Mak 12

1Kơnràñ sơntơm tơs î ƀòn gô băl î jơno pơ̆niyô: “Du hôi cro tò tăm buơn ño, tơngñă pơga tĕdơ, tẵư trôm păt alăk, băt du-lăm hîh yơng ăm jư, gư̆m dờp ma lơ̆gay cro tăm ño ơpah wăl buơn, sŏng gư̆n swà gung wĭc. 2Trôh kơnnhe koh tơgom, ông pơđơ du hôi cro dê̆ trôh î ma tơmpôl tăm ño lơi bơh lơ̆gay cro dô, ông digơlăn dưñ du pơnah công nha bơh buơn dê. 3Mà ma-ngkơi jơ kơ̆p jư amî gư̆n, tơmpôl gô pơng lơh sŏng gư̆n tơmprơh trê tê gời. 4Ông pơđơ du hôi cro dê̆ nde wăl trôh î ƀòn gư̆n, gư̆m î cro gư̆n, ƀòn gô pơng nơ̆m găl gư̆m bơtat tơmprơh. 5Sŏng gư̆n ông pơđơ cro dê̆ nde te, î cro gư̆n, ƀòn gô tơngsơ̆t sơ̆t, gư̆m î khăi cro nde — dơ̆ pơng băm cro dô, dơ̆ tơngsơ̆t cro năy. 6Ông dî du hôi cro te, la du hôi kon klo kơñ-kơloh, ông pơđơ amî gư̆n, cro lŭi-dơ̆t, trôh î ma ƀòn gư̆n, kơlôi lah: ‘Tơmpôl gư̆n rơp kingam kon klo mơ̆n.’ 7Mơya tơmpôl tăm ño gư̆n bơyê î găp lah: ‘Dô la cro cơdô̆ srăy brê. Swà jờh, ƀòn mơ̆n tơngsơ̆t cĕ gô, sŏng gư̆n srăy brê cơdô̆ rơp la jơno ƀòn mơ̆n dê.’ 8Bơh gư̆n ma-ngkơi jơ kơ̆p jư, tơmpôl gư̆n tơngsơ̆t cro-klo gư̆n, sŏng gư̆n mbư̆ng amî gư̆n đah makin buơn ño. 9Gư̆n-jîng, pơnhơm buơn ño rơp lơh mơmơh? Gô rơp trôh tơngroh tơmpôl tăm ño gư̆m jao buơn ño ma lơ̆gay cro nde. 10Lơ̆gay ƀòn ông hôm dahrăư đŏk jơno dô nơ̆m Sră-Goh ơ̆h?

‘Ne-lô̆ mà cro jăk băt hîh lơi căư,

lô̆ gư̆n sŏng dî sơlôh jîng lô̆ joñ hîh.

11Bră dô trôh bơh Yang,

gư̆m rơ̆ la bră phadêh nơ̆m măt ƀòn mơ̆n.’”

12Bơh gư̆n ƀòn gô jôi jơno kơ̆p Kơnràñ mơya ƀòn gô kơ̆mbrit lang bol, tài bơh ƀòn gô gư̆t lah Kơnràñ tơs jơno pơ̆niyô gư̆n sơntu ma ƀòn gô. Gư̆n-jîng tơm jơ swà pleh bơh Kơnràñ, ƀòn gô lơi swà.

13Sŏng gư̆n ƀòn gô pơđơ nhẵư hê cro gôtrê băl tơmpôl Pharisi gư̆m gôtrê băl bơnòr Herôt trôh ma Kơnràñ lơi ƀòn gư̆n jôi cai Kơnràñ nơ̆m jơno tơs. 14Tơm tô̆ trôh, ƀòn gô tơs î Kơnràñ lah: “Ơ cro bơtău, ƀòn hî gư̆t lah cro bơtău la cro tơpăt-ngăn, gư̆m anẵu cro bơtău, ơ̆ tom bră kơlôi jăt du hôi cro găy, bơh cro bơtău ơ̆ lăng nơ̆m đah makin cro dê, tơblơ̆ wăl, cro bơtău ƀăn mơntău gung dà Yang Tơm Trồ dê jăt iyŏ jơno-tơpăt. Tom iyŏ jơno bơlăm hala ơ̆ tơm jơ lơboh-dia ma Sesa? Ƀòn mơ̆n păl lơboh hala ơ̆ păl lơboh?” 15Mơya tài bơh gư̆t ờs dờm jơno mablăc ƀòn gô dê, Kơnràñ tơs î ƀòn gô lah: “Ngglơh lơ̆gay ƀòn ông lòng ăñ? Iyà cĕ ma ăñ du-dơñe lơi ăñ lăng.” 16Tîrơ̆ gư̆n ƀòn gô iyà trôh du đŏng, sŏng gư̆n Kơnràñ tơs î ƀòn gô: “Rồp gư̆m sơnăn dô la măt cro dê?” Ƀòn gô kla dẵư î Kơnràñ lah: “Sesa.” 17Jơ gư̆n, Yang Jesu tơs pơđơ ƀòn gô lah: “Kla cĕ ma Sesa lơ̆gay jơno găy Sesa dê, gư̆m kla ma Yang Tơm Trồ lơ̆gay jơno găy Yang Tơm Trồ dê.” Ƀòn gô lơ̆ să ndrăt-ndròt bơh Kơnràñ.

