Luka 14

1Bră tom tơlôh tơm tô̆ Kơnràñ swà mơ̆t nơ̆m hîh du hôi cro kwăng ăt-bồ nŏk-noi Pharisi nhòng du nge Saƀat lơi ngui sa, î ƀòn gô ndăng lăng nê̆ jôi jăt Kơnràñ. 2Gừn tò, du hôi cro năy kŏng kòp eh hơ-ram ăm băt sơđàp măt Kơnràñ. 3Tơm tô̆ pẵư dẵư, Yang Jesu tơs î lơ̆gay cro bơtău jơno-bơlăm gư̆m cro Pharisi, lah: “Nơ̆m nge Saƀat tom dî gơnoăr sămƀeah kòp jê hala ơ̆h?” 4Mơya ƀòn gô ăm-ƀơt iyờp. Gừn tơm tô̆ đăư dŏng cro kòp, Kơnràñ sămƀeah cro gư̆n, gừn e swà trê. 5Kơnràñ tơs î ƀòn gô: “Măt cro nhòng ƀòn ông tom du hôi kon klo, hala du-lăm kon lamău, kŏng duh nteàh dà jương nơ̆m nge Saƀat mà ơ̆ kơtô̆k gô cŭngsî khơñ jai?” 6Ƀòn gô ơ̆ rgê kla dẵư dî nơ̆m lơ̆gay jơno tơs dô.

7Sŏng gư̆n Kơnràñ tơs du-lăm jơno pơ̆niyô ma lơ̆gay cro năc dî hôi jà, bơh đăl gư̆t mơmơh tîgay ƀòn gô sŏng săc-rwơh lơ̆gay anẵu nggui niem-lơhơn, gư̆n jîng tơs î ƀòn gô lah 8“Tơm tô̆ ƀòn ông dî cro găy jà trôh ăm sa tơmhòp bo, bư̆ng nggui nơ̆m kaƀang anẵu niem-lơhơn, kơ̆mbrit lah digơlăn tom du hôi cro dơng mang rlo ƀòn ông sŏng dî cro gư̆n hôi jà, 9tơm tô̆ gô sŏng jà oh mi băl cro năc năy trôh en, tơs î ƀòn ông: ‘Dăn lơi wăl anẵu ma cro dô,’ gừn ƀòn ông nên-nôn ngăn la păl dưñ lăñ anẵu ma-ngkơi î jơno ƀasmăt. 10Tơblơ̆ wăl, tơm tô̆ ƀòn ông dî jà, swà cĕ, nggui nơ̆m kaƀang sa anẵu dơ̆t-lŭi, lơi tơm tô̆ cro sŏng jà ƀòn ông trôh, ƀòn gô rơp tơs î ƀòn ông: ‘Ơ cro bơyô, dăn jà swà anẵu yơng rlo.’ Tô̆ rơ̆, rơp tom jơno kingam ăn lơi ma ƀòn ông sơđàp măt kơp cro nggui băl kaƀang î mơ̆n. 11Bơh cro găy tơngyơng sătan mơ̆n cŭngsî rơp kŏng tơngduh nteàh, gừn cro găy tơng-êt sătan mơ̆n nteàh rơp dî yŏk tơngyơng cŭngsî.”

12Ma-ngkơi gư̆n, Kơnràñ kŭng tơs î cro sŏng jà Kơnràñ, lah: “Tơm tô̆ ông pồ jơno sa tơnge hala tơmăng, bư̆ng jà bơyô ông, hala oh mi ông, hala găp să ông, kŭng bư̆ng jà tơmpôl cro găp ƀòn kơnhơ̆p-mơ̆nda, kơ̆mbrit lah, ƀòn gô kŭng digơlăn jà wăl ông, gừn bră kla wăl tơmtom trôh ma ông. 13Tơblơ̆ wăl, tơm tô̆ ông pẵư jơno sa dơng, jà cĕ tơmpôl cro kơsòt-rƀah, kwềt-kơte, kwèt-kwe, ñô̆ng măt, 14gừn ông rơp dî lơnge, bơh ƀòn gô ơ̆ dî lơi kla wăl ông. Bơh pơnah kla wăl rơp dî ăn lơi ma ông nơ̆m jơno jîng wăl cro tơpăt-durư̆ng.”

