Mak 14

1Jơ gư̆n, bea nge ma-ngkơi te la nge Bơjư̆m-Sa Swà-Găn î nge Bơjư̆m-Sa Ƀăñ Ơ̆ Tom Dong, lơ̆gay cro gơnoăr dơng ăn jơno duh-khoai băl î cro gơnoăr cêh ndăng jôi kai-kơnĕ, lơi ma-ngkơi jơ kơ̆p Kơnràñ dubă ndăp-ndơ, ƀòn gô digơlăn tơngsơ̆t Kơnràñ cĕ. 2Bơh ƀòn gô tơs lah: “Ơ̆ dî păl lơh nơ̆m nge bơjư̆m-sa, kơhea cĕ lah jơno sơlô̆ng-sơlăng rơp tom tơlôh nơ̆m tơmpôl lang bol.”

3Tơm tô̆ Kơnràñ ndăng ăm nơ̆m Ƀethani, nơ̆m hîh Simôn dê, la cro kŏng kòp dun, Kơnràñ ndăng nggui nơ̆m kaƀang sa gừn du hôi cro-ua swà trôh, iyà băl î kơlŏ mơñà ƀôhơ̆ bơh î lô̆ mang ăn-têm mơñà ƀôhơ̆ kamtŭng sơnăk, khăi jên ngăn. Ma-ngkơi jơ jăn bơcah kơlŏ, gô tôh mơñà gư̆n nơ̆m găl Kơnràñ. 4Mơya nơ̆m nhòng ƀòn gô, tom du pơnah cro tơcao nùs: “Bơh jơno găy mà lơh pơle mơñà ƀôhơ̆ dô? 5Tài bơh mơñà dô digơlăn brău dî rlo ma păy-rhieng dơñe sŏng gư̆n tơmpà ma cro kơsòt.” Ƀòn gô ƀoah-đas amî-ua gư̆n. 6Mơya Yang Jesu tơs lah: “Lơi cĕ amî-ua gư̆n ăm iyờp. Ngglơh oh mi lơh kălkê amî-ua? Amî-ua sŏng lơh du bră niem ma ăñ. 7Bơh oh mi dî miek cro kơsòt ăm î mơ̆n, gừn kơp dơ̆ găy oh mi kơñ oh mi digơlăn lơh bră niem ma ƀòn gô, mơya oh mi rơp ơ̆ dî ăñ miek ơ̆. 8Amî-ua sŏng lơh bră mà amî-ua digơlăn lơh. Amî-ua sŏng rcăng lai lơi bŏng ƀùc ăñ gôtrê trôh bră lơboh tăp. 9Iyŏ ngăn, ăñ tơs î oh mi, dilah Jơno Niem dî tơs bơtău anẵu găy nơ̆m lơ̆gay dunya gừn bră mà amî-ua dô sŏng lơh kŭng rơp dî tơs wăl nơ̆m jơno sơdơ bơh amî-ua.”

10Hôm Juđa Iskariôt, du hôi nơ̆m jư̆t-bea hê cro bơtê, tơlôh swà trôh tơmtom lơ̆gay cro gơnoăr dơng ăn jơno duh-khoai lơi gô digơlăn phi jao Kơnràñ ma ƀòn gô. 11Jơ gư̆n, ma-ngkơi jơ kơnău tîrơ̆, ƀòn gô sơhờp-sờhơn ngăn î hăư e ma gô priè. Sŏng gư̆n gô jôi tô̆ jơ lơwah lơi tơmdră phi jao Kơnràñ.

