Bră 9

1Mơya Sol nơ̆m dơ̆ rơ̆ kư̆ dưñ jơno tơng-î̀ gư̆m jơno tơngsơ̆t tơmdră î lơ̆gay cro bơtê Yang dê. Ma-ngkơi tơm jơ trôh î cro gơnoăr dơng lăm ăn jơno duh-khoai, 2gừn dăn bơh anẵu ông rơ̆ lơ̆gay sră pơyoa ăn lơi ma lơ̆gay hîh jư̆m nơ̆m Damas, lơi dilah ông jôi dî tom cro găy don jăt Jơno Niem dê, bulah cro-klo hala cro-ua, gừn ông kơ̆p lơboh ƀòn gô nơ̆m tơm jơ kŏng căp, iyà trê ma Jerusalem. 3Jơ gư̆n, nơ̆m dơ̆ swà gung, bră sơlôh tơmtom tơm tô̆ ông mơñ trôh nơ̆m ƀòn Damas, nisơna jơno ang bơh cŭng trồ jroh bơang gơcrà tĕdơ ông. 4Gừn, ma-ngkơi jơ blă duh nteàh ù, ông kơnău du-dẵư tơs dơng î mơ̆n lah: “Ơ Sol, Sol, no-gwơh kon kơ̆p-cơkhă ăñ teh?” 5Jơ gư̆n, ông tơs lah: “Ơ Yang, Kơnràñ la măt cro?” Yang tơs lah: “Ăñ la Jesu mà kon ndăng kơ̆p-cơkhă. 6Mơya, ñă atẵy cĕ, gư̆m swà mơ̆t nơ̆m ƀòn dơng, gừn kơp bră hă rơp dî tơs î kon bơh jơno găy dî păl ma kon lơi lơh jăt.” 7Mơya lơ̆gay cro swà gung băl î ông gừn ñă sơgư̆n ơ̆ tơs dî jơno găy, tơm tô̆ kơnău dẵư mơya ơ̆ tơmpơl cro. 8Jơ gư̆n, Sol ñă atẵy bơh nơ̆m ù, mơya dơ̆ măt ông dê dî pẵư, gừn ông ơ̆ tơmpơl jơno găy te. Tîrơ̆ gừn, ma-ngkơi tơm jơ kadăm tê bơlăm ông swà, ƀòn gô lơboh ông mơ̆t nơ̆m ƀòn dơng Damas. 9Rlo tơm păy nge, ông lăng ơ̆ tơmpơl jơno găy, gư̆m ông ơ̆ sa kŭng ơ̆ ñô.

