Bră 10

1Dơ̆ rơ̆, anẵu ƀòn dơng Sesare, du hôi cro tò sơnăn la Kornai, la kwăng ăt-bồ du-rhieng lĭñ nhòng tơmpôl lĭñ dî sơnăn la Itali, 2la cro ngăc-ngăr ngăn gư̆m duh kơ̆mbrit Yang Tơm Trồ băl î lơ̆gay hîh nhă mơ̆n, lơh khăi bră niem ma cro lang bol gư̆m ờs hôi-dăn î Yang Tơm Trồ dubă kơp nge. 3Pơngăp dî ñăm jơ dơ̆ sơ̆n nhòng nge, nơ̆m du-lăm jơno e tơmpơl lai, ông lăng tơmpơl loh-lang du hôi cro gơndrơh Yang Tơm Trồ dê trôh î mơ̆n gư̆m tơs băl î ông lah: “Ơ Kornai!” 4Mơya, ma-ngkơi jơ lăng nê̆ nê̆ nơ̆m cro gơndrơh gư̆m sơlôh kơ̆mbrit, ông tơs: “Ơ Kơnràñ, tom bră găy?” Gừn cro rơ̆ tơs î ông lah: “Lơ̆gay jơno hôi-dăn ông dê băl î lơ̆gay bră tơmpà gời ông dê sŏng hao lêh trôh sơđàp măt Yang Tơm Trồ gư̆ptî du jơno ăn duh-khoai cêh kah. 5Jơ dô, pơđơ cĕ cro trôh nơ̆m Jôppe gư̆m dăn jà Simôn tò, cro dî sơnăn la Pier. 6Ông gư̆n ndăng dî wă-rẵu bơh du hôi Simôn năy, cro jăk lơh plồ kato, la cro dî hîh ăm en tikîng dàlîng.” 7Tîrơ̆ gừn, dơ̆ cro gơndrơh la cro tơs î ông, sŏng tơlôh swà lờt, gừn ma-ngkơi jơ hôi bea hê dê̆-gơna nhòng hîh, băl î du hôi cro lĭñ duh kơ̆mbrit Yang nhòng khà lơ̆gay cro dŏng bră mơ̆n. 8Gư̆m tơm tô̆ sŏng tơs wăl ma ƀòn gô lơ̆gay jơno, ông pơđơ ƀòn gô trôh nơ̆m Jôppe.

9Nge ma-ngkơi, ndăng tơm jơ lơ̆gay cro gư̆n swà gung gư̆m mơñ trôh en ƀòn dơng, Pier hao lêh nơ̆m tơkang hîh lơi hôi-dăn, ñăm mơñ pơngăp jơ dơ̆ pro. 10Dơ̆ rơ̆, ông sơntơm tơmpơl gư̆t jơgloh gư̆m sơmôs sa, mơya nhòng tơm jơ cro ndăng sơmơn pồ jơno sa, du jơno e tơmpơl lai trôh ma ông. 11Ông tơmpơl lơwah trồ sŏng dî pẵư hwơ gư̆m tom du-lăm jơno sơđăư tò jư nteàh, gôlơh gư̆ptî du blah ôi dơng, dî tư̆ng jư nteàh ù bơh puôn joñ, 12mà nhòng gư̆n la tăl kơp jơno lơ̆gay jơi puôn ƀĕ jư̆ng, lơ̆gay jơno wîn ngsrang nơ̆m ù gư̆m lơ̆gay sêm trồ. 13Gừn du dẵư tơs trôh băl î ông lah: “Ơ Pier, ma-ngkơi jơ lôh, tơngsơ̆t cĕ rlău gừn sa ñă.” 14Mơya Pier hăư lah: “Khoai Yang, ơ̆ dî ờ, bơh kon ơ̆ tom du dơ̆ găy sa bulah du jơno găy sơmơ̆-sơmĭñ gư̆m ơ̆ lơh lơhiê.” 15Gư̆m du dơ̆ te, dẵư tơs gư̆n trôh î ông nơ̆m dơ̆ bea lah: “Lơ̆gay jơno Yang Tơm Trồ sŏng lơh lơhiê lờt, kon bư̆ng lăng la sơmơ̆-sơmĭñ.” 16Tîrơ̆ gừn, bră dô sơlôh tơmtom trôh păy dơ̆; gư̆m jơno gư̆n khơñ ngăn dî iyà lêh cŭngsî trồ.

