Luka 15

1Jơ gư̆n, lơ̆gay tơmpôl cro lơboh dia î cro tồi-glài swà trôh lơ̆ î Kơnràñ lơi iet jơno Kơnràñ. 2Sŏng gừn, băl î cro Pharisi gư̆m lơ̆gay cro bơtău jơno-bơlăm ƀoah-rƀu, tơs lah: “Cro dô wă-rẵu tơmpôl cro glài, î sa băl î ƀòn gô.”

3Bơh gư̆n la Kơnràñ tơs jơno pơ̆niyô dô ma ƀòn gô, lah: 4“Cro găy nhòng ƀòn ông dî du-rhieng lăm belàt, gừn tơm tô̆ kŏng roh du-lăm nhòng pơnah gư̆n, gừn ơ̆ lơi sơ̆n-jư̆t sơ̆n-lăm belàt năy anẵu ƀlang ngêt-ngờt gừn swà jôi belàt sô̆ trôh dî jơ jôi tơmpơl gô? 5Tơm tô̆ sŏng jôi tom lờt, cro rơ̆ sơhờp tî gô cŭng mơnì mơ̆n. 6Trê trôh nơ̆m hîh, cro gư̆n hôi bơyô î găp să mơ̆n trôh, tơs î ƀòn gô lah: ‘Sơhờp cĕ băl î ăñ, bơh ăñ sŏng jôi tom belàt swà roh mơ̆n dê.’ 7Ăñ tơs î ƀòn ông lah kŭng gư̆p tîgư̆n, rơp tom jơno sơhờp cŭngsî trồ bơh du hôi cro glài tơcao mbư̆ng glài, rlo la bơh sơ̆n-jư̆t sơ̆n cro tơpăt-durư̆ng mà ơ̆ kơñ dî tơcao mbư̆ng glài.

8Hala du hôi cro-ua găy dî jư̆t đŏng priè, dilah gô tơngroh du đŏng, gừn ơ̆ su oềs đeng, pàs hîh gư̆m jơh nùs jôi lăng trôh dî jơ jôi dî ơ̆h? 9Tơm tô̆ sŏng jôi tơm, gô hôi jà cro bơyô, î cro găp să trôh, tơs lah: ‘Sơhờp cĕ băl î ăñ, bơh ăñ sŏng jôi tom priè mà ăn lơh tơngroh.’ 10Kŭng gư̆p tîgư̆n, ăñ tơs î ƀòn ông, tom jơno sơhờp nơ̆m sơđàp măt lơ̆gay cro gơndrơh Yang Tom Trồ bơh du hôi cro glài tơcao mbư̆ng glài.”

