Luka 24

1Bơh gư̆n, nge sơm nơ̆m du poh, ƀòn gô swà trôh mơ̆ntô ƀùc, iyà băl sơnăm ƀô mà ƀòn gô sŏng rcăng. 2Mơya ƀòn gô tơmpơl mpông lô̆ sŏng dî tơngblă bơh mơ̆ntô, 3Mơya, tơm tô̆ mơ̆t nhòng, ƀòn gô ơ̆ tơmpơl ƀùc Yang Jesu. 4Bră tom tơlôh nơ̆m jơ ƀòn gô ndăng kơlôi mơrêh-mơrăñ bơh bră dô, gừn lăng năy, bea hê cro-klo cù ao ang gơcrà ñă sơđàp ƀòn gô. 5Dơ̆ ƀòn gô kơ̆mbrit î cun măt nơ̆m ù gừn bea hê cro gư̆n tơs î ƀòn gô: “Ngglơh ƀòn e jôi cro jîng nhòng anẵu cro sơ̆t? 6Kơnràñ ơ̆ ăm nơ̆m dô ờ, mơya Kơnràñ jîng wăl lờt! Sơdơ wăl cĕ Kơnràñ sŏng tơs amơh î oh mi rôh lŏ bơh tơm jơ hôm ăm anẵu Galile, 7tơs lah: Kon-Mơnùs păl kŏng cro phi jao nơ̆m tê tơmpôl cro tồi-glài gừn păl kŏng pư̆ng điñ nơ̆m sî pư̆ng, sŏng gư̆n trôh nge dơ̆ păy, păl jîng wăl.” 8Ƀòn gô sơdơ wăl jơno tơs Kơnràñ, 9gừn tơm tô̆ bơh anẵu mơ̆ntô ƀùc swà trê, ƀòn gô tơs wăl lơ̆gay bră ma jư̆t dul hê cro gơnoăr bơtău dơng băl î tơmpôl cro nde. 10Tơmpôl cro-ua gư̆n la Mari Madơlen, Jannơ, Mari mơi Jakơ, î lơ̆gay cro-ua nde băl î ƀòn gô, tơs wăl ma lơ̆gay cro gơnoăr bơtău dơng lơ̆gay bră gư̆n. 11Lơ̆gay bră tơs wăl gư̆n kơnău gư̆ptî ơ̆ iyŏ î lơ̆gay cro gơnoăr bơtău dơng, gư̆n-jîng ƀòn gô ơ̆ don nhẵư hê cro-ua dô. 12Mơya, Pier ñă cŭngsî, cơplŏk trôh nơ̆m mơ̆ntô ƀùc, gừn tơm tô̆ cun nteàh lăng nơ̆m nhòng, ông tơmpơl nư̆ng bơtơi ƀùc. Bơh gư̆n la ông swà trê nơ̆m hîh, lùp dêh bră găy sŏng tơngtrôh.

