Bră 4

1Jơ gư̆n, tơm tô̆ ƀòn gô ndăng tơs î lang bol, lơ̆gay cro gơnoăr ăn jơno duh-khoai, băl î tơmpôl lĭñ hîh duh-khoai gư̆m lơ̆gay cro Saduse hal-apàl trôh nơ̆m anẵu ƀòn gô, 2tơcao ngăn nùs bơh bea hê ƀòn ông ndăng tơs bơtău lang bol î tơs tơnggư̆t jơno jîng wăl bơh anẵu sơ̆t nơ̆m Yang Jesu. 3Sŏng gư̆n tơmpôl ƀòn gô kơ̆p lơh bea hê ƀòn ông gư̆m kơ̆p ăn nơ̆m hîh jam ñô̆ng cang trôh brê-ang nge ma-ngkơi, bơh jơ gư̆n brê ñô̆ng lờt. 4Mơya pơnah khăi nơ̆m khà lơ̆gay cro ma-ngkơi jơ kơnău jơno bơtău gư̆n sŏng don; gừn khà cro-klo gời khăi trôh pơngăp prăm rbô hê.

5Bră tom tơlôh nơ̆m nge ma-ngkơi, tơmpôl cro kwăng ăt-bồ ƀòn gô dê, băl î lơ̆gay kwăng kra gư̆m lơ̆gay cro bơtău jơno bơlăm dî tơmƀù wăl nơ̆m anẵu Jerusalem, 6î Anne la cro gơnoăr bơlăm-găl dơng ăn jơno duh-khoai, băl î Kaiphe, Jăng, Aleksandrơ gư̆m jơh lơ̆gay cro gôtrê mađah nŏk-noi cro gơnoăr bơlăm-găl dơng ăn jơno duh-khoai dơng. 7Ma-ngkơi jơ iyà bea hê ông ăn ăm nơ̆m nhòng, ƀòn gô lùp lah: “Bơh gơnăp-gơnoăr găy, hala e sơnăn cro găy mà ƀòn mê sŏng lơh bră gư̆n teh?” 8Nơ̆m dơ̆ dô, bơh dî bîng-jut Yang Hwîng Goh, Pier sŏng tơs î ƀòn gô lah: “Ơ lơ̆gay cro kwăng dơng lang bol dê î lơ̆gay cro kwăng kra. 9Dilah nge dô ƀòn hî kŏng khao lùp bơh bră lơbăn-niem gôtrê bơh du hôi cro kòp jê, lah kơnơm bơh sigăy amî gư̆n sŏng dî sămƀeah, 10gừn dô tom iyŏ la jơno dî lơ̆gay ƀòn mê î lơ̆gay lang bol Israel gư̆t trôh, lah e sơnăn Yang Dŏng-Klàs Jesu cro Nasaret, Bơtao mà ƀòn mê sŏng pư̆ng điñ cŭngsî sî pư̆ng, Bơtao mà Yang Tơm Trồ sŏng lơh jîng wăl bơh anẵu sơ̆t, rơ̆ la kơnơm bơh Bơtao gư̆n mà cro dô ñă pran-kơdăng sơđàp măt ƀòn mê. 11Kơnràñ la ne-lô̆ sŏng kŏng lăng ơ̆săp-ơ̆său tài bơh ƀòn mê, rơ̆ la lơ̆gay cro jăk băt tơngñă hîh, mà sŏng sơlôh gôjîng ne-lô̆ tơm joñ mơ̆m hîh. 12Ơ̆ tom jơno dŏng-klàs bơh nơ̆m anẵu cro nde găy, bơh nteàh trồ ơ̆ tom sơnăn nde găy dî dờp e ma nơ̆m nhòng kon-mơnùs lơi ƀòn mơ̆n păl kơnơm bơh sơgư̆n dî dŏng-klàs.”

