Luka 12

1Nhòng jơ rơ̆, tơm tô̆ tơmpôl khăi hang rbô hê cro bơjư̆m wăl, tien gơs jă pên găp, gừn lai ngăn, Kơnràñ sơntơm tơs î lơ̆gay cro bơtê mơ̆n: “Kơhea cĕ păl jư să-jăn klàs bơh dong cro Pharisi, rơ̆ la jơno lơh dơm nùs don mablăc. 2Mơya ơ̆ tom jơno găy kŏng ăn iyờp mà rơp ơ̆ dî tơs tơlôh makin, hala ămpôn ndăp mà rơp ơ̆ kŏng cro nde gư̆t. 3Gư̆n-jîng, dilah lơ̆gay jơno găy mà oh mi tơs nhòng kơnăm ñô̆ng rơp dî kơnău nơ̆m anẵu ang, gừn lơ̆gay jơno găy oh mi tơs rơmhòc anẵu tua nhòng adô̆ ndăp rơp dî tơs tơnggư̆t cŭng tơkang hîh. 4Bulah tîgư̆n, ăñ tơs î oh mi la lơ̆gay cro bơyô ăñ, bư̆ng kŏng kơ̆mbrit bơh cro tơngsơ̆t să-jăn, gừn ma-ngkơi gư̆n ơ̆ hôm jơno găy lơi lơh rlo dî te. 5Mơya ăñ rơp e tơnggư̆t ma oh mi gư̆t păl kơ̆mbrit cro găy. Kơ̆mbrit cĕ Bơtao, ma-ngkơi jơ tơngsơ̆t sŏng să-jăn, dî gơnoăr rơmbư̆ng cro nde nơ̆m brŏng-oềs. Ngăn, ăñ tơs î oh mi, păl duh kơ̆mbrit Bơtao rơ̆. 6Ơ̆-iyŏ prăm-lăm sêm-răc brău dî bea đŏng priè ơ̆h? Mà ơ̆ du-lăm sêm găy nhòng khà ƀòn gô kŏng lơi hwơbê̆ sơđàp măt Yang Tơm Trồ. 7Tîrơ̆ mà sŏ cŭngsî găl oh mi tien gơs sŏng dî yà lơ̆. Bư̆ng kơ̆mbrit: oh mi dơng mang rlo ma khăi sêm-răc. 8Ăñ tơs î oh mi dilah cro găy tơs tơlôh sơnăn ăñ sơđàp măt cro nde, gừn Kon-Mơnùs kŭng rơp tơs tơlôh sơnăn cro gư̆n sơđàp lơ̆gay cro gơndrơh Yang Tơm Trồ. 9Hôm cro găy khan lơi căư ăñ sơđàp măt cro nde gừn rơp kŏng khan lơi căư sơđàp lơ̆gay cro gơndrơh Yang Tơm Trồ. 10Gừn kơp cro găy tơs jơno tơmdră î Kon-Mơnùs rơp dî hồ, mơya î cro tơs tìs trôh Yang Hwîng Goh rơp ơ̆ dî hồ ơ̆h. 11Mơya tơm tô̆ cro nde iyà oh mi trôh nơ̆m lơ̆gay hîh jơnư̆m, tơmpôl cro ăt-bồ î tơmpôl cro kwăng ƀang, bư̆ng kơlôi mơ̆n păl pẵư dẵư tơmpẵu să amơh hala jơno găy, hala mơ̆n păl tơs jơno găy. 12Bơh nơ̆m ƀăt jơ gư̆n, Yang Hwîng Goh rơp bơtău oh mi lơ̆gay jơno păl tơs.”

