Bră 8

1Jơ gư̆n, Sol ờs du nùs băl nơ̆m bră tơngsơ̆t Etien. Bơh gư̆n, nơ̆m nge gư̆n, du jơno kơ̆p-cơkhă dơng sŏng tom tơlôh tơmdră wăl î Hîh Jư̆m Goh nơ̆m Jerusalem; hôm lơ̆gay kơp cro don jăt yang kơ̆mprah-kơ̆mprĭng lam kơp lơgơ Juđe gư̆m lơgơ Samari, hôm nư̆ng lơ̆gay cro gơnoăr bơtău dơng. 2Tơmpôl cro don-duh sŏng iyà tăp Etien gừn tom jơno ñim kơloh dơng ngăn gôtrê ma ông. 3Mơya, Sol lơh roh kơ̆mprah-kơ̆mprĭng dơng ma Hîh Jư̆m Goh; Tơm tô̆ kư̆ rơndôh mơ̆t nơ̆m kơp hîh, kơtô̆k băl cro-klo gư̆m cro-ua tơlôh, ông kơ̆p ƀòn gô ăn nơ̆m hîh jam.

4Bulah tîgư̆n, tơmpôl cro kŏng kơ̆mprah-kơ̆mprĭng sŏng swà kơp anẵu tơs tơnggư̆t jơno niem gôtrê bơh jơno Yang. 5Jơ dô, Philip swà jư trôh nơ̆m ƀòn dơng Samari ông tơs tơnggư̆t Bơtao Dŏng-Klàs ma ƀòn gô. 6Jơ gư̆n, lang bol du nùs băl iet nê̆ nơ̆m lơ̆gay jơno găy Philip bơtău, nơ̆m jơ kơnău lơ̆gay jơno gư̆n î tơmpơl lơ̆gay gơnoăr phadêh mà ông lơh. 7Tài bơh khăi cro nơ̆m khà ƀòn gô kŏng kơp hwîng cà lơh, ƀòn gô sŏng tơlôh ma-ngkơi jơ dreo dơng dẵư. Hôm khăi cro kŏng kwềt-kơte î kwe gừn sŏng dî sămƀeah. 8Jơ gư̆n, tom jơno sơhờp-sờhơn dơng ngăn nơ̆m ƀòn dơng gư̆n.

9Mơya tom du hôi cro-klo năy, sơnăn la Simôn, bơh lai ƀua sŏng lơh gru bơjô nơ̆m ƀòn dơng gư̆m lơh hal-apàl lang bol Samari, sơnăn dêh mơ̆n la cro dơng mang. 10Cro mà lơ̆gay ƀòn gô, bơh êt trôh dơng, du nùs băl iet kơnău jăt bơh tơs lah: “Cro dô la gơnăp-gơnoăr Yang Tơm Trồ dê, la jơno dî sơnăn la Dơng Mang.” 11Jơ gư̆n, cro kơnău jăt ông, bơh nơ̆m du jŏ tô̆ tơnge, ông sŏng lơh ƀòn gô ndrăt-ndròt bơh î lơ̆gay jơno lơh hao gru. 12Mơya tơm tô̆ ƀòn gô don Philip bơh dî tơs tơnggư̆t jơno niem gôtrê bơh lơgơ Yang Tơm Trồ î sơnăn Yang Dŏng-Klàs Jesu dê, gừn ƀòn gô kŏng lơh ƀaptem, gư̆m cro-klo băl î cro-ua. 13Sŏng gư̆n sătan Simôn kŭng don, tơm tô̆ sŏng kŏng lơh ƀaptem, ông kư̆ ăm te î Philip. Ơ̆ dî nư̆ng tîgư̆n, tơm tô̆ lăng tơmpơl lơ̆gay têl phadêh î lơ̆gay bră gơnăp-gơnoăr dơng mang tom tơlôh, ông ndrăt-ndròt ngăn.

