Bră 11

1Bơh jơ gư̆n, lơ̆gay cro gơnoăr bơtău dơng gư̆m oh mi ăm lam Juđe kơnău lah lang bol bơdih kŭng sŏng don dờp jơno niem Yang Tơm Trồ dê. 2Tîrơ̆ gừn, tơm tô̆ Pier swà hao trôh Jerusalem, lơ̆gay cro gôtrê mpôl cro kŏng koh kato tơmbơkai î ông, 3ƀòn gô tơs lah: “Ông sŏng swà mơ̆t anẵu lơ̆gay cro ơ̆ kŏng koh kato gư̆m ăm sa băl î ƀòn gô!” 4Mơya tơm tô̆ pẵư dẵư, Pier tơs tơnggư̆t nê̆ ma ƀòn gô pơnjăt gư̆p jơno rơndăp tăp seng lah: 5“Ăñ ndăng hôi-dăn anẵu ƀòn dơng Jôppe, gư̆m nhòng dơ̆ tơlôh hwîng cà ăñ lăng tơmpơl jơno e sơđah lai bơh du-lăm jơno klăm tò ndăng tư̆ng duh jư nteàh, gôlơh gư̆ptî du blah thơk dơng puôn joñ bơh trồ tơm tô̆ dî tư̆ng duh nteàh gư̆m gô trôh ƀăt anẵu ăñ, 6mà dơ̆ ngơ lăng măt nơ̆m gư̆n, ăñ lăng nê̆ gừn tơmpơl kơp lăm jơno puôn ƀĕ jư̆ng nơ̆m ù-teàh, kơp lăm jơno brê, kơp lăm jơno wîn ngsrang, băl î kơp lăm sêm trồ. 7Sŏng gư̆n ăñ kŭng kơnău du-dẵư tơs î ăñ lah: ‘Ơ Pier, ma-ngkơi jơ lôh atẵy, păl lơh rlău gừn sa cĕ!’ 8Mơya ăñ kla wăl dẵư lah: ‘Ơ Yang, ơ̆ dî ờ, bơh jơno sơmơ̆-sơmĭñ hala ơ̆ lơhiê hôm dahrăư dơ̆ găy tơmơ̆t nơ̆m kơndẵư kon.’ 9Mơya, dẵư bơh cŭngsî trồ tơs wăl nơ̆m dơ̆ bea, lah: ‘Lơ̆gay jơno găy Yang Tơm Trồ sŏng lơh lơhiê, kon bư̆ng lăng la sơmơ̆-sơmĭñ.’ 10Jơ gư̆n, bră dô tơmtom trôh păy dơ̆, sŏng gư̆n lơ̆gay jơno dî iyà trê wăl cŭngsî trồ. 11Gừn lăng năy, ƀăt jai gư̆n, tom păy hê cro-klo ñă mađàp mpông hîh mà ƀòn hî ndăng ăm, bơh sŏng dî pơđơ swà bơh nơ̆m Sesare trôh î ăñ. 12Jơ gư̆n, Yang Hwîng Goh pơđơ ăñ swà î ƀòn gô, ơ̆ kơ̆mbrit-kơ̆mbròt jơno găy ờ. Bơh gư̆n, pro hê oh mi dô kŭng swà băl î ăñ, gừn ƀòn hî swà mơ̆t nơ̆m hîh cro gư̆n dê. 13Pơnjăt te, ông gư̆n sŏng tơs wăl ma ƀòn hî mơmơh tîgay ông gư̆n sŏng tơmpơl cro gơndrơh ñă nơ̆m hîh gô, tơs lah: ‘Pơđơ cĕ cro trôh nơ̆m Jôppe gừn hôi jà Simôn, gô dî sơnăn la Pier, 14la cro rơp tơs ma mê lơ̆gay jơno sơđah pơđơ mà kơnơm bơh gư̆n, mê rơp dî dŏng-klàs — mê gư̆m băl î hîh nhă mê dê.’ 15Mơya tơm tô̆ ăñ sơntơm tơs, gừn Yang Hwîng Goh sŏng jư răp cŭngsî ƀòn gô kŭng gư̆ptî cŭngsî ƀòn hî nơ̆m tơm jơ bơhsơm. 16Sŏng gư̆n ăñ sơdơ trôh jơno tơs Yang dê, mơmơh tîgay Kơnràñ tom tơs lah: ‘Jăng sŏng lơh ƀaptem bơh î dà; mơya oh mi rôh lŏ rơp dî ƀaptem bơh î Yang Hwîng Goh.’ 17Gư̆n jîng, dilah Yang Tơm Trồ sŏng dờp e ma ƀòn gô băl du jơno sơmah kŭng gư̆ptî dờp e ma ƀòn mơ̆n tơm tô̆ ăn nùs don nơ̆m anẵu Yang la Yang Dŏng-Klàs Jesu, gừn ăñ la cro găy mà digơlăn cơkhă wăl Yang Tơm Trồ?” 18Jơ gư̆n, dơ̆ sŏng kơnău nhẵư jơno gư̆n, ƀòn gô dơh tơmbơkai wăl mà nư̆ng jong-rơ Yang Tơm Trồ, tơs lah: “Tîrơ̆ gừn Yang Tơm Trồ kŭng sŏng dờp e ma lơ̆gay lang bol bơdih nùs tơcao mbư̆ng glài lơi dưñ-lăñ jơno jîng.”

