Bră 13

1Jơ gư̆n, nơ̆m nhòng Hîh Jư̆m Goh nơ̆m Antiôt, tom kơp cro gơnoăr-hwơr î cro bơtău: Rơ̆ Ƀanaƀa, Simeôn dî sơnăn la Nije, Lusius cro Siren, Manahem oh rong bơtao Herôt la bơtao cro oh dê, î Sol. 2Dơ̆ gư̆n, tơm tô̆ ƀòn gô ndăng duh-khoai Yang î ăt sa, gừn Yang Hwîng Goh tơs lah: “Păl ăn dêh Ƀanaƀa î Sol mande ma Ăñ, bơh gơnoăr bră mà Ăñ sŏng hôi-săc ƀòn gô.” 3Bơh rơ̆, ma-ngkơi jơ ăt sa, hôi-dăn î ăn tê cŭngsî bea hê ƀòn gư̆n, ƀòn gô lơi ma bea hê gư̆n swà.

4Gừn, ma-ngkơi jơ dî pơđơ swà bơh Yang Hwîng Goh, bea hê ông swà jư trôh nơ̆m Selơsi; gừn bơh rơ̆ ƀòn gô hao nơ̆m ahẵu trôh nơ̆m Ciprơ. 5Dơ̆ sŏng trôh nơ̆m Salamis, ƀòn gô tơs tơnggư̆t jơno niem Yang Tơm Trồ dê nơ̆m lơ̆gay hîh jơnư̆m cro Juđa dê. Bơh jơ gư̆n, ƀòn gô kŭng dî Jăng gư̆ptî du hôi cro jăt dŏng bră. 6Pơnjăt bơh rơ̆, ma-ngkơi jơ swà găn bôt bơlao trôh nơ̆m anẵu Paphô, ƀòn gô tơmtom du hôi cro năy, la du hôi cro gru, gơnoăr-hwơr mablăc cro Juđa, sơnăn gô la Ƀarjesu, 7mà cro dô ăm băl î cro kwăng dơng lơgơ Sejus Polus — du hôi cro wơng gư̆t. Tơm tô̆ sŏng dờp hôi jà Ƀanaƀa î Sol, cro kwăng dơng jôi jăt lơi kơñ iet kơnău jơno niem Yang Tơm Trồ dê. 8Mơya “cro gru” Elimas (bơh sơnăn măt gô dî cêh tơlôh tîgư̆n), tơmdră î ƀòn gô; jôi kơp jơno tơmblăc cro kwăng dơng lơgơ bơh jơno don. 9Hôm Sol, kŭng sơnăn la pol, dî bîng-jut Yang Hwîng Goh, dơ̆ lăng nê̆ nê̆ ma gô, 10gừn tơs lah: “Ơ cro bîng-jut lơ̆gay jơno blăc pơlum gư̆m wêl-tăl lơ̆gay jơno bờk-mơsăk, kon cà-ràk dê, la cro tơmdră lơ̆gay jơno tơpăt-durư̆ng dê, ông rơp ơ̆ bơdê tơs blăc gung dà tơpăt-durư̆ng Yang dê ya? 11Jơ dô, păl lăng cĕ, tê Yang dê tơmdră wăl î mê gừn mê rơp kŏng ñô̆ng măt. Ơ̆ lăng tơmpơl măt tơnge nơ̆m du tô̆ tơnge te.” Tîrơ̆ la, ƀăt jai gư̆n, jơno kơnăm ñô̆ng tôh nơ̆m gô, gừn gô swà bơdăc nư̆ng du noh kơnơm cro nde iyà tê tề lăm mơ̆n. 12Jơ dô, tơm tô̆ sŏng tơmpơl nê̆ bră mhăy tom tơlôh, cro kwăng dơng lơgơ don, bơh kŏng ndrăt-ndròt nơ̆m jơno bơtău Yang dê.

