Luka 11

1Bră tom tơlôh tơm tô̆ Kơnràñ ndăng hôi-dăn nơ̆m du-anẵu năy, dơ̆ Kơnràñ hôi-dăn sŏng, du hôi nhòng lơ̆gay cro bơtê tơs î Kơnràñ lah: “Khoai Yang, dăn bơtău ƀòn hî hôi-dăn, gư̆ptî Jăng kŭng sŏng bơtău lơ̆gay cro bơtê mơ̆n.” 2Sŏng gư̆n Kơnràñ tơs î ƀòn gô: “Tơm tô̆ oh mi hôi-dăn, păl tơs lah:

‘Khoai Bàp, dăn sơnăn Bàp dî sang-goh.

Dăn lơgơ Bàp dî trôh.

3Dăn e ƀòn kon jơno sa kơñ ngui kơp nge ma ƀòn kon.

4Dăn toh glài ƀòn kon bơh tồi-glài ƀòn kon,

bơh ƀòn kon kŭng toh glài lơ̆gay cro kađòng dồs î ƀòn kon.

Dăn bư̆ng lơboh ƀòn kon nơ̆m jơno ơn-ñai.’”

5Gừn Kơnràñ tơs î ƀòn gô: “Mơ̆t cro nơ̆m oh mi dî bơyô, î nggùl măng swà trôh î cro gư̆n, sŏng tơs î gô lah: ‘Ơ bơyô, dăn e ăñ mơn păy-lăm ƀăñ, 6bơh du hôi cro bơyô ăñ bơh anẵu wĭc trôh î ăñ, mà ăñ ơ̆ tom jơno găy lơi pồ e ma bơyô rơ̆’? 7Tơm tô̆ cro năy bơh nhòng hîh kla dẵư, cro gư̆n tơs: ‘Bư̆ng lơh mơwăl ăñ. Mpông tơ̆l sŏng lờt, gừn ƀòn kon ăñ ndăng ăm cŭng cơnờng băl î ăñ. Ăñ ơ̆ lôh dî e ma mê jơno găy dî.’ 8Ăñ tơs î oh mi, tien gơs bulah cro rơ̆ ơ̆ lôh lơi dưñ e ma cro năy bơh la bơyô găp mơ̆n, mơya tài bơh jơno kư̆ dăn miek cro năy, gư̆n-jîng kŭng păl lôh, cro dô rơp dưñ ma cro năy tăl khà ƀăñ cro năy kơñ. 9Ăñ kŭng tơs î oh mi, dăn cĕ, gừn jơno rơ̆ rơp dî e ma oh mi; jôi cĕ, gừn oh mi rơp tơmtom, toh mpông cĕ, gừn mpông rơp pẵư ma oh mi. 10Bơh dilah cro găy dăn gừn dî; cro găy jôi gừn tom; gư̆m mpông rơp dî pẵư ma cro găy toh. 11Cro Bàp găy nhòng oh mi, tơm tô̆ kon mơ̆n dăn ka, gừn cro rơ̆ e gô beh ala bơh ka? 12Hala kon mơ̆n dăn tăp, gừn cro rơ̆ e ma gô a dieng? 13Gư̆n-jîng, dilah oh mi, bulah la bờk, sŏng gư̆t lơ̆gay jơno e gời niem lơi e kon so mơ̆n, gừn Bàp la Bơtao ăm cŭng trồ rơp e Yang Hwîng Goh ma cro dăn Kơnràñ khăi rlo mơmơh?”