13Tò, nơ̆m tơm nge rơ̆, bea hê cro nhòng pơnah cro bơtê ndăng swà trôh du ƀòn wĭc sơnăn la Emmaus, pơngăp Jerusalem pro-jư̆t ettađơ, 14gừn ƀòn gô ndăng tơmbơyê î găp bơh lơ̆gay bră sŏng tơlôh. 15Bră tơlôh nơ̆m jơ ƀòn gô răk-sa î tơmbơyê, gừn să tơm Yang Jesu trôh en swà băl î ƀòn gô. 16Mơya măt ƀòn gô kŏng tơmbàk lơi ơ̆ gư̆t đăl Kơnràñ. 17Jơ gư̆n, Kơnràñ tơs î ƀòn gô: “jơno bră rơ̆ la amơh mà bea hê ƀòn mê bơyê î găp tơm jơ ndăng swà gung tîgư̆n?” Ƀòn gô ñă wăl nơ̆m gư̆n, moat-jrum ngăn. 18Sŏng gư̆n tơm tô̆ kla dẵư, du hôi cro sơnăn la Kơleôƀa tơs î Kơnràñ lah: “Tom iyŏ nư̆ng du hôi ông la cro năc swà còp Jerusalem ơ̆ gư̆t lơ̆gay bră sŏng tom tơlôh nơ̆m anẵu gư̆n nhẵư nge dô?” 19Kơnràñ lùp ƀòn gô: “Jơno bră găy gư̆n?” Sŏng gư̆n ƀòn gô tơs î Kơnràñ: “Bră gôtrê trôh bơh Yang Jesu cro Nasaret, mà gư̆n la du hê cro, du hôi cro gơnoăr-hwơr bîng gơnăp-gơnoăr nơ̆m bră lơh băl î jơno tơs sơđàp măt Yang Tơm Trồ î lơ̆gay lang bol, 20î mơmơh tîgay mà lơ̆gay cro gơnoăr ăn jơno duh-khoai dơng î cro kwăng ăt-bồ ƀòn mơ̆n sŏng phi jao Kơnràñ lơi kŏng glài tơngsơ̆t, gư̆m pư̆ng điñ Kơnràñ cŭng sî pư̆ng. 21Hôm ƀòn hî kơnơm lah Kơnràñ la Bơtao trôh lơi dŏng-klàs Israel. Tơblơ̆ wăl, ơ̆-iyŏ nư̆ng lơ̆gay bră tơs cŭngsî, jơno tơmtom gư̆n trôh nge dô la nge dơ̆ păy, tơs bơh tơm jơ lơ̆gay bră năy tơlôh. 22Mơya, nhẵư hê cro-ua nơ̆m nhòng ƀòn hî ngăn lơh ƀòn hî păl ndrăt-ndròt, ma-ngkơi jơ ăm anẵu mơ̆ntô ƀùc bơh ang ndrư̆m 23gừn dơ̆ ơ̆ tơmpơl ƀùc Kơnràñ, ƀòn gô trê, tơs wăl la sŏng tơmpơl jơno e tơnggư̆t bơh cro gơndrơh tơs Kơnràñ hôm jîng. 24Nhẵư hê cro nơ̆m ƀòn hî swà tơlôh bơh mơ̆ntô ƀùc gừn ƀòn gô sŏng tơmpơl gư̆p tîgư̆n, iyŏ ngăn gư̆ptî nhẵư hê cro-ua sŏng tơs, mơya ƀòn gô ơ̆ tơmpơl Kơnràñ.” 25Sŏng gư̆n Kơnràñ tơs î ƀòn gô: “Ơ tơmpôl cro wì-lơngôh gư̆m tơmpôl cro băt wơng nhòng nùs lơi don anẵu lơ̆gay jơno mà lơ̆gay cro gơnoăr-hwơr sŏng tơs! 26Ơ̆-iyŏ Yang Dŏng-Klàs păl kŏng lơ̆gay jơno gư̆n, lơi mơ̆t nơ̆m jơno gơklŏ Kơnràñ ơ̆h?” 27Sŏng gư̆n sơntơm bơh Môise, î bơh lơ̆gay cro gơnoăr-hwơr, Kơnràñ tơs nê̆ ma ƀòn gô lơ̆gay bră trôh Kơnràñ nơ̆m lơ̆ Sră-Goh. 28Ƀòn gô swà mơñ trôh nơ̆m ƀòn êt anẵu ƀòn gô kơñ swà, gừn Kơnràñ lơh gư̆ptî kơñ swà wĭc rlo. 29Gư̆n-jîng la ƀòn gô pơtĕo Kơnràñ, lah: “Dăn ăm wăl î ƀòn hî, bơh trồ mơñ tơmăng sŏng gư̆m nge mơñ lơ̆.” Kơnràñ swà mơ̆t lơi ăm wăl î ƀòn gô. 30Bră tom tơlôh tơm tô̆ Kơnràñ sŏng nggui nơ̆m kaƀang băl î ƀòn gô, iyà ƀăñ cŭngsî, Kơnràñ ưnngai, gừn ma-ngkơi jơ pêh ƀăñ, Kơnràñ dờp ma ƀòn gô. 31Jơ gư̆n, măt ƀòn gô dî tơmpơl gừn ƀòn gô gư̆t đăl Kơnràñ, sŏng gư̆n Kơnràñ sơlơ̆ ha-ău thơ̆t bơh sơ ƀòn gô. 32Ƀòn gô tơs î găp: “Ơ̆-iyŏ nùs ƀòn mơ̆n dôh khôl tơm jơ Kơnràñ răk-sa î ƀòn mơ̆n nơ̆m gung swà, kŭng gư̆ptî tơm jơ Kơnràñ tơs nê̆ Sră-Goh ma ƀòn mơ̆n ơ̆h?” 33Bơh gư̆n la tơm tô̆ ñă atẵy kŭng nơ̆m jơ gư̆n, ƀòn gô trê trôh Jerusalem. Gừn ƀòn gô jôi tơmtom jư̆t-dul hê cro gơnoăr bơtău dơng ndăng bơjư̆m wăl, băl tơmpôl cro tom măt î ƀòn gô, 34tơs lah: “Yang sŏng jîng ngăn wăl lờt, gừn Kơnràñ sŏng dî Simôn lăng tơmpơl.” 35Sŏng gư̆n ƀòn gô tơs wăl lơ̆gay bră nơ̆m gung swà, î amơh tîgay Kơnràñ sŏng e ƀòn gô gư̆t nơ̆m jơ pêh ƀăñ.

