Luka 21

1Tơm tô̆ ngẵư măt cŭngsî, Kơnràñ tơmpơl tơmpôl cro kơnhơ̆p ăn phăn-mơna ƀòn gô nơ̆m tơ̆m hîh duh-khoai. 2Sŏng gư̆n Kơnràñ tơmpơl du hôi cro mơ̆ndro kơsòt năy ăñ nơ̆m gư̆n bea đŏng priè êt. 3Gừn Kơnràñ tơs: “Iyŏ ngăn, ăñ tơs î oh mi lah cro mơ̆ndro kơsòt dô sŏng ăn khăi rlo lơ̆gay, 4Bơh lơ̆gay cro năy iyà ăn lơ̆gay jơno ăn tơngkah-tơngkăñ mơ̆n dê. Hôm mò dô, bơh anẵu prŏi kơsòt mơ̆n dê, sŏng ăn lơ̆gay jên-priè mà mò dî.”

5Tơm tô̆ nhẵư hê cro ndăng tơs bơh hîh duh-khoai, lah hîh dî bơka bơh î lô̆ niem mơnĕ î lơ̆gay phăn-ăn jăt nùs, gừn Kơnràñ tơs: 6“Lơ̆gay jơno mà oh mi ndăng tơmpơl, rơp trôh nge mà nơ̆m jơ gư̆n, ơ̆ tom ne-lô̆ găy dî rơndăp cŭng lô̆ nde mà ơ̆ kŏng rlăm.” 7Jơ gư̆n, ƀòn gô lùp Kơnràñ lah: “Tîgư̆n, ơ cro bơtău, jơ găy rơp tom lơ̆gay bră gư̆n, gừn têl phadêh tơlôh mơmơh tơm tô̆ lơ̆gay bră gư̆n mơñ tom tơlôh?” 8Sŏng gư̆n Kơnràñ kla dẵư: “Kơhea cĕ lơi oh mi ơ̆ kŏng pơlum. Bơh khăi cro rơp trôh e sơnăn ăñ, tơs lah: ‘Rơ̆ la Ăñ,’ gừn ‘Nge lŭi-dơ̆t sŏng trôh en lờt.’ Bư̆ng swà jăt ƀòn gô. 9Pơnah nde, tơm tô̆ oh mi kơnău bơh jơno kơlîn-kơtoă î sơlô̆ng-sơlăng, gừn bư̆ng kơ̆mbrit, bơh lơ̆gay bră rơ̆ păl tom tơlôh lai, mơya, jơno dơ̆t-lŭi hôm dahrăư ơ̆-iyŏ la ƀăt jơ gư̆n.”

10Ma-ngkơi gư̆n, Kơnràñ tơs î ƀòn gô: “Lang bol dô rơp ñă atẵy tơmdră wăl lang bol nde, î lơgơ dô tơmdră lơgơ năy. 11Rơp tom băl lơ̆gay jơno wăñ-lơnggơh ù dơng î khăi jơno jơgloh-dơng, băl î khăi jơno kòp jê nơ̆m khăi anẵu. Rơp tom băl lơ̆gay jơno pluh plang î lơ̆gay têl dơng bơh trồ. 12Mơya lai lơ̆gay bră gư̆n, cro nde rơp e tê ƀòn gô cŭng oh mi î kơ̆p cơkhă oh mi, tơm tô̆ jao nap ma lơ̆gay hîh jơnư̆m î jôi gung, iyà oh mi trôh sơđàp măt lơ̆gay bơtao î cro kwăng dơng tài bơh sơnăn ăñ. 13Jơno gư̆n rơp jîng tô̆ lơwah lơi oh mi tơs sơđah jơno cư̆ng-tang. 14Gư̆n-jîng, păl lơh nên nơ̆m nùs oh mi ơ̆ rcăng lai lơi tơmpẵu dêh. 15Bơh ăñ rơp e ma oh mi jơno tơs î jơno jăk-sai mà lơ̆gay cro tơmdră oh mi ơ̆ rgê tơmdră wăl hala tơmbơkai dî. 16Mơya oh mi tien gơs rơp kŏng jao nap bơh mơi bàp, oh mi, găp ƀòn î bơyô, sŏng gư̆n cro nde rơp tơngsơ̆t du pơnah cro nhòng oh mi. 17Oh mi rơp kŏng lơ̆gay cro tơcao bơh sơnăn ăñ. 18Mà du-dăng săy sŏ cŭng găl oh mi kŭng ơ̆ roh ha-ău dî. 19Nơ̆m jơno kŏng-ăt ăt-ăl mơ̆n, oh mi rơp dî hwîng-soan mơ̆n.