12Mơ̆t nơ̆m nge dơ̆ dul nơ̆m nge Bơjư̆m-Sa Ƀăñ Ơ̆ Tom Dong, tơm jơ cro ăn belàt kon Bơjư̆m-Sa Swà-Găn, lơ̆gay cro bơtê Kơnràñ tơs î Kơnràñ lah: “Cro bơtău kơñ ƀòn hî swà rcăng rơndăp bơlao găy lơi cro bơtău digơlăn sa Bơjư̆m-Sa Swà-Găn?” 13Sŏng gư̆n Kơnràñ pơđơ bea hê nơ̆m lơ̆gay cro bơtê mơ̆n, gư̆m tơs î ƀòn gô lah: “Swà mơ̆t cĕ nơ̆m ƀòn dơng, gừn du hôi cro iyà thô̆ng dà rơp tơmtom oh mi. Swà jăt cĕ amî-klo gư̆n. 14Dilah amî-klo gư̆n mơ̆t nơ̆m hîh găy, tơs cĕ î cro pơnhơm hîh lah: ‘Cro Bơtău pơđơ: “Ơdô̆ năc ăñ jê, anẵu ăñ digơlăn sa Bơjư̆m-Sa Swà-Găn î lơ̆gay cro bơtê ăñ, ăm anẵu găy?”’ 15Cro pơnhơm hîh rơp sơđah ma oh mi du-lăm ơdô̆ dơng nơ̆m dăp cŭngsî sŏng dî rơndăp ăn rcăng lai, gừn rơndăp rcăng cĕ ma ƀòn hî nơ̆m anẵu gư̆n.” 16Bơh gư̆n lơ̆gay cro bơtê tơlôh swà gừn swà mơ̆t nơ̆m ƀòn dơng, sŏng gư̆n ƀòn gô tơmpơl lơ̆gay bră gư̆ptî Kơnràñ sŏng tơs î ƀòn gô, gừn ƀòn gô rcăng jơno sa Bơjư̆m-Sa Swà-Găn.

17Tơm tô̆ trôh brê mhău ñô̆ng, Kơnràñ swà trôh ma jư̆t-bea hê cro bơtê. 18Tơm tô̆ ƀòn gô ndăng nggui nơ̆m kaƀang sa î sa jơno, Yang Jesu tơs lah: “Iyŏ ngăn, ăñ tơs î oh mi lah du hôi cro nơ̆m oh mi, la cro ndăng sa î ăñ, rơp tơmdră ăñ.” 19Ƀòn gô sơntơm moat-jrum gừn cro dô trôh cro năy tơs î Kơnràñ lah: “Ơ̆-iyŏ la ăñ ơ̆?” 20Mơya Kơnràñ tơs î ƀòn gô lah: “Gư̆n la du hôi nơ̆m jư̆t-bea hê oh mi, cro ndăng iyrù ƀăñ nơ̆m wan băl î ăñ. 21Bơh Kon-Mơnùs tơlôh swà jăt gư̆ptî jơno sŏng dî cêh bơh Kơnràñ, mơya dî păl kŏng sràt-rma ngăn ma cro mà bơh gô, Kon-Mơnùs kŏng tơmdră lơboh! Iyŏ ngăn cro gư̆n bư̆ng bơda tơlôh gừn niem rlo ngăn ma gô.” 22Tơm tô̆ ƀòn gô ndăng sa, ma-ngkơi jơ dưñ ƀăñ, ưnngai, Kơnràñ pêh ƀăñ, dờp ma ƀòn gô î tơs lah: “Dưñ iyà cĕ. Dô la să-jăn ăñ dê.” 23Gừn ma-ngkơi jơ dưñ wan, ưnngai, Kơnràñ dờp ma ƀòn gô, gừn lơ̆gay ƀòn gô ñô wan gư̆n. 24Kơnràñ tơs î ƀòn gô lah: “Dô la mham jơno hăư-băl ăñ jê, la mham dî hua tơlôh ma khăi cro. 25Iyŏ ngăn, ăñ tơs î oh mi, lah nên-nôn ngăn ăñ ơ̆ ñô dà bơh ple sî ño te trôh dî nge gư̆n, la tơm tô̆ ăñ ñô dà ño mhăy nơ̆m lơgơ Yang Tơm Trồ.”

26Ma-ngkơi jơ đas du sên sờ, ƀòn gô swà tơlôh trôh bơlao yồ Ôlibe. 27Yang Jesu tơs î ƀòn gô lah: “Lơ̆gay oh mi rơp sơndăc blă, gư̆ptî jơno dî cêh lah:

‘Ăñ rơp pơng lơh cro jư belàt,

gừn belàt rơp kŏng kơ̆mprah-kơ̆mprĭng.’

