Luka 13

1Du pơnah cro tom măt nơ̆m jơ gư̆n tơs wăl ma Kơnràñ bơh tơmpôl cro Galile mà Pilat sŏng lơh mham tơmpôl ƀòn gư̆n swai î jơno ăn duh-khoai ƀòn gô dê. 2Tơm tô̆ kla wăl dẵư, Kơnràñ tơs î ƀòn gô: “Ƀòn ông tôn lah tơmpôl cro Galile gư̆n la tồi-glài rlo lơ̆gay cro Galile nde bơh ƀòn gô păl kŏng gư̆p tîgư̆n ya? 3Ăñ tơs î ƀòn ông, ơ̆-iyŏ tîgư̆n. Mơya, dilah ƀòn ông ơ̆ tơcao mbư̆ng glài, gừn lơ̆gay kŭng kŏng sơ̆t-roh gư̆p tîgư̆n. 4Hala gư̆ptî jư̆t-pham hê cro năy, mà hîh yơng nơ̆m Silôe sŏng tơlah-rơlăm duh kơtơ̆ cŭngsî î tơngsơ̆t ƀòn gô: Ƀòn ông kơlôi lah ƀòn gô la lơ̆gay cro tìs-glài bờk-mơsăk rlo lơ̆gay cro jîng nơ̆m Jerusalem ya? 5Ăñ tơs î ƀòn ông, ơ̆-iyŏ tîgư̆n. Mơya dilah ƀòn ông ơ̆ tơcao mbư̆ng glài, gừn lơ̆gay kŭng rơp kŏng sơ̆t-roh gư̆p tîgư̆n.”

6Sŏng gư̆n Kơnràñ tơs jơno pơ̆niyô dô: “Cro năy dî sî ƀăl dî tăm nơ̆m buơn ño mơ̆n; gừn ông trôh jôi ple nơ̆m sî gư̆n mơya ơ̆ tơmpơl. 7Ông tơs î cro lơh buơn: ‘Mê lăng dô, păy năm bơh tơm jơ mà ăñ trôh jôi ple anẵu sî ƀăl dô mà ơ̆ jôi tơmpơl. Păl kăl gô cĕ. Tài bơh jơno găy mà gô tien gơs tơmpìt ù ơ̆ kwơ?’ 8Mơya jơ kla dẵư, cro gư̆n tơs î cro pơnhơm: ‘Ơ cro pơnhơm, dăn lơi cĕ gô wăl dî du năm dô te, trôh dî mà ăñ sŏng tẵư ù tĕdơ gô î ăn phân. 9Êt ngai gừn, bơh ma-ngkơi gư̆n gô digơlăn tơlôh ple … hôm dilah ngăn ơ̆ tom jơno găy, cro pơnhơm rơp kăl gô!’”

10Kơnràñ ndăng bơtău nhòng du hîh jơnư̆m nơ̆m nge Saƀat, 11gừn năy, du hôi cro-ua kŏng hwîng lơbăn-lơñô lơh miek jư̆t-pham năm, gô kŏng kung bơ̆t gư̆m ơ̆ ñă tơpăt dî. 12Tơm tô̆ Yang Jesu tơmpơl mò, Kơnràñ hôi sŏng gư̆n tơs î gô lah: “Ơ mò, mò sŏng dî klàs bơh jơno kòp jê mơ̆n dê.” 13Kơnràñ ăn tê nơ̆m să mò; khơñ ngăn mò ñă tơpăt cŭngsî, î jong-rơ Yang Tơm Trồ. 14Mơya tơm tô̆ cro ăt-bồ hîh jơnư̆m pẵư dẵư, bơh tơcao bơh Yang Jesu sŏng sămƀeah kòp nhòng nge Saƀat, gư̆n-jîng ông tơs î tơmpôl lang bol lah: “Tom pro nge mà nhòng lơ̆gay nge dô la păl lơh bră. Gư̆n-jîng, trôh cĕ sămƀeah kòp nơ̆m lơ̆gay nge gư̆n, ơ̆-iyŏ nơ̆m nge Saƀat.” 15Mơya Yang kla dẵư wăl ông gư̆n, î Kơnràñ tơs: “Ơ Tơmpôl cro nùs don mablăc! Ơ̆-iyŏ nơ̆m nge Saƀat kơp cro ƀòn ông păl hồ săy kăt lamău hala alang mơ̆n tơlôh bơh sơ wa î iyà gô swà ñô dà ya? 16Hôm cro-ua dô, la kon ua Abraham dê, la cro mà Satan sŏng căp kăt, lăng năy, rlo nhòng jư̆t-pham năm, mò ơ̆ kă dî dŏng-klàs bơh rngăr dô nơ̆m nge Saƀat ya?” 17Tơm tô̆ Kơnràñ tơs lơ̆gay jơno rơ̆, tơmpôl cro tơmdră Kơnràñ ƀasmăt lơ̆, hôm lơ̆gay tơmpôl lang bol khăi gừn sơhờp-sờhơn bơh jơh lơ̆gay bră phadêh-phadai dî lơh bơh Kơnràñ.

18Bơh gư̆n, Kơnràñ tơs lah: “Lơgơ Yang Tơm Trồ gừn gư̆ptî jơno găy, î ăñ rơp sơntu gô î jơno găy dô? 19Lơgơ gư̆n gừn kŭng gư̆ptî du-ne gơ nha-kai mà du hôi cro dưñ-sêh nhòng buơn mơ̆n, sŏng gư̆n gô hon dơng yơng gôjîng du ƀĕ sî, gừn sêm trồ lơh kơ̆nson cŭngsî mbơlong gô.”

