Luka 22

1Nge Bơjư̆m-Sa Ƀăñ Ơ̆ Tom Dong, dî sơnăn la Bơjư̆m-Sa Swà Găn, ndăng trôh en. 2Lơ̆gay cro gơnoăr ăn jơno duh-khoai î cro bơtău jơno-bơlăm ndăng jôi jơno găy gư̆n mà ƀòn gô digơlăn tơngsơ̆t Kơnràñ, bơh ƀòn gô kơ̆mbrit lang bol.

3Sŏng gư̆n cà Satan mơ̆t ñăp nơ̆m să Juđa, cro dî sơnăn la Iskariôt, ăm nhòng pơnah jư̆t-bea hê cro bơtê. 4Gừn, tơm tô̆ sŏng trôh tơmtom, gô tơmbơyê î lơ̆gay cro gơnoăr ăn jơno duh-khoai gư̆m cro kwăng lĭñ lăng jư hîh duh-khoai gôtrê bơh jơno gô digơlăn jao nap Kơnràñ ma ƀòn gô. 5Ƀòn gô sơhờp ngăn î bơyê e ma gô jên-priè. 6Gô du nùs băl gừn jôi tô̆ lơwah jao nap Kơnràñ ma ƀòn gô tơm tô̆ ơ̆ tom măt lang bol.

7Sŏng gư̆n nge Bơjư̆m-Sa Ƀăñ Ơ̆ Tom Dong trôh, la nge mà cro nde păl iyà ăn jơno duh-khoai belàt kon Bơjư̆m-Sa Swà Găn. 8Yang pơđơ Pier î Jăng swà, ƀăn tơngkah lah: “Swà rcăng cĕ jơno Bơjư̆m-Sa Swà Găn ma ƀòn mơ̆n, lơi ƀòn mơ̆n sa băl.” 9Ƀòn gô tơs î Kơnràñ: “Cro bơtău kơñ ƀòn hî rcăng jơno sa anẵu găy?” 10Sŏng gư̆n Kơnràñ kla dẵư ƀòn gô: “Dô, tơm tô̆ oh mi sŏng mơ̆t nhòng ƀòn dơng, du hôi cro-klo iyà pồ dà rơp tơmtom oh mi. Swà jăt cĕ cro gư̆n mơ̆t nơ̆m nhòng hîh mà cro gư̆n mơ̆t. 11Gừn oh mi rơp tơs î cro pơnhơm hîh: ‘Cro bơtău tơs î ông lah: “Anẵu ơdô̆ năc cro bơtău digơlăn sa Bơjư̆m-Sa Swà Găn î lơ̆gay cro bơtê ăñ jê ăm anẵu găy?”’ 12Ông gư̆n rơp sơđah ma oh mi du-lăm ơdô̆ dơng nơ̆m cŭngsî dî rcăng lơs jơno. Pồ cĕ jơno ñô să nơ̆m gư̆n.” 13Bơh gư̆n, tơm tô̆ sŏng swà gung, ƀòn gô tơmpơl bră tơlôh gư̆ptî jơno Kơnràñ sŏng tơs î ƀòn gô. Gừn ƀòn gô rcăng jơno ma nge Bơjư̆m-Sa Swà Găn.