13Jơ gư̆n, ma-ngkơi jơ hao nơ̆m ahẵu bơh Paphô, lơ̆gay cro swà băl î Pol swà trôh nơ̆m Perje gôtrê mađah lơgơ Pamphili. Mơya bơh ruc wăl bơh ƀòn gô, Jăng blăc trê wăl nơ̆m Jerusalem. 14Hôm ƀòn gô, ma-ngkơi jơ tơlôh bơh Perje, gừn swà trôh nơ̆m Antiôt gôtrê mađah lơgơ Pisidi, gừn tơm tô̆ sŏng swà mơ̆t nơ̆m hîh jơnư̆m nơ̆m nge Saƀat, ƀòn gô nggui bơjư̆m băl. 15Ma-ngkơi bră đŏk sră jơno-bơlăm î lơ̆gay sră gơnoăr-hwơr, lơ̆gay cro ăt-bồ hîh jơnư̆m pơđơ cro trôh î ƀòn gô, tơs lah:

“Ơ ƀòn ông, tơmpôl oh mi, dilah dî jơno niem mơ̆ndơm-mơ̆nieng găy ăn lơi ma lang bol anẵu ƀòn ông, gừn dăn păl tơs cĕ.” 16Bơh gư̆n, ma-ngkơi jơ ñă atẵy î pai tê lơh têl, Pol tơs lah: “Ơ oh mi, lơ̆gay cro Israel î lơ̆gay cro găy duh kơ̆mbrit Yang Tơm Trồ, dăn iet kơnău. 17Yang Tơm Trồ lang bol Israel dô sŏng săc-rwơh ông-pang ƀòn mơ̆n, lơh ƀòn gô kơnhơ̆p-mơ̆nda nơ̆m tô̆ tơnge jîng ăm bơdơh nơ̆m lơgơ Ejiptơ, gư̆m bơh î kơ̆mpang tê yŏk yơng, Kơnràñ bơlăm ƀòn gô tơlôh bơh nơ̆m gư̆n. 18Nơ̆m tô̆ tơnge pơngăp puôn-jư̆t năm Kơnràñ kŏng-ăt ƀòn gô nơ̆m anẵu ƀlang-càs. 19Gừn ma-ngkơi jơ tơngroh poh nŏk-noi nơ̆m lơgơ Kanaan, Kơnràñ dờp lơgơ ƀòn gư̆n ma ƀòn gô lơh srăy-brê, 20nơ̆m pơngăp puôn-rhieng prăm-jư̆t năm. Ma-ngkơi lơ̆gay bră gư̆n, Kơnràñ sŏng dờp e ma ƀòn gô lơ̆gay cro kwăng cahrña trôh dî rai cro gơnoăr-hwơr Samuel. 21Bơh gư̆n trôh ma-ngkơi, lang bol hôi-dăn du hôi bơtao, gừn Yang Tơm Trồ sŏng dờp e ma ƀòn gô Sol, kon klo Kit dê, du hôi cro gôtrê mađah nŏk-noi Ƀenjamin, nơ̆m puôn-jư̆t năm. 22Gừn dơ̆ sŏng lơi căư ông gư̆n, Kơnràñ pồ Dabit lơh jîng bơtao ma ƀòn gô, mà tơm tô̆ lơh cư̆ng bơh gô, Kơnràñ kŭng tơs lah: ‘Ăñ sŏng jôi tơmpơl Dabit, kon klo Jese, du hôi cro jăt nùs Ăñ, la cro rơp lơh lơ̆gay jơno jăt nùs-kơñ Ăñ jê.’ 23Bơh kon so cro bơtao dô, jăt gư̆ptî jơno hăư, Yang Tơm Trồ sŏng iyà trôh ma Israel du Bơtao Dŏng-Klàs, la Yang Jesu, 24tơm tô̆ Jăng sŏng tơs bơtău lai mađàp gư̆n du gơnoăr lơh ƀaptem bơh jơno tơcao mbư̆ng glài ma lơ̆gay lang bol Israel, lai ma tô̆ jơno sơđah-să Kơnràñ dê. 25Jơ gư̆n, dơ̆ Jăng ndăng lơh tơngsŏng gơnoăr bră mơ̆n, ông tơs lah: ‘Oh mi rôh lŏ kơlôi ăñ la măt cro? Ơ̆-iyŏ la ăñ ơ̆. Mơya, păl lăng cĕ, Bơtao ndăng trôh ma-ngkơi ăñ, la Bơtao mà ăñ ơ̆ dî păl lơi hồ săy cơkhŏ sơ jư̆ng Kơnràñ.’