14Kơnràñ mhăy tơmprơh du hôi cà kơmblău. Tîrơ̆ gừn, bră tom tơlôh tơm jơ cà sŏng tơlôh lờt, cro kơmblău tơs dî, gừn tơmpôl lang bol ndrăt-ndròt ngăn. 15Mơya nhẵư hê cro nhòng khà rơ̆ tơs: “Ông gư̆n tơmprơh cà, kơnơm Ƀeelseƀul, la bơtao cà.” 16Hôm pơnah nde, bơh lơi lòng Kơnràñ, ƀòn gô dăn anẵu Kơnràñ du-lăm têl phadêh bơh trồ. 17Mơya bơh sŏng gư̆t jơno kơlôi ƀòn gô, Kơnràñ tơs î ƀòn gô: “Lơgơ găy kŏng tơmcơlah tơmdră wăl dêh mơ̆n gừn kŏng lơh kơ̆mprah-kơ̆mprĭng, î kơp hîh tơmdră wăl kơp hîh gừn tơlah-rlăm. 18Dilah Satan kŭng kŏng tơmcơlah dêh tơmdră wăl nư̆ng sătan gô, gừn amơh lơgơ gô hôm miek miek dî? Bơh ƀòn ông tơs ăñ tơmprơh cà kơnơm bơh Ƀeelseƀul. 19Dilah gư̆ptî ăñ tơmprơh cà kơnơm bơh Ƀeelseƀul, gừn kơnơm bơh cro găy mà kon so ƀòn ông tơmprơh cà? Bơh jơno gư̆n, ƀòn gô rơp la tơmpôl cro cahrña ƀòn ông. 20Mơya, dilah ăñ tơmprơh cà kơnơm bơh kon tê Yang Tơm Trồ, gừn lơgơ Yang Tơm Trồ sŏng trôh î ƀòn ông. 21Tơm tô̆ du hôi cro pran-kơdăng dî cù jơno tơmlơh bîng-tăl jư̆m gom hîh mơ̆n, gừn jini-jơno cro rơ̆ dî lơngăp-lơnge, 22mơya tơm tô̆ du hôi cro pran rlo ma gô rơndôh lơh, gừn cro gư̆n pha-lĭn rlo ma gô, dưñ tă ao kato gô, la jơno mà cro gư̆n kơnơm, sŏng gư̆n cro gư̆n tơmpà jini-jơno kơntô̆ng dî bơh cro rơ̆. 23Cro găy tơm jơ ơ̆ ăm î ăñ la tơmdră wăl ăñ, î cro găy tơm jơ ơ̆ dubă băl î ăñ gừn kơ̆mprah-kơ̆mprĭng. 24Tơm tô̆ hwîng cà sŏng tơlôh bơh du hôi cro, gô swà găn lơ̆gay anẵu rău-răñ jôi lăng anẵu bơdê să. Gừn tơm tô̆ ơ̆ jôi dî, gô tơs lah: ‘Ăñ rơp blăc trê nơ̆m hîh ăñ, la anẵu mà ăñ sŏng swà tơlôh.’ 25Ma-ngkơi jơ swà trê trôh, gô tơmpơl hîh sŏng dî pàs was niem î rơndăp niem. 26Jơ rơ̆, gô swà î jà te poh-lăm cà nde bờk-mơsăk rlo ma gô mơ̆t ăm băl nhòng hîh dô. Gừn rai-jîng dơ̆ ma-ngkơi cro rơ̆ gôjîng bờk rlo dơ̆ sơm.”

27Bră tom tơlôh tơm tô̆ Kơnràñ ndăng tơs lơ̆gay jơno dô, du hôi cro-ua năy bơh nhòng tơmpôl khăi pẵư dẵư, mò tơs î Kơnràñ: “Lơnge ma cro lơh mơi cro bơtău î toh mà cro bơtău sŏng pô.” 28Mơya Kơnràñ kla dẵư: “Iyŏ ngăn gừn, lơnge ma cro găy kơnău jơno Yang Tơm Trồ î dưñ prăp jư.”