14Tơm tô̆ jơ sa trôh, Kơnràñ nggui nơ̆m kaƀang, gừn lơ̆gay cro bơtê nggui băl î Kơnràñ. 15Kơnràñ tơs î ƀòn gô: “Î jơno kơ̆p kơñ, ăñ sŏng kơñ sa Bơjư̆m-Sa Swà Găn dô î oh mi lai matô̆ ăñ kŏng jê-gleh. 16Bơh Ăñ tơs î oh mi, lah ăñ nên-nôn ngăn rơp ơ̆ sa nge bơjư̆m dô trôh dî jơ nge bơjư̆m rơ̆ dî lơh sŏng nơ̆m lơgơ Yang Tơm Trồ.” 17Gừn ma-ngkơi jơ dưñ woan î ưnngai, Kơnràñ tơs: “Dưñ iyà cĕ woan dô î tơmpà ma găp. 18Bơh ăñ tơs î oh mi, bơh dô lêh ma-ngkơi, ăñ nên-nôn ngăn rơp ơ̆ ñô ple ño dô te, trôh dî jơ lơgơ Yang Tơm Trồ trôh.” 19Gừn ma-ngkơi jơ dưñ ƀăn î ưnngai, Kơnràñ pêh ƀăñ gừn dờp ma ƀòn gô, tơs lah: “Dô la să-jăn ăñ, bơh oh mi mà kŏng phi. Lơh cĕ jơno dô nơ̆m jơno sơdơ kah bơh ăñ.” 20Kŭng gư̆p tîgư̆n î woan, ma-ngkơi jơ sa sŏng, Kơnràñ tơs lah: “Woan dô la jơno hăư mhăy nhòng mham Ăñ, la mham kŏng hua tơlôh bơh oh mi. 21Mơya, lăng năy, kơ̆mpang tê cro tơmdră Ăñ ăm nơ̆m kaƀang băl î Ăñ. 22Bơh bulah Kon-Mơnùs tơlôh swà jăt gư̆ptî jơno sŏng dî lơh nên, mơya sơòs-sơngeh ma cro gư̆n, la cro mà bơh gô, Kơnràñ kŏng blơ̆-dră.” 23Ƀòn gô sơntơm tơmbơkai î găp cro tîgư̆n digơlăn la mơ̆t cro nhòng ƀòn gô, la cro ndăng sơmơn lơh bră gư̆n.

24Bơh gư̆n, du jơno tơmbơkai kŭng tom tơlôh nhòng ƀòn gô gôtrê bơh cro găy gư̆n nhòng pơnah ƀòn gô dî lăng la dơng rlo. 25Bơh gư̆n, Kơnràñ tơs î ƀòn gô: “Lơ̆gay cro bơtao kơp lơgơ ngui gơnoăr-pran ăt-bồ cro nde, gư̆m lơ̆gay cro kwăng ƀang ăt-bồ cŭng lang bol dî sơnăn la cro e sơmah. 26Mơya î oh mi gừn ơ̆ dî tîgư̆n. Ala sơgư̆n, cro dơng rlo nơ̆m oh mi păl gôjîng gư̆ptî cro êt rlo; î cro ăt-bồ gư̆ptî cro dŏng bră. 27Bơh cro găy dơng rlo, cro nggui sa hala cro duh bră? Ơ̆ iyŏ la cro nggui sa ơ̆h? Tîrơ̆ mà ăñ ăm nhòng oh mi gư̆ptî du hôi cro dŏng bră. 28Mơya oh mi la tơmpôl cro sŏng dubă băl î ăñ nơ̆m lơ̆gay jơno lòng ăñ dê. 29Ăñ kŭng e ma oh mi, gư̆ptî Bàp ăñ sŏng e lơgơ ma Ăñ, 30lơi oh mi digơlăn ñô sa băl kaƀang ăñ nơ̆m lơgơ ăñ dê, î nggui cŭng sơban cahrña jư̆t-bea nŏk-noi Israel.

31Ơ Simôn, Simôn, lăng tò, Satan kơñ prah dơ mê gư̆ptî kôi-mi. 32Mơya ăñ sŏng hôi-dăn ma mê lơi jơno don mê ơ̆ roh ha-ău. Gừn mê, tơm tô̆ sŏng blăc trê wăl, lơh cĕ ma lơ̆gay oh mi mơ̆n pran-kơdăng.” 33Mơya gô tơs î Kơnràñ: “Ơ Yang, ăñ rcăng sŏng swà băl î Kơnràñ ƀăt băl î mơ̆t nơ̆m hîh jam gư̆m trôh anẵu sơ̆t.” 34Mơya Kơnràñ tơs: “Ơ Pier, Ăñ tơs î mê, nge dô ia kwăng rơp ơ̆ ndro lai jơ mê khan ơ̆ gư̆t ăñ păy dơ̆.”

35Kơnràñ tơs î ƀòn gô: “Tơm tô̆ ăñ pơđơ oh mi swà ơ̆ iyà băl î kơdôk priè, kơdô̆ng, cơkhŏ jep, oh mi ơ̆ tom prŏi jơno găy, ngăn ơ̆?” Ƀòn gô tơs: “Ơ tom jơno găy.” 36Sŏng gư̆n Kơnràñ tơs î ƀòn gô: “Mơya jơ dô, mơ̆t cro dî kơdôk priè, păl dưñ cĕ, gừn kơdô̆ng kŭng tîgư̆n. Mơ̆t cro hôm dahrăư dî pàs-đao, brău cĕ ao rơnjai mơ̆n mà tăc. 37Bơh ăñ tơs î oh mi lah jơno sŏng dî cêh dô păl sơlôh gôjîng iyŏ ngăn anẵu ăñ: ‘Gừn gô sŏng kŏng cêh băl î tơmpôl cro lơh glài.’ Bơh ngăn jơno tơs bơh ăñ păl sơlôh ngăn.” 38Bơh gư̆n, ƀòn gô tơs: “Ơ Yang, lăng dô, anẵu dô tom bea-lăm pàs-đao.” Kơnràñ tơs î ƀòn gô: “Tîgư̆n la tăl.”

39Ma-ngkơi jơ tơlôh swà, Kơnràñ swà trôh yồ Ôlibe gư̆ptî jơno ờs dơm, hôm lơ̆gay cro bơtê kŭng swà jăt Kơnràñ. 40Tơm tô̆ sŏng swà trôh anẵu, Kơnràñ tơs î ƀòn gô: “Păl hôi-dăn lơi ơ̆ gôtơmơ̆t nơ̆m jơno pơlum.” 41Kơnràñ pleh wĭc bơh anẵu ƀòn gô pơngăp du bông lô̆, gừn cơdơn krô̆ng nteàh, Kơnràñ hôi-dăn, 42lah: “Khoai Bàp, dilah Bàp kơñ, dăn tă woan dô bơh sơ Kon. Bulah tîgư̆n, ơ̆-iyŏ bơh nùs Kon, tơblơ̆ wăl, dăn jơno kơñ Bàp sơlôh jîng.” 43[Du hôi cro gơndrơh bơh cŭng trồ tơlôh sơđah sơđàp Kơnràñ, bơtăl pran ma Kơnràñ. 44Nơ̆m nhòng jơno jê-gleh, Kơnràñ sî hôi-dăn jơh nùs, î bơ hal Kơnràñ gôjîng gư̆ptî lơ̆gay mham hua duh nơ̆m ù.] 45Tơm tô̆ ñă atẵy bơh anẵu hôi-dăn, Kơnràñ swà trôh anẵu lơ̆gay cro bơtê, Kơnràñ tơmpơl ƀòn gô ndăng bĭc bơh moat-jrum. 46Kơnràñ tơs î ƀòn gô: “Ngglơh oh mi bĭc? Ñă lôh hôi-dăn cĕ, lơi oh mi ơ̆ gôtơmơ̆t nơ̆m jơno pơlum.”

47Tơm tô̆ Kơnràñ hôm ndăng tơs, lăng tò, du tơmpôl khăi î cro dî sơnăn la Juđa, du hôi nhòng jư̆t-bea hê cro bơtê, bơlăm găl ƀòn gô, Gô trôh en Yang Jesu lơi cư̆m Kơnràñ. 48Mơya Yang Jesu tơs î gô: “Juđa, mê blơ̆-dră Kon-Mơnùs î du-lăm jơno cư̆m ya?” 49Tơm tô̆ tơmpôl cro tĕdơ Kơnràñ tơmpơl bră mơñ tom tơlôh, ƀòn gô lùp: “Ơ Yang, ƀòn hî tom kă kla wăl tê bơh î pàs-đao ya?” 50Du hôi cro năy nhòng pơnah ƀòn gô sŏng păc dê̆-gơna cro gơnoăr bơlăm-găl ăn jơno duh-khoai dơng, gừn păc tĕ tua đah ma gô. 51Mơya kla wăl dẵư, Yang Jesu tơs lah: “Lơi cĕ bră dô!”. Gừn tơm tô̆ tơbi anẵu tua gư̆n, Kơnràñ sămƀeah ma gô. 52Ma-ngkơi gư̆n, Yang Jesu tơs î tơmpôl cro trôh kơ̆p Kơnràñ, rơ̆ la lơ̆gay cro gơnoăr ăn jơno duh-khoai, lơ̆gay cro ăt-bồ lĭñ hîh duh-khoai, gư̆m lơ̆gay cro kwăng kra, lah: “Ƀòn ông trôh iyà băl î pàs-đao gư̆m mư̆ng gư̆ptî kơ̆p cro kơntô̆ng ya? 53Kơp nge, tơm tô̆ ăñ ăm băl î ƀòn ông nơ̆m hîh duh-khoai, ƀòn ông ơ̆ e tê kơ̆p ăñ. Mơya dô la jơ ƀòn ông î jơno gơnoăr ñô̆ng.”

54Sŏng gư̆n, ma-ngkơi jơ kơ̆p jư Kơnràñ, ƀòn gô iyà swà gừn lơboh trôh nơ̆m hîh cro gơnoăr bơlăm-găl ăn jơno duh-khoai dơng. Hôm pier jăt Kơnràñ bơh ma wĭc. 55Dơ̆ sŏng su du ƀù oềs nơ̆m nhòng ƀlang î nggui băl î găp, Pier nggui băl î ƀòn gô. 56Jơ gư̆n, du hôi cro-ua dê̆ năy, tơm tô̆ tơmpơl ông ndăng nggui ăm en oềs gừn lăng nê̆ nê̆ ma ông, gô tơs: “Ông dô kŭng ăm băl î cro năy.” 57Mơya ông khan, lah: “Ơ e, ăñ ơ̆ tom gư̆t ông gư̆n ờ.” 58Du-yoa te, du hôi cro nde, tơm tô̆ tơmpơl ông, gừn tơs: “Mê kŭng gôtrê mađah tơmpôl ƀòn gô.” Mơya Pier tơs: “Ơ mê, ơ̆ iyŏ ăñ.” 59Pơngăp du jơ jŏ te, du hôi cro nde te tơs lah: “Ngăn la cro dô kŭng ăm băl î cro năy, bơh cro gư̆n kŭng la lang bol Galile.” 60Mơya Pier tơs: “Ơ cro năy, ăñ ơ̆ wơng mê ndăng tơs jơno găy.” Ƀăt jơ gư̆n, nơ̆m jơ ông hôm ndăng tơs, du-lăm ia kwăng ndro jai. 61Yang tơmblăc lăng Pier, gừn Pier sơdơ wăl jơno Yang tơs, mơmơh tîgay Kơnràñ sŏng tơs î mơ̆n lah: “Nge dô, lai matô̆ ia kwăng ndro, mê rơp khan ăñ păy dơ̆.” 62Gừn tơm tô̆ sŏng swà tơlôh makin, ông ñim alô̆ng dubă sràt-bơtăng.

63Tơmpôl cro ăm jư Kơnràñ sŏng tơngyŏ-tơnghiel, pơng lơh Kơnràñ. 64Kăt măt Kơnràñ wăl lờt, tơmpôl gô lùp Kơnràñ lah: “Tơs hwơ cĕ! Mơ̆t cro la cro lơh ông?” 65Ƀòn gô tơs î Kơnràñ khăi jơno sơmăm tìs nde te.

66Mhăy jơ brê ang, lơ̆gay cro kwăng kra nơ̆m lang bol, nơ̆m gư̆n tom lơ̆gay cro gơnoăr ăn jơno duh-khoai î cro bơtău jơno-bơlăm, sŏng bơjư̆m wăl gừn ƀòn gô iyà Kơnràñ trôh anẵu Tơmpôl Jơnư̆m Dơng mơ̆n, 67tơs lah: “Dilah ông la Yang Dŏng-Klàs, tơs cĕ ma ƀòn hî.” Mơya Kơnràñ tơs î ƀòn gô: “Dilah ăñ tơs ma ƀòn ông, nên-nôn ngăn ƀòn ông ơ̆ don; 68hôm dilah ăñ khao lùp, nên-nôn ngăn ƀòn ông ơ̆ kla dẵư. 69Mơya bơh dô lêh ma-ngkơi, Kon-Mơnùs rơp nggui đah ma Yang Tơm Trồ gơnăp-gơnoăr.” 70Jơ gư̆n, tơmpôl ƀòn gô lùp: “Tîgư̆n, ông la Kon Yang Tơm Trồ ya?” Sŏng gư̆n Kơnràñ tơs tơnggư̆t î ƀòn gô: “Să tơm ƀòn ông ndăng tơs lah ăñ la Bơtao rơ̆.” 71Bơh gư̆n la ƀòn gô tơs: “Ƀòn mơ̆n hôm kơñ cro lơh cư̆ng jơno găy te? Bơh să tơm ƀòn mơ̆n sŏng kơnău bơh dẵư gô.”