28Mơya ma-ngkơi jơ ăñ sŏng dî lơh jîng wăl, ăñ rơp swà lai oh mi trôh nơ̆m Galile.” 29Mơya Pier tơs î Kơnràñ lah: “Tien gơs bulah lơ̆gay cro rơp kŏng sơndăc blă, mơya ăñ gừn ơ̆ tom ơ̆.” 30Yang Jesu tơs î ông lah: “Iyŏ ngăn, ăñ tơs î mê, lah nge dô — ƀăt tơmăng dô — lai jơ ia kwăng ndro bea dơ̆, mê rơp khan lơi căư ăñ păy dơ̆.” 31Mơya Pier tơs dubă krañ-cê lah: “Dilah kơ̆p ăñ păl sơ̆t băl î cro bơtău, nên-nôn ngăn ăñ rơp ơ̆ khan lơi căư cro bơtău.” Jơ gư̆n, lơ̆gay ƀòn gô kŭng tơs băl tîgư̆n.

32Sŏng gư̆n ƀòn gô swà trôh nơ̆m du-anẵu, anẵu gư̆n sơnăn la Ghetsemane, gừn Kơnràñ tơs î lơ̆gay cro bơtê Kơnràñ lah: “Nggui cĕ sơdô nơ̆m dơ̆ ăñ hôi-dăn.” 33Kơnràñ bơlăm Pier, Jakơ, î Jăng swà băl î Kơnràñ, sŏng gư̆n Kơnràñ sơntơm moat-jrum gư̆m ơ̆ sô̆k ăm. 34Kơnràñ tơs î ƀòn gô lah: “Hwîng-soan ăñ dê ndăng moat-jrum ngăn, tien gơs trôh dî sơ̆t. Păl kư̆ ăm sơdô î kah-rngăl.” 35Sŏng gư̆n swà wĭc dî dư̆ng-iè te, Kơnràñ tơmbĭc să Kơnràñ nơ̆m ù î hôi-dăn lah, dilah digơlăn, dăn jơ gư̆n swà găn bơh Kơnràñ. 36Kơnràñ tơs lah: “Aba, ơ Bàp, î Bàp lơ̆gay bră la digơlăn. Dăn tă wañ dô bơh Kon. Mơya ơ̆-iyŏ la jơno Kon kơñ, mà la jơno Bàp kơñ.” 37Sŏng gư̆n Kơnràñ trê wăl gừn tơmpơl ƀòn gô ndăng bĭc, gư̆n-jîng Kơnràñ hôi Pier lah: “Simôn, mê bĭc ya? Mê ơ̆ digơlăn kah-rngăl dî du-jơ ơ̆h? 38Păl kah-rngăl î hôi-dăn, lơi oh mi ơ̆ tơmơ̆t nơ̆m jơno ơn-ñai. Hwîng-nùs gừn kơñ ngăn, mơya să-jăn gừn lơbăn-lơñô.” 39Du dơ̆ te, tơm tô̆ sŏng swà tơlôh, Kơnràñ hôi-dăn, tơs lơ̆gay jơno gư̆p tîgư̆n. 40Î du dơ̆ te, tơm jơ blăc wăl, Kơnràñ tơmpơl ƀòn gô ndăng bĭc, bơh măt ƀòn gô pẵư ơ̆ trôh, gư̆m ƀòn gô ơ̆ gư̆t jơno găy lơi kla dẵư Kơnràñ. 41Sŏng gư̆n Kơnràñ trôh dơ̆ păy gừn tơs î ƀòn gô lah: “Oh mi hôm ăm bĭc î bơdê să ya? Tăl lờt! Tô̆ jơ trôh sŏng. Lăng cĕ Tò! Kon-Mơnùs mơñ kŏng tơmdră phi jao nơ̆m tê cro glài. 42Ñă cĕ atẵy jơ, lăng tò, cro tơmdră ăñ trôh en lờt.” 43Ƀăt jơ gư̆n, tơm tô̆ Kơnràñ ờs hôm ndăng tơs, Juđa, du hôi nơ̆m jư̆t-bea hê cro bơtê, swà trôh gư̆m băl î gô la du tơmpôl cro khăi iyà băl î pàs-đao gư̆m mư̆ng, tơlôh swà bơh anẵu lơ̆gay cro gơnoăr dơng ăn jơno duh-khoai, lơ̆gay cro gơnoăr cêh î lơ̆gay cro kwăng kra. 44Jơ gư̆n, cro tơmdră wăl Kơnràñ sŏng lơh du têl ma ƀòn gô, lah: “Cro găy mà ăñ cư̆m rơ̆ la sătan cro gư̆n. Kơ̆p cĕ gô î iyà swà dubă niem niem.” 45Bơh gư̆n, dơ̆ sŏng trôh anẵu, ƀăt jơ gư̆n, ma-ngkơi jơ swà trôh en Kơnràñ, gô tơs lah: “Raƀi,” sŏng gư̆n gô cư̆m Kơnràñ. 46Jơ gư̆n, ƀòn gô e tê sơbê̆ Kơnràñ gư̆m kơ̆p jư Kơnràñ. 47Mơya du hôi cro năy nơ̆m lơ̆gay cro ñă ăm en, ma-ngkơi jơ sŏng tă pàs-đao makin, sŏng ndôh lơh cro dê̆ cro gơnoăr dơng ăn jơno duh-khoai î koh tĕ tua amî-klo gư̆n. 48Kla wăl bră kơ̆p jư, Yang Jesu tơs î ƀòn gô lah: “Lơ̆gay ƀòn mê trôh iyà băl pàs-đao gư̆m mư̆ng lơi kơ̆p ăñ gôlơh gư̆ptî tơmdră wăl du hôi cro kơntô̆ng ya? 49Kơp nge ăñ ăm î lơ̆gay ƀòn mê dơ̆ bơtău nơ̆m hîh duh-khoai, mà lơ̆gay ƀòn mê ơ̆ kơ̆p ăñ. Mơya, dô la lơi jơno Sră-Goh dî jîng jơno ngăn.” 50Ma-ngkơi jơ lơi căư wăl Kơnràñ, lơ̆gay ƀòn gô toat ăm pôn lơ̆.