10Tơm jơ gư̆n, nơ̆m ƀòn dơng Damas tom du hôi cro bơtê tò sơnăn la Anania. Yang tơs î ông nơ̆m du jơno tơmpơl lai lah: “Ơ Anania!” Gừn ông tơs lah: “Ơ Yang, dăn lăng dô, kon dô!” 11Jơ gư̆n, Yang tơs î amî lah: “Ma-ngkơi jơ ñă atẵy, swà cĕ trôh nơ̆m gung sơnăn la Tơpăt Doăng, gư̆m jôi cĕ nơ̆m hîh nhă Juđa dê du hôi cro sơnăn la Sol, ƀòn tơm Tarsơ. Lăng nê̆ cĕ, bơh cro dô ndăng hôi-dăn, 12gư̆m nơ̆m jơno tơmpơl lai, ông gư̆n sŏng tơmpơl du hôi cro sơnăn la Anania mơ̆t gư̆m ăn tê cŭngsî să mơ̆n lơi ông gư̆n digơlăn ang măt wăl.” 13Mơya Anania hăư lah: “Ơ Yang, kon sŏng kơnău bơh khăi cro tơs bơh cro dô, bơh gư̆t nhẵư jơno bờk-mơsăk ông gư̆n sŏng lơh tơlôh khăi ma lơ̆gay cro sang-goh Kơnràñ dê nơ̆m Jerusalem. 14Gư̆m anẵu dô, ông gư̆n dî jơno e gơnoăr bơh lơ̆gay cro gơnoăr ăn jơno duh-khoai dơng lơi kơ̆p căp lơ̆gay cro hôi-dăn dî sơnăn Kơnràñ.” 15Tîrơ̆ gư̆n, Yang tơs î ông lah: “Kư̆ swà ñă, bơh cro dô la phăn ngui jơno săc-rwơh dê gôtrê ma Ăñ, lơi iyà sơnăn Ăñ trôh sơđàp lơ̆gay lang bol bơdih, kŭng gư̆m lơ̆gay cro bơtao băl î kon so Israel dê; 16Bơh Ăñ rơp sơđah ma cro rơ̆ gư̆t mơ̆n păl cang kŏng gleh-glăr khăi mơmơh bơh sơnăn Ăñ.” 17Tîrơ̆ gừn, Anania swà gung gư̆m swà mơ̆t nhòng hîh gư̆n. Ma-ngkơi jơ ăn tê cŭngsî gô, ông tơs lah: “Ơ amî Sol, Yang sŏng pơđơ ăñ — rơ̆ la Yang Jesu, Bơtao sŏng sơđah tơlôh î amî nơ̆m gung mà amî swà trôh nơ̆m dô, lơi amî digơlăn lăng tơmpơl wăl gư̆m dî bîng-jut Yang Hwîng Goh.” 18Ƀăt Jai gư̆n, du-lăm jơno găy gư̆n gôlơh gư̆ptî kơn-sièp, gô ru bơh nhòng măt ông dê, tư̆ng jăt te ông lăng ang wăl, gư̆m ma-ngkơi tơm jơ ñă atẵy, ông kŏng dî ƀaptem; 19Dơ̆ sŏng dưñ jơno sa, ông dî pran ayua wăl. Jơ gư̆n, ông ăm î lơ̆gay cro bơtê anẵu Damas nhẵư nge te. 20Jai gư̆n, ông bơtău tơs Yang Jesu nơ̆m lơ̆gay hîh jư̆m, lah Kơnràñ la Kon Yang Tơm Trồ. 21Lơ̆gay cro êt kơnău kŭng hal-apàl, tơs lah: “Ơ̆-iyŏ dô la cro sŏng kơ̆p tơngsơ̆t lơ̆gay cro hôi-dăn dî sơnăn dô nơ̆m Jerusalem ơ̆h? Gư̆m ơ̆-iyŏ ông gư̆n sŏng trôh nơ̆m dô bơh jơno rơ̆, lơi ma-ngkơi jơ kơ̆p căp gừn lơboh ƀòn gư̆n iyà ma lơ̆gay cro gơnoăr dơng ăn jơno duh-khoai.” 22Mơya Sol kư̆ pran-kơdăng bơtăl te, gư̆m lơh ndrăt-ndròt ma lơ̆gay cro Juđa jîng nơ̆m Damas dubă cư̆ng-tang lah Jesu la Yang Dŏng-klàs.

23Bulah tîrơ̆, tơm tô̆ jŏ nge ma-ngkơi, cro Juđa bơyê băl î găp jôi kai-kơnĕ lơi tơngsơ̆t ông. 24Tîrơ̆ gư̆n, jơno bơyê kai ƀòn gô dê sŏng dî tơs ma Sol gư̆t. Gư̆n jîng, cro mƀà tien gơs kơhea cơkhă lơ̆gay mpông ƀòn dơng băl tơnge gư̆m tơmăng lơi kơ̆p tơngsơ̆t Sol. 25Jơ gư̆n, ma-ngkơi jơ lơboh swà nhòng brê tơmăng, lơ̆gay cro bơtê ông dê lơi ông jư makin tî piê thăñ ƀòn dơng, î lơh tư̆ng duh ông jư ăn nhòng du-lăm bai dơng.

26Mơya dơ̆ sŏng trôh nơ̆m anẵu Jerusalem, ông e pran ayua jôi jơno lơi dî tơmơ̆t băl î lơ̆gay cro bơtê, ma jơh lơ̆gay ƀòn gô kŭng kơ̆mbrit ông, ơ̆ don lah gô la cro bơtê. 27Jơ gư̆n, ma-ngkơi jơ bơlăm ông swà, Ƀanaƀa lơboh ông trôh tơmtom lơ̆gay cro gơnoăr bơtău dơng, gừn e tơnggư̆t ma ƀòn gô lơh amơh ma ông sŏng đăl gư̆t Yang nơ̆m gung, kŭng gư̆p Kơnràñ sŏng tơs î ông, gư̆m amơh lơh nơ̆m anẵu Damas, ông sŏng khơ̆n-sa tơs bơh sơnăn Yang Jesu. 28Tîrơ̆ la, ông ăm băl î ƀòn gô tơm tô̆ trôh trê nơ̆m anẵu Jerusalem, khơ̆n-sa bơtău bơh sơnăn Yang. 29Ông ndư̆ng răk-sa, ndư̆ng tơmbơkai î lơ̆gay cro Juđa tơs dẵư cro Grek, mơya ƀòn gô jôi gung tơngsơ̆t ông. 30Mơya tơm tô̆ sŏng gư̆t gư̆ptî gư̆n, lơ̆gay oh mi bơlăm ông jư trôh Sesare, gư̆m lơboh ông swà-găn lêh Tarsơ.