11Ma-ngkơi gư̆n, Kơnràñ tơs: “Du hôi cro năy dî bea hê kon klo, 12cro oh tơs î bàp, ‘Ơ bàp, dăn tơmpà ma kon phăn-mơna gôtrê ma pơnah kon.’ Gừn ông tơmpà phăn-mơna mơ̆n ma ƀòn gô. 13Ma-ngkơi gư̆n, ơ̆ dî nhẵư nge, tơm tô̆ sŏng tơgom lơ̆gay jơno, cro kon pơ̆t swà gung swà anẵu wĭc, nơ̆m gư̆n gô gư̆n sa pròng preh phăn-mơna mơ̆n tơm tô̆ jîng dubă khăt-gơboh. 14Tơm tô̆ gô sŏng pròng lơ̆gay jơno, gừn du jơno jơgloh dơng ngăn tom tơlôh kơp lơgơ gư̆n, gừn gô sơntơm prŏi jơno sa. 15Sŏng gư̆n, gô păl swà lơh mơn ma du hôi cro nơ̆m ƀòn lơgơ gư̆n, gừn cro pơnhơm pơđơ gô swà nơ̆m ƀlang săy cro gư̆n lơi jư sư. 16Gô sơmồt kơñ sa bơh anẵu nka koah, la jơno mpôl sư ndăng sa, mà ơ̆ cro găy e gô. 17Mơya tơm tô̆ ndăng kơlôi wăl bơh mơ̆n, gô tơs lah: ‘Gư̆t nhẵư hê cro lơh mơn ma bàp ăñ dî jơno sa tơngkah-tơngkăñ, hôm ăñ mơñ sơ̆t jơgloh nơ̆m dô! 18Ma-ngkơi jơ ñă atẵy, ăñ rơp swà trê băl ma bàp ăñ, gừn ăñ rơp tơs î bàp lah: “Ơ bàp, kon sŏng tìs-glài tơmdră î trồ gư̆m sơđàp măt bàp. 19Kon ơ̆ dî păl sơnăn la kon bàp te. Dăn lăng kon gư̆ptî du hôi cro lơh mơn bàp.”’ 20Gừn tơm jơ sŏng ñă atẵy, gô swà trê băl ma bàp mơ̆n. Mơya tơm jơ gô hôm ăm ma wĭc, bàp gô sŏng tơmpơl gô gừn ông e nùs kơñ-kơloh, sŏng gư̆n cơplŏk trôh en, ông ùc wăñ ngkău gô î cư̆m gô. 21Jơ gư̆n, cro kon tơs î bàp: ‘Ơ bàp, kon sŏng tìs-glài tơmdră î trồ gư̆m sơđàp măt bàp. Kon ơ̆ dî păl sơnăn la kon bàp te.’ 22Mơya cro bàp tơs î lơ̆gay cro dê̆-gơna mơ̆n: ‘Swà dưñ khơñ ao niem rlo tơngcù ma gô, tơngdẵu sơmbèt nơ̆m tê gô, î crăp cơkhŏ nơ̆m jư̆ng. 23Kơ̆p cĕ lamău kon lamă, lơh rlău gô, gừn ƀòn mơ̆n pẵư jơno sa sơhờp. 24Bơh kon klo dô ăñ sŏng sơ̆t mà dô jîng wăl, ờs roh sŏng mà dô dî jôi tom.’ Sŏng gư̆n ƀòn gô pẵư jơno sa sơhờp-sờhơn. 25Mơya kon klo dơng ông dê ndăng ăm nơ̆m ƀlang săy, gừn tơm tô̆ blăc trê, gô swà mơñ trôh nơ̆m hîh, kơnău kơ̆ntàs kơñi, plŏk tơmya. 26Hôi du hôi cro dê̆-gơna wăl, gô lùp bră dô la amơh? 27Cro dê̆-gơna tơs î gô lah: ‘Oh klo mê blăc trê sŏng gừn bàp mê e lơh rlău lamău kon lamă, tài bơh ông sŏng wă-rẵu gô gư̆n trê nơ̆m hîh lơngăp-lơnge.’ 28Mơya, cro kon klo dơng tơcao, gô ơ̆ kơñ mơ̆t nơ̆m nhòng, gừn bàp gô swà tơlôh mơ̆ndơm gô. 29Mơya tơm tô̆ kla dẵư, gô tơs î bàp mơ̆n lah: ‘Bàp lăng, Kon lơh bră ma bàp gư̆t nhẵư năm, gừn kon hôm dahrăư lăng ơ̆săp-ơ̆său gơnoăr pơđơ bàp, mà bàp ơ̆ jơ găy e kon du-lăm băy dăm lơi kon digơlăn sơhờp băl î cro bơyô kon. 30Mơya tơm tô̆ kon klo năy bàp dê swà trê, la cro sŏng sa lon phăn-mơna bàp î cro-ua kliê, gừn bàp sŏng e lơh rlău lamău kon lamău bơh gô.’ 31Bơh gư̆n cro bàp tơs î gô: ‘Ơ kon, kon ăm miek băl î bàp, gừn jơh lơ̆gay jơno găy bàp dê la jơno kon. 32Mơya dî păl ngăn lơi pẵư jơno sa î sơhờp-sờhơn, bơh oh klo kon dô sŏng sơ̆t mà jîng wăl, bơh lai swà sô̆ mà sŏng dî jôi tom.’”