14Jơ gư̆n, ma-ngkơi jơ kơnău lah lang bol lơgơ Samari sŏng don jăt jơno niem Yang Tơm Trồ dê, lơ̆gay cro gơnoăr bơtău dơng nơ̆m Jerusalem pơđơ Pier î Jăng trôh ma ƀòn gô, 15la bea hê cro gơnoăr bơtău dơng mà ma-ngkơi jơ trôh nơ̆m anẵu, sŏng hôi-dăn ma ƀòn gô, lơi ƀòn gô digơlăn dưñ-lăñ Yang Hwîng Goh. 16Bơh Kơnràñ ờs hôm dahrăư răp jư nơ̆m du hôi cro găy nơ̆m khà ƀòn gô, mơya ƀòn gô nư̆ng dưñ-lăñ dî gơnoăr lơh ƀaptem nơ̆m sơnăn Yang Jesu gời. 17Gừn bea hê cro gơnoăr bơtău dơng ăn tê cŭngsî ƀòn gô, sŏng gư̆n ƀòn gô dưñ-lăñ Yang Hwîng Goh. 18Jơ gư̆n, tơm tô̆ tơmpơl gư̆t lah Yang Hwîng Goh dî dờp e bơh jơno ăn tê kơp cro gơnoăr bơtău dơng dê, gừn Simôn e gời priè ma ƀòn gô, 19tơs lah: “Dăn kŭng e ma ăñ gơnăp-gơnoăr dô lơi dilah cro găy mà ăñ ăn tê cŭngsî, gừn cro rơ̆ digơlăn dưñ-lăñ Yang Hwîng Goh.” 20Mơya Pier tơs î ông lah: “Dăn jên-priè ông dê ăm nơ̆m jơno kŏng tơngroh băl î ông, bơh ông tôn tăc dî jơno sơmah Yang Hwîng Goh dê bơh î priè! 21Ơ̆ tom jơno pơnah hala jơno tơmklăc găy nơ̆m bră dô ăn lơi ma ông, bơh nùs ông ơ̆-iyŏ la tơpăt doăng sơđàp măt Yang Tơm Trồ. 22Gừn, păl tơcao mbư̆ng glài gôtrê bơh jơno bờk-mơsăk dô ông dê î hôi-dăn lơ̆ nùs î Yang, mơmơh gư̆t dî kơnơm bơh rơ̆ mà jơno kơlôi-sơnư̆ng nơ̆m nùs ông rơp dî hồ-toh. 23Bơh ăñ tơmpơl ông ndăng ăm nơ̆m năc bơtăng î săy-srê̆ tồi-glài dê.” 24Mơya kla wăl dẵư, Simôn tơs lah: “Dăn ƀòn ông hôi-dăn î Yang ala ma ăñ, lơi ơ̆ du-lăm jơno găy nơ̆m lơ̆gay jơno mà ƀòn ông mhăy tơs digơlăn tom tơlôh ma ăñ.”

25Gừn, ma-ngkơi jơ sŏng lơh cư̆ng î bơtău jơno Yang, ƀòn gô tơmblăc lêh mađah Jerusalem, mơya kŭng tơs tơnggư̆t Jơno Niem ma khăi ƀòn êt cro Samari dê.

