Bră 7

1Jơ gư̆n, cro gơnoăr bơlăm-găl ăn jơno duh-khoai dơng tơs lah: “Lơ̆gay jơno gư̆n tom iyŏ gư̆p tîrơ̆ hala ơ̆?” 2Bơh rơ̆ la, ông tơs lah:

“Ơ lơ̆gay oh mi î kơp kơnă lơh ông-pang, dăn iet kơnău: Yang Tơm Trồ jơno ang gơklŏ sŏng sơđah-să î ông-pang Abraham ƀòn mơ̆n dê tơm tô̆ gô ăm nơ̆m Mesôpôtami, lai jơ gô ăm nơ̆m Caran. 3Gừn Kơnràñ tơs băl î gô lah: ‘Tơlôh cĕ bơh lơgơ tơm kon dê, kŭng gư̆ptî bơh cro găp să nŏk-noi kon dê, gừn kon păl swà trôh nơ̆m lơgơ mà Ăñ rơp sơđah ma kon.’ 4Pơnjăt te, ma-ngkơi jơ tơlôh bơh lơgơ lang bol Kalde dê gô ăm jîng nơ̆m Caran. Sŏng gư̆n bơh rơ̆, ma-ngkơi jơ bàp gô lơwă rai, Yang Tơm Trồ sŏng iyà gô mơ̆t nơ̆m lơgơ dô, nơ̆m anẵu mà oh mi tô̆ dô ndăng ăm jîng. 5Kơnràñ ơ̆ dờp e ma gô du srăy-brê nơ̆m lơgơ, tien gơs du-anẵu durư̆ng kơ̆mpang jư̆ng kŭng ơ̆. Tîrơ̆ mà Kơnràñ sŏng hăư dờp e lơgơ ma gô lơi dưñ-lăñ, băl î nŏk-noi gô dê pơnjăt ma-ngkơi gô, bulah gô hôm dahrăư dî kon. 6Mơya, Yang Tơm Trồ sŏng tơs tîdô, lah nŏk-noi gô rơp la lang bol ăm bơdơh nơ̆m du lơgơ wĭc ngai, sŏng gư̆n cro rơp kơ̆p ƀòn gô lơh jîng cro ăm dê̆ mà kơ̆p rôn-bơklơ̆n nơ̆m puôn-rhieng năm. 7Yang Tơm Trồ tơs lah: ‘Gừn Ăñ rơp lơh-glài dà lơgơ mà ƀòn gô sŏng păl kŏng lơh dê̆, gừn bơh rơ̆, ƀòn gô rơp tơlôh swà gừn duh-khoai Ăñ nơ̆m anẵu dô.’ 8Kơnràñ kŭng sŏng dờp e ma gô jơno hăư băl mhăy bơh gơnoăr koh kato, gừn bơh rơ̆, gô bơda Isăk gừn lơh gơnoăr koh kato ma kon gô nơ̆m nge dơ̆ pham; Isăk lơh gư̆p tîgư̆n ma Jakôp; gừn Jakôp kŭng lơh gư̆p tîrơ̆ ma jư̆t-bea hê kwăng kra. 9Bơh lơ̆gay cro kwăng kra tơmngañ î Jôsep, ƀòn gô sŏng brău Jôsep lêh ma lơgơ Ejiptơ; mà Yang Tơm Trồ ăm băl î gô, 10gừn dŏng-tă gô klàs bơh lơ̆gay jơno gleh-glăr gô dê. Kơnràñ kŭng dờp jơno sơmah î jơno jăk-sai ma gô sơđàp măt Pharaôn, bơtao Ejiptơ, gư̆m bơtao gư̆n sŏng pồ gô ăt-bồ nơ̆m Ejiptơ gư̆m băl î hîh nhă gô. 11Jơ gư̆n, du jơno jơgloh-dơng tơngtrôh nơ̆m lơ̆gay kơp lơgơ Ejiptơ î Kanaan; la jơno rŭng-rai dơng ngăn, gừn lơ̆gay ông-pang ƀòn mơ̆n dê ơ̆ jôi dî jơno sa. 12Bơh gư̆n, ma-ngkơi jơ kơnău nơ̆m Ejiptơ dî kôi-mi, Jakôp pơđơ lơ̆gay ông-pang ƀòn mơ̆n trôh nơ̆m gư̆n dơ̆ sơm. 13Gừn nơ̆m dơ̆ bea, Jôsep sŏng sơđah să mơ̆n ma ƀòn amî gô, sŏng gư̆n hîh nhă Jôsep dê dî đăl tơnggư̆t ma Pharaôn. 