20Mơya dilah jơ găy oh mi tơmpơl ƀòn dơng Jerusalem kŏng rwang tĕdơ bơh tơmpôl lĭñ, gừn jơ rơ̆ păl gư̆t lah jơno phà tơngroh ƀòn dơng dô sŏng trôh en lờt. 21Dơ̆ gư̆n, cro găy nhòng ƀòn Juđe, toat ămpôn cĕ lêh cŭng-yồ, cro găy ăm nhòng ƀòn dơng, swà tơlôh cĕ, gừn cro găy ăm nơ̆m ƀlang srăy, bư̆ng mơ̆t nhòng ƀòn dơng. 22Bơh dô la lơ̆gay nge kla tê lơi lơ̆gay jơno sŏng cêh dî sơlôh gôjîng iyŏ ngăn. 23Mơya, jê-gleh ma cro-ua ndăng tơwă î tơmpôl cro mơi ndăng e ma kon pô nơ̆m lơ̆gay nge gư̆n! Bơh rơp tom jơno rŭng-rai nơ̆m ƀòn, î jơno tơcao dơng trôh cŭng găn lang bol dô. 24Ƀòn gô rơp blă sơ̆t nteàh măt đao î ƀòn gô kŏng cro iyà trôh lơ̆gay lơgơ, î ƀòn dơng Jerusalem rơp kŏng lơ̆gay lang bol bơdih jă pên trôh dî jơ mà tô̆ tơnge lang bol bơdih dî wêl-tăl.

25Rơp tom lơ̆gay têl phadêh-phadai cŭngsî măt tơnge, măt khe băl î lơ̆gay sơmăñ, gừn jơno moat-jrum lơ̆gay nŏk-noi ăm nteàh ù nơ̆m jơno kơ̆mbrit-kơ̆mbròt bơh jơno kơ̆ntàs ndrăm dàlîng î kơbôt dàlîng pran ngăn. 26Cro nde hwơi-nùs blă bơh kơ̆mbrit î ăm cang lơ̆gay jơno rŭng-rai mơñ jư nteàh lang bol nơ̆m ù, bơh lơ̆gay gơnoăr cŭng trồ rơp wăñ-lơnggơh. 27Ma-ngkơi gư̆n, ƀòn gô rơp tơmpơl Kon-Mơnùs trôh nơ̆m khŏk tô̆ băl î jơno gơnăp-gơnoăr gư̆m jơno gơklŏ dơng mang. 28Mơya tơm tô̆ lơ̆gay bră gư̆n sơntơm tom tơlôh, păl ñă atẵy î ngẵư yơng găl mơ̆n, bơh jơno dŏng-klàs oh mi ndăng trôh en.”

29Kơnràñ tơs ma ƀòn gô du jơno pơ̆niyô: “Lăng cĕ sî ƀăl î lơ̆gay sî nde. 30Kơp jơ găy gô mhăy sơ̆mbơ̆t gơcăt nha, oh mi gư̆t, tơm tô̆ lăng tơmpơl dêh, lah kơnnhe dôh sŏng trôh en lờt. 31Kŭng tîgư̆n, tơm tô̆ oh mi tơmpơl lơ̆gay bră dô tom tơlôh, oh mi păl gư̆t lah lơgơ Yang Tơm Trồ trôh en sŏng. 32Iyŏ ngăn, ăñ tơs î oh mi lah rai dô nên-nôn ngăn rơp ơ̆ ha-ău trôh dî jơ lơ̆gay bră năy tom tơlôh. 33Trồ î ù rơp roh, mơya lơ̆gay jơno ăñ tơs nên-nôn ngăn rơp ơ̆ jơ găy roh dî.

34Mơya kơhea cĕ î sătan mơ̆n, lơi nùs oh mi ơ̆ kŏng kơjơ̆-kơjùt nơ̆m bră ñô sa, mañơ̆l-lơmbẵy î lơ̆gay jơno kơù-kơan rai dô, tien gơs nge gư̆n digơlăn sơni-sơna trôh jư nơ̆m oh mi 35gư̆ptî dî kơ̆ndăp, bơh jơno gư̆n rơp tom tơlôh ma lơ̆gay cro jîng nơ̆m kơp ple-ù. 36Mơya păl kah-rngăl nơ̆m kơp dơ̆, hôi-dăn lơi oh mi dî tăl pran lơi klàs bơh jơh lơ̆gay jơno mơñ tom tơlôh gư̆n, gừn lơi ñă sơđàp măt Kon-Mơnùs.”

37Bơh gư̆n la nơ̆m brê tơnge, Kơnràñ bơtău nơ̆m hîh duh-khoai; hôm tơm tô̆ brê mhău ñô̆ng, ma-ngkơi jơ swà hao lêh cŭng-yồ sơnăn la Ôlibe, Kơnràñ ăm bơdê tơmăng. 38Gừn lơ̆gay cro trôh ma Kơnràñ nơ̆m brê ang ndrư̆m lơi iet Kơnràñ nơ̆m hîh duh-khoai.