Luka 23

1Lơ̆gay tơmpôl ƀòn gô ñă atẵy, iyà Kơnràñ swà trôh ma Pilat. 2Ƀòn gô sơntơm yă Kơnràñ, lah: “Ƀòn hî tơmpơl cro dô bơtrôt nùs lang bol ƀòn hî, cơkhă ƀòn gô lơboh-dia ma Sesa, gư̆m sơnăn dêh mơ̆n la Yang Dŏng-Klàs, rơ̆ la bơtao.” 3Jơ gư̆n, Pilat khao lùp Kơnràñ lah: “Tom iyŏ mê la Bơtao lang bol Juđa ya?” Mơya tơm tô̆ klă dẵư ông gư̆n, Kơnràñ tơs: “Să tơm ông tơs tîgư̆n.” 4Ma-ngkơi gư̆n, Pilat tơs î lơ̆gay cro gơnoăr ăn jơno duh-khoai î tơmpôl lang bol: “Ăñ ơ̆ jôi tom glài găy anẵu cro-klo dô.” 5Mơya ƀòn gô kư̆ tơs miek miek lah: “Gô bơtrôt nùs lang bol, bơtău lơ̆gay kơp lơgơ Juđe, sơntơm bơh Galile trôh dî anẵu dô.” 6Tơm tô̆ Pilat kơnău tîrơ̆, ông khao lùp Kơnràñ tom iyŏ la lang bol Galile. 7Tơm tô̆ gư̆t dî lah Kơnràñ ăm nteàh gơnoăr Bơtao Herôt, ông gư̆n jao Kơnràñ ma Herôt, sătan bơtao kŭng ndăng ăm anẵu Jerusalem nơ̆m lơ̆gay nge gư̆n.

8Tơm tô̆ Herôt tơmpơl Yang Jesu, ông sơhờp ngăn bơh ông kơp kơñ tơmtom Kơnràñ bơh yo ngăn lờt, bơh sŏng kơnău jơno pơndrơ bơh Kơnràñ, gư̆n-jîng ông kơp kơñ lăng tơmpơl jơno phadêh-phadai găy gư̆n dî lơh tơlôh bơh Kơnràñ. 9Bơh gư̆n la, ông lùp Kơnràñ nơ̆m khăi jơno, mơya Kơnràñ ơ̆ kla wăl du-dẵư ông găy ờ. 10Hôm lơ̆gay cro gơnoăr ăn jơno duh-khoai î cro bơtău jơno-bơlăm ñă sơgư̆n yă glài Kơnràñ mơsăk ngăn. 11Sŏng gư̆n băl Herôt gư̆m lĭñ ông tơngyŏ Kơnràñ, gừn ma-ngkơi jơ tơngyŏ-tơnghiel Kơnràñ, tơngcù ao bơkao gơcrà ma Kơnràñ, ông gư̆n lơboh kla wăl Kơnràñ ma Pilat. 12Jơ gư̆n, băl Herôt î Pilat sŏng gôjîng cro bơyô î găp nơ̆m nge gư̆n, bơh lai mađàp gư̆n ndăng tom jơno tơmdră nhòng bea hê ƀòn gô.

