Luka 17

1Sŏng gư̆n Kơnràñ tơs î lơ̆gay cro bơtê mơ̆n: “Jơno ơ̆ dî ơ̆ tơmtom la lơ̆gay jơno lơh sơmăm tìs, mơya sơòs-sơngeh ma cro găy bơh gô, lơ̆gay jơno sơmăm tìs tơmtom! 2Niem rlo ma cro gư̆n dilah gư̆ptî du-lăm mpăl lô̆ dî kăt tĕdơ ngkău gô, gừn gô kŏng mbư̆ng nơ̆m dàlîng rlo la lơi gô lơh sơmăm tìs ma du hôi nhòng lơ̆gay kơmom êt dô. 3Kơhea jư cĕ să mơ̆n! Dilah du hôi oh mi mơ̆n tìs-glài, ƀoah-đas cĕ cro gư̆n; gừn dilah cro gư̆n tơcao mbư̆ng glài, hồ-toh cĕ ma gô. 4Bulah cro gư̆n tìs-glài î oh mi trôh poh dơ̆ nơ̆m du-nge, gừn poh dơ̆ trê wăl tơs î oh mi lah: ‘Ăñ tơcao mbư̆ng glài,’ gừn oh mi kŭng rơp hồ-toh ma gô!”

5Lơ̆gay cro bơtê tơs î Yang: “Dăn bơtăl jơno don ma ƀòn hî.” 6Bơh gư̆n, Yang tơs: “Dilah oh mi dî jơno don gư̆ptî gơ nha-kai, gừn gư̆ptî jơ oh mi tơs î sî sơr-dao dô lah: ‘Mê păl kŏng bŭi cĕ cŭngsî gư̆m dî tăm nteàh dàlîng,’ gừn gô nên-nôn ngăn la păl lơh-jăt oh mi. 7Mơya cro găy nơ̆m oh mi dî cro dê̆-gơna swà lơh srăy brê hala jư belàt bơh makin blang srăy blăc trê mà pơđơ gô lah: ‘Swà nggui cĕ nơ̆m kaƀang khơñ’? 8Ala sơgư̆n, ơ̆-iyŏ cro pơnhơm rơp tơs î gô: ‘Păl pồ jơno ma ăñ sa, î kăt bơ̆t mơ̆n duh bră ăñ nơ̆m jơ ăñ ñô să, sŏng ma-ngkơi lơ̆gay bră gư̆n, mê gư̆n dî ñô sa’ ya? 9Cro pơnhơm gư̆n ơ̆ e nùs ưnngai găy î cro dê̆-gơna bơh gô sŏng lơh lơ̆gay bră dî ƀăn pơđơ, iyŏ ơ̆? 10Oh mi kŭng tîgư̆n, jơ găy oh mi lơh tơngsŏng lơ̆gay bră sŏng dî ƀăn tơngkah ma mơ̆n, tơs cĕ lah: ‘Ƀòn hî la cro dê̆-gơna ơ̆ kwơ. Ƀòn hî sŏng lơh tơngsŏng jơno mơ̆n păl lơh.’”

11Bră tơmtom nơ̆m jơ Yang Jesu swà gung trôh nơ̆m Jerusalem, gừn Kơnràñ swà găn tơ-nhal nhòng Samari î Galile. 12Tơm tô̆ Kơnràñ mơ̆t nơ̆m ƀòn dơng năy, jư̆t hê cro kŏng kòp dun swà wă-rẵu Kơnràñ, mà ƀòn gô ñă bơh ma wĭc 13gừn ƀòn gô pẵư dẵư tơs: “Ơ cro bơtău Jesu, dăn sơmah kơñ-kơloh ƀòn hî.” 14Tơm tô̆ tơmpơl ƀòn gô, Kơnràñ tơs î ƀòn gô: “Swà cĕ sơđah-să mơ̆n î lơ̆gay cro gơnoăr ăn jơno duh-khoai.” Gừn bră tơmtom nơ̆m jơ ƀòn gô swà, gừn ƀòn gô dî lơhiê. 15Sŏng gư̆n du hôi cro nơ̆m khà ƀòn gô, tơm tô̆ tơmpơl lah mơ̆n sŏng dî ƀeah, gô blăc wăl, dơng dẵư jong-rơ Yang Tơm Trồ. 16Gô kơrsơ̆p măt nteàh anẵu jư̆ng Kơnràñ, ưnngai Kơnràñ. Gô la du hôi cro Samari. 17Bơh gư̆n la, tơm tô̆ kla dẵư, Yang Jesu tơs: “Ơ̆-iyŏ lơ̆ jư̆t hê cro dî lơhiê ya? Hôm sơ̆n hê cro năy anẵu? 18Ngglơh ơ̆ tơmpơl cro găy blăc wăl jong-rơ Yang Tơm Trồ nư̆ng sî cro lang bol bơdih dô?” 19Sŏng gư̆n Kơnràñ tơs î gô: “Ñă atẵy cĕ, gừn swà. Jơno don mê sŏng dî sămƀeah mê.”