19Tơng-jăt ma gư̆n, lơ̆gay cro kŏng kơ̆mprah-kơ̆mprĭng bơh gung kơ̆p-cơkhă tom tơlôh bơh bră Etien sŏng lam tơlôh trôh anẵu lơgơ Phenesi, Ciprơ î Antiôt ơ̆ cro găy tơs bơh jơno niem Yang, sî nư̆ng cro Juđa. 20Mơya nhẵư hê cro nơ̆m khà gư̆n la tơmpôl cro lơgơ tơm Ciprơ î Siren, mà lơ̆gay tơmpôl ƀòn dô tơm tô̆ sŏng swà trôh nơ̆m Antiôt, ƀòn gô kŭng tơs î lơ̆gay cro Grek, tơs tơnggư̆t Jơno Niem gôtrê bơh Yang Jesu. 21Tê Yang dê ăm băl î ƀòn gô; gừn du khà khăi ngăn, bơh don, sŏng tơmblăc trê wăl ma Yang. 22Jơ gư̆n, jơno tieng pơndrơ bơh tơmpôl ƀòn dô lam kơnău trôh nơ̆m tua Hîh Jư̆m Goh nơ̆m anẵu Jerusalem, gư̆n-jîng ƀòn gô pơđơ Ƀanaƀa swà trôh nơ̆m anẵu Antiôt, 23mà ma-ngkơi jơ trôh anẵu î lăng tơmpơl jơno sơmah Yang Tơm Trồ dê, ông dî sơhờp-sờhơn ngăn gừn mơ̆ndơm-mơ̆nieng lơ̆gay kư̆ ăm nơ̆m Yang bơh î jơno kơđư̆ng nơ̆m nùs-nhơ̆m. 24Bơh ông la du hôi cro niem, bîng-jut Yang Hwîng Goh băl î jơno don, gừn khăi cro dî bơtăl tơmơ̆t nơ̆m Yang. 25Ma-ngkơi gư̆n, ông swà trôh nơ̆m Tarsơ lơi jôi Sol. 26Tơm tô̆ jôi tom, ông bơlăm Sol trôh nơ̆m Antiôt. Bơh gư̆n, bră tom tơlôh gôtrê ma ƀòn gô tien gơs nơ̆m du năm gư̆n la dî ăm bơjư̆m wăl î Hîh Jư̆m Goh gư̆m ƀăn bơtău khăi cro. Mơya, lơ̆gay cro bơtê dî sơnăn la Cro Don Yang nơ̆m Antiôt dơ̆ sơm.

27Jơ gư̆n, nơ̆m lơ̆gay nge gư̆n, nhẵư hê cro gơnoăr-hwơr bơh Jerusalem swà jư trôh nơ̆m Antiôt. 28Bơh gư̆n, ma-ngkơi jơ du hôi cro nơ̆m khà ƀòn gô, sơnăn la Agaƀus, ñă atẵy, tài bơh Yang Hwîng Goh, ông e tơnggư̆t lah du jơno jơgloh-dơng mơ̆n tơngtrôh nơ̆m kơp dunya. Bră dô sŏng tom tơlôh nơ̆m rai Klôdơ. 29Bơh rơ̆ la nơ̆m lơ̆gay cro bơtê, kơp du hôi cro nơ̆m khà gư̆n dilah cro găy dî pran trôh dî dư̆ng găy, ƀòn gô sŏng lơh nên ăn lơi dêh jơno pơnah tơmdŏng lơi lơboh e ma oh mi rôh lŏ jîng ăm nơ̆m lơgơ Juđe, 30mà ƀòn gô sŏng lơh tîgư̆n ngăn, tơm tô̆ lơboh trôh ma lơ̆gay cro kwăng kra, kơnơm bơh tê Ƀanaƀa dê î Sol.