Bră 5

1Jơ gư̆n, du hôi cro tò sơnăn la Anania, băl î bo-ua gô la Saphira, sŏng brău dubă ù, 2sŏng gư̆n amî gư̆n prăp lơi dêh ma gô du pơnah bơh khà priè gư̆n (cro bo-ua kŭng gư̆t) gừn ma-ngkơi tơm jơ iyà du pơnah năy trôh, amî gư̆n ăn nơ̆m anẵu jư̆ng lơ̆gay cro gơnoăr bơtău dơng. 3Mơya Pier tơs lah: “ơ Anania, no-gwơh cà Satan bîng-jut nùs mê, lơh ma mê tơs blăc î Yang Hwîng Goh mà prăp lơi dêh ma mê du pơnah bơh khà priè du pơnah ù gư̆n teh? 4Tơm tô̆ hôm sơgư̆n, ơ̆-iyŏ dubă ù ờs la jơno mê dê, gừn ma-ngkơi jơ brău lờt, khà priè rơ̆ kŭng gôtrê nơ̆m gơnoăr mê dê ya? Amơh lơh mà mê lơi wăl jơno bơyê bră dô nhòng nùs mê teh? Ơ̆-iyŏ mê tơs blăc î kon-mơnùs ờ, mơya la î Yang Tơm Trồ.” 5Bơh gư̆n, ma-ngkơi jơ Anania kơnău lơ̆gay jơno gư̆n, gô ha-ău nhim mà bông blă nteàh. Gừn jơno kơ̆mbrit-kơ̆mbròt dơng ngăn tôh cŭngsî lơ̆gay cro găy kơnău jơno bră dô. 6Jơ gư̆n, tơm tô̆ lơ̆gay cro pơnu ñă atẵy pùc să ƀùc amî gư̆n î tơm jơ sŏng tung tơlôh makin lờt gừn ƀòn gô iyà lơboh tăp.

7Mơya bră tom tơlôh nơ̆m păy jơ ma-ngkơi gư̆n, bo-ua amî gư̆n lơbà mơ̆t, hôm dahrăư gư̆t bơh bră sŏng tơngtrôh. 8Pier tơs î mò lah: “Tơs cĕ ma ăñ gư̆t tom iyŏ ƀòn e sŏng brău dubă ù dî nư̆ng dư̆ng dô priè hala ờ?” Sŏng gư̆n mò tơs lah: “Ời, khà dî nư̆ng dư̆ng dô.” 9Mơya Pier tơs î mò lah: “Lơh mơmơh mà bră gư̆n dî bea hê ƀòn e du nùs băl lơi lòng Hwîng Goh Yang dê teh? Lăng cĕ năy, Kơ̆mpang jư̆ng tơmpôl cro sŏng lơboh tăp bo-klo e ăm ƀăt sơ mpông, gừn ƀòn gô kŭng rơp iyà e lơboh tăp.” 10Ƀăt Jai gư̆n, mò gư̆n blă nteàh anẵu jư̆ng ông gừn ha-ău nhim. Jơ gư̆n, dơ̆ lơbà mơ̆t, lơ̆gay cro pơnu tơmpơl ƀùc mò, sŏng gư̆n ma-ngkơi jơ tung mò tơlôh makin, ƀòn gô iyà tăp mò en đàp bo-klo gô. 11Jơno kơ̆mbrit-kơ̆mbròt dơng ngăn tơlôh nơ̆m Hîh Jư̆m Goh gư̆m nơ̆m lơ̆gay cro găy kơnău bơh lơ̆gay bră dô.

12Jơ gư̆n, bơh kơ̆mpang tê lơ̆gay cro gơnoăr bơtău dơng dê, khăi têl phadêh î bră crêh-crai tom tơlôh nhòng tĕdơ lang bol, gừn ƀòn gô kŭng du nùs băl î găp ăm nơ̆m anẵu Mpông Kơwưng Salômôn. 13Mơya ơ̆ tom cro nde găy khơ̆n tơmơ̆t băl î ƀòn gô, bulah lang bol ờs ndăng jong-rơ mơnê ƀòn gô. 14Jơ gư̆n, sî nge sî khăi cro dî tơmơ̆t bơtăl tơm tô̆ ăn jơno don nơ̆m anẵu Yang rlo te, khà bîng khăi hơt băl cro-klo gư̆m cro-ua, 15tien gơs cro mƀà iyà cro kòp jê makin gung, ăn tơmbĭc nơ̆m cơnờng gư̆m bêl, lơi tơm tô̆ Pier swà găn, gừn êt ngăn hwîng ông dê digơlăn tơmbàk dî nơ̆m cro găy gư̆n nơ̆m ƀòn gô. 16Du tơmpôl cro khăi ngăn kŭng hwa găp trôh bơh lơ̆gay ƀòn dơng tĕdơ Jerusalem, iyà băl î cro kòp jê gư̆m tơmpôl cro kŏng hwîng cà sơmơ̆-sơmĭñ lơh gleh-glăr, mà lơ̆gay ƀòn gô dî sămƀeah lơ̆.