31Tîrơ̆ gừn, Hîh Jư̆m Goh lam lơ̆ lơgơ Juđe, Galile, gư̆m Samari dî jơno lơngăp-lơnge; bơh dî bơ̆t bơtao lơbà swà băl nơ̆m jơno duh kơ̆mbrit Yang gư̆m nhòng jơno mơ̆ndơm-mơ̆nieng Yang Hwîng Goh dê, Hîh Jư̆m Goh dî bơtăl khăi te. 32Jơ gư̆n, bră sơlôh jîng gư̆n la tơm tô̆ Pier ndăng swà lam kơp lơgơ, gừn kŭng swà jư trôh anẵu lơ̆gay cro sang-goh jîng ăm nơ̆m ƀòn dơng Lida. 33Gừn nơ̆m anẵu rơ̆, ông tơmtom du hôi cro tò sơnăn la Ene, ndăng bĭc kwềt nơ̆m cơnờng tơm rlo pham năm, rơ̆ la cro kŏng kòp kwềt-kơte. 34Pier tơs î amî gư̆n lah: “Ơ Ene, Yang Dŏng-klàs Jesu sămƀeah ma amî. Ñă atẵy cĕ gư̆m iyà cơnờng mơ̆n hă,” gừn ƀăt jai gư̆n, amî ñă atẵy. 35Jơh kơp lơ̆gay cro jîng ăm nơ̆m anẵu Liđa gư̆m Sarôn sŏng tơmpơl amî, ƀòn gô lơ̆gay kŭng trê wăl ma Yang.

36Jơ gư̆n, anẵu Jôppe tom du hôi cro bơtê tò sơnăn la Taƀitha, sơnăn rơ̆, tơm tô̆ dî gơtha, gừn hôi la “Dôrkas”. Mò ờs bîng-tăl lơ̆gay bră niem băl î khăi bră lơh niem ma mò sŏng lơh. 37Bră sơlôh tơmtom nơ̆m lơ̆gay nge gư̆n, rơ̆ la ma-ngkơi jơ pem kòp, mò lơwă rai. Pơnjăt rơ̆, dơ̆ sŏng tư̆ng ơ̆m-dà ma mò sŏng lờt, gừn cro ăn mò nơ̆m adô̆ tăp cŭngsî. 38Bơh Lida ăm en Jôppe, gừn lơ̆gay cro bơtê tơm tô̆ kơnău lah Pier ndăng ăm nơ̆m anẵu gư̆n, ƀòn gô pơđơ bea hê cro trôh ma ông, pơjô̆ pơđơ lah: “Dăn bư̆ng lơh băt lơi trôh băl î ƀòn hî.” 39Tîrơ̆ la, ma-ngkơi jơ ñă atẵy, Pier swà băl î ƀòn gô, la lơ̆gay cro, tơm tô̆ sŏng trôh anẵu, ƀòn gô lơboh ông lêh adô̆ tăp cŭngsî, gừn jơh lơ̆gay ua mơ̆ndro trôh sơđàp ông ñim, gư̆m sơđah ma ông lăng lơ̆gay blah ao răm băl khăi ôi-ao amơh ma Dôrkas sŏng sî tơm jơ mò hôm ăm jîng băl î ƀòn gô. 40Mơya, dơ̆ sŏng pơđơ jơh lơ̆gay tơlôh makin gừn cơdơn krô̆ng nteàh, Pier hôi dăn, gừn ma-ngkơi tơm jơ blăc lêh să ƀùc, ông tơs lah: “Ơ Taƀitha, lôh cĕ ñă.” Gư̆n la mò pẵư măt mơ̆n, gư̆m tơm tô̆ lăng tơmpơl Pier, mò lôh nggui. 41Ma-ngkơi jơ tơlang dờp tê ma mò, ông đăư mò ñă atẵy, gừn dơ̆ sŏng hôi lơ̆gay cro sang-goh gư̆m lơ̆gay cro-ua mơ̆ndro mơ̆t, ông e tơmpơl mò hôm jîng. 42Dơ̆ rơ̆, jơno bră dô sơlôh jîng kơnău pơndrơ lam lơ̆ ƀòn Jôppe gừn khăi cro mơ̆t don jăt Yang. 43Bră jîng sơlôh tơmtom ma-ngkơi gư̆n la ông sŏng ăm wăl khăi jŏ nge nơ̆m anẵu Jôppe băl î du hôi cro tò sơnăn la Simôn, la cro jăk lơh plồ kato.