Luka 16

1Kơnràñ kŭng tơs î lơ̆gay cro bơtê lah: “Tom du hôi cro kơnhơ̆p năy la cro dî du hôi cro ăt-bồ gừn gô kŏng cro yă î cro pơnhơm bơh sa pròng sa priè phăn-mơna cro pơnhơm. 2Ma-ngkơi jơ hôi gô trôh, cro pơnhơm tơs î gô: ‘Bră ăñ kơnău bơh mê la amơh? Tơs tơlôh jơno lơh lơ̆gay bră ăt-bồ mê dê, bơh mê ơ̆ lơh dî bră ăt-bồ te.’ 3Bơh gư̆n cro ăt-bồ tơs dêh î să tơm lah: ‘Ăñ păl lơh mơmơh dô, bơh cro pơnhơm ăñ ndăng tă dưñ bră ăt-bồ bơh sơ ăñ? Pŏ ù gừn ăñ ơ̆ tăl pran, dăn sa gừn ƀasmăt oañ. 4Ăñ gư̆t mơ̆n păl lơh tîgay lơi tơm tô̆ kŏng roh bơh gơnoăr bră dô, cro nde rơp wă-rẵu ăñ mơ̆t nơ̆m hîh ƀòn gô.’ 5Gừn ma-ngkơi jơ dờp hôi kơp du hôi cro nơ̆m lơ̆gay cro kađòng dồs cro pơnhơm mơ̆n trôh, gô tơs î cro dơ̆ sơm lah: ‘Mê kađòng dồs cro pơnhơm ăñ nhẵư?’ 6Cro gư̆n kla dẵư: ‘Du-rhieng thô̆ng dà mơñà.’ Bơh gư̆n la gô tơs î cro gư̆n: ‘Dưñ iyà sră cêh dồs mê dê, nggui nteàh, cêh khơñ prăm-jư̆t!’ 7Pơnjăt bơh gư̆n, gô pơđơ du hôi cro nde: ‘Hôm mê kađòng dồs nhẵư?’ Cro gư̆n kla dẵư lah: ‘Du-rhieng ndrong kôi-mi.’ Gô pơđơ cro gư̆n: ‘Dưñ iyà sră cêh dồs mê dê, gừn cêh pham-jư̆t.’ 8Cro pơnhơm mơnê cro ăt-bồ hîh ơ̆ tơpăt-durư̆ng gư̆n tài bơh gô sŏng lơh cai rgê ngăn. Bơh kon so rai dô cai rgê rlo î kon so jơno ang nơ̆m rai ƀòn gô. 9Hôm Ăñ tơs î oh mi, lơh bơyô cĕ ma mơ̆n bơh î jên-priè ơ̆ tơpăt-durư̆ng, lơi tơm tô̆ jên-priè lơ̆, ƀòn gô digơlăn wă-rẵu oh mi mơ̆t nơ̆m anẵu ăm miek miek. 10Cro găy don-tơpăt nơ̆m bră êt ngai gừn kŭng don-tơpăt nơ̆m bră dơng, gừn cro găy ơ̆ tơpăt-durư̆ng nơ̆m bră êt ngai gừn kŭng ơ̆ tơpăt-durư̆ng nơ̆m bră dơng. 11Gư̆n-jîng, dilah oh mi ơ̆ don-tơpăt nơ̆m jini-jơno ơ̆ tơpăt-durư̆ng, măt cro rơp jao ma oh mi jini-jơno ngăn? 12Gừn dilah oh mi ơ̆ don-tơpăt nơ̆m lơ̆gay jơno gôtrê ma cro nde, măt cro rơp jao ma oh mi lơ̆gay jơno găy gôtrê ma să tơm oh mi? 13Ơ̆ tom du hôi cro dê̆-gơna găy digơlăn duh bră bea hê cro pơnhơm, bơh cro dê̆-gơna gư̆n rơp tơcao cro dô mà kơñ-kơloh cro năy, hala gô du nùs î cro dô, mà lăng ơ̆săp-ơ̆său cro năy. Oh mi ơ̆ dî păl duh bră Yang Tơm Trồ gư̆m î jên-priè dî ơ̆.”

14Dơ̆ gư̆n, tơmpôl cro Pharisi, la tơmpôl cro ham-kơñ jên-priè, kơnău jơh lơ̆gay jơno rơ̆, gừn ƀòn gô tơngyŏ-tơnghiel Kơnràñ. 15Kơnràñ tơs î ƀòn gô: “Ƀòn ông la cro sơnăn dêh mơ̆n tơpăt durư̆ng sơđàp măt cro nde, mơya Yang Tơm Trồ gư̆t nùs ƀòn ông. Bơh jơno dơng mang nhòng kon-mơnùs la jơno sơmơ̆-sơmĭñ sơđàp măt Yang Tơm Trồ. 16Jơno-bơlăm î lơ̆gay jơno cro gơnoăr-hwơr la trôh dî rai Jăng. Bơh gư̆n lêh ma-ngkơi, lơgơ Yang Tơm Trồ dî tơs bơtău, gừn lơ̆gay cro pơn-grat jờh pran mơ̆t nơ̆m gư̆n. 17Mơya ngăn la ƀoan rlo ma trồ î ù gôjîng ha-ău thơ̆t, rlo la du jơno cêh nơ̆m jơno-bơlăm gôjîng ơ̆ kwơ.