18Sŏng gư̆n tơmpôl cro Saduse, la tơmpôl cro tơs lah ơ̆ tom jơno jîng wăl, trôh ma Kơnràñ gư̆m khao lùp Kơnràñ, lah: 19“Ơ cro bơtău, Môise sŏng cêh ma ƀòn mơ̆n lah: ‘Dilah amî du hôi cro năy dê lơwă rai lơi wăl bo-ua mà hôm dahrăư dî kon, gừn oh cro amî dê păl dưñ cro bo-ua gư̆n gư̆m lơi cơdô̆ nŏk-noi ma amî mơ̆n.’ 20Tom poh hê oh mi rơ̆; cro amî sơm dưñ bo sŏng gư̆n sơ̆t, ơ̆ tom dî kon, 21cro dơ̆ bea tơmhòp amî-ua gư̆n, sŏng gư̆n sơ̆t, ơ̆ dî kon, gư̆m cro dơ̆ păy kŭng tîgư̆n. 22Lơ̆gay poh hê kŭng ơ̆ dî kon. Lŭi lơ̆ ma-ngkơi, cro-ua gư̆n kŭng sơ̆t. 23Trôh jơ jîng wăl, tơm tô̆ ƀòn gô jîng wăl, amî-ua tò rơp la bo-ua cro găy dê nơ̆m khà ƀòn gô? Bơh poh hê cro kŭng sŏng dưñ amî-ua gư̆n lơh bo-ua.” 24Yang Jesu tơs î ƀòn gô lah: “Ơ̆-iyŏ ƀòn ông kŏng blăm swà tìs-kơ̆mprah bơh jơno dô ơ̆h, tài bơh ơ̆ wơng gư̆t Sră-Goh kŭng gư̆ptî gơnăp-gơnoăr Yang Tơm Trồ dê? 25Bơh tơm tô̆ cro jîng wăl bơh anẵu sơ̆t, cro ơ̆ tom lăp klo hala tombo ua, mơya ƀòn gô rơp gư̆ptî cro gơndrơh cŭngsî trồ. 26Hôm bơh bră cro sơ̆t dî jîng wăl, jơno lơ̆gay ƀòn ông hôm dahrăư đŏk nhòng sră Môise dê, ăm nơ̆m pơnah cêh bơh pôm lẵu, gư̆p tîgay mà Yang Tơm Trồ tơs î ông lah: ‘Ăñ la Yang Tơm Trồ Abraham dê, Yang Tơm Trồ Isăk dê, gư̆m Yang Tơm Trồ Jakôp dê’? 27Kơnràñ ơ̆-iyŏ la Yang Tơm Trồ cro sơ̆t dê, mà la cro jîng dê. Lơ̆gay ƀòn ông ndăng kađòng tìs dơng ngăn.”