26Jơ gư̆n, du hôi cro gơndrơh Yang dê tơs î Philip lah: “Lôh ñă atẵy cĕ î swà trê mađah đăm nơ̆m gung măy bơh Jerusalem jư trôh nơ̆m Gasa.” (Rơ̆ la anẵu ngêt-ngờt.) 27Tơm tô̆ sŏng lôh ñă atẵy, ông swà gung, gừn lăng tò, du hôi cro-klo, cro Etiôpi, la cro kwăng konđơi dŏng bră Kanđak dê, bơtao ua lơgơ Etiôpi, la cro ờs jư lăng nơ̆m lơ̆gay hîh đam prăp ăn jơno mò dê, Ông sŏng trôh lơi duh-khoai nơ̆m Jerusalem. 28Ƀăt nơ̆m jơ gư̆n, ông ndăng swà trê, nggui nơ̆m rơdeh aseh mơ̆n dê î đŏk sră gơnoăr-hwơr Esai. 29Jơ gư̆n, Yang Hwîng Goh tơs î Philip lah: “Trôh en cĕ î swà jăt rơdeh aseh gư̆n.” 30Bơh gư̆n, tơm tô̆ sŏng cơplŏk trôh, Philip kơnău cro kwăng dô ndăng đŏk sră gơnoăr-hwơr Esai gừn ông tơs lah: “Kơnràñ tom wơng ngăn lơ̆gay jơno găy mơ̆n ndăng đŏk ya?” 31Mơya, cro kwăng tơs lah: “Lơh mơmơh mà ăñ digơlăn wơng dî, nư̆ng dilah tom du hôi cro găy gư̆n rơp sơđah bơtău ma ăñ?” Ƀăt nơ̆m jơ gư̆n, ông hôi jà Philip lơbà hao lơi nggui băl î mơ̆n. 32Jơ gư̆n, tăp Sră-Goh mà ông ndăng đŏk la tîdô:

“Gô kŏng iyà swà gư̆ptî belàt trôh nơ̆m anẵu lơh rlău,

gư̆m gư̆ptî belàt kon kơmblău sơđàp măt cro kàc sơnẵu gô,

gư̆n-jîng Gô ơ̆ pẵư dẵư mơ̆n.

33Nơ̆m jơno tơngyŏ-tơnghiel, jơno-tơpăt Gô dê kŏng tă dưñ thơ̆t.

Cro găy rơp tơs wăl nŏk-noi Gô?

Bơh jơno jîng Gô sŏng kŏng tă bơh ù.”

34Tơm tô̆ kla wăl dẵư, cro kwăng konđơi tơs î Philip lah: “Ăñ dăn amî e ma ăñ gư̆t, cro gơnoăr-hwơr ndăng tơs jơno dô gôtrê bơh cro găy — gôtrê bơh sătan ông hala gôtrê bơh du hôi cro găy nde?” 35Bơh gư̆n la, pẵư dẵư mơ̆n tơs gừn sơntơm bơh pơnah Sră-Goh dô, Philip tơs tơnggư̆t Jơno Niem gôtrê bơh Yang Jesu ma cro kwăng konđơi gư̆n. 36Bơh gư̆n, dơ̆ ƀòn gô ndăng swà nơ̆m gung, ƀòn gô swà trôh nơ̆m anẵu tom dà tò, gừn cro kwăng konđơi lùp lah: “Lăng năy, dà! Tom jơno găy ndăng cơkhă ăñ kŏng dî ƀaptem?” 37[Jơ gư̆n, Philip tơs î cro ông lah: “Dilah ông don bơh î lơ̆gay nùs-nhơ̆m mơ̆n, gừn ông rơp dî dŏng-klàs.” Bơh gư̆n tơm tô̆ kla wăl dẵư, cro kwăng tơs lah: “Ăñ don nơ̆m anẵu Yang Dŏng-Klàs la Kon Yang Tơm Trồ.”] 38Cro kwăng e gơnoăr pơđơ dơh rơdeh aseh wăl gừn băl bea hê băl î găp swà jư nơ̆m dà, băl Philip gư̆m cro kwăng konđơi, sŏng gư̆n Philip lơh ƀaptem ma cro kwăng gư̆n. 39Jơ gư̆n, tơm tô̆ ƀòn gô sŏng hao bơh sơ dà, Hwîng Goh Yang dê iyà Philip swà thơ̆t; gừn cro kwăng konđơi ơ̆ tom lăng tơmpơl ông te, cro kwăng sơhờp-sờhơn kư̆ swà pơnjăt nơ̆m gung mơ̆n. 40Hôm Philip gừn dî lăng tơmpơl nơ̆m Asôt, gư̆m tơm tô̆ swà găn kơp bơlao gư̆n, ông tơs bơtău Jơno Niem ma lơ̆gay kơp ƀòn dơng, trôh dî jơ ông swà trôh nơ̆m Sesare.