13Tơm tô̆ tơmpơl jơno khơ̆n-sa Pier î Jăng dê, gư̆m đăl gư̆t lah bea hê ông la lơ̆gay cro ơ̆ dî bơtê gư̆m cro lang bol mơ̆n, gừn ƀòn gô ndrăt-ndròt, ƀòn gô kŭng đăl gư̆t nê̆ bea hê ông, lah cro bơh lai ƀua ờs ăm băl î Yang Jesu. 14Mơya, bơh tơmpơl cro-klo sŏng dî sămƀeah ñă băl î bea hê ông, gư̆n-jîng ƀòn gô ơ̆ tom dî jơno găy lơi tơmdră wăl. 15Jơ gư̆n, ma-ngkơi jơ e gơnoăr pơđơ ma tơmpôl ƀòn gư̆n swà tơlôh bơh sơ adô̆ kwăng cahrña, ƀòn gô tơmbơyê băl î găp, 16lah: “Ƀòn mơ̆n păl lơh mơmơh î tơmpôl ƀòn dô? Rơ̆ la tài bơh du gơnoăr phadêh nê̆-năn sŏng tom tơlôh bơh tơmpôl ƀòn dô, ngăn la loh-lang ngăn gôtrê î jơh lơ̆gay cro găy ndăng jîng nơ̆m Jerusalem gừn ƀòn mơ̆n ơ̆ tom khan dî. 17Mơya, lơi bră dô ơ̆ lam tơlôh te nơ̆m nhòng tơmpôl lang bol, ƀòn mơ̆n păl khă lai ƀòn gô bư̆ng e sơnăn gư̆n lơi tơs bơtău î kơp cro găy te.” 18Tîgư̆n, tơm tô̆ pơđơ hôi bea hê ông mơ̆t, ƀòn gô e gơnoăr pơđơ lah ơ̆ tơs hala bơtău kơp jơno găy e sơnăn Yang Jesu. 19Mơya tơm tô̆ Pier î Jăng kla wăl dẵư, bea hê ông sŏng tơs î ƀòn gô lah: “Tom iyŏ la iyŏ sơđàp măt Yang Tơm Trồ tơm jơ kơnău jăt ƀòn mê rlo ma Yang Tơm Trồ Ƀòn mê swì lăng cĕ. 20Bơh ƀòn hî ơ̆ digơlăn ma ơ̆ tơs bơh lơ̆gay jơno mơ̆n sŏng tơmpơl î kơnău.” 21Bơh gư̆n, ma-ngkơi jơ tơng-î̀ bơtăl te, ƀòn gô lơi ma bea hê ông swà. Bơh ơ̆ jôi tom jơno găy lơi mà ƀòn gô digơlăn kơ̆p lơh-glài bea hê ông, rơ̆ la tài bơh lang bol, bơh lơ̆gay cro kŭng jong-rơ Yang Tơm Trồ bơh bră sŏng tom tơlôh. 22Bơh cro klo năy, cro mà gơnoăr phadêh sămƀeah dô tom tơlôh, gừn sŏng rlo puôn-jư̆t năm lờt.

23Jơ gư̆n, ma-ngkơi jơ dî hồ khăt-gơboh makin, bea hê ông trôh ma oh mi rôh lŏ cro don Yang mơ̆n dê gừn tơs wăl lơ̆gay jơno mà kơp cro gơnoăr ăn jơno duh-khoai î kơp cro kwăng kra sŏng tơs î ƀòn gô. 24Tơm tô̆ sŏng kơnău lờt, ƀòn gô du nùs băl dreo dơng dẵư gôtrê mađah Yang Tơm Trồ î tơs lah: “Khoai Yang, Kơnràñ la Bơtao sŏng bơjîng trồ, ù-teàh gư̆m dàlîng, băl î lơ̆gay jini-jơno nơ̆m nhòng gư̆n, 25la Bơtao kơnơm bơh ông-pang ƀòn hî dê, bơh Yang Hwîng Goh, bơh anẵu yôi Dabit dê cro dê̆ gơna Kơnràñ sŏng tơs lah:

‘ngglơh kơp dà lơgơ tơcao,

î lơ̆gay lang bol jôi kai-kơnĕ ơ̆ kwơ?

