Mak 13

1Tơm tô̆ Kơnràñ ndăng tơlôh bơh hîh duh-khoai, du hôi nơ̆m lơ̆gay cro bơtê Kơnràñ tơs î Kơnràñ lah: “Ơ cro bơtău, lăng tò! Lơ̆gay ne-lô̆ dơng gư̆t nhẵư î lơ̆gay jơno lơh tơlôh niem hel ngăn!” 2Yang Jesu tơs î cro bơtê gư̆n lah: “Mê tơmpơl lơ̆gay hîh dơng her hơt dô ya? Rơp ơ̆ hôm kađòng du ne-lô̆ găy nơ̆m anẵu dô dî te lơi dăp cŭngsî ne-lô̆ nde mà lô̆ gư̆n rơp ơ̆ kŏng bơcah-lề.”

3Gừn tơm tô̆ Kơnràñ ndăng nggui nơ̆m yồ Ôlibe ăm ndăng tîpô̆ng hîh duh-khoai, Pier, Jakơ, Jăng î Andre lùp dêh Kơnràñ lah: 4“Dăn cro bơtău tơs ma ƀòn hî gư̆t, jơ găy lơ̆gay bră gư̆n rơp tom tơlôh? Gư̆m tom têl phadêh găy tơm tô̆ lơ̆gay jơno gư̆n mơñ dî jîng jơno ngăn?” 5Jơ gư̆n, Yang Jesu pẵư dẵư tơs î ƀòn gô lah: “Păl Kơhea, bư̆ng lơi cro găy tề-lăm oh mi swà tìs kơ̆mprah. 6Khăi cro rơp trôh e sơnăn ăñ, tơs lah: ‘La ăñ dô,’ gừn ƀòn gô rơp tề-lăm khăi cro swà tìs kơ̆mprah. 7Hôm tơm tô̆ oh mi kơnău bơh jơno kơlîn-kơtoă î jơno kơnău tơs bơh kơlîn-kơtoă, gừn bư̆ng kơ̆mbrit, jơno gư̆n păl tom tơlôh, mơya hôm dahrăư iyŏ la lŭi-dơ̆t. 8Bơh lang bol dô rơp ndôh ñă tơmdră wăl lang bol nde, gừn lơgơ dô tơmdră wăl lơgơ năy. Rơp tom jơno rlăm ù nơ̆m khăi anẵu, rơp tom jơno jơgloh dơng. Lơ̆gay bră gư̆n la sơntơm lơ̆gay jơno jê sơmơn bơda.

9Pơnah nde, Sătan oh mi păl gư̆t kơhea. Cro rơp phi jao oh mi ma tơmpôl jơnư̆m î ma hîh jơnư̆m, oh mi rơp kŏng pơng lơh, rơp ñă sơđàp tơmpôl kwăng dơng lơgơ î lơ̆gay bơtao tài bơh ăñ, gư̆ptî du jơno lơh cư̆ng ma ƀòn gô. 10Gừn lai ngăn, Jơno Niem păl dî tơs bơtău ma lơ̆gay lang bol. 11Tơm tô̆ ƀòn gô kơ̆p iyà oh mi swà jao lơboh, bư̆ng kơ̆mbrit bơh jơno mơ̆n păl tơs. Mơya, dilah jơno găy dî dờp e ma oh mi nơ̆m jơ gư̆n, gừn tơs cĕ jơno gư̆n; tài bơh ơ̆-iyŏ oh mi la cro ndăng tơs, mơya la Yang Hwîng Goh. 12Amî rơp phi jao oh nơ̆m anẵu sơ̆t, bàp gừn phi jao kon. Sŏng gư̆n kon so rơp ndôh ñă tơmdră wăl mơi bàp gư̆m lơh ƀòn gô kŏng tơngsơ̆t. 13Oh mi rơp kŏng lơ̆gay cro tơcao-gơget bơh sơnăn ăñ. Mơya cro găy kơđư̆ng nùs trôh dî dơ̆t-lŭi, cro gư̆n rơp dî dŏng-klàs.