14Jơ gư̆n, ma-ngkơi jơ pơđơ tơmpôl amî trê, Jôsep e wă-rẵu Jakôp, bàp mơ̆n, băl î lơ̆gay cro găp să, î khà cro la poh-jư̆t prăm hê. 15Bơh gư̆n la, Jakôp swà jư trôh nơ̆m Ejiptơ, sŏng gư̆n gô lơwă rai, î lơ̆gay ông-pang ƀòn mơ̆n dê kŭng tîrơ̆. 16Ƀòn gô dî lơboh iyà trôh nơ̆m Sicem gừn tăp nơ̆m mơ̆ntô ƀùc mà Abraham sŏng tăc î khà jên priè bơh lơ̆gay kon klo Hemôr dê nơ̆m Sicem. 17Jơ gư̆n, jăt gư̆ptî tô̆ tơnge jơno hăư mà Yang Tơm Trồ sŏng hăư î Abraham trôh en lờt, gừn khà lang bol sơlơ nge sơlơ khăi î gôjîng khăi nơ̆m Ejiptơ, 18trôh dî jơ du hôi cro bơtao nde ndôh ñă ăt-bồ lơgơ Ejiptơ, mà bơtao gư̆n ờs ơ̆ gư̆t Jôsep. 19Bơh kơñ lơh kai blăc-pơlum lang bol ƀòn mơ̆n, bơtao gư̆n sŏng kơ̆p rôn-bơklơ̆n ông-pang ƀòn mơ̆n, lơh ma kon so mhăy bơda ƀòn gô dê kŏng tơngroh, bư̆ng lơi jîng. 20Nơ̆m dơ̆ mà Môise mhăy dî bơda; gô niem-lơhơn sơđàp măt Yang Tơm Trồ. Gô dî rong-siem păy kơnnhe nơ̆m hîh bàp mơ̆n. 21Jơ gư̆n, tơm tô̆ gô kŏng tơmpơl, kon ua Pharaôn dê sŏng iyà gô swà gừn rong-siem gô gư̆ptî kon klo mơ̆n. 22Môise dî tơng bơtê nơ̆m lơ̆gay jơno jăk-sai cro Ejiptơ dê; gô kŭng dî nơ̆m gơnoăr-pran nơ̆m jơno tơs î nơ̆m bră lơh mơ̆n dê. 23Mơya tơm jơ tô̆ tơnge puôn-jư̆t năm sŏng trôh î gô, gôlơh ngglăm nùs gô kơp kơñ swà còp oh mi mơ̆n, rơ̆ kon so Israel. 24Dơ̆ tơmpơl du hôi cro năy kŏng rôn-bơklơ̆n, gô sŏng ñă atẵy tơmpẵu î dŏng kla wăl jơno lơh mơsăk ma cro kŏng rôn-bơklơ̆n tơm tô̆ pơng tơngsơ̆t cro Ejiptơ năy, 25gô tôn oh mi wơng lah Yang Tơm Trồ kơnơm bơh tê mơ̆n ndăng iyà trôh jơno dŏng-tă ma ƀòn gô, mơya ƀòn gô ơ̆ wơng. 26Nge ma-ngkơi, gô swà trôh nơ̆m nhòng ƀòn gô jơ ndăng tơmbơkai, gừn gô mơ̆ndơm-mơ̆nieng ƀòn gô gôtrê bơh jơno tơmrơm wăl, lah: ‘Ơ ƀòn oh mi, lơ̆gay ƀòn amî la oh mi băl. No-gwơh ƀòn oh mi lơh sồt-rmañ ma găp teh?’ 27Mơya cro ndăng lơh bờk-mơsăk cro tĕdơ mơ̆n sŏng tơlơ̆ gô mande, tơs lah: ‘Mơ̆t cro sŏng pồ mê lơh jîng cro kwăng ăt-bồ gư̆m kwăng cahrña cŭngsî ƀòn hî teh? 28Jơno la ông kơñ tơngsơ̆t ăñ gư̆ptî bră mà ông sŏng tơngsơ̆t cro Ejiptơ nge ma-ua ya?’ 29Bơh gư̆n, Môise toat ăm pôn bơh jơno tơs gư̆n, gừn gô gôjîng cro ăm bơdơh nơ̆m lơgơ Madian, anẵu mà gô bơda dî bea hê kon klo. 30Tơm tô̆ puôn-jư̆t