36Jơ gư̆n, tơm tô̆ ƀòn gô ndăng tơs lơ̆gay bră rơ̆, să tơm Kơnràñ ñă ăm nhòng ƀòn gô, gư̆m tơs î ƀòn gô: “Lơnge ma oh mi.” 37Mơya bơh kơ̆mbrit î ntơ să, ƀòn gô kơlôi la ndăng tơmpơl hwîng. 38Kơnràñ tơs î ƀòn gô: “Ngglơh oh mi mơrêh-mơrăñ î tài bơh jơno găy mà ping wêl-wăl ăn nhòng nùs oh mi? 39Lăng cĕ tê ăñ î jư̆ng ăñ, lah să tơm Ăñ dô. Tơbi cĕ nơ̆m ăñ gừn lăng. Bơh hwîng ơ̆ tom rlău î katîng, gư̆ptî oh mi gư̆t tơmpơl ăñ dî.” 40Tơs sŏng jơno gư̆n, Kơnràñ e ƀòn gô lăng tê î jư̆ng mơ̆n. 41Nơ̆m jơ ƀòn gô hôm dahrăư khơ̆n don î ndrăt-ndròt bơh sơhờp ngăn, Kơnràñ lùp ƀòn gô: “Nơ̆m dô, oh mi dî jơno găy sa dî ya?” 42Jơ gư̆n, ƀòn gô dờp ma Kơnràñ du-lăm ka khơng; 43Ma-ngkơi jơ iyà dưñ, Kơnràñ sa sơđàp măt ƀòn gô.

44Sŏng gư̆n Kơnràñ tơs î ƀòn gô: “Dô la lơ̆gay jơno tơs ăñ mà ăñ sŏng tơs î oh mi tơm jơ hôm ăm î oh mi, lah lơ̆gay jơno sŏng cêh bơh ăñ nơ̆m jơno-bơlăm Môise, lơ̆gay sră gơnoăr-hwơr î lơ̆gay sră Tơs-crih păl sơlôh gôjîng iyŏ ngăn.” 45Dơ̆ rơ̆. Kơnràñ pẵư tơngoh ƀòn gô lơi wơng Sră-Goh, gừn Kơnràñ tơs î ƀòn gô: 46lah: “Gư̆ptî tom jơno cêh: Yang Dŏng-Klàs păl kŏng gleh-glăr, gừn bơh anẵu sơ̆t jîng wăl nơ̆m nge dơ̆ păy, 47sŏng gư̆n jơno tơcao mbư̆ng glài lơi dî toh glài păl dî tơs bơtău e sơnăn Kơnràñ ma jơh lơ̆gay lang bol, sơntơm bơh Jerusalem. 48Oh mi la cro lơh cư̆ng bơh lơ̆gay bră gư̆n. 49Ăñ mơñ pơyoa jơno sŏng hăư pơngon Bàp ăñ trôh nơ̆m oh mi. Mơya oh mi ăm cĕ nhòng ƀòn dơng trôh dî jơ oh mi dî dưñ jơno gơnăp-gơnoăr bơh cŭng trồ.”

50Sŏng gư̆n Kơnràñ bơlăm ƀòn gô tơlôh makin trôh dî anẵu Ƀethani, gừn tơm tô̆ pẵư tê mơ̆n cŭngsî, Kơnràñ e lơnge ma ƀòn gô. 51Bră tom tơlôh nơ̆m jơ Kơnràñ e lơnge ma ƀòn gô, Kơnràñ swà bơh sơ ƀòn gô gừn dî iyà cŭngsî trồ. 52Ma-ngkơi jơ duh-khoai Kơnràñ, ƀòn gô blăc trê nơ̆m anẵu Jerusalem băl î jơno sơhờp-sờhơn ngăn, 53gừn lơ̆gay ƀòn gô kư̆ ăm nơ̆m hîh duh-khoai, jong-rơ Yang Tơm Trồ.