Bră 12

1Jơ gư̆n, nơ̆m tô̆ tơnge gư̆n, bơtao Herôt e tê lơh rôn-bơklơ̆n du khà cro nơ̆m Hîh Jư̆m Goh. 2Tô̆ gư̆n, ông gư̆n tơngsơ̆t sơ̆t Jakơ, amî Jăng dê bơh î pàs-đao. 3Bơh gư̆n, tơm tô̆ tơmpơl gư̆t lah bră dô la jơno niem nùs gôtrê bơh cro Juđa, ông gư̆n kŭng sơntơm swà kơ̆p jư Pier (mà lơ̆gay bră gư̆n tom tơlôh nơ̆m lơ̆gay nge Bơjư̆m-Sa Ƀăñ Ơ̆ Tom Dong dê), 4gừn ma-ngkơi jơ kơ̆p jư gô, ông gư̆n sŏng pơđơ kơ̆p ăn nơ̆m hîh jam, pơđơ puôn hê lĭñ ăm cơkhă hîh jam lăng jư gô, kơñ lơh nên iyà gô sơđàp măt lang bol ma-ngkơi nge Bơjư̆m-Sa Swà-Găn. 5Bơh rơ̆ la, bulah Pier ndăng kŏng jam nơ̆m hîh ñô̆ng, mơya jơno hôi-dăn gừn ờs dî lơh nên dubă jơh nùs gôtrê mađah Yang Tơm Trồ ăn lơi ma ông bơh Hîh Jư̆m Goh. 6Jơ gư̆n, nơ̆m jơ bơtao Herôt mơn iyà Pier tơlôh nơ̆m anẵu cahrña, nơ̆m măng gư̆n, Pier ndăng bĭc nơ̆m nhòng bea hê tơmpôl lĭñ, kŏng căp bơh î bea dăng săy-srê̆, ơ̆ dî nư̆ng tîgư̆n lơ̆gay tơmpôl lĭñ ăm cơkhă bơlao mađàp mpông ndăng ăm jư hîh ñô̆ng. 7Lăng năy, du hôi cro gơndrơh Yang dê trôh ăm ñă sơđàp ông, jơno ang gơcrà jroh ang nơ̆m ơdô̆ hîh jam. Jơ gư̆n, ma-ngkơi jơ tơmpơ̆p sơ pô̆ng dà Pier, cro gơndrơh ble ông, tơs lah: “Lôh khơñ cĕ,” gừn lơ̆gay săy-srê̆ ông ru duh bơh tê. 8Jơ gư̆n, cro gơndrơh tơs î ông lah: “Cù dêh cĕ săy bơ̆t gư̆m crăp cơkhŏ mê dê jờh.” Bơh gư̆n, ông lơh-jăt gư̆ptî gư̆n. Cro gơndrơh kŭng tơs î ông lah: “Cù cĕ ao makin mê dê gừn jăt ăñ.” 9Ma-ngkơi jơ tơlôh makin, ông jăt cro gơndrơh gư̆n mà ông ơ̆ gư̆t lah bră ndăng dî lơh nên bơh cro gơndrơh la jơno ngăn mơya ông kư̆ tôn-lah ndăng tơmpơl du jơno e sơđah lai. 10Dơ̆ sŏng swà sơlèt găn tơmpôl lĭñ ăm jư cơkhă dơ̆ sơm î dơ̆ bea, ƀòn gô swà trôh sơ mpông bơh î lòs bơlăm tơmơ̆t nơ̆m ƀòn dơng; mà mpông tơpẵư dêh ma ƀòn gô. Ma-ngkơi jơ tơlôh makin, ƀòn gô swà jư nơ̆m du-lăm gung măy gừn cro gơndrơh ni sơna swà ha-ău thơ̆t bơh sơ ông. 11Tơm tô̆ sătan sŏng sơdơ wăl, Pier tơs lah: “Iyŏ ngăn, jai dô gư̆n ăñ gư̆t lah Yang sŏng pơđơ cro gơndrơh Kơnràñ gừn tơmdŏng ăñ klàs bơh tê bơtao Herôt, băl î lơ̆gay ăm cang cro Juđa dê.” 12Ơ̆ dî nư̆ng tîgư̆n, dơ̆ sŏng wơng dî tîgư̆n, ông swà trôh nơ̆m hîh Mari, mơi Jăng dê, dî sơnăn la Mak, mà nơ̆m anẵu dô tom khăi cro don Yang dî bơjư̆m wăl î ndăng hôi-dăn. 13Jơ gư̆n, tơm tô̆ ông toh mpông dơng, du hôi cro dê̆-gơna ua, sơnăn la Rôda lơbà swà trôh en lơi kla dẵư. 14Ma-ngkơi jơ đăl gư̆t dẵư Pier dê, mà bơh sơhờp-sờhơn, gô hwơbê̆ pẵư mpông, mơya cơplŏk mơ̆t wăl nơ̆m nhòng, gô tơs tơnggư̆t lah: “Pier ndăng ăm ñă sơ mpông.” 15Mơya, ƀòn gô tơs î cro-ua dŏng bră lah: “E ndăng mòs sơnrăng.” Mơya cro-ua dŏng bră kư̆ ñăng ñăng bră tơngtrôh tîgư̆n, gư̆n-jîng ƀòn gô tơs lah: “Gư̆n la gơndrơh ông gư̆n dê.” 16Tơblơ̆ wăl, Pier kư̆ toh mpông, gừn ma-ngkơi jơ pẵư mpông, ƀòn gô lăng tơmpơl ông gừn dưñ lơh hal-apàl. 17Jơ gư̆n, tơm tô̆ sŏng lơh têl bơh î tê ma ƀòn gô ăm-ƀơt, ông tơs sơđah mơmơh tîgay mà Yang sŏng bơlăm ông tơlôh bơh hîh jam. Mơya, ông ƀăn tơngkah lah: “Păl tơs wăl lơ̆gay bră dô ma Jakơ î ma lơ̆gay oh mi rôh lŏ.” Sŏng gư̆n lơbà tơlôh makin, ông swà trôh nơ̆m du-anẵu nde. 18Jơ gư̆n, nơ̆m brê ang, tom jơno ndrăm-ndròm ơ̆ êt nơ̆m tơmpôl lĭñ bơh bră sŏng tom tơlôh ma Pier. 19Hôm Herôt, tơm tô̆ sŏng e gơnoăr lăng swì cro mà ơ̆ jôi tom, dơ̆ khao lùp sŏng tơmpôl lĭñ ăm jư cơkhă, bơtao e gơnoăr pơđơ tơngsơ̆t ƀòn gô. Gừn ma-ngkơi jơ bơh Juđe jư trôh nơ̆m Sesare, ông ăm wăl nơ̆m anẵu gư̆n.

