏng tơs tơmơ̆t băl î tơmpôl cro glài.”) 29Lơ̆gay cro swà găn tơngyŏ-tơnghiel Kơnràñ, tơtô găl mơ̆n gư̆m tơs lah: “Ơi hơh! Cro phà tơlah hîh duh-khoai sŏng gư̆n băt-tơngñă wăl nơ̆m păy nge, 30dŏng-kơl dêh cĕ sătan mơ̆n bơh î bră jư bơh sî pư̆ng jờh!” 31Kŭng gư̆ptî tîgư̆n, lơ̆gay cro gơnoăr ăn jơno duh-khoai î lơ̆gay cro gơnoăr bơtău jơno bơlăm, băl î găp tơngyŏ-tơnghiel Kơnràñ, ƀòn gô tơs lah: “Gô dŏng-kơl dî khăi cro nde, mơya gô ơ̆ dŏng-kơl dî dêh sătan gô. 32Yang Dŏng-Klàs, Bơtao Israel dê, jơ dô jư cĕ bơh sî pư̆ng jờh, lơi ƀòn hî tơmpơl mà don.” Tơmpôl cro kŏng pư̆ng điñ băl î Kơnràñ kŭng tơngyŏ-tơnghiel Kơnràñ.

33Trôh jơ dơ̆ pro, jơno kơnăm-kơnom tom tơlôh gom tơmbàk lam kơp ù trôh dî jơ dơ̆ sơ̆n. 34Mơ̆t nơ̆m jơ dơ̆ sơ̆n, Yang Jesu hôi dreo dơng dẵư lah: “Êlôi, Êlôi, lama saƀaktani?” Jơno gư̆n dî gơtha la: “Ơ Yang Tơm Trồ ăñ jê, ơ Yang Tơm Trồ ăñ jê, ngglơh Kơnràñ lơi căư ăñ?” 35Tơm tô̆ kơnău tîrơ̆, tơmpôl cro ăm ñă en gư̆n tơs lah “Lăng năy, gô ndăng hôi Êli.” 36Bơh gư̆n, du hôi cro găy gư̆n, ma-ngkơi tơm jơ cơplŏk swà iyrù suh bîng dà sràt nơ̆m kơnsồp, ăn nơ̆m mư̆ng sî proh, cro gư̆n dờp ma Kơnràñ ñô, tơs lah: “Lơi cĕ bră gô, lăng Êli tom trôh iyà gô jư nteàh ơ̆.” 37Jơ gư̆n, ma-ngkơi jơ sŏng dreo du-dẵư dơng, Yang Jesu ha-ău nhim sơ̆t. 38Gừn kơmang nơ̆m hîh duh-khoai kŏng crề jîng bea đah bơh cŭngsî lêh nteàh. 39Jơ gư̆n cro iyà-găl du-rhieng lĭñ, gô ñă ăm tơpăt ndăng mađàp Kơnràñ, tơm jơ sŏng tơmpơl Kơnràñ ha-ău nhim sơ̆t tîgư̆n, gô tơs lah: “Iyŏ ngăn, cro dô la Kon Yang Tơm Trồ dê.” 40Kŭng tom lơ̆gay cro-ua ăm ñă lăng bơh ma wĭc, nơ̆m khà ƀòn gô tom Mari Madơlen, Mari (Mơi Jakơ êt î Jôse) băl î Salôme, 41la lơ̆gay cro mà tơm jơ Kơnràñ hôm ăm nơ̆m Galile, ƀòn gô sŏng swà jăt Kơnràñ gư̆m duh bră Kơnràñ, kŭng hôm khăi cro-ua nde te sŏng swà băl î Kơnràñ trôh nơ̆m Jerusalem.

42Dơ̆ trôh brê mhău ñô̆ng lờt, bơh nge gư̆n la Nge Rcăng Lai, rơ̆ la lai nơ̆m nge Saƀat, 43Jôsep, la cro bơh lơgơ Arimathe, du hôi cro păl dî kingam ngăn nơ̆m Tơmpôl Jơnư̆m, kŭng la cro ndăng ăm cang lơgơ Yang Tơm Trồ dê. Tơm jơ sŏng trôh anẵu, ông khơ̆n-sa mơ̆t tơmtom Pilat gư̆m lùp dăn ƀùc Yang Jesu. 44Jơ gư̆n, Pilat ndrăt-ndròt ngăn dilah ngăn la Kơnràñ sŏng sơ̆t lờt, gừn ma-ngkơi jơ hôi cro iyà-găl du-rhieng lĭñ, gô lùp cro gư̆n lăng Kơnràñ sŏng sơ̆t jŏ hôm. 45Dơ̆ sŏng gư̆t loh-lang bră bơh cro iyà-găl du-rhieng lĭñ, gô jao ƀùc ma Jôsep. 46Ma-ngkơi jơ tăc bơtơi tơme, iyà Kơnràñ jư bơh cŭngsî sî pư̆ng, ông pùc Kơnràñ wăl bơh î bơtơi gư̆n, î ăn Kơnràñ nơ̆m du-lăm mơ̆ntô sŏng dî phà nơ̆m lô̆ tơliê. Sŏng gư̆n ông tơlơ̆ du khô̆k lô̆ cơkhă mpông mơ̆ntô. 47Jơ gư̆n, Mari Madơlen î Mari mơi Jôse dê sŏng tơmpơl nơ̆m anẵu Kơnràñ dî tăp.