Luka 19

1Tơm tô̆ sŏng mơ̆t nhòng, Kơnràñ swà găn ƀòn dơng Jerikô. 2Gừn lăng cĕ du hôi cro, dî sơnăn la Sace, ông la cro ăt-bồ lơ̆gay cro lơboh-dia, î ông gư̆n kơnhơ̆p-mơ̆nda. 3Ông jôi gung lăng tơmpơl Yang Jesu la mơ̆t cro, mà ông ơ̆ lơh dî bơh nhòng tơmpôl khăi ngăn, bơh ông dî să-jăn lồt lŭi. 4Sŏng tơm tô̆ cơplŏk trôh mađàp, ông hao cŭng sî-hra lơi ông digơlăn tơmpơl Kơnràñ bơh Kơnràñ mơñ swà găn nơ̆m gung gư̆n. 5Tơm tô̆ Kơnràñ swà trôh anẵu rơ̆, ngẵư lăng cŭngsî, Yang Jesu tơs î ông lah: “Ơ Sace, jư nteàh khơñ, bơh nge dô ăñ kơñ păl ăm nơ̆m hîh mê.” 6Tîrơ̆ la ông sơbăc-sơbăng jư nteàh î sơhờp-sờhơn wă-rẵu Kơnràñ. 7Tơm tô̆ tơmpơl tîgư̆n, lang bol rƀu, tơs lah: “Ông gư̆n mơ̆t nơ̆m hîh băl î du hôi cro tom glài.” 8Mơya tơm tô̆ Sace ñă tơlôh, ông tơs î Yang lah: “Khoai Yang, dăn lăng dô, ăñ tơmpà nggùl phăn-mơna ăñ ma cro kơsòt, gừn dilah ăñ tom pơlum cro găy jơno găy, ăñ rơp tăm kla wăl pơngăp puôn dơ̆.” 9Jơ gư̆n, Yang Jesu tơs î ông lah: “Nge dô jơno dŏng-klàs sŏng mơ̆t nơ̆m hîh dô, bơh cro dô kŭng la kon so Abraham dê. 10Bơh Kon-Mơnùs sŏng trôh lơi jôi î dŏng-klàs cro sơ̆t-roh.”