51Du hôi cro pơnu năy swà jăt Yang Jesu, cù nư̆ng du blah ao rơnjai bơtơi săy tơme pùc tĕdơ să, gừn ƀòn gô kơ̆p jư amî-klo gư̆n, 52mơya tơm jơ lơi căư wăl ao rơnjai, gô ăm săkôh lơi sơlơ̆ñ toat ămpôn.

53Ƀòn gô iyà Yang Jesu trôh nơ̆m anẵu cro gơnoăr bơlăm-găl ăn jơno duh-khoai, gừn lơ̆gay cro gơnoăr ăn jơno duh-khoai, lơ̆gay cro kwăng kra, băl î lơ̆gay cro gơnoăr cêh bơjư̆m wăl. 54Hôm Pier jăt Kơnràñ bơh ma wĭc, mơ̆t trôh ngglăm ƀlang hîh cro gơnoăr bơlăm-găl ăn jơno duh-khoai, sŏng gư̆n ông nggui băl î lơ̆gay lĭñ ăm jư gư̆m ăm răm en oềs. 55Jơ gư̆n, lơ̆gay cro gơnoăr ăn jơno duh-khoai î lơ̆gay Tơmpôl Jơnư̆m Juđa ndăng jôi cư̆ng-tang tơmdră wăl Yang Jesu lơi lơboh Kơnràñ mơ̆t nơ̆m anẵu sơ̆t, mà ƀòn gô jôi ơ̆ tom dî jơno găy ơ̆. 56Tài bơh khăi cro lơh cư̆ng-blăc blơ̆ tơmdră wăl Kơnràñ, mà jơno cư̆ng-tang ƀòn gô dê gừn ơ̆ tơnggăp î găp. 57Bea păy hê cro, ma-ngkơi jơ ñă atẵy, lơh cư̆ng-blăc blơ̆ tơmdră wăl Kơnràñ, tơm tô̆ tơs 58lah: “Ƀòn hî kơnău ông gư̆n tơs la ‘Ăñ rơp jăn rlăm hîh duh-khoai bơh tê kon-mơnùs lơh tơlôh dô, sŏng gư̆n nơ̆m păy nge ăñ rơp băt tơngñă du-lăm hîh duh-khoai nde ơ̆-iyŏ bơh tê kon-mơnùs lơh tơlôh.’” 59Mơya bulah tîgư̆n, ƀăt nơ̆m bră dô, gừn jơno cư̆ng-tang ƀòn gô dê kŭng ơ̆ tơnggăp băl. 60Gừn ma-ngkơi jơ ñă atẵy bơh nhòng lơ̆gay cro, cro gơnoăr bơlăm-găl ăn jơno duh-khoai khao lùp Yang Jesu lah: “Ngglơh mê ơ̆ kla dẵư găy ơ̆? Lơ̆gay ƀòn dô lơh cư̆ng-tang tơmdră wăl mê bơh jơno găy?” 61Mơya Kơnràñ kư̆ ăm-ƀơt gư̆m ơ̆ kla dẵư găy ơ̆. Cro gơnoăr bơlăm-găl ăn jơno duh-khoai khao lùp te Kơnràñ, gừn ông tơs î Kơnràñ lah: “Mê tom iyŏ la Yang Dŏng-Klàs, Kon Bơtao dî păl jong-rơ, ya?” 62Jơ gư̆n, Yang Jesu tơs lah: “Sătan ăñ dô; sŏng gư̆n lơ̆gay ƀòn ông rơp tơmpơl Kon-Mơnùs nggui mađah ma Bơtao Gơnăp-Gơnoăr î trôh nhòng lơ̆gay dăp trồ.”