18Lơ̆gay cro găy tơmlơi bo-ua mơ̆n gừn tơmhòp cro nde, gừn tìs-glài rês-àr bơnan; cro tơmhòp cro-ua sŏng tơmlơi î bo-klo, gừn kŭng tìs-glài rês-àr bơnan.

19Tom du hôi cro kơnhơ̆p năy, ông gư̆n cù ao pơcăñ î bơtơi lơbăn, kơp nge, ñô sa sơhờp-sờhơn dubă khăt-gơboh. 20Hôm du hôi cro kơsòt năy sơnăn Lasarơ, să-jăn bîng jơno pô̆ ket, dî iyà ăn sî mpông hîh cro kơnhơ̆p, 21î kơp kơñ dî sa anẵu lơ̆gay jơno duh nteàh bơh cŭng kaƀang cro kơnhơ̆p. Mơya, nư̆ng tom mpôl său trôh lêp jơno ket sồt nơ̆m să gô. 22Sŏng gư̆n bră tơmtom rơ̆ la cro kơsòt sơ̆t, gừn gô dî cro gơndrơh iyà trôh nhòng nùs Abraham. Ma-ngkơi gư̆n, cro kơnhơ̆p kŭng sơ̆t î ông gư̆n dî iyà tăp. 23Nơ̆m lơgơ lang-ƀùc, nơ̆m jơ ndăng ăm nhòng jơno jê-kơkua, dơ̆ ngẵư măt mơ̆n cŭngsî, ông gư̆n tơmpơl Abraham bơh ma wĭc, băl î Lasarơ nơ̆m nùs Abraham. 24Pẵư dẵư dreo dơng, ông gư̆n tơs: Ơ ông-pang Abraham, dăn sơmah kơñ-kơloh kon î dăn pơđơ Lasarơ lơi gô gư̆n iyrù kon te mơ̆n nơ̆m dà gừn lơh lơngềt lơm-piet ăñ, bơh ăñ kŏng jê-kơkua nơ̆m oềs dô. 25Mơya Abraham kla dẵư: ‘Ơ kon, păl sơdơ lah nơ̆m rai jîng kon, kon sŏng lăñ pơnah jơno niem mơ̆n dê, gừn kŭng gư̆ptî gư̆n, Lasarơ gừn lăñ kong jê-kơkua. Mơya jơ dô gô dî jơno pơndơm-pơnieng anẵu dô, hôm kon ndăng kŏng jê-kơkua. 26Băl î lơ̆gay bră rơ̆, ăm nhòng ƀòn hî î kon sŏng dî ăn brŏng jrô dơng ngăn, lơi amơh cro găy kơñ swà bơh dô trôh anẵu kon la ơ̆ dî, kŭng ơ̆ dî bơh nơ̆m gư̆n swà trôh anẵu ƀòn hî dî.’ 27Bơh gư̆n la cro kơnhơ̆p tơs: ‘Ơ ông-pang, tîrơ̆ gừn kon răc-dăn ông lah ông digơlăn pơđơ gô gư̆n trôh nơ̆m hîh bàp kon — 28bơh kon dî prăm hê oh mi — lơi gô lơh cư̆ng ƀòn gô, lơi amơh ƀòn gô kŭng digơlăn ơ̆ păl swà trôh anẵu jê-kơkua dô.’ 29Mơya Abraham kla dẵư: ‘Ƀòn gô dî Môise gư̆m lơ̆gay cro gơnoăr-hwơr; ƀòn gô păl iet jăt lơ̆gay cro rơ̆!’ 30Bulah tîgư̆n, cro kơnhơ̆p tơs: ‘Ơ̆ iyŏ ờ, ơ ông-pang Abraham, tơblơ̆ wăl, dilah cro găy bơh anẵu sơ̆t trôh î ƀòn gô, gừn ƀòn gô rơp tơcao mbư̆ng glài.’ 31Mơya Abraham tơs î ông gư̆n lah: ‘Dilah ƀòn gô ơ̆ iet Môise gư̆m lơ̆gay cro gơnoăr-hwơr, gừn bulah cro găy gư̆n bơh anẵu cro sơ̆t jîng wăl, ƀòn gô kŭng rơp ơ̆ don.’”