17Jơ gư̆n, nơ̆m dơ̆ Pier ndăng kơlôi-sơnư̆ng nhòng nùs bơh jơno e tơmpơl lai ma ông mhăy tơmpơl la jơno găy, gừn lăng năy, lơ̆gay cro dî Kornai pơđơ swà sŏng ñă mađàp mpông, ma-ngkơi jơ jôi lùp hîh Simôn. 18E dẵư hôi, ƀòn gô lùp Simôn, dî sơnăn la Pier, tom iyŏ hala ơ̆ la ndăng dî wă-rẵu anẵu dô. 19Hôm Pier, nơ̆m tơm jơ ờs hôm ndăng kơlôi-sơnư̆ng bơh jơno e tơmpơl lai tò, gừn Yang Hwîng Goh tơs î gô lah: “Lăng năy, păy hê cro-klo ndăng jôi kon. 20Mơya ma-ngkơi jơ ñă atẵy, kon păl jư nteàh gư̆m swà î ƀòn gô, ơ̆ kơlôi-sơnư̆ng jơno găy, bơh Ăñ sŏng pơđơ ƀòn gô.” 21Tîrơ̆ la, tơm tô̆ sŏng swà jư trôh anẵu nhẵư hê cro rơ̆, Pier tơs: “Lăng dô, Ăñ la cro ƀòn amî ndăng jôi. Bơh tom jơno găy ma ƀòn amî trôh nơ̆m dô?” 22Jơ gư̆n, ƀòn gô tơs lah: “Kwăng ăt-bồ rhieng lĭñ Kornai, du hôi cro tơpăt-durư̆ng gư̆m duh kơ̆mbrit Yang Tơm Trồ, bơh sơrơ̆ dî lơh cư̆ng niem bơh lơ̆gay lang bol Juđa, sŏng dî du hôi cro gơndrơh sang-goh bơtău pơđơ păl jà ông trôh nơ̆m hîh mơ̆n lơi kơnău lơ̆gay jơno sơđah pơđơ bơh anẵu ông.” 23Tîrơ̆ gừn, dơ̆ sŏng jà ƀòn gô mơ̆t nơ̆m hîh, ông wă-rẵu ƀòn gô. Gừn nge pơnjăt te, ma-ngkơi jơ ñă atẵy, ông tơlôh swà î ƀòn gô, gư̆m nhẵư hê oh mi bơh Jôppe kŭng swà băl î ông. 24Bơh gừn, nge ma-ngkơi, ƀòn gô swà trôh nơ̆m Sesare. Jơ gư̆n, Kornai ndăng ăm cang ƀòn gô; Nơ̆m tơm jơ sŏng hôi khăi găp bơtien mơ̆n băl lơ̆gay oh mi bơyô bơjư̆m băl. 25Tŭ rơ̆, bră sơlôh tơmtom tơm tô̆ Pier lơbà mơ̆t, dơ̆ tơmtom măt ông, gừn Kornai duh-khoai, cơdơn krô̆ng anẵu jư̆ng ông. 26Mơya Pier đăư ông ñă, tơs lah: “Dăn ñă atẵy cĕ! Să tơm ăñ kŭng la kon-mơnùs băl lơs.” 27Nơ̆m tơm jơ răk-sa î Kornai, ông lơbà mơ̆t nơ̆m hîh gư̆m tơmpơl khăi cro sŏng ăm bơjư̆m băl. 28Bơh sơgư̆n, ông tơs î ƀòn gô lah: “Să tơm ƀòn mê gư̆t dô la jơno sơloah jơno-bơlăm la mơmơh gôtrê î du hôi cro Juđa ơ̆ dî gơnoăr tơmklăc-băl hala còp rwang du hôi cro lang bol bơdih, mơya î ăñ, Yang Tơm Trồ sŏng sơđah pơđơ ơ̆ sơnăn du hôi cro găy la sơmơ̆-sơmĭñ hala ơ̆ lơhiê. 29Bơh gư̆n, ma-ngkơi jơ dî jà, ăñ sŏng swà dubă ơ̆ tom khan. Gừn, ăñ ndăng kơñ lùp, bơh jơno găy mà ƀòn mê pơđơ jà ăñ teh?” 30Kornai hăư lah: “Puôn nge lai, trôh jơ dô, ăñ ndăng ăm hôi-dăn nhòng hîh mơ̆n nơ̆m jơ dơ̆ sơ̆n, gừn lăng năy, du hôi cro ñă sơđàp măt ăñ nơ̆m cù ao gơcrà ang-lơr, 31gư̆m cro gư̆n tơs lah: ‘Ơ Kornai, jơno hôi-dăn amî dê sŏng dî kơnău gư̆m lơ̆gay bră tơmdŏng gời amî dê, sŏng dî cêh kah trôh sơđàp măt Yang Tơm Trồ. 32Tîrơ̆ gừn, pơđơ cĕ cro trôh nơ̆m Jôppe gư̆m jà Simôn, la cro dî sơnăn la Pier. Ông rơ̆ ndăng dî wă-rẵu nơ̆m hîh Simôn dê, du hôi cro rgê plồ kato, en đah tikîng dàlîng.’ 