Luka 20

1Bră tom tơlôh nơ̆m du-nge năy, tơm tô̆ Kơnràñ ndăng ƀăn mơntău lang bol nơ̆m hîh duh-khoai î bơtău Jơno Niem, lơ̆gay cro gơnoăr ăn jơno duh-khoai gư̆m lơ̆gay cro bơtău jơno bơlăm băl î tơmpôl kwăng kră trôh tơmtom Kơnràñ. 2Ƀòn gô tơs î Kơnràñ lah: “Dăn e ma ƀòn hî gư̆t bơh gơnoăr găy mà cro bơtău lơh lơ̆gay bră dô, hala cro găy la cro sŏng e ma cro bơtău gơnoăr dô.” 3Mơya lơi kla dẵư, Kơnràñ tơs î ƀòn gô lah: “Ăñ kŭng rơp lùp ƀòn ông du sên, tơs cĕ ma ăñ gư̆t: 4Jơno gơnoăr lơh ƀaptem Jăng la bơh trồ hala bơh kon-mơnùs?” 5Bơh gư̆n la ƀòn gô bơyê î găp, tơs lah: “Dilah ƀòn mơ̆n tơs: ‘Bơh trồ,’ ông gư̆n rơp lùp: ‘Tîgư̆n ngglơh ƀòn mê ơ̆ don Jăng?’ 6Hôm dilah ƀòn mơ̆n tơs: ‘Bơh kon-mơnùs,’ gừn du lang bol rơp kơdang lô̆ ƀòn mơ̆n, bơh lang bol don Jăng la cro gơnoăr-hwơr.” 7Sŏng gư̆n ƀòn gô kla dẵư lah ƀòn gô ơ̆ gư̆t bơh sơgăy. 8Yang Jesu tơs î ƀòn gô: “Ăñ kŭng ơ̆ e ƀòn ông gư̆t bơh gơnoăr găy ăñ lơh lơ̆gay bră gư̆n.”

9Sŏng gư̆n Kơnràñ sơntơm tơs jơno pơ̆niyô dô ma lang bol: “Du hôi cro năy tăm du buơn ño, gừn e ma tơmpôl cro tăm ño ơpah gô, sŏng gư̆n swà trôh nơ̆m lơgơ nde nơ̆m du jŏ tô̆ tơnge. 10Trôh kơnnhe ple, ông pơđơ du hôi cro dê̆-gơna trôh băl î tơmpôl tăm ño lơi ƀòn gô nap ma ông dưñ bơh công nha buơn ño. Mơya ma-ngkơi jơ pơng lơh, tơmpôl tăm ño sŏng tơmprơh gô trê tê gời. 11Ông pơdơ te du hôi cro dê̆-gơna nde trôh, mơya cro dô kŭng tîgư̆n, ƀòn gô sŏng tơmprơh gô trê tê gời ma-ngkơi jơ pơng lơh î tơngyŏ-tơnghiel. 12Sŏng gư̆n ông pơđơ te du hôi cro dê̆-gơna dơ̆ păy trôh, mơya ƀòn gô kŭng pơng lơh cro gư̆n sôh rmañ, mbư̆ng makin. 13Bơh gư̆n la, cro pơnhơm buơn ño tơs: ‘Ăñ păl lơh mơmơh dô? Ăñ rơp pơđơ kon klo kơñ-kơloh ăñ trôh. Digơlăn, ƀòn gô rơp kingam gô.’ 14Mơya tơm tô̆ tơmpôl tăm ño tơmpơl cro kon, ƀòn gô bơyê î găp, lah: ‘Dô la cro cơdô̆ srăy-brê. Ƀòn mơ̆n tơngsơ̆t cĕ gô, lơi jini-jơno dô digơlăn gôjîng jơno ƀòn mơ̆n.’ 15Gừn ma-ngkơi jơ mbư̆ng cro kon rơ̆ makin buơn ño, ƀòn gô tơngsơ̆t cro gư̆n. Tîgư̆n, cro pơnhơm buơn ño rơp lơh mơmơh tîgay î tơmpôl gư̆n? 16Ông gư̆n rơp trôh tơngsơ̆t lơ̆gay tơmpôl tăm ño dô gừn jao buơn ño ma cro nde.” Tơm tô̆ kơnău tîrơ̆, ƀòn gô tơs: “Dăn jơno bră gư̆n ơ̆ tom tơlôh.” 17Mơya tơm tô̆ lăng ƀòn gô, Kơnràñ tơs: “Tîgư̆n, jơno sŏng cêh dô gơtha la amơh:

‘Ne-lô̆ mà cro băt tơngñă hîh lơi căư, sătan gô dî gôjîng lô̆ joñ hîh’?

18Cro găy duh nơ̆m lô̆ gư̆n rơp kŏng lề gơtrat. Hôm dilah cro găy mà lô̆ gư̆n duh lơgeh, gừn gô rơp lơh bơcah-lề cro gư̆n.”

19Sŏng gư̆n, lơ̆gay cro bơtău jơno-bơlăm băl î cro gơnoăr ăn jơno duh-khoai jôi jơno lơh jơh Kơnràñ ƀăt nơ̆m jơ gư̆n, mà ƀòn gô kơ̆mbrit lang bol, bơh ƀòn gô gư̆t lah Kơnràñ tơs jơno pơ̆niyô gư̆n la tơs bơh ƀòn gô. 20Tơm tô̆ jôi jăt Kơnràñ nê̆-năn, ƀòn gô pơđơ nhẵư hê cro swà jôi jăt lơh mư̆ng tî cro tơpăt, lơi ƀòn gô digơlăn kơp glài Kơnràñ nơ̆m jơno tơs, lơi jao nap Kơnràñ ma cro ăt-bồ î cro kwăng lơgơ. 21Tơmpôl ƀòn gư̆n lùp Kơnràñ lah: “Ơ cro bơtău, ƀòn hî gư̆t gư̆n la cro bơtău tơs î ƀăn mơntău dubă tơpăt-durư̆ng, ơ̆ kingam cro găy, mà cro bơtău tơs bơtău gung dà Yang Tơm Trồ nơ̆m jơno tơpăt-ngăn. 22Lơboh-dia ma Sesa la jơno păl dî gơnoăr î ƀòn mơ̆n hala ơ̆h?” 23Mơya bơh gư̆t đăl jơno lăc-leo ƀòn gô, Kơnràñ tơs î ƀòn gô: 24“E ma ăñ lăng du đŏng dơñe. Gô dî rồp î sơnăn cro găy?” Ƀòn gô kla dẵư: “Sesa dê.” 25Bơh gư̆n la Kơnràñ tơs î ƀòn gô: “Tîgư̆n, kla wăl cĕ ma Sesa lơ̆gay jơno Sesa, î kla ma Yang Tơm Trồ lơ̆gay jơno Yang Tơm Trồ.” 26Ƀòn gô ơ̆ kơ̆p dî jơno tơs rơ̆ sơđàp măt lang bol dî, gừn bơh ndrăt-ndròt nơ̆m jơno kla dẵư Kơnràñ, ƀòn gô ăm-ƀơt.