13Ma-ngkơi gư̆n, du hôi cro nhòng tơmpôl khăi tơs î Kơnràñ: “Ơ cro bơtău, dăn pơđơ amî ăñ tơmpà jini-jơno î ăñ.” 14Mơya Kơnràñ kla dẵư î cro gư̆n: “Ơ amî, măt cro pồ ăñ lơh kwăng cahrña hala cro ăm nhòng tơmpà jini-jơno ma ƀòn amî?” 15Sŏng gư̆n Kơnràñ tơs î ƀòn gô: “Kơhea cĕ î jư să mơ̆n klàs bơh lơ̆gay jơno ờs dơm ham-hà, bơh jơno jîng du hôi cro ơ̆ ăm nơ̆m jơno tơngkah-tơngkăñ anẵu jini-jơno mơ̆n dê.” 16Tơmjăt bơh gư̆n, Kơnràñ tơs ma ƀòn gô du jơno pơ̆niyô lah: “Srăy miê du hôi cro kơnhơ̆p năy dî ple-đău ngăn, 17gừn gô kơlôi dêh lah: ‘Ăñ rơp lơh mơmơh dô, bơh ăñ ơ̆ hôm anẵu lơi prăp ăn ple-đău mơ̆n dê?’ 18Gô tơs: ‘Ăñ rơp lơh tîdô: “Ăñ rơp tơya lơ̆gay hîh tơ̆m mơ̆n, băt tơngñă lơ̆gay jơno dơng rlo te, gừn prăp ăn nơ̆m gư̆n lơ̆gay kôi phăy î lơ̆gay jini-jơno niem ăñ.” 19Sŏng gư̆n ăñ tơs î hwîng-soan mơ̆n: “Ơ hwîng-soan, mê sŏng dî khăi ngăn jini-jơno ăn lơi ma khăi năm. Păl sơhờp cĕ, ñô, sa î hơn-sờ.”’ 20Mơya Yang Tơm Trồ tơs î cro gư̆n: ‘Ơ cro wì-lơngôh năy, nơ̆m tơmăng dô hwîng-soan mê kŏng lơ-e wăl, sŏng gư̆n lơ̆gay jơno mà mê sŏng prăp ăn lơi rơp gôtrê ma cro găy?’ 21Cro prăp ăn lơi jini-jơno ma mơ̆n mà ơ̆ kơnhơ̆p nơ̆m Yang Tơm Trồ kŭng tîgư̆n.”

22Sŏng gư̆n Kơnràñ tơs î lơ̆gay cro bơtê mơ̆n lah; “Bơh jơno gư̆n, ăñ tơs î oh mi, bư̆ng kơlôi-rcăng bơh jơno jîng mơ̆n, rơp sa jơno găy — kŭng bư̆ng kơlôi bơh să-jăn mơ̆n, rơp cù jơno găy. 23Bơh jơno jîng la dơng mang rlo ma jơno sa, î să-jăn dơng mang rlo ma ôi-ao. 24Lăng cĕ jơi klang, rơ̆ la ƀòn gô ơ̆ sêh kŭng ơ̆ koh, ơ̆ tom dî hîh tơ̆m prăp hala anẵu prăp ăn ma ƀòn gô, mà Yang Tơm Trồ rong-siem ƀòn gô. Oh mi dơng mang rlo jơi sêm gư̆t nhẵư! 25Pơnah nde, cro găy nhòng oh mi, kơnơm bơh jơno kơlôi mơrêh-mơrăñ, digơlăn kơtô̆k bơtăl te ma nge kơnnhe du rai-jîng mơ̆n du êt phuk ơ̆h? 26Tîgư̆n, dilah oh mi ơ̆ lơh dî nư̆ng du bră êt ahên rơ̆, gừn ngglơh oh mi kơlôi mơrêh-mơrăñ bơh lơ̆gay bră nde? 27Lăng cĕ jơi bơkao brông — ƀòn gô dơng yơng dubă amơh. Ƀòn gô ơ̆ sơòs-gleh, kŭng ơ̆ kơtô̆k brài. Mơya ăñ tơs î oh mi, ƀăt băl î bơtao Salômôn, î lơ̆gay jơno gơklŏ bơtao rơ̆, kŭng ơ̆ dî cù niem gư̆p du bơkao găy nhòng khà ƀòn gô. 28Ơ cro êt jơno don, dilah Yang Tơm Trồ tơngcù tîgư̆n ma bơkao khơ̆ makin srăy la jơi nge dô hôm nge nhîng kŏng mbư̆ng nơ̆m nhă oềs, gừn oh mi khăi rlo ơ̆ gư̆t nhẵư. 29Oh mi bư̆ng jôi mơ̆n sa jơno găy î ñô jơno găy, kŭng bư̆ng kơlôi-sơnư̆ng. 30Bơh lơ̆gay nŏk-noi nơ̆m dunya ờs jôi lăng lơ̆gay jơno dô, mơya Bàp oh mi sŏng gư̆t lah oh mi kơñ lơ̆gay jơno gư̆n. 31Mơya, păl jôi lăng cĕ lơgơ Kơnràñ, gừn lơ̆gay jơno rơ̆ rơp dî bơtăl ma oh mi. 32Ơ tơmpôl êt, bư̆ng kơ̆mbrit, bơh Bàp oh mi sơhờp nùs dờp lơgơ ma oh mi. 33Brău cĕ jini-jơno mơ̆n î dờp e ma cro kơsòt. Rcăng cĕ ma mơ̆n kơdô̆ng ơ̆ tĕ blôh — rơ̆ la jơno dơng mang dê ơ̆ kŏng sìa roh ăm cŭng trồ, la anẵu cro kơntô̆ng ơ̆ trôh en, tuh kơmŏ kŭng ơ̆ ken sa ôm-lề dî. 34Bơh jini-jơno oh mi anẵu găy, gừn nùs oh mi kŭng ăm anẵu rơ̆.