26Ơ ƀòn ông, ơ oh mi, la kon so gôtrê mađah nŏk-noi Abraham î tơmpôl cro duh kơ̆mbrit Yang Tơm Trồ nhòng tĕdơ oh mi, jơno Yang nơ̆m jơno dŏng-klàs dô sŏng dî pơyoa trôh ma ƀòn mơ̆n. 27Bơh tơmpôl cro jîng ăm nơ̆m Jerusalem î lơ̆gay kơnă tơmpôl kwăng ƀòn gô dê ơ̆ đăl gư̆t Bơtao gư̆n, gư̆n-jîng ƀòn gô sŏng lơh gôjîng iyŏ ngăn lơ̆gay jơno tơmpôl cro gơnoăr-hwơr ờs dî đŏk kơp nge Saƀat. 28Bulah ơ̆ jôi tom du-lăm jơno găy ma jơno tơngsơ̆t, Mơya ƀòn gô sŏng răc-dăn Pilat tơngsơ̆t cĕ Kơnràñ. 29Jơ gư̆n, dơ̆ ƀòn gô sŏng lơh wêl-tăl lơ̆gay jơno dî cêh bơh Kơnràñ, gừn ma-ngkơi jơ iyà Kơnràñ jư bơh sî pư̆ng, ƀòn gô ăn Kơnràñ nơ̆m du mơ̆ntô ƀùc. 30Mơya Yang Tơm Trồ sŏng lơh Kơnràñ jîng wăl bơh nơ̆m anẵu sơ̆t, 31mà Kơnràñ sŏng dî lăng tơmpơl nơ̆m khăi nge bơh tơmpôl cro swà hao băl î Kơnràñ bơh nơ̆m Galile trôh nơ̆m Jerusalem, tơmpôl ƀòn gư̆n jai dô la cro lơh cư̆ng Kơnràñ dê sơđàp măt lang bol. 32Ƀòn hî ndăng tơs tơnggư̆t Jơno Niem Yang Tơm Trồ ma oh mi rôh lŏ, la jơno hăư sŏng trôh î ông-pang ƀòn mơ̆n dê, 33lah Yang Tơm Trồ sŏng lơh nên wêl-tăl jơno gư̆n ma lơ̆gay kon so ƀòn mơ̆n dê, tơm tô̆ lơh Yang Jesu jîng wăl, kŭng gư̆ptî jơno sŏng dî cêh nơ̆m sră Tơs-crih tăp bea lah:

‘Kon la Kon Ăñ, nge dô Ăñ sŏng bơda jîng Kon.’

34Pơnah nde, bơh bră rơ̆ Kơnràñ sŏng lơh Bơtao gư̆n, jîng wăl bơh nơ̆m anẵu sơ̆t, rơp ơ̆ hôm tơmblăc trê î jơno ôm-lề te, gư̆n-jîng Kơnràñ tơs lah:

‘Ăñ rơp dờp e ma Kon lơ̆gay jơno sơmah lơnge sang-goh Dabit dê, rơ̆ la lơ̆gay lơnge-lơngồ nên-nôn ngăn.’

35Kŭng bơh rơ̆, Kơnràñ tơs nơ̆m du sră Tơs-crih nde, lah:

‘Kơnràñ rơp ơ̆ lơi ma Bơtao Sang-Goh Kơnràñ tơmpơl jơno ôm-lề.’

36Tom jơno, gôtrê î Dabit nơ̆m rai sătan mơ̆n, ma-ngkơi jơ duh bră jăt nùs-kơñ Yang Tơm Trồ dê, gừn gô sŏng bĭc, dî iyà tăp băl î ông-pang mơ̆n, gừn sŏng tơmpơl jơno ôm-lề. 37Mơya Bơtao mà Yang Tơm Trồ sŏng lơh jîng wăl gừn ơ̆ tơmpơl jơno ôm-lề. 38Gư̆n-jîng, ơ ƀòn ông, ơ oh mi jơno dô păl la jơno gư̆t wơng gôtrê î oh mi lah, kơnơm bơh Bơtao gư̆n, jơno sơmah hồ-toh tồi-glài dî tơs tơnggư̆t ma oh mi, î klàs bơh lơ̆gay jơno mà tài bơh jơno gư̆n, oh mi ơ̆ digơlăn sơnăn la tơpăt-durư̆ng jăt jơno-bơlăm Môise. 39Kơnơm Bơtao rơ