29Tơm tô̆ tơmpôl lang bol ndăng bơjư̆m khăi rlo, Kơnràñ sơntơm tơs lah: “Nŏk-noi dô la du nŏk-noi bờk-mơsăk. Gô jôi du-lăm jơno têl, mà ơ̆ tom têl sơđah găy dî e ma ƀòn gô nư̆ng sî têl sơđah ma Jôna. 30Bơh Jôna sŏng gôjîng têl sơđah amơh ma lang bol ƀòn dơng Ninibe, gừn Kon-Mơnùs kŭng rơp la têl sơđah tîrơ̆ ma nŏk-noi dô. 31Nhòng nge cahrña, Bơtao Ua Đah Đam rơp ñă atẵy băl î cro nŏk-noi dô, î cahrña ƀòn gô, bơh mò sŏng trôh bơh anẵu lŭi-dơ̆t ple-ù, lơi iet jơno jăk-sai bơtao Salômôn, gừn lăng năy, du hôi Bơtao dơng rlo Salômôn nơ̆m dô. 32Nhòng nge cahrña, lang bol ƀòn dơng Ninibe rơp ñă atẵy băl î nŏk-noi dô gừn rơp cahrña gô, bơh ƀòn gô tơcao mbư̆ng glài lai jơno Jôna tơs bơtău, gừn lăng năy, du hôi Bơtao hôm dơng rlo Jôna nơ̆m anẵu dô.

33Ma-ngkơi jơ su oềs đeng, ơ̆ cro găy ăn lơi gô anẵu bàk, kŭng ơ̆ lơi nteàh thô̆ng ăn jơno, mơya ăn cŭngsî jư̆ng đeng lơi tơmpôl cro găy lơbà mơ̆t nhòng digơlăn tơmpơl jơno ang. 34Oềs đeng să-jăn la gơ-măt oh mi rôh lŏ. Tơm tô̆ măt oh mi rôh lŏ la niem, lơ̆gay să-jăn oh mi rôh lŏ kŭng dî bîng-jut jơno ang. Mơya tơm jơ gô ƀiƀà, lơ̆gay să-jăn oh mi rôh lŏ kŭng dî bîng-jut jơno ñô̆ng. 35Gư̆n-jîng, kơhea-să cĕ, bư̆ng lơi jơno ang nhòng oh mi rôh lŏ la jơno ñô̆ng. 36Gừn dilah lơ̆gay să-jăn oh mi rôh lŏ bîng-jut jơno ang, ơ̆ tom pơnah găy kơnăm-kơnom, gừn gô rơp bîng-jut ang ƀlăk, gư̆ptî jơ oềs đeng bơang oh mi rôh lŏ.”

37Bơh gư̆n, tơm tô̆ Kơnràñ tơs sŏng, du hôi cro Pharisi jà Kơnràñ amơh lơi Kơnràñ digơlăn ăm să băl î ông. Tơm tô̆ sŏng swà trôh, Kơnràñ nggui nơ̆m kaƀang sa. 38Tơm tô̆ tơmpơl tîgư̆n, cro Pharisi ndrăt-ndròt ngăn bơh Kơnràñ ơ̆ lơh sơntơm rao tê lai jơ sa jơno. 39Mơya Yang tơs î ông: “Jơ dô, cro Pharisi ƀòn ông rao lơhiê đah makin cơdŏ î woan, hôm đah nhòng ƀòn ông gừn bîng jơno ham-kơñ î jơno bờk-mơsăk. 40Lơ̆gay cro mơngăl gơla năy! Ơ̆-iyŏ Bơtao sŏng lơh nê̆ đah makin kŭng lơh nê̆ đah nhòng ơ̆h? 41Bulah tîgư̆n, dưñ e cĕ jơno găy ăm đah nhòng bră tơmpà gời, gừn lăng dô, kơp jơno la lơhiê ma ƀòn ông.