28Tơm tô̆ du hôi nhòng lơ̆gay cro bơtău jơno-bơlăm sŏng trôh en, kơnău dî ƀòn gô ndăng tơmbơkai î găp, tơmpơl lah Kơnràñ kla dẵư tơmpôl ƀòn năy rgê ngăn, gừn ông lùp Kơnràñ lah: “Jơno găy la jơno-bơlăm dơng mang ngăn nơ̆m lơ̆gay?” 29Yang Jesu kla dẵư lah: “Jơno-bơlăm dơng mang ngăn la: ‘Ơ Israel, iet cĕ dô, Yang la Yang Tơm Trồ ƀòn mơ̆n, la Yang nư̆ng dul. 30Kon păl kơñ Yang la Yang Tơm Trồ kon dê băl î lơ̆ nùs-kơlôi mơ̆n, băl î lơ̆ hwîng-soan mơ̆n, băl î lơ̆ tơngoh jăk mơ̆n, gư̆m băl î lơ̆ pran ayua mơ̆n.’ 31Jơno bơlăm dơ̆ bea la dô: ‘Kon păl kơñ-kơloh cro tĕdơ kon dê gư̆ptî sătan mơ̆n.’ Ơ̆ tom jơno-bơlăm nde găy dơng rlo bea-lăm jơno dô.” 32Cro bơtău jơno-bơlăm tơs î Kơnràñ lah: “Iyŏ ngăn, ơ cro bơtău! Cro bơtău sŏng tơs jăt jơno tơpăt lah Kơnràñ la nư̆ng dul, gư̆m ơ̆ tom Yang nde găy rlo ma Kơnràñ. 33Kơñ kơloh Kơnràñ bơh î lơ̆gay nùs-kơlôi, băl î lơ̆gay tơngoh wơng, băl î lơ̆gay jơno pran-kơdăng, gư̆m kơñ-kơloh cro tĕdơ gư̆ptî sătan mơ̆n tien gơs dî dơng mang rlo lơ̆gay jơno ăn su duh-khoai î jơno ăn duh-khoai.” 34Ma-ngkơi jơ lăng ông, bơh ông sŏng kla dẵư dubă jăk-sai, Yang Jesu tơs î ông lah: “Ông ơ̆ wĭc bơh lơgơ Yang Tơm Trồ dê ơ̆.” Gư̆m ơ̆ cro găy khơ̆n khao lùp Kơnràñ te.

35Lơi kla dẵư, dơ̆ ndăng bơtău nơ̆m blang hîh duh-khoai, Yang Jesu tơs lah: “Mơmơh lơ̆gay cro gơnoăr cêh tơs lah Yang Dŏng-Klàs la kon bơtao Dabit? 36Să tơm bơtao Dabit, nơ̆m Yang Hwîng Goh, sŏng tơs lah:

‘Yang tơs î Yang ăñ lah:

“Nggui cĕ mađah ma Ăñ,

trôh dî jơ găy Ăñ ăn lơ̆gay cro tơmdră Kon sî kơnơl jư̆ng Kon dê.”’

37Sătan bơtao Dabit sơnăn Kơnràñ la ‘Yang,’ gừn amơh Kơnràñ la kon bơtao gư̆n dî?” Tơmpôl lang bol khăi iet kơnău Kơnràñ dubă sơhờp-sờhơn.

38Nơ̆m jơno bơtău Kơnràñ, Kơnràñ tơs lah: “Păl kơhea î lơ̆gay cro gơnoăr cêh, la lơ̆gay cro sơhờp-sờhơn ñă swà nơ̆m ôi ao rơnjai, lơ̆gay jơno còp-să nhòng anẵu ƀòn drà, 39anẵu nggui niem nơ̆m hîh jơnư̆m băl î bơlao mađàp nơ̆m anẵu ñô sa. 40Lơ̆gay ƀòn gư̆n lon sa hîh cro-ua mơ̆ndro, lơh bleh hôi-dăn jŏ. Tơmpôl ƀòn dô rơp kŏng lơh-glài krañ-cê ngăn.”

41Sŏng gư̆n tơm tô̆ sŏng nggui nteàh tơpăt ndăng anẵu lơi ăn thô̆ng prăp ăn jên-priè hîh duh-khoai dê, Kơnràñ ăm lăng lang bol prăp jên nơ̆m thô̆ng mơmơh tîgay. Khăi cro kơnhơ̆p prăp ăn lơ̆gay khà priè dơng. 42Tơm tô̆ du hôi cro-ua mơ̆ndro kơsòt swà trôh, mò prăp ăn bea đŏng priè êt, dơng mang durư̆ng î du su. 43Ma-ngkơi jơ sŏng hôi lơ̆gay cro bơtê mơ̆n wăl, Kơnràñ tơs î ƀòn gô lah: “Iyŏ ngăn, ăñ tơs î oh mi lah cro-ua mơ̆ndro kơsòt dô sŏng ăn khăi rlo ma lơ̆gay kơp cro sŏng prăp ăn jên-priè nơ̆m thô̆ng năy. 44Bơh lơ̆gay ƀòn gô ăn bơh jơno tơngkah-tơngkăñ ƀòn gô dê, mơya mò gư̆n, bơh jơno kơsòt-rƀah mò dê, sŏng ăn lơ̆gay jơno mò dî, rơ̆ lơ̆gay jơno ăn-têm lơi rong jîng sătan mò.”