20Tơm tô̆ dî tơmpôl cro Pharisi lùp jơ găy lơgơ Yang Tơm Trồ rơp trôh, Kơnràñ kla dẵư ƀòn gô, gừn tơs: “Lơgơ Yang Tơm Trồ ơ̆ trôh î jơno tơmpơl dî. 21Cro nde kŭng rơp ơ̆ tơs: ‘Lăng dô, anẵu dô!’ hala ‘Toh tò!’ Bơh, lăng cĕ năy, lơgơ Yang Tơm Trồ dê ăm nhòng nùs ƀòn ông.”

22Sŏng gư̆n Kơnràñ tơs î cro bơtê: “Rơp tom nge jơ mà oh mi kơp kơñ tơmpơl du nhòng lơ̆gay nge Kon-Mơnùs, mà oh mi rơp ơ̆ tơmpơl dî. 23Gừn cro nde rơp tơs î oh mi lah: ‘Tò, anẵu tò!’ hala: ‘Dô, anẵu dô!’ Bư̆ng swà trôh, kŭng bư̆ng cơplŏk jăt ƀòn gô, 24bơh gư̆ptî lơp ang tơcrà bơh jư̆ng trồ dô jroh trôh jư̆ng trồ năy, gừn Kon-Mơnùs kŭng rơp tîgư̆n. 25Mơya jơno păl lai ngăn ma Kơnràñ la kŏng khăi jơno sơòs-sơngeh î kŏng khan lơi căư bơh nŏk-noi dô. 26Gư̆ptî bră sŏng tom tơlôh mơmơh tîgay nơ̆m rai Nôe, gừn gô kŭng rơp gư̆p tîgư̆n nơ̆m rai Kon-Mơnùs. 27Cro nde kŭng hôm ñô, sa, lăp klo, tombo ua, trôh dî nge Nôe mơ̆t nơ̆m ahẵu, sŏng gư̆n dà rlîng sơn-gàc trôh gừn tơngroh lơ̆gay. 28Kŭng gư̆p tîgư̆n, gư̆ptî bră sŏng tom tơlôh nơ̆m rai Lot — cro nde kŭng hôm sa, ñô, tăc, brău, tùc tăm, băt tơngñă. 29Mơya mơ̆t nge Lot tơlôh bơh Sôđôm, gừn brê mih oềs î sieu bơh trồ duh nteàh, sŏng gư̆n oềs su tơngroh lơ̆gay. 30Bră rơp tơngtrôh jăt jơno rơ̆ nơ̆m nge Kon-Mơnùs sơđah-să. 31Nơ̆m nge gư̆n, mơ̆t cro ăm cŭng tơkang hîh mà jini-jơno mơ̆n ăm nơ̆m hîh, bư̆ng jư lơi dưñ jơno; gừn kŭng gư̆p tîgư̆n, mơ̆t cro ăm nơ̆m ƀlang srăy, gừn bư̆ng blăc trê î lơ̆gay jơno hôm wăl. 32Sơdơ wăl cĕ bo ông Lot. 33Dilah cro găy jôi jơno jư jơno jîng mơ̆n gừn rơp roh gô, mơya dilah cro găy lơi căư gừn rơp dŏng-klàs dî gô. 34Ăñ tơs î oh mi, nơ̆m tơmăng gư̆n, rơp tom bea hê cro bĭc ăm băl du-lăm cơnờng. Du hôi rơp kŏng dî iyà, hôm cro năy rơp dî lơi wăl. 35Rơp tom bea hê cro ƀŏ mpăl nơ̆m du-anẵu băl. Du hôi cro rơp kŏng iyà swà, hôm cro năy rơp dî lơi wăl.” 36[Bea hê cro nơ̆m ƀlang srăy, du hôi cro rơp kŏng iyà swà, gừn cro năy rơp dî lơi wăl.] 37Gừn tơm tô̆ kla dẵư, ƀòn gô tơs î Kơnràñ: “Ơ Yang, anẵu găy gư̆n?” Sŏng gư̆n Kơnràñ tơs î ƀòn gô: “Ƀùc sơ̆t sơgăy, klang-jasat kŭng rơp tơmƀù wăl nơ̆m gư̆n.”