20Kơnràñ tơs te lah: “Ăñ rơp sơntu lơgơ Yang Tơm Trồ î jơno găy? 21Lơgơ gư̆n gừn kŭng sơntu gư̆ptî dong mà du hôi cro-ua dưñ pơiyuă nơ̆m păy kơnăc kơmbôh trôh dî jơ kơmbôh rô̆ dơng ngăn.”

22Sŏng gư̆n Kơnràñ swà găn lơ̆gay ƀòn dơng î ƀòn êt, gư̆m tơs bơtău gư̆m swà gung trôh nơ̆m Jerusalem. 23Jơ gư̆n, du hôi cro năy tơs î Kơnràñ: “Khoai Yang, Tom iyŏ nư̆ng du pơnah êt cro dî dŏng-klàs?” Kơnràñ kla wăl dẵư ƀòn gô: 24“Rôn-grat cĕ lơi swà mơ̆t găn mpông kơ̆njềt bơh, ăñ tơs e ma oh mi rôh lŏ gư̆t, khăi cro rơp jôi jơno lơi mơ̆t mà ơ̆ dî. 25Ma-ngkơi jơ cro pơnhơm hîh sŏng ñă atẵy î tơ̆l wăl mpông, oh mi rôh lŏ mhăy ñă makin î toh mpông, tơs lah: ‘Khoai Yang, dăn pẵư ma ƀòn hî.’ Gừn tơm tô̆ kla wăl dẵư oh mi rôh lŏ, cro pơnhơm rơp tơs: ‘Ăñ ơ̆ gư̆t nhẵư hê ƀòn mê, hala nhẵư hê ƀòn mê bơh sơgăy tơlôh.’ 26Dơ̆ rơ̆, oh mi rôh lŏ rơp pẵư dẵư lơi tơs lah: ‘Ƀòn hî sŏng ñô sa sơđàp măt Kơnràñ, î Kơnràñ sŏng ƀăn mơntău nơ̆m lơ̆gay gung-drà ƀòn dơng ƀòn hî dê.’ 27Mơya cro pơnhơm hîh rơp pẵư dẵư, tơs î oh mi rôh lŏ: ‘Ăñ ơ̆ gư̆t ƀòn mê trôh bơh sơgăy. Pleh wĭc cĕ bơh sơ Ăñ, ơ̆ lơ̆gay tơmpôl lơh bră tô̆ tơnge bờk-mơsăk năy!’ 28Nơ̆m anẵu gư̆n, rơp tom ñim-rèa î tơget sề tơm tô̆ oh mi rôh lŏ tơmpơl Abraham, Isăk, gư̆m Jakôp, băl î lơ̆gay cro gơnoăr-hwơr ăm nơ̆m lơgơ Yang Tơm Trồ, mà ơ̆ tom oh mi rôh lŏ, bơh kŏng mbư̆ng tơlôh makin. 29Cro nde rơp trôh bơh măt tơnge tơlôh, î măt tơnge ñăp, bơh đah mađăm, î đah mađư̆ng, gừn ƀòn gô rơp nggui ăm sa nơ̆m lơgơ Yang Tơm Trồ. 30Tò, tom tơmpôl cro ma-ngkơi mà ƀòn gô rơp gôjîng dơ̆ sơm, î tom khăi cro dơ̆ sơm mà ƀòn gô rơp gôjîng ma-ngkơi.”

31Ƀăt nơ̆m jơ gư̆n, tom nhẵư hê cro Pharisi năy trôh en, tơs î Kơnràñ: “Dăn cro bơtău tơlôh swà î pleh wĭc bơh anẵu dô bơh Herôt kơñ tơngsơ̆t cro bơtău.” 32Kơnràñ tơs î ƀòn gô: “Swà cĕ, pơđơ pî̀ rơ̆: ‘Lăng dô, ăñ tơmprơh cà î lơh lơ̆gay bră sămƀeah nge dô î nge nhîng, sŏng gư̆n mơ̆t nơ̆m nge dơ̆ păy ăñ lơh tơngsŏng wêl-tăl.’ 33Bulah tîgư̆n, jăt bơh ăñ, jơno kơñ lơh la păl pơnjăt te gung dà nge dô, nge nhîng î nhîng-no, tài bơh î du hôi cro gơnoăr-hwơr, ơ̆ kŏng dî sơ̆t makin ƀòn dơng Jerusalem. 34Ơ Jerusalem, Jerusalem, mê tơngsơ̆t lơ̆gay cro gơnoăr-hwơr î kơ̆ndang lô̆ tơmpôl cro sŏng dî pơđơ trôh î mơ̆n. Gư̆t nhẵư dơ̆ Ăñ kơñ bơjư̆m wăl kon so mê gư̆ptî jơno mà ia măy tơngkrŏk kon mơ̆n nơ̆m phôm mơnơ, mà ƀòn mê ơ̆ kơñ. 35Tò, hîh ƀòn mê kŏng lơi căư bơh ƀòn mê. Ăñ tơs î ƀòn mê, ƀòn mê iyŏ ngăn ơ̆ tơmpơl ăñ te trôh dî jơ tô̆ tơnge rơ̆ rơp trôh, la jơ ƀòn mê tơs: ‘Lơnge ma Bơtao trôh nơ̆m sơnăn Yang.’”