42Mơya, sơòs-sơngeh ma cro Pharisi ƀòn ông, bơh ƀòn ông ăn pơnah jư̆t bièp trau, bièp krô̆ng î kơp jơno bièp khơk nhòng buơn, mà ƀòn ông lơi căư jơno tơpăt-durư̆ng î nùs kơñ-kơloh Yang Tơm Trồ. Mơya păl cang ngăn lơh lơ̆gay bră dô, gừn ơ̆ lơi căư lơ̆gay bră năy. 43Sơòs-sơngeh ma cro Pharisi ƀòn ông, bơh ƀòn ông kơñ nggui anẵu niem ngăn nhòng hîh jơnư̆m î lơ̆gay jơno lùp còp niem să nhòng drà. 44Sơòs-sơngeh ma ƀòn ông, bơh ƀòn ông gư̆ptî matô bùc nơ̆m ƀlang, î cro nde ơ̆ gư̆t tơm jơ jă pên lêh cŭngsî.”

45Ma-ngkơi gư̆n, lơi kla wăl, du hôi nhòng lơ̆gay cro bơtău jơno-bơlăm tơs î Kơnràñ; “Ơ cro bơtău, cro bơtău tơm jơ tơs tîgư̆n kŭng gơlơh tìs dî ƀòn hî.” 46Mơya Kơnràñ pơđơ: “Sơòs-sơngeh ma tơmpôl cro bơtău jơno-bơlăm ƀòn ông te! Bơh ƀòn ông prăp tơng-añ ma cro nde lơ̆gay ơnong kơjơ̆ păl añ, hôm sătan mơ̆n ƀòn ông ơ̆ kơñ tơmpơ̆p du kon tê mơ̆n nơ̆m bră añ kơjơ̆ gư̆n. 47Sơòs-sơngeh ma ƀòn ông, bơh ƀòn ông băt tơngñă mơ̆ntô ƀùc ma lơ̆gay cro gơnoăr-hwơr, hôm ông-pang ƀòn ông sŏng tơngsơ̆t ƀòn gô. 48Tîgư̆n, ƀòn ông lơh cư̆ng gư̆m du nùs băl nơ̆m bră lơh ông-pang mơ̆n dê, bơh ƀòn gô sŏng tơngsơ̆t lơ̆gay cro gơnoăr-hwơr, hôm ƀòn ông băt tơngñă mơ̆ntô ƀùc. 49Kŭng bơh tîgư̆n, jơno jăk-sai Yang Tơm Trồ dê tơs lah: ‘Ăñ rơp pơđơ lơ̆gay cro gơnoăr-hwơr î lơ̆gay cro gơnoăr bơtău trôh î ƀòn gô, mơya ƀòn gô rơp tơngsơ̆t î lơh gleh-glăr khăi cro nhòng pơnah ƀòn gô’ 50lơi mham lơ̆gay cro gơnoăr-hwơr sŏng tôh tơlôh bơh sơm mon bơjîng ù-teàh păl kŏng lơ-e anẵu nŏk-noi dô, 51bơh mham Abel trôh dî mham Sacari, la cro sŏng kŏng tơngsơ̆t ăm nhòng kaƀang duh-khoai î hîh duh-khoai. Ngăn, ăñ tơs î ƀòn ông, mham gư̆n rơp dî lơ-e wăl bơh nŏk-noi dô. 52Sơòs-sơngeh ma tơmpôl cro bơtău jơno-bơlăm ƀòn ông, bơh ƀòn ông dưñ căư cơ-khwà tơngoh jăk; sătan ƀòn ông ơ̆ mơ̆t, mà ƀòn ông cơkhă cro nde mơ̆t.”

53Ma-ngkơi jơ Kơnràñ tơlôh bơh anẵu gư̆n, lơ̆gay cro bơtău jơno-bơlăm î cro Pharisi sơmơn tơmdră Kơnràñ pran ngăn î tơmbơkai î Kơnràñ bơh khăi jơno, 54jôi jơ lơwah lơi lơh glài Kơnràñ nơ̆m jơno tơs tơlôh bơh dẵư Kơnràñ.