17Mơya ma-ngkơi jơ ñă atẵy, cro gơnoăr bơlăm-găl ăn jơno duh-khoai dơng î lơ̆gay tơmpôl cro jăt gô (la tơmpôl cro gôtrê mađah Saduse); bîng-jut nùs tơmngañ, 18sŏng gư̆n tơmpôl gư̆n e tê cơƀah kơ̆p lơ̆gay cro gơnoăr bơtău dơng gừn jam ƀòn gô nơ̆m hîh jam băl. 19Mơya nơ̆m brê tơmăng, du hôi cro gơndrơh Yang dê sŏng pẵư mpông hîh jam, iyà ƀòn gô tơlôh makin, î ƀăn tơngkah lah: 20“Swà cĕ, gừn ma-ngkơi jơ ñă ăm nơ̆m hîh duh-khoai, păl tơs î lang bol lơ̆gay jơno jîng dô.” 21Bơh gư̆n, tơm tô̆ sŏng kơnău tîgư̆n, ƀòn gô swà mơ̆t nơ̆m hîh duh-khoai dơ̆ rơhĭng ang gừn bơtău. Jơ gư̆n cro gơnoăr bơlăm-găl ăn jơno duh-khoai dơng î tơmpôl cro jăt gô trôh nơ̆m anẵu, ƀòn gô tơng jơnư̆m tơmpôl Jơnư̆m băl î lơ̆gay tơmpôl kwăng kra nơ̆m lang bol Israel, sŏng gư̆n pơđơ cro trôh nơ̆m hîh jam lơi iyà cro gơnoăr bơtău dơng trôh. 22Mơya dơ̆ trôh anẵu gư̆n, lơ̆gay lĭñ ăm jư ơ̆ tơmpơl lơ̆gay cro gơnoăr bơtău dơng nơ̆m hîh jam, bơh gư̆n tơm jơ blăc trê wăl ma-ngkơi ƀòn gô tơs tơnggư̆t bră, 23tơs lah: “Ƀòn hî tơmpơl hîh jam sŏng dî kăl bơkhê bơh î lơ̆gay jơno rơndăp krañ-cê ngăn, î lĭñ ăm jư gừn ñă ƀăt sơ mpông, mơya tơm jơ pẵư mpông ƀòn hî ơ̆ tơmpơl cro găy ăm nơ̆m nhòng ờ.” 24Jơ gư̆n, ƀăt tơm jơ ƀòn gô sŏng kơnău lơ̆gay jơno gư̆n, cro ăt-bồ tơmpôl lĭñ ăm jư hîh duh-khoai gư̆m lơ̆gay cro gơnoăr bơlăm-găl ăn jơno duh-khoai dơng mơrêh-mơrăñ bơh lơ̆gay jơno tơs tơnggư̆t bră, mơmơh bră tîgư̆n digơlăn tom tơlôh. 25Bơh gư̆n, du hôi cro găy gư̆n, ma-ngkơi jơ trôh nơ̆m anẵu sŏng tơs wăl î ƀòn gô lah: “Lăng cĕ năy, tơmpôl cro mà ƀòn mê kơ̆p ăm jam nơ̆m hîh ñô̆ng jai dô ndăng ăm nơ̆m hîh duh-khoai, ñă bơtău lang bol!” 26Bơh gư̆n, cro kwăng ăt-bồ tơmpôl lĭñ swà băl î tơmpôl lĭñ ăm jư, sŏng iyà ƀòn gô trê, ơ̆ ngui jơno pơng lơh, bơh ƀòn gô kơ̆mbrit lang bol, kơ̆mbrit lah mơ̆n kŏng kơ̆ndang î lô̆. 27Tơm tô̆ sŏng iyà lơ̆gay cro gơnoăr bơtău dơng trê, tơmpôl ƀòn gư̆n lơi ƀòn gô ñă ăm nhòng Tơmpôl Jơnư̆m. Song gư̆n cro bơlăm-găl ăn jơno duh-khoai dơng khao lùp ƀòn gô, 28lah: “Ƀòn hî sŏng e gơnoăr pơđơ khă ƀòn mê lờt bư̆ng e sơnăn dô bơtău, mơya lăng năy, ƀòn mê sŏng lơh Jerusalem bîng-jut jơno ƀăn mơntău mơ̆n, î ƀòn mê gừn kơñ iyà mham ƀòn gư̆n dê tôh cŭngsî ƀòn hî.” 29Mơya tơm tô̆ kla wăl dẵư, Pier î lơ̆gay cro gơnoăr bơtău dơng tơs lah: “Păl don-duh Yang Tơm Trồ rlo la cro nde. 30Yang Tơm Trồ ông-pang ƀòn mơ̆n dê sŏng lơh Yang Jesu jîng wăl; Kơnràñ la Bơtao mà ƀòn mê sŏng tơngsơ̆t, tơm tô̆ kơ̆p iyông cŭng sî pư̆ng. 31Yang Tơm Trồ sŏng pồ Bơtao gư̆n lơh jîng Cro Ăt-Bồ î Bơtao Dŏng-Klàs ăm mađah ma mơ̆n, lơi e jơno tơcao rơmbư̆ng glài ma Israel băl î jơno hồ-toh tồi-glài 32Ƀòn hî la cro lơh cư̆ng bơh lơ̆gay bră gư̆n, băl î Yang Hwîng Goh, Bơtao mà Yang Tơm Trồ sŏng dờp e ma tơmpôl cro don-duh Kơnràñ.