11Ndăng jơ ƀòn gô kơnău lơ̆gay jơno rơ̆, Kơnràñ sơntơm tơs du-lăm jơno pơ̆niyô, bơh Kơnràñ ndăng ăm en Jerusalem, mà ƀòn gô kơlôi lah lơgơ Yang Tơm Trồ dê mơñ tơlôh trôh anẵu lờt. 12Bơh gừn, Kơnràñ tơs lah: “Du hôi cro dơng mang năy swà trôh lơgơ wĭc ngăn lơi sătan mơ̆n dưñ lăñ gơnoăr ăt-bồ lơgơ sŏng trê wăl. 13Ma-ngkơi jơ hôi jư̆t hê cro dê̆-gơna mơ̆n trôh, ông jao ma ƀòn gô jư̆t đŏng priè gư̆m tơs î ƀòn gô lah: ‘Păl lơh tơlôh công nha nơ̆m jơ ăñ swà wĭc.’ 14Mơya lang bol ông dê ngañ ông gừn pơđơ du tơmpôl cro ala măt jăt ma-ngkơi ông, tơs lah: ‘Ƀòn hî ơ̆ kơñ cro dô ăt-bồ ƀòn hî.’ 15Bră tơlôh jơ ông swà trê, ma-ngkơi jơ sŏng dưñ lăñ gơnoăr ăt-bồ lơgơ, ông pơđơ hôi trôh tơmtom mơ̆n lơ̆gay cro dê̆-gơna mà ông sŏng jao priè, lơi ông digơlăn gư̆t ƀòn gô sŏng lơh tơlôh công nha găy bơh bră lơh sa. 16Sŏng gư̆n, cro dơ̆ sơm trôh, tơs lah: ‘Ơ pơnhơm, blieng priè ông sŏng lơh tơlôh jư̆t đŏng priè.’ 17Pơnhơm tơs î cro gư̆n: ‘Ơ cro dê̆-gơna tơpăt niem, niem ngăn. Bơh mê sŏng don tơpăt-ngăn nơ̆m bră êt rlo, gư̆n-jîng mê păl ăt-bồ cŭngsî jư̆t-lăm ƀòn dơng.’ 18Gừn cro dơ̆ bea trôh, tơs lah: ‘Ơ pơnhơm, đŏng priè ông sŏng dî lơh tơlôh prăm đŏng priè.’ 19Sŏng gư̆n cro pơnhơm kŭng tơs î cro dô: ‘Mê kŭng rơp ăt-bồ prăm-lăm ƀòn dơng.’ 20Du hôi cro nde trôh, tơs lah: ‘Ơ pơnhơm, dăn lăng đŏng priè ông mà ăñ păl jư; dî prăp jư ăn nơ̆m thơk, 21Bơh ăñ kơ̆mbrit ông, bơh ông la cro krañ-cê. Ông dưñ nơ̆m anẵu mơ̆n ơ̆ ăn, î koh nơ̆m anẵu mơ̆n ơ̆ tăm.’ 22Pơnhơm pơđơ cro gư̆n: ‘Jăt gư̆ptî jơno mê tơs, ăñ rơp lơh-glài mê, cro dê̆-gơna bờk-mơsăk. Mê gư̆t lah ăñ la cro krañ-cê, dưñ nơ̆m anẵu ăñ ơ̆ ăn, î koh nơ̆m anẵu ăñ ơ̆ tăm. 23Tîrơ̆ gừn ngglơh mê ơ̆ pơyoa priè ăñ nơ̆m hîh đam prăp priè, lơi tơm jơ ăñ trê wăl, ăñ kŭng dưñ wăl priè rơ̆ băl î priè công nha?’ 24Sŏng gư̆n ông tơs î lơ̆gay cro ndăng ñă sî gư̆n: ‘Dưñ cĕ đŏng priè bơh cro dô mà dờp ma cro dî jư̆t đŏng priè.’ 25Ƀòn gô tơs î ông lah: ‘Ơ pơnhơm, cro gư̆n ndăng dî jư̆t đŏng priè lờt.’ 26‘Ăñ tơs ma ƀòn mê gư̆t, cro găy dî rơp dî e bơtăl te, mơya bơh cro ơ̆ dî, rơp kŏng dưñ lơ̆gay kơp jơno gô ndăng dî. 27Hôm lơ̆gay cro tơmdră î ăñ năy, la lơ̆gay cro ơ̆ kơñ ăñ ăt-bồ cŭng ƀòn gô, lơboh cĕ ƀòn gô trôh ma dô gừn tơngsơ̆t ƀòn gô sơđàp măt ăñ.’”

28Ma-ngkơi jơ tơs lơ̆gay jơno rơ̆, Kơnràñ pơnjăt te swà lai, swà trôh Jerusalem.