35Bơ̆t oh mi păl dî kăt wăl, băl î đeng păl jư hit ang miek, 36gừn oh mi gư̆ptî tơmpôl cro ndăng ăm cang cro pơnhơm mơ̆n dơ̆ ông blăc trê bơh anẵu jơno sa tơmhòp, lơi ma-ngkơi tơm jơ trôh î toh mpông, ƀòn gô khơñ ngăn digơlăn pẵư jai ma cro pơnhơm. 37Lơnge ma lơ̆gay cro dê̆-gơna gư̆n la tơmpôl cro mà ma-ngkơi jơ trê trôh, cro pơnhơm rơp tơmpơl lơ̆gay cro dê̆-gơna ndăng lôh. Iyŏ ngăn, ăñ tơs î oh mi lah cro pơnhơm rơp kăt bơ̆t mơ̆n, î jà ƀòn gô nggui nơ̆m kaƀang sa, sŏng gư̆n cro pơnhơm dŏng bră ƀòn gô tơm jơ swà găn kơp cro. 38Ƀăt tơm jơ cro pơnhơm trôh nơ̆m jơ dơ̆ bea, hala tien gơs nơ̆m jơ dơ̆ păy, gừn cro pơnhơm digơlăn tơmpơl gư̆p tîgư̆n, gừn lơnge ma lơ̆gay dê̆-gơna gư̆n. 39Mơya păl wơng tîdô, rơ̆ la dilah cro pơnhơm hîh sŏng gư̆t jơ găy cro kơntô̆ng trôh, gừn ông iyŏ ngăn ơ̆ lơi hîh mơ̆n kŏng cro kơntô̆ng mơ̆t. 40Oh mi kŭng păl rcăng cĕ, bơh nơ̆m tô̆ tơnge mà oh mi ơ̆ kơlôi trôh, gừn Kon-Mơnùs rơp trôh.”

41Sŏng gư̆n Pier kla dẵư: “Khoai Yang, Kơnràñ ndăng tơs jơno pơ̆niyô dô ma ƀòn hî, hala kŭng e ma lơ̆gay cro?” 42Gừn Yang tơs: “Tîgư̆n, mơ̆t cro la cro ăt-bồ don-tơpăt, jăk-sai, la cro mà cro pơnhơm rơp pồ tơngñă ăn cŭngsî lơ̆gay cro dê̆-gơna mơ̆n, lơi tơmpà jơno sa ma ƀòn gô nơ̆m ñăm jơ? 43Lơnge ma cro dê̆-gơna gư̆n, la cro mà pơnhơm mơ̆n, tơm tô̆ trôh lăng, rơp tơmpơl ndăng lơh gư̆p tîgư̆n. 44Iyŏ ngăn, ăñ tơs î oh mi lah cro pơnhơm rơp pồ tơngñă cro dê̆-gơna gư̆n ăt-bồ lơ̆gay phăn-mơna mơ̆n dê. 45Mơya dilah cro dê̆-gơna gư̆n tơs nhòng nùs mơ̆n, lah: ‘Cro pơnhơm ăñ hôm jŏ ngăn gư̆n trê,’ gư̆n-jîng sơntơm pơng lơh lơ̆gay dê̆ klo î dê̆ ua, gư̆m sa gư̆m ñô, sŏng gư̆n kŏng mañơ̆l-lơmbẵy, 46gừn cro pơnhơm cro dê̆-gơna gư̆n rơp trê trôh nơ̆m nge mà gô ơ̆ kơlôi trôh, ngăn, nơ̆m jơ mà gô ơ̆ gư̆t, gừn cro pơnhơm rơp koh tĕ khăi să-jăn gô, sŏng gư̆n lơh nên anẵu ma gô băl î tơmpôl cro ơ̆ don. 47Cro dê̆-gơna gư̆n, la cro gư̆t nùs kơlôi cro pơnhơm mơ̆n mà ơ̆ rcăng hala lơh jăt nùs cro pơnhơm, rơp kŏng pơng khăi ngăn. 48Hôm cro dê̆-gơna ơ̆ gư̆t mà lơh bră dî păl kŏng glài rơp kŏng pơng êt. Pơnah nde, cro găy la cro dî dờp e khăi, gừn khăi jơno rơp kŏng lơ-e wăl anẵu cro rơ̆, gư̆m jăt bơh cro găy sŏng dî jao e khăi, lơ̆gay jơno găy rơp kŏng lơ-e wăl anẵu cro rơ̆ jîng khăi rlo te.