20Jơ gư̆n, ông gư̆n ndăng tơcao ngăn lang bol Tirơ î lang bol Siđôn. Bơh gư̆n, ƀòn gô băl î găp swà trôh tơmtom ông gư̆n, gừn tơm tô̆ sŏng mơ̆ndơm dî Ƀalatus, la cro kwăng dŏng bră ăm en bơtao dê, ƀòn gô dăn tơmrơm wăl bơh lơgơ ƀòn gô dî dờp e jini-jơno sa bơh lơgơ cro bơtao dê. 21Dơ̆ gư̆n, nơ̆m nge sŏng dî lơh nên, ma-ngkơi jơ cù ao bơtao î nggui nơ̆m sơban, Herôt tơs sơđàp măt ƀòn gô. 22Jơ gư̆n, lang bol dreo dơng lah: “Gư̆n la dẵư du hôi yang dê, ơ̆-iyŏ dẵư kon-mơnùs dê!” 23Sŏng gư̆n ƀăt jai gư̆n, du hôi cro gơndrơh Yang dê pơng lơh ông gư̆n, tài bơh ông gư̆n ơ̆ ăn jơno gơklŏ ma Yang Tơm Trồ, gừn ma-ngkơi jơ kŏng rhai ken sa, gừn ông gư̆n ha-ău nhim sơ̆t.

24Hôm jơno niem Yang Tơm Trồ dê kư̆ lam ơnàng î dî pẵư ơnàng rlo te.

25Pơnjăt bơh gư̆n, Ƀanaƀa î Sol blăc trê trôh nơ̆m Jerusalem, tơm jơ lơh sŏng gơnoăr duh bră mơ̆n dê, iyà băl î Jăng la cro lơh bră băl, cro dî sơnăn la Mak.