26Lơ̆gay bơtao nơ̆m ù-teàh ndôh ñă,

î lơ̆gay cro kwăng dơng dî tơmƀù wăl băl î găp tơmdră wăl Yang

gư̆m tơmdră wăl Bơtao kŏng bŏng mơñà Kơnràñ dê.’

27Bơh nơ̆m bră ngăn, băl Herôt î Ƀônsơ Pilat, gư̆m băl î lơ̆gay lang bol bơdih î lang bol Israel, sŏng dî tơng jơnư̆m wăl băl î găp nơ̆m ƀòn dơng dô tơmdră wăl cro Dê̆-Gơna sang-goh Kơnràñ dê la Yang Jesu, Bơtao mà Kơnràñ bŏng mơñà, 28lơi lơh nên lơ̆gay bră mà tê Kơnràñ î jơno rơndăp tăp sên Kơnràñ dê sŏng lơh nên lai păl tom sơlôh. 29Jơ dô, ơ Yang, dăn swì lăng cĕ lơ̆gay jơno tơng-î̀ ƀòn gô dê, gư̆m dăn dờp e ma lơ̆gay cro dê̆-gơna Kơnràñ dê tơs bơtău jơno Kơnràñ bơh î lơ̆gay jơno khơ̆n-sa. 30Tơm tô̆ Kơnràñ yŏk tê Kơnràñ dê lơi e ma jơno sămƀeah, lơ̆gay têl phadêh î lơ̆gay bră crêh-crai dî tom tơlôh kơnơm bơh sơnăn cro Dê̆-Gơna sang-goh Kơnràñ dê, la Yang Jesu.” 31Tơm tô̆ ƀòn gô hôi-dăn sŏng lờt, nơ̆m anẵu mà ƀòn gô ndăng bơjư̆m wăl kŏng wăñ-lơnggơh; Sŏng gư̆n lơ̆gay ƀòn gô dî bîng-jut Yang Hwîng Goh gừn tơs bơtău jơno niem Yang Tơm Trồ bơh băl î nùs khơ̆n-sa.

32Jơ gư̆n, lơ̆gay tơmpôl cro sŏng don dî du nùs băl î nùs-nhơ̆m băl. Ơ̆ cro găy lăng du jơno găy nơ̆m lơ̆gay jơno găy gôtrê ma mơ̆n la jơno dêh ờ, mà gôtrê ma ƀòn gô, lơ̆gay jơno la jơno băl. 33Bơh î gơnăp-gơnoăr pran-kơdăng, lơ̆gay cro gơnoăr bơtău dơng tơs tơnggư̆t jơno cư̆ng-tang bơh jơno jîng wăl Yang Jesu dê, î jơno sơmah dơng mang ăm nơ̆m lơ̆gay ƀòn gô. 34Bơh ơ̆ tom cro găy kơsòt prŏi nhòng tĕdơ ƀòn gô, bơh dilah cro găy la cro pơnhơm ù-teàh hala hîh tơ̆m, gừn ma-ngkơi jơ brău, ƀòn gô iyà trôh khà priè sŏng lăñ dî. 35Sŏng gư̆n ăn nơ̆m anẵu jư̆ng lơ̆gay cro gơnoăr bơtău dơng, hôm priè gư̆n dî dờp tơmpà ma kơp du hôi cro jăt jơno kơñ ngui cro gư̆n dê.

36Jơ gư̆n, Jôsep cro dî lơ̆gay cro gơnoăr bơtău dơng sơnăn la Ƀanaƀa (sơnăn dî cêh tơlôh gơtha la Kon jơno tơngkah-mơ̆ndơm dê), la du hôi cro Lebi, cro ƀòn tơm Ciprơ, 37ma-ngkơi jơ brău lờt srăy-brê gôtrê ma mơ̆n, ông sŏng iyà priè trôh gừn ăn nơ̆m anẵu jư̆ng lơ̆gay cro gơnoăr bơtău dơng.