13Pơnjăt te, ma-ngkơi jơ Pilat e bơjư̆m wăl lơ̆gay cro gơnoăr ăn jơno duh-khoai, lơ̆gay cro kwăng lơgơ î lang bol, 14ông tơs î ƀòn gô: “Ƀòn ông iyà trôh ma ăñ cro-klo dô gư̆ptî cro pơlum lang bol, gừn lăng năy, ma-ngkơi jơ khao lùp cro gư̆n sơđàp măt ƀòn ông, ăñ ơ̆ jôi tom nhòng cro dô glài bờk-mơsăk găy mà ƀòn ông ndăng yă kơ̆p glài tơmdră wăl cro gư̆n. 15Mơya ơ̆ iyŏ nư̆ng tîgư̆n gời, Herôt kŭng ơ̆ tơmpơl jơno găy, bơh Bơtao sŏng jao gô wăl ma ƀòn hî, gừn lăng cĕ, ơ̆ tom jơno găy sŏng dî lơh bơh gô la păl sơ̆t. 16Gư̆n-jîng, ma-ngkơi jơ pơng lơh gô, ăn rơp hồ gô swà.” 17[Pơnah nde, kơp nge bơjư̆m băl, ông dî jơno lơh nên păl hồ du hôi cro kŏng jam ma ƀòn gô.] 18Mơya ƀòn gô du nùs băl dreo dơng, lah: “Iyông cĕ gô cŭngsî, gừn hồ Ƀaraƀa ma ƀòn hî!” 19(Cro dô kŏng kơ̆p nơ̆m hîh jam bơh du jơno sơlô̆ng-sơlăng năy tơlôh nơ̆m ƀòn dơng î bơh glài tơngsơ̆t cro.) 20Jơ gư̆n, Pilat mơ̆ndơm ƀòn gô du dơ̆ te, bơh kơñ hồ Yang Jesu. 21Mơya ƀòn gô dreo dơng lah: “Pư̆ng điñ cĕ! Pư̆ng điñ gô cĕ cŭngsî sî pư̆ng.” 22Sŏng gư̆n ông gư̆n tơs î ƀòn gô dơ̆ păy: “Bơh jơno bờk-mơsăk găy mà cro dô sŏng lơh? Ăñ ơ̆ jôi tom glài găy păl sơ̆t anẵu cro dô. Gư̆n-jîng, tơm tô̆ pơng lơh sŏng, ăn rơp hồ ma cro dô.” 23Mơya ƀòn gô kư̆ dreo dơng dẵư iyờp kơp kơñ Kơnràñ păl kŏng pơng điñ, gừn dẵư tơs ƀòn gô pha-lĭn sŏng. 24Pilat sŏng e jơno lơh nên lơi jơno kơp kơñ ƀòn gô dî păl lơh. 25Jơ gư̆n, ông gư̆n hồ cro kŏng tơng-gron nơ̆m hîh jam bơh glài lơh sơlô̆ng-sơlăng î tơngsơ̆t cro, la cro mà ƀòn gô sŏng pơđơ, mơya ông gư̆n jao Yang Jesu jăt nùs kơñ ƀòn gô.

26Nơ̆m jơ cro nde iyà Kơnràñ swà, bơh sŏng kơ̆p Simôn du hôi cro Siren năy, trôh bơh ƀòn êt, gư̆n-jîng ƀòn gô ăn sî pư̆ng nơ̆m să cro gư̆n lơi tî jăt ma-ngkơi Yang Jesu.

27Du tơmpôl lang bol khăi ngăn swà jăt Kơnràñ, gừn lơ̆gay cro-ua ñim-rèa ma Kơnràñ. 28Mơya tơm tô̆ tơmblăc lêh ma ƀòn gô, Yang Jesu tơs: “Ơ kon ua Jerusalem, bư̆ng ñim bơh ăñ, tơblơ̆ wăl, păl ñim bơh sătan mơ̆n gư̆m bơh kon so ƀòn e. 29Bơh lăng năy, lơ̆gay nge mơñ trôh, mà nơ̆m lơ̆gay nge gư̆n, cro nde rơp tơs: ‘Lơnge ma cro-ua kơnên, gư̆m ơ̆ bơda dî, băl î toh ơ̆ e pô.’ 30Dơ̆ rơ̆, cro nde rơp sơntơm tơs î lơ̆gay yồ grồi, ‘Duh cĕ nteàh ma ƀòn hî,’ gư̆m î lơ̆gay yồ grồi, ‘Tơmbàk cĕ ma ƀòn hî.’ 31Bơh dilah ƀòn gô lơh tîgư̆n anẵu sî hôm pơ̆t, gừn bră găy tơlôh anẵu sî rău?”

32Jơ gư̆n, bea hê cro glài nde, kŭng kŏng iyà lơi kŏng tơngsơ̆t băl î Kơnràñ.

33Tơm tô̆ ƀòn gô swà trôh du-anẵu dî sơnăn la “Katîng Găl,” gừn ƀòn gô pư̆ng điñ Kơnràñ nơ̆m gư̆n, băl î nhẵư hê cro tìs-glài — du hôi mađah ma hôm du hôi mađah eo. 34Sŏng gư̆n ƀòn gô tă khà tơmpà găp ao Kơnràñ. 35Lang bol ăm ñă sơgư̆n lăng nê̆, hôm cro kwăng ăt-bồ kŭng tơngyŏ-tơnghiel Kơnràñ, lah: “Gô sŏng dŏng-klàs cro nde, păl dŏng-klàs dêh sătan mơ̆n hă, dilah gô la Bơtao Dŏng-Klàs Yang Tơm Trồ dê, Bơtao dî Kơnràñ săc-rwơh.” 36Tơmpôl lĭñ kŭng tơngyŏ Kơnràñ, swà en dờp dà sràt ma Kơnràñ, 37sŏng gư̆n tơs lah: “Dilah mê la Bơtao lang bol Juđa gừn dŏng-klàs dêh sătan mê hă.” 38Nơ̆m cŭngsî Kơnràñ kŭng tom du-lăm jơno cêh: “Dô la Bơtao lang bol Juđa.”