29Bră tơmtom jơ Kơnràñ swà mơñ trôh Ƀetphage î Ƀethani, trôh anẵu yồ grồi dî sơnăn la Ôlibe, Kơnràñ pơđơ bea hê cro bơtê, 30pơđơ lah: “Swà mơ̆t cĕ nơ̆m ƀòn mađàp măt, tơm tô̆ mơ̆t nơ̆m gư̆n, oh mi rơp tơmpơl du-lăm alang kon kŏng kăt, mà nơ̆m alang gư̆n dahrăư cro găy hao. Ma-ngkơi jơ hồ săy kăt gô, iyà trê ma dô. 31Dilah cro găy lùp oh mi lah: ‘Ngglơh ƀòn mê hồ săy kăt gô?’ gừn oh mi rơp tơs lah: ‘Yang kơñ ngui gô.’” 32Tîrơ̆ la, tơm tô̆ bea hê cro sŏng dî pơđơ swà, ƀòn gô tơmpơl jơno bră gư̆ptî Kơnràñ sŏng tơs î ƀòn gô. 33Dơ̆ ƀòn gô ndăng hồ săy kăt alang kon, lơ̆gay pơnhơm alang tơs î ƀòn gô: “Ngglơh ƀòn mê hồ săy kăt alang kon?” 34Ƀòn gô kla dẵư lah: “Yang kơñ ngui gô.” 35Sŏng gư̆n ƀòn gô tề alang trê ma Yang Jesu gừn ma-ngkơi jơ deh ao rơnjai mơ̆n cŭngsî rô̆ng alang, ƀòn gô tơnghao Yang Jesu cŭngsî. 36Tơm tô̆ Kơnràñ swà găn, cro nde deh ao rơnjai ƀòn gô nơ̆m gung. 37Dơ̆ Kơnràñ swà mơñ trôh tơnư̆ng yồ Ôlibe lờt, lơ̆gay tơmpôl cro bơtê khăi sơntơm sơhờp-sờhơn, dreo dơng du-dẵư băl jong-rơ Yang Tơm Trồ bơh lơ̆gay bră gơnăp-gơnoăr ma ƀòn gô sŏng tơmpơl, 38lah: “Lơngăp-lơnge la cro bơtao trôh nhòng sơnăn Yang! Lơngăp-lơnge cŭngsî trồ, gừn jơno gơklŏ cŭngsî anẵu yơng rlo!” 39Du pơnah cro Pharisi bơh nơ̆m tơmpôl lang bol tơs î Kơnràñ: “Ơ cro bơtău, dăn ƀoah-đas lơ̆gay cro bơtê cro bơtău.” 40Kla wăl dẵư ƀòn gô, Kơnràñ tơs: “Ăñ pơđơ ƀòn ông, lah dilah ƀòn gô ăm-ƀơt gừn lơ̆gay lô̆ dô rơp dreo dơng.”

41Tơm tô̆ Kơnràñ swà trôh en, dơ̆ lăng tơmpơl ƀòn dơng, Kơnràñ ñim bơh gô, 42tơs lah: “Iyŏ ngăn mê sŏng gư̆t đăl nhòng nge dô, ngăn sătan mê păl gư̆t, lơ̆gay jơno găy iyà trôh jơno lơngăp-lơnge! Mơya, gô gư̆n sŏng kŏng tơmbàk bơh măt mê. 43Bơh rơp tom nge tơlôh trôh nơ̆m mê, lơ̆gay cro tơmdră mê rơp lơh piê cơkhă tĕdơ mê, ƀòn gô rơp rwang mê, î sơrềp mê bơh kơp đah. 44Ƀòn gô rơp tơnglề mê băl î kon so mê, ăm nhòng mê. Sŏng ƀòn gô rơp ơ̆ lơi du-ne lô̆ găy hôm dăp cŭngsî du-ne lô̆ nde nơ̆m anẵu mê, tài bơh mê ơ̆ gư̆t tô̆ tơnge mơ̆n dî swà còp rwang.”

45Sŏng tơm tô̆ mơ̆t nhòng hîh duh-khoai, Kơnràñ sơntơm tơmprơh lơ̆gay cro kă-brău nơ̆m gư̆n, 46tơs î ƀòn gô: “Tom jơno cêh lah: ‘Hîh Ăñ la hîh hôi-dăn,’ mơya lơ̆gay ƀòn mê sŏng lơh gô jîng trôm anẵu tơmpôl cro kơntô̆ng.”

47Kơp nge Kơnràñ kư̆ bơtău nơ̆m hîh duh-khoai. Hôm lơ̆gay cro gơnoăr ăn jơno duh-khoai, lơ̆gay cro gơnoăr bơtău jơno-bơlăm î cro gơnoăr ăt-bồ lang bol jôi jơno tơngsơ̆t Kơnràñ, 48gừn ƀòn gô ơ̆ jôi dî jơno găy mà ƀòn gô digơlăn lơh, bơh lơ̆gay lang bol nê̆-năn iet jơno Kơnràñ tơs.