15Tơm tô̆ du hôi nhòng tơmpôl cro ndăng nggui kaƀang sa iet kơnău lơ̆gay jơno dô, ông gư̆n tơs î Kơnràñ: “Lơnge ma cro rơp dî sa ƀăñ nơ̆m lơgơ Yang Tơm Trồ!” 16Mơya Kơnràñ tơs î ông: “Tom cro năy pẵư jơno sa dơng gừn jà khăi cro năc. 17Trôh jơ sa, ông pơđơ cro dê̆-gơna mơ̆n swà lơi tơs ma lơ̆gay cro năc sŏng dî jà: ‘Dăn trôh cĕ bơh jơ sa sŏng rcăng lơ̆ lờt.’ 18Gừn lơ̆gay ƀòn gô kơp du hôi cro tơm khan. Cro dơ̆ dul tơs î ông: ‘Ăñ sŏng tăc dubă srăy, gừn ăñ păl swà lăng gô. Dăn să ông ăñ ơ̆ swà dî.’ 19Cro nde tơs: ‘Ăñ mhăy tăc prăm yô lamău, gừn sơmơn swà lăng pran gô. Dăn să ông ăñ ơ̆ swà dî.’ 20Cro nde te tơs lah: ‘Ăñ mhăy tơmhòp bo, gừn bơh tîrơ̆ ăñ ơ̆ swà dî.’ 21Cro dê̆-gơna trê, tơs wăl lơ̆gay bră rơ̆ ma cro pơnhơm mơ̆n. Jơ gư̆n, ma-ngkơi jơ tơcao, cro pơnhơm hîh sŏng tơs î cro dê̆-gơna mơ̆n lah: ‘Swà tơlôh khơñ cĕ makin lơ̆gay gung dơng î gung êt nơ̆m ƀòn dơng mà bơlăm madô lơ̆gay cro kơsòt-rƀah, kwềt-kơte, ñô̆ng măt î kwèt-kwe.’ 22Cro dê̆-gơna tơs: ‘Ơ cro pơnhơm, ƀòn hî lơh sŏng jơno ông ƀăn, mơya kŭng hôm anẵu hwơng.’ 23Cro pơnhơm tơs î cro dê̆-gơna: ‘Swà tơlôh cĕ jăt lơ̆gay gung măy î nơ̆m lơ̆gay ƀòn dơng êt, sŏng gư̆n pơtĕo cro nde mơ̆t, lơi amơh bîng hîh ăñ. 24Bơh ăñ tơs î mê lah ơ̆ cro găy nhòng tơmpôl cro dî jà năy rơp dî ăm sa băl î ăñ.’”

25Jơ gư̆n, tơmpôl lang bol khăi ngăn ndăng swà jăt Kơnràñ, gừn dơ̆ tơmblăc să wăl, Kơnràñ tơs î ƀòn gô lah: 26“Dilah cro găy trôh băl ma ăñ mà ơ̆ tơcao mơi bàp, kon bo, oh mi, rôh lŏ mơ̆n, gư̆m băl î rai-jîng mơ̆n te, gừn cro gư̆n ơ̆ dî la cro bơtê ăñ dê. 27Dilah cro găy ơ̆ tî sî pư̆ng mơ̆n î jăt ma-ngkơi ăñ, gừn cro rơ̆ ơ̆ dî la cro bơtê ăñ. 28Bơh cro găy nhòng oh mi rôh lŏ kơñ băt tơngñă du-lăm hîh yơng, mà lai ngăn ơ̆ nggui nteàh yà khà jên-priè — mơ̆n tom tăl priè lơi lơh tơngsŏng hala ơ̆h? 29Lơi kơ̆mbrit lah, ma-ngkơi jơ gô sŏng băt tơngñă mơnang mà ơ̆ lơh sŏng dî, lơ̆gay tơmpôl cro găy lăng tơmpơl nên-nôn ngăn la pẵư dẵư tơngyŏ-tơnghiel cro gư̆n, 30tơs lah: ‘Cro dô sơntơm băt tơngñă mà ơ̆ lơh sŏng dî.’ 31Hala bơtao găy, tơm tô̆ mơñ swà tơmlơh î bơtao nde nơ̆m anẵu tơmlơh, ơ̆ nggui nteàh, lai ngăn katîng khà lah dilah mơ̆n dî jư̆t rbô hê tơmpôl lĭñ, gừn digơlăn tơmdră î tơmpôl lĭñ ndăng trôh tơmdră băl mơ̆n î bea-jư̆t rbô hê tơmpôl lĭñ ya? 32Dilah kơ̆mbrit la ơ̆ dî, gừn nơ̆m dơ̆ bơtao năy hôm ăm wĭc, bơtao dô pơđơ cro kŏng pơđơ swà tơmrơm wăl. 33Gư̆n-jîng, kŭng gư̆p tîgư̆n, cro găy nhòng oh mi rôh lŏ mà ơ̆ lơi căư lơ̆gay jơno mơ̆n dî gừn ơ̆ dî la cro bơtê ăñ. 34Boh gừn dî dơng mang, mơya dilah boh kŭng kŏng ha-ău ăng, gừn gô rơp dưñ jơno găy lơh gô ăng wăl? 35Gô ơ̆ dî kwơ găy ma ù kŭng ơ̆ lơi lơh phân dî, cro nde kư̆ mbăt gô makin. Cro găy dî tua lơi iet, iet cĕ.”