Bră 6

1Jơ gư̆n, nơ̆m lơ̆gay nge gư̆n, tơm tô̆ khà cro bơtê ndăng sî nge sî khăi, gừn jơno ƀoah-rƀu sŏng tơngtrôh bơh cro Juđa nư̆ng tơs dẵư Grek gôtrê bơh cro Heƀrơ, bơh lơ̆gay cro-ua mơ̆ndro ƀòn gô dê ndăng kŏng cro tơm lơi căư nơ̆m bră tơmdŏng kơp nge. 2Bơh gư̆n, ma-ngkơi jơ jư̆t-bea hê cro gơnoăr bơtău dơng bơjư̆m wăl du tơmpôl cro khăi kơp cro bơtê, ƀòn gô tơs lah: “Dô la jơno ơ̆ dî păl dưñ lăñ dî gôtrê bơh ƀòn hî tơm jơ lơi căư jơno Yang Tơm Trồ dê ma-ngkơi lơi dŏng bră kaƀang sa. 3Mơya, ơ oh mi rôh lŏ, săc-rwơh cĕ bơh nhòng oh mi rôh lŏ poh hê cro-klo dî tien pơndrơ niem, bîng-jut Yang Hwîng Goh gư̆m jơno jăk-sai, la lơ̆gay cro mà ƀòn hî digơlăn jao ma jơno kơñ ngui dô. 4Hôm ƀòn hî gừn rơp ăt-ăl nơ̆m jơno hôi-dăn î bră bơtău jơno Yang.” 5Jơno gư̆n lơh niem-nùs sơđàp măt lơ̆gay lang bol. Bơh gư̆n la ƀòn gô săc-rwơh Etien, du hôi cro bîng-jut jơno don gư̆m Yang Hwîng Goh, Philip, Ƀrôkôr, Nikanor, Timôn, Ƀamena î Nikôla du hôi cro Antiôt jăt gung duh-khoai cro Juđa, 6la lơ̆gay cro mà ƀòn gô iyà trôh lơi ñă sơđàp măt lơ̆gay cro gơnoăr bơtău dơng, gừn ma-ngkơi jơ hôi-dăn, lơ̆gay cro gơnoăr bơtău dơng ăn tê cŭngsî lơ̆gay cro gư̆n.

7Sŏng gư̆n, jơno Yang Tơm Trồ dê kư̆ lam miek kơp anẵu, gừn khà cro bơtê nơ̆m Jerusalem sơlơ nge sơlơ khăi rlo te, ƀăt băl î du tơmpôl khăi ngăn lơ̆gay cro gơnoăr ăn jơno duh-khoai sŏng lơh-jăt jơno don.

8Jơ gư̆n, Etien bîng-jut jơno sơmah î gơnăp-gơnoăr, lơh bră crêh-crai î gơnoăr phadêh dơng nơ̆m lang bol. 9Mơya du pơnah cro sŏng ndôh ñă, la tơmpôl cro gôtrê mađah hîh jơnư̆m năy, anẵu dî sơnăn la: “Tơmpôl Cro Khăt-Gơboh”, băl î tơmpôl cro Siren, cro Aleksandri băl î nhẵư hê cro bơh Silisi gư̆m Asi tơmbơkai î Etien. 10Tîgư̆n, ƀòn gô ơ̆ tăl pran tơmdră dơi jơno jăk-sai gư̆m Yang Hwîng Goh mà ông sŏng tơs tơnggư̆t kơnơm bơh Bơtao gư̆n. 11Ma-ngkơi gư̆n, ƀòn gô tăc nùs nhẵư hê cro lơi tơs lah: “Ƀòn hî sŏng kơnău ông gư̆n tơs lơ̆gay jơno sơmăm tìs î Yang tơmdră wăl Môise î Yang Tơm Trồ.” 12Ƀòn gô pơjô̆ nùs lơ̆gay lang bol gư̆m lơ̆gay cro kwăng kra băl î lơ̆gay cro bơtău jơno-bơlăm, gừn tơm jơ rơndôh trôh, ƀòn gô kơ̆p ông gừn lơboh iyà trôh nơ̆m Tơmpôl Jơnư̆m Dơng. 13Ơ̆ dî nư̆ng tîgư̆n, ƀòn gô rơndăp lơ̆gay cro lơh cư̆ng-blăc, tơs tîdô lah: “Cro dô ơ̆ bơdê tơs lơ̆gay jơno tìs trôh anẵu sang-goh î jơno-bơlăm. 14Bơh ƀòn hî sŏng kơnău gô tơs lah Jesu cro Nasaret năy rơp phà tơngroh anẵu dô gư̆m tơmbơgăl lơ̆gay jơno ờs dơm yo mà Môise sŏng tơs wăl ma ƀòn mơ̆n.” 15Tơm tô̆ lăng nê̆ nê̆ ma ông, lơ̆gay kơp cro ndăng nggui nơ̆m Tơmpôl Jơnư̆m Dơng, tơmpơl môh măt ông gôlơh gư̆ptî môh măt cro gơndrơh dê.