63Bơh gư̆n ma-ngkơi jơ crề tĕ ao Kơnràñ, cro gơnoăr bơlăm-găl ăn jơno duh-khoai tơs lah: “Ƀòn mơ̆n păl jôi jơno găy bơh cro lơh cư̆ng te? 64Ƀòn mê sŏng kơnău jơno sơmăm tìs î Yang lờt. Ƀòn mê kơlôi mơmơh?” Bơh gư̆n lơ̆gay cro băl î găp cahrña Kơnràñ la cro păl sơ̆t. 65Du pơnah cro sơntơm soh Kơnràñ, pùc kăt măt Kơnràñ î pơng lơh Kơnràñ, sŏng gư̆n tơs î Kơnràñ lah: “Tơs jơno hwơr lăng mơmơh!” Bea păy hê lĭñ lăng jư kŭng sơbê̆ kơ̆p Kơnràñ gừn pah.

66Nơ̆m jơ Pier ăm nơ̆m ƀlang, du hôi nơ̆m lơ̆gay cro dê̆ ua cro gơnoăr bơlăm-găl ăn jơno duh-khoai swà trôh nơ̆m anẵu ông. 67Dơ̆ tơmpơl Pier ndăng ăm răm nơ̆m oềs, tơm tô̆ lăng nê̆-năn ông, cro-ua gư̆n tơs lah: “Mê kŭng ăm băl î Jesu, cro Nasaret.” 68Mơya ông tơm khan, tơs lah: “Ăñ ơ̆ gư̆t, kŭng ơ̆ wơng e ndăng tơs jơno găy.” Sŏng gư̆n ông swà tơlôh makin ƀlang. 69Cro dê̆ ua sŏng tơmpơl ông gừn sơntơm tơs te î lơ̆gay cro ndăng ñă sơgư̆n lah: “Cro dô ăm băl nơ̆m pơnah ƀòn gư̆n!” 70Mơya ông khan du dơ̆ te. Du-yoa ma-ngkơi gư̆n, lơ̆gay cro ñă sơgư̆n tơs te î Pier lah: “Nên-nôn ngăn mê ăm băl nơ̆m pơnah ƀòn gư̆n, bơh mê kŭng la cro Galile.” 71Mơya ông sơntơm sràt-rma î sràt-să lah: “Ăñ ơ̆ gư̆t cro gư̆n, cro mà ƀòn mê ndăng ăm tơs.” 72Ƀăt jơ gư̆n ia kwăng ndro dơ̆ bea gừn Pier sơdơ wăl jơno mà Yang Jesu sŏng tơs î gô lah: “Lai ma tô̆ ia kwăng ndro bea dơ̆, mê rơp tơm khan ăñ păy dơ̆,” gư̆n-jîng tơm jơ moat-jrum, ông ñim-rèa.