14Pơnah nde, tơm tô̆ oh mi tơmpơl jơno sơmơ̆-sơmĭñ nơ̆m jơno kơ̆mprah-kơ̆mprĭng tom tơlôh nơ̆m anẵu ơ̆ dî păl tom (cro sên păl wơng), gừn lơ̆gay cro găy ăm nơ̆m lơgơ Juđe păl toat ăm pôn lêh nơ̆m yồ, 15hôm cro găy ăm cŭngsî tơkang hîh, bư̆ng jư nteàh kŭng bư̆ng mơ̆t nhòng lơi dưñ kơp du-lăm jơno găy tơlôh bơh hîh mơ̆n, 16gừn cro găy ăm nơ̆m ƀlang srăy, bư̆ng blăc trê wăl î lơ̆gay jơno hôm ma-ngkơi lơi dưñ ao rơnjai mơ̆n dê. 17Mơya sơòs-gleh ngăn ma cro-ua ndăng tơwă gư̆m cro-ua dờp kon êt pô nơ̆m lơ̆gay nge gư̆n! 18Tơblơ̆ wăl, hôi-dăn cĕ lơi bră gư̆n ơ̆ tom tơlôh nơ̆m kơnnhe lơngềt. 19Bơh nơ̆m lơ̆gay nge gư̆n rơp tom jơno rŭng-rai tien gơs hôm dahrăư dơ̆ găy tom tîgư̆n bơhsơm mon bơjîng ù-teàh, la tơm tô̆ Yang Tơm Trồ mon bơjîng lơ̆gay jơno trôh dî nge dô, î kŭng ơ̆ dơ̆ găy tom wăl. 20Gừn dilah Yang ơ̆ tơng-êt mằ lơ̆gay nge gư̆n, kơp să-jăn rơp ơ̆ dî dŏng-klàs. Mơya tài bơh lơ̆gay cro dî săc-rwơh, la lơ̆gay cro Kơnràñ sŏng săc-rwơh, Kơnràñ tơng-êt mằ khà nge gư̆n. 21Dơ̆ gư̆n, dilah cro găy gư̆n tơs î oh mi lah: ‘Lăng dô, Yang Dŏng-Klàs ăm sơdô! Lăng tò, nơ̆m bơlao tò!’ gừn bư̆ng don. 22Bơh yang dŏng-klàs mablăc î cro gơnoăr-hwơr mablăc rơp dî ndôh ñă, sŏng gư̆n rơp lơh tơlôh lơ̆gay têl phadêh î gơnoăr phadêh, lơi dilah digơlăn, lơh tìs-kơ̆mprah lơ̆gay cro dî săc-rwơh. 23Mơya oh mi păl gư̆t kơhea! Lăng cĕ dô, ăñ sŏng e oh mi gư̆t lai lơ̆gay bră gư̆n lờt.

24Mơya, nơ̆m lơ̆gay nge gư̆n, ma-ngkơi jơno rŭng-rai gư̆n,

măttơnge rơp gôjîng kơnăm-kơnom,

măt khe rơp ơ̆ bơang-ang jơno ang nơ̆m anẵu gô;

25lơ̆gay sơmăñ bơh trồ rơp duh nteàh,

gừn lơ̆gay jơno pran-kơdăng cŭngsî trồ rơp wăñ-lơnggơh.

26Nơ̆m jơ gư̆n, cro rơp tơmpơl Kon-Mơnùs î gơnăp-gơnoăr gư̆m gơklŏ ryŭ-ryơ̆m jư trôh ăm nhòng lơ̆gay khô̆k tô̆. 27Sŏng gư̆n, Kơnràñ rơp pơđơ lơ̆gay cro gơndrơh gừn Kơnràñ rơp bơjư̆m wăl lơ̆gay cro dî Kơnràñ săc-rwơh bơh puôn đah jư̆ng trồ, bơh dơ̆t-lŭi ple-ù trôh dî dơ̆t-lŭi jư̆ng trồ.

28Pơnah nde, bơtê gư̆t cĕ jơno pơ̆niyô bơh sî ƀăl. Tơm tô̆ mbơlong gô jîng lơmhên î tơlôh nha lờt, oh mi gư̆t lah kơnnhe dôh en sŏng. 29Kŭng tîgư̆n, tơm tô̆ oh mi tơmpơl lơ̆gay bră gư̆n tom tơlôh, oh mi gư̆t lah Kơnràñ ndăng ăm en, ƀăt mađàp mpông. 30Iyŏ ngăn, ăñ tơs î oh mi lah rai dô nên-nôn ngăn la rơp ơ̆ swà găn trôh dî jơ găy lơ̆gay bră gư̆n tom tơlôh. 31Trồ î ù-teàh rơp ha-ău, mơya lơ̆gay jơno tơs ăñ dê nên-nôn ngăn rơp ơ̆ ha-ău. 32Hôm gôtrê bơh nge gư̆n hala jơ gư̆n, sî nư̆ng Bàp, gừn ơ̆ cro găy gư̆t dî, tien gơs lơ̆gay cro gơndrơh cŭngsî trồ kŭng ơ̆, î Kon kŭng tîrơ̆.

33Păl Kơhea-să! Păl Kah-rngăl î hôi-dăn, bơh oh mi ơ̆ gư̆t tô̆ jơ gư̆n la jơ găy. 34Gư̆ptî du hôi cro tò swà gung swà wĭc bơh hîh, tơm jơ sŏng tơlôh bơh hîh gô, î sŏng jao ma kơp cro dê̆ gô gơnoăr ăt-bồ bră lơh gô, gừn gô ƀăn tơngkah cro ăm jư mpông lah cro gư̆n păl kah-rngăl. 35Bơh gư̆n, păl kah-rngăl, tài bơh oh mi ơ̆ gư̆t jơ găy cro pơnhơm hîh trê trôh — hala nơ̆m brê mhău ñô̆ng, hala nggùl năng; hala tơm jơ ia ndro hala nơ̆m brê ang ndrư̆m; 36ơ̆ kơhea lah ma-ngkơi jơ sơni-sơna trê trôh, cro pơnhơm tơmpơl oh mi ndăng bĭc. 37Mơya jơno mà ăñ tơs î oh mi, ăñ kŭng tơs î lơ̆gay cro lah: Păl kah-rngăl!”