năm sŏng swà găn, du hôi cro gơndrơh sơđah-să î Môise anẵu ƀlang-càs gôtrê bơlao yồ Sinai, nơ̆m du lơm-piet oềs nơ̆m anẵu pôm lẵu. 31Jơ gư̆n, tơm tô̆ lăng tơmpơl tîrơ̆, Môise e lơh phadêh-phadai bơh jơno sơđah gư̆n, gừn tơm tô̆ gô trôh en lơi lăng nê̆-năn, gừn tom dẵư tơs Yang dê: 32‘Ăñ la Yang Tơm Trồ ông-pang kon dê, Yang Tơm Trồ Abraham dê, Isăk dê gư̆m Jakôp dê.’ Jơ gư̆n, bơh jơno ntơ-kơ̆mbrit trôh hăl, Môise ơ̆ khơ̆n lăng. 33Sŏng gư̆n Yang tơs î gô lah: ‘Hồ cĕ cơkhŏ bơh sơ jư̆ng kon, bơh anẵu mà kon ndăng ñă ăm la ù sang-goh. 34Ma-ngkơi jơ swì lăng, Ăñ sŏng lăng tơmpơl jơno gleh-glăr lang bol Ăñ dê nơ̆m Ejiptơ; Ăñ sŏng kơnău jơno alô̆ng ƀòn gô dê, î Ăñ sŏng jư lơi dŏng-tă ƀòn gô; Jơ dô, trôh cĕ ma dô jờh, Ăñ pơđơ mê trôh nơ̆m Ejiptơ.’ 35Môise dô, cro mà ƀòn gô sŏng lơi căư tơm tô̆ tơs lah: ‘Cro găy sŏng pồ mê lơh jîng cro ăt-bồ hala kwăng cahrña?’ — Yang Tơm Trồ pơđơ gô gư̆m lơh cro kwăng ăt-bồ gư̆m lơh cro dŏng-tă, kơnơm bơh tê cro gơndrơh dê sŏng sơđah-să î gô nơ̆m anẵu pôm lẵu. 36Gô sŏng bơlăm ƀòn gô tơlôh, ma-ngkơi jơ lơh kơp gơnoăr phadêh î têl phadêh nơ̆m lơgơ Ejiptơ gư̆m nơ̆m Dàlîng Brông, kŭng gư̆ptî nơ̆m ƀlang-càs miek puôn-jư̆t năm. 37Rơ̆ la Môise, gô sŏng tơs î kon so Israel lah: ‘Yang Tơm Trồ rơp pồ tơngñă du hôi cro gơnoăr-hwơr ma oh mi gư̆ptî ăñ dô, bơh nhòng tĕdơ tơmpôl oh mi ƀòn mê dê.’ 38Dô la cro ăm nơ̆m tơmpôl lang bol anẵu ƀlang-càs băl î cro gơndrơh, Bơtao sŏng tơs băl î gô cŭngsî yồ Sinai, gư̆m băl î lơ̆gay ông-pang ƀòn mơ̆n; gô la cro sŏng dưñ-lăñ jơno jîng miek lơi dờp e ma ƀòn mơ̆n, 39mà gôtrê bơh gô, ông-pang ƀòn mơ̆n ơ̆ kơñ don băl, tơblơ̆ wăl, ƀòn gô khan lơi căư gư̆m tơmblăc nùs mơ̆n kơñ trê wăl ma Ejiptơ. 40Tơm tô̆ tơs î Arôn lah: ‘Lơh cĕ ma ƀòn hî lơ̆gay yang rơp tề-lăm ƀòn hî. Gôtrê mađah pơnah Môise dô, cro sŏng iyà ƀòn hî tơlôh bơh lơgơ Ejiptơ, ƀòn hî ơ̆ gư̆t bră găy sŏng tom tơlôh ma ông gư̆n.’ 41Bơh gư̆n la, nơ̆m lơ̆gay nge gư̆n ƀòn gô lơh du-lăm rồp lamău kon î ăn jơno duh-khoai ma rồp-ràk gư̆n, sŏng gư̆n sơhờp-sờhơn bơh bră lơh kơ̆mpang tê mơ̆n dê. 42Jơ gư̆n, Yang Tơm Trồ tơmblăc măt î lơi bră ƀòn gô duh-khoai lơ̆gay sơmăñ cŭngsî trồ, gư̆ptî sŏng cêh nơ̆m sră kơp cro gơnoăr-hwơr dê lah:

‘Ơ hîh nhă Israel,

tom iyŏ ƀòn mê sŏng ăn ma Ăñ lơ̆gay jơno ăn duh-khoai î jơno duh-khoai miek nơ̆m puôn-jư̆t năm nơ̆m anẵu ƀlang cas?

43Ƀòn mê sŏng tung kơjang bơdơh yang Mơlŏk dê,

î sơmăñ yang Remphan ƀòn mê dê,

lơ̆gay rồp-ràk mà ƀòn mê sŏng lơh tơlôh lơi duh-khoai jơno gư̆n;

gừn Ăñ rơp iyà ƀòn mê lêh mađah manăy Ƀaƀilôn.’

44Kơjang cư̆ng-tang ăm băl î ông-pang ƀòn mơ̆n nơ̆m ƀlang-càs, gư̆ptî jơno Bơtao tơs î Môise sŏng bơtău, păl lơh kơjang rơ̆ jăt jơno dơnău mà gô sŏng tơmpơl, 45mà băl î kơjang gư̆n, ma-ngkơi jơ ăn lơi pơnjăt băl, ông-pang ƀòn mơ̆n kŭng sŏng iyà jăt băl nơ̆m rai Jôsue nơ̆m gung swà tơmlơh tơmpìt lơgơ kơp lang bol mà Yang Tơm Trồ sŏng tơmprơh swà sơđàp măt ông-pang ƀòn mơ̆n trôh dî rai Dabit, 46la cro dî jơno sơmah sơđàp măt Yang Tơm Trồ, gừn ông sŏng răc-dăn lơi jôi du-anẵu ăm ma hîh nhă Jakôp dê. 47Bơh gư̆n, Salômôn sŏng băt tơngñă hîh ma Kơnràñ. 48Mơya, Bơtao Dơng Rlo Lơ̆gay ơ̆ ăm nơ̆m anẵu tê cro lơh tơlôh, gư̆ptî cro gơnoăr-hwơr tom tơs lah:

49‘Yang tơs lah: Trồ la sơban Ăñ, gừn ù la kơnơl ăn jư̆ng Ăñ.

Ƀòn mê rơp băt tơngñă hîh mơmơh tîgay ma Ăñ?

Hala anẵu găy ăn lơi ma jơno bơdê Ăñ dê?

50Ơ̆-iyŏ tê Ăñ sŏng lơh jîng jơh lơ̆gay jơno dô ya?’

51Ơ lơ̆gay cro kơdăng găl, nùs gư̆m tua ơ̆ kŏng koh kato tò. Ƀòn mê tơmdră miek î Yang Hwîng Goh; Ông-pang ƀòn mê dê tîgay, ƀòn mê kŭng tîrơ̆. 52Tom du hôi cro găy nơ̆m lơ̆gay cro gơnoăr-hwơr mà ông-pang ƀòn mê dê ơ̆ kơ̆p-cơkhă? Ƀòn gô sŏng tơngsơ̆t tơmpôl cro tơs tơnggư̆t lai bơh jơno trôh Bơtao Tơpăt-Durư̆ng dê; mà ƀòn mê jai dô sŏng gôjîng cro tơmdră î cro tơngsơ̆t Bơtao gư̆n. 53Rơ̆ la tơmpôl cro sŏng dưñ lăñ jơno-bơlăm bơh jơno tơs tơnggư̆t kơp cro gơndrơh dê, mà ơ̆ prăp jư.”

54Jơ gư̆n, ma-ngkơi jơ kơnău kơp jơno gư̆n, ƀòn gô kŏng jê ndôh tơcao ngăn ngglăm nùs mơ̆n, gừn ƀòn gô tơget sề î ông. 55Mơya tơm jơ ndăng dî bîng-jut Yang Hwîng Goh, ma-ngkơi tơm jơ lăng nê̆ nê̆ cŭngsî trồ, ông tơmpơl jơno ang gơklŏ Yang Tơm Trồ dê î Yang Jesu ñă ăm mađah ma Yang Tơm Trồ. 56Ông tơs lah: “Lăng tò, ăñ tơmpơl lơ̆gay dăp trồ dî pẵư tơlôh, î Kon-Mơnùs ñă ăm mađah ma Yang Tơm Trồ.” 57Jơ gư̆n, ma-ngkơi jơ dreo dơng dẵư, ƀòn gô kadăm tua mơ̆n wăl sŏng gư̆n băl î găp rơndôh kơ̆p ông. 58Dơ̆ sŏng hwa tơlôh makin ƀòn dơng, ƀòn gô kơ̆ndang lô̆ ông. Lơ̆gay cro lơh cư̆ng-tang ăn ao makin mơ̆n dê nơ̆m anẵu jư̆ng du hôi cro pơnu dî sơnăn la Sol. 59Ƀòn gô kơ̆ndang lô̆ Etien nơ̆m jơ ông hôi-dăn lah: “Ơ Yang Jesu, dăn dưñ lăñ hwîng-soan kon.” 60Bơh gư̆n, ma-ngkơi jơ cơdơn krô̆ng nteàh, ông tơs dơng dẵư lah: “Ơ Yang, Kơnràñ bư̆ng tôh glài dô nơ̆m ƀòn gô.” Dơ̆ tơs jơno gư̆n sŏng lờt gừn ông bĭc.