49Ăñ sŏng trôh lơi tư̆ng oềs nơ̆m ù, î ăñ kơp kơñ jơno găy dilah gô sŏng dî oềs sa lờt. 50Mơya ăñ hôm păl kŏng du-lăm gơnoăr ƀaptem, gừn ăñ moat-jrum gư̆t nhẵư trôh dî jơ gô dî lơh sŏng! 51Oh mi kơlôi lah ăñ trôh lơi iyà jơno lơngăp-lơnge ma dunya ơ̆h? Ơ̆ tom ờ, ăñ tơs î oh mi, ngăn rlo la jơno tơmcơlah. 52Bơh jơ dô, rơp tom prăm hê nhòng du hîh nhă kŏng tơmcơlah găp — păy tơmdră wăl bea gừn bea tơmdră wăl păy. 53Ƀòn gô kŏng tơmcơlah găp, bàp tơmdră wăl kon klo gừn kon klo tơmdră wăl bàp, mơi tơmdră wăl kon ua gừn kon ua tơmdră wăl mơi, mơi bo-klo tơmdră wăl bơtô ua mơ̆n gừn bơtô ua tơmdră wăl î mơi bo-klo.”

54Sŏng gư̆n Kơnràñ kŭng tơs î tơmpôl lang bol: “Tơm tô̆ oh mi rôh lŏ tơmpơl du khŏk tô̆ tơlôh sơđah anẵu măttơnge ñăp, oh mi rôh lŏ tơs jai lah: ‘Du tơnăng mih ndăng trôh,’ î bră tom tơlôh iyŏ gư̆p tîgư̆n. 55Hôm tơm tô̆ cal đah đăm khôm, oh mi rôh lŏ tơs lah: ‘Rơp tom tơnge tơal hơt,’ gừn bră tom tơlôh tîgư̆n. 56Ơ tơmpôl cro nùs don mablăc! Oh mi rôh lŏ gư̆t tơs sơđah nê̆ lơ̆gay bră sơlôh cŭng trồ î nơ̆m ù, mơya ngglơh oh mi rôh lŏ ơ̆ wơng gư̆t lơi tơs sơđah nê̆ tô̆ tơnge jai dô teh? 57Ngglơh oh mi rôh lŏ tien gơs ơ̆ swì lăng dêh să tơm mơ̆n jơno găy la iyŏ? 58Bơh ƀăt nơ̆m jơ oh mi rôh lŏ ndăng swà băl î cro yă yom mơ̆n trôh nơ̆m hîh cro kwăng ƀang, păl lơh lơ̆ gơnoăr pran lơi rơndăp nê̆-năn bră î cro gư̆n nơ̆m gung swà, lơi ƀòn gô ơ̆ kơtô̆k oh mi rôh lŏ trôh nơ̆m anẵu cahrña, sŏng gư̆n kwăng cahrña jao oh mi rôh lŏ ma cro kwăng lĭñ, gừn cro kwăng lĭñ tơmơ̆t oh mi rôh lŏ nơ̆m hîh jam. 59Ăñ tơs î oh mi rôh lŏ, nên-nôn ngăn oh mi rôh lŏ rơp ơ̆ tơlôh klàs bơh nơ̆m hîh jam trôh dî jơ oh mi rôh lŏ kla lơ̆ đŏng priè dơ̆t-lŭi.”