33Mơya ma-ngkơi jơ kơnău tîrơ̆, tơmpôl ƀòn gô tơcao ngăn î kơñ tơngsơ̆t lơ̆gay cro gơnoăr bơtău dơng.” 34Jơ gư̆n, tơm tô̆ du hôi cro tò ñă atẵy bơh nhòng Tơmpôl Jơnư̆m, la du hôi cro Pharisi, sơnăn la Gamaliel, cro bơtău jơno bơlăm, dî du lang bol kingam, ông pơđơ iyà lơ̆gay cro gơnoăr bơtău dơng tơlôh makin dư̆ng-iè. 35Sŏng gư̆n ông tơs î ƀòn gô lah: “Ơ oh mi, tơmpôl cro Israel, păl kơhea cĕ sătan mơ̆n bơh jơno mà oh mi sơmơn lơh ma tơmpôl dô. 36Bơh lai mađàp tô̆ tơnge gư̆n, Theuda sŏng ndôh ñă, sơnăn dêh sătan gô la du hôi cro tîgay gư̆n, khà khăi cro-klo sŏng tơmơ̆t băl î gô pơngăp puôn-rhieng, mà gô sŏng kŏng cro tơngsơ̆t gừn jơh lơ̆gay cro găy dî mơ̆ndơm jăt gô kŏng kơ̆mprah-kơ̆mprĭng, sŏng gư̆n ƀòn gô swà trôh anẵu ơ̆ hôm cro găy. 37Ma-ngkơi cro dô, Juđa cro Galile sŏng ndôh ñă nơ̆m tô̆ tơnge cêh sơnăn măt khà lang bol gừn pơlum lang bol jăt gô. Cro gư̆n kŭng sơ̆t, sŏng gư̆n jơh lơ̆gay cro găy dî mơ̆ndơm jăt gô kŭng kŏng kơ̆mprah-kơ̆mprĭng. 38Jơ dô ăñ tơs î oh mi jơno dô. Pleh wĭc cĕ bơh tơmpôl ƀòn gư̆n gư̆m lơi kơdò ƀòn gô, bơh dilah nùs-kơlôi dô hala bră lơh dô la bơh kon-mơnùs, gừn gô rơp kŏng tơngroh sơ̆t. 39Mơya dilah jơno gư̆n la bơh Yang Tơm Trồ, gừn oh mi rơp ơ̆ phà tơngroh dơi ƀòn gô, mà ơ̆ kơhea sătan oh mi tien gơs digơlăn kŏng lăng la cro tơmdră î Yang Tơm Trồ.” Bơh gư̆n la ƀòn gô dî mơ̆ndơm jăt ông. 40Ma-ngkơi jơ pơđơ hôi lơ̆gay cro gơnoăr bơtău dơng, tơm jơ sŏng pơng lơh lờt, ƀòn gô e gơnoăr ơ̆ e sơnăn Yang Jesu bơtău, sŏng gư̆n ƀòn gô hồ e swà. 41Gư̆n jîng, lơ̆gay cro gơnoăr bơtău dơng swà gung tơlôh bơh jơno tơmdră Mpôl Jơnư̆m, sơhờp-sờhơn bơh ƀòn gô sŏng dî tơs la cro dî păl kŏng tơngyŏ-tơnghiel bơh Sơnăn Yang. 42Kơp nge, gư̆m nơ̆m hîh duh-khoai băl î nơ̆m kơp du-lăm hîh, ƀòn gô ơ̆ bơdê bơtău gư̆m tơs tơnggư̆t Jơno Niem — Yang Jesu la Yang Dŏng-Klàs.