33Bơh rơ̆, ăñ e cro swà jà ông ƀăt jai gư̆n, bơh sơgư̆n ông kŭng sŏng lơh jăt dubă iyŏ ngăn tơm jơ trôh nơ̆m dô. Gư̆n-jîng, bơh jơ gư̆n, lơ̆gay ƀòn hî ndăng ăm nơ̆m dô sơđàp măt Yang Tơm Trồ lơi êt lơ̆gay jơno sŏng dî Yang bơtău pơđơ ma ƀòn ông.” 34Bơh jơ gư̆n, tơm tô̆ pẵư dẵư tơs, Pier tơs lah: “Kơnơm nơ̆m jơno tơpăt-ngăn, ăñ đăl gư̆t lah Yang Tơm Trồ ơ̆-iyŏ la Bơtao tơmpẵu. 35Ala bơh gư̆n, nơ̆m lơ̆gay lang bol, cro găy duh kơ̆mbrit kơnràñ gư̆m lơh jơno tơpăt-durư̆ng gừn dî dờp gôtrê ma Kơnràñ. 36Jơno Yang mà Kơnràñ sŏng pơyoa trôh kon so Israel, tơm tô̆ tơs tơnggư̆t Jơno Niem bơh jơno lơngăp-lơnge tơs bơh Yang Dŏng-klàs Jesu — Kơnràñ la Yang jơh lơ̆gay dê — 37ƀòn mê sŏng gư̆t tơm tô̆ bră pẵư ơnàng tơlôh trôh lơ̆ lơgơ Juđe, sơntơm bơh anẵu Galile, ma-ngkơi gơnoăr ƀaptem mà Jăng sŏng bơtău tơs, 38bơh Yang Jesu, Bơtao tơlôh bơh Nasaret, lơh mơmơh ma Yang Tơm Trồ sŏng bŏng mơñà ma Kơnràñ bơh Yang Hwîng Goh gư̆m gơnăp-gơnoăr. La Bơtao swà sơdô sơnăy lơh bră lơbăn-niem gư̆m sămƀeah lơ̆gay cro kŏng cà lơh, bơh Yang Tơm Trồ ăm băl î Kơnràñ. 39Ƀòn hî la lơ̆gay cro lơh cư̆ng bơh jơh lơ̆gay bră mà Kơnràñ sŏng lơh, nơ̆m dà lơgơ cro Juđa dê gư̆m ăm nơ̆m anẵu Jerusalem, kŭng la Bơtao mà ƀòn gô sŏng tơngsơ̆t căư î dubă iyông Kơnràñ cŭng sî pư̆ng. 40Yang Tơm Trồ sŏng lơh ma Kơnràñ jîng wăl nơ̆m nge dơ̆ păy gư̆m lơh Kơnràñ sơđah-să dubă loh-lang, 41ơ̆-iyŏ e ma jơh lơ̆gay kơp cro, mơya e ma lơ̆gay cro cư̆ng-tang sŏng dî Yang Tơm Trồ săc-rwơh bơh lai — rơ̆ la e ma ƀòn hî, lơ̆gay cro sŏng sa gư̆m ñô băl î Kơnràñ ma-ngkơi jơ Kơnràñ jîng wăl bơh anẵu sơ̆t. 42Kơnràñ sŏng ƀăn pơđơ ƀòn hî bơtău tơs ma lang bol gư̆m lơh cư̆ng dubă khơ̆n-sa lah Kơnràñ la Bơtao sŏng dî Yang Tơm Trồ săc-rwơh lơh Bơtao Cahrña cro jîng băl î cro sơ̆t. 43Rơ̆ la bơh Kơnràñ, jơh lơ̆gay cro gơnoăr-hwơr kŭng lơh cư̆ng lah bulah cro găy ăn nùs don anẵu Kơnràñ gừn dưñ-lăñ jơno hồ-toh tồi-glài kơnơm dî sơnăn Kơnràñ.”

44Nơ̆m tơm jơ Pier kŭng hôm ndăng tơs lơ̆gay jơno rơ̆, gừn Yang Hwîng Goh jư ăm cŭngsî kơp cro ndăng ăm êt jơno Yang ông dê. 45Lơ̆gay cro don Yang gôtrê tơmpôl kŏng koh kato — rơ̆ la jơh lơ̆gay cro găy sŏng swà băl î Pier — kŭng hal-apàl, bơh jơno e gời Yang Hwîng Goh kŭng dî tôh hua cŭngsî ma lang bol bơdih. 46Bơh ƀòn gô kơnău lơ̆gay cro dô tơs bơh î lơ̆gay jơno tơs nde gư̆m jong-rơ Yang Tơm Trồ. Nơ̆m dơ̆ rơ̆, Pier pẵư dẵư lah: 47“Tom iyŏ cro găy gư̆n, digơlăn cơkhă bơkô̆ dà lơi lơ̆gay cro dô ơ̆ dî lơh ƀaptem, rơ̆ la lơ̆gay cro sŏng dưñ-lăñ Yang Hwîng Goh kŭng gư̆ptî ƀòn mơ̆n?” 48Tîrơ̆ gừn, ông tơs pơđơ ƀòn gô kŏng lơh ƀaptem nơ̆m sơnăn Yang Dŏng-klàs Jesu. Ma-ngkơi gư̆n, ƀòn gô dăn ông ăm wăl nhẵư nge te.