27Ma-ngkơi gư̆n, tơm tô̆ nhẵư hê cro gôtrê mađah Saduse swà trôh en, rơ̆ la tơmpôl cro tơs lah ơ̆ tom jơno jîng wăl, ƀòn gô khao lùp Kơnràñ 28lah: “Ơ cro bơtău, Môise sŏng cêh ma ƀòn mơ̆n, dilah amî cro găy gư̆n tơmhòp bo, mà tơm tô̆ sơ̆t, cro gư̆n hôm dahrăư dî kon, gừn oh cro gư̆n păl lơh bo î cro bo-ua mơ̆ndro dô gừn digơlăn lơh jîng du nŏk-noi ma amî mơ̆n. 29Gư̆n-jîng, hîh năy dî poh hê oh mi klo, gừn ma-ngkơi jơ tơmhòp bo, cro amî sơm sŏng sơ̆t ơ̆ dî kon; 30gừn cro dơ̆ bea 31sŏng gư̆n cro dơ̆ păy lơh bo î amî ua; mơya kư̆ tîgư̆n mà lơ̆ poh hê kŭng ơ̆ dî kon, gừn sơ̆t. 32Dơ̆t-lŭi ma-ngkơi, cro-ua kŭng sơ̆t. 33Tîgư̆n, nơ̆m nge jîng wăl, amî ua gư̆n rơp la bo-ua cro găy nhòng pơnah ƀòn gô? Bơh lơ̆ poh hê oh mi sŏng dưñ amî ua lơh bo?” 34Yang Jesu tơs î ƀòn gô: “Kon so rai dô gừn lăp klo, tombo ua. 35Hôm tơmpôl cro găy dî tơs la dî păl sơndơn rai ma-ngkơi î jơno jîng wăl bơh cro sơ̆t gừn ơ̆ lăp klo kŭng ơ̆ tombo ua. 36Bơh ƀòn gô kŭng ơ̆ sơ̆t dî te, bơh ƀòn gô rơp gư̆ptî cro gơndrơh; gừn ƀòn gô la lơ̆gay cro kon Yang Tơm Trồ, tơm tô̆ la kon so jơno jîng wăl. 37Hôm bơh bră cro sơ̆t jîng wăl gừn gư̆ptî Môise sŏng e tơmpơl anẵu mpồm lẵu, tơm tô̆ ông sơnăn Yang la Yang Tơm Trồ Abraham, Yang Tơm Trồ Isăk, î Yang Tơm Trồ Jakôp. 38Kơnràñ ơ̆ iyŏ la Yang Tơm Trồ cro sơ̆t, mà la cro jîng, bơh î Kơnràñ lơ̆gay la cro jîng.” 39Sŏng gư̆n tơm tô̆ nhẵư hê cro bơtău jơno-bơlăm kla wăl dẵư, ƀòn gô tơs lah: “Ơ cro bơtău, cro bơtău tơs iyŏ ngăn.” 40Ƀòn gô ơ̆ khơ̆n lùp Kơnràñ du sên găy te.

41Ma-ngkơi gư̆n, Kơnràñ tơs î ƀòn gô: “Ngglơh cro nde tơs Yang Dŏng-Klàs la kon Dabit? 42Bơh nơ̆m sră Tơs-crih, sătan Dabit tơs:

Yang tơs î Yang ăñ lah:

‘Nggui cĕ đah ma Ăñ,

43trôh dî jơ Ăñ lơh lơ̆gay cro tơmdră Kon jîng kơnơl ma jư̆ng Kon.’

44Tîgư̆n, Dabit sơnăn Kơnràñ la ‘Yang’ gừn mơmơh Kơnràñ la kon bơtao gư̆n dî?”

45Nơ̆m jơ lơ̆gay lang bol ndăng ăm iet, Kơnràñ tơs î lơ̆gay cro bơtê mơ̆n: 46“Kơhea cĕ î lơ̆gay cro bơtău jơno-bơlăm, la tơmpôl cro kơñ cù ao lơmŏng swà bơcoñ, kơñ jơno còp-să niem nơ̆m anẵu drà, î lơ̆gay anẵu nggui dơng mang nơ̆m hîh jơnư̆m băl î anẵu yơng nơ̆m hîh ñô sa, 47mà ƀòn gô sa lon hîh lơ̆gay cro mơ̆ndro, sŏng gư̆n hôi-dăn lơmŏng lơi cro nde gư̆t. Tơmpôl ƀòn gư̆n rơp dưñ-lăñ jơno cahrña kơjơ̆ rlo te.”