39Du hôi nhòng bea hê cro tìs-glài ndăng kŏng iyông tơngyŏ Kơnràñ, lah: “Ơ̆-iyŏ ông la Yang Dŏng-Klàs ya? Dŏng-klàs cĕ să tơm mê î ƀòn hî jờh.” 40Mơya tơm tô̆ kla dẵư, cro tìs-glài năy ƀoah-đas gô, cro gư̆n tơs: “Mê kŭng ơ̆ gư̆t kơ̆mbrit Yang Tơm Trồ tơm tô̆ mê ndăng kŏng băl du jơno lơh glài ya? 41Bulah ƀòn mơ̆n tîdô la iyŏ ngăn, bơh ƀòn mơ̆n ndăng lăñ wăl jơno iyŏ ngăn î bră mơ̆n sŏng lơh, mơya cro dô ơ̆ lơh tìs jơno găy ờ.” 42Gừn cro gư̆n tơs: “Ơ Yang Jesu, tơm tô̆ cro bơtău mơ̆t nhòng lơgơ mơ̆n, dăn sơdơ trôh ăñ.” 43Kơnràñ tơs î gô: “Iyŏ ngăn, ăñ tơs î mê, nge dô mê rơp dî ăm î ăñ nhòng Ƀarađi.”

44Dơ̆ rơ̆ la pơngăp jơ dơ̆ pro lờt, mà ñô̆ng kơnăm trôh gôgom tĕdơ lơgơ trôh dî jơ dơ̆ sơ̆n. 45Măttơnge kơnăm ñô̆ng wăl. Hôm kơmang nhòng hîh duh-khoai kŏng tơcrè jîng bea-lăm. 46Ma-ngkơi jơ dreo dơng dẵư, Yang Jesu tơs: “Khoai Bàp, Kon jao hwîng-soan Kon nơ̆m tê Bàp.” Ma-ngkơi gư̆n, dơ̆ tơs sŏng jơno dô, Kơnràñ tĕ nhim lŭi-dơ̆t. 47Jơ gư̆n, ma-ngkơi jơ cro kwăng ăt-bồ tơmpơl bră sŏng tom tơlôh, ông jong-rơ Yang Tơm Trồ, lah: “Cro dô nên-nôn ngăn la cro tơpăt-durư̆ng.” 48Tơm tô̆ lơ̆gay lang bol khăi bơjư̆m bơh bră tơngsơ̆t dô tơmpơl lơ̆gay jơno sŏng tom tơlôh, gừn ƀòn gô pŏ-nùs swà trê. 49Hôm lơ̆gay cro găy gư̆t Kơnràñ băl î lơ̆gay cro-ua swà jăt Kơnràñ bơh Galile, ƀòn gô ờs sŏng ñă bơh ma wĭc jăt lăng lơ̆gay bră rơ̆.

50Tò, du hôi cro sơnăn Jôsep, la cro ăm nhòng tơmpôl kwăng tơrña la cro lơbăn-niem î tơpăt-durư̆ng. 51(Ông sŏng ơ̆ du nùs băl î tơmpôl cro kwăng tơrña gư̆m bră lơh ƀòn gô.) Ông cro ƀòn tơm bơh Arimathe, du ƀòn dơng cro Juđa, la cro ndăng cang kơnơm lơgơ Yang Tơm Trồ. 52Tơm tô̆ trôh tơmtom Pilat, sătan ông sŏng dăn ƀùc Yang Jesu. 53Gừn ma-ngkơi jơ tơngduh ƀùc Kơnràñ nteàh, ông pùc ƀùc bơh î bơtơi, gừn tăp nơ̆m mơ̆ntô ƀùc dî phàt nơ̆m trôm lô̆, anẵu hôm dahrăư tăp cro găy. 54Nge gư̆n la nge Rcăng, î nge Saƀat mơñ trôh. 55Jơ gư̆n, lơ̆gay tơmpôl cro-ua, la lơ̆gay cro sŏng trôh băl î Kơnràñ bơh Galile, tơm tô̆ swà jăt ma-ngkơi, ƀòn gô lăng tơmpơl mơ̆ntô ƀùc î amơh ăn ƀùc Kơnràñ dî tăp. 56Gừn tơm jơ swà trê, ƀòn gô rcăng sơnăm ƀô î mơñà ƀôhơ̆.

Trôh nge Saƀat, ƀòn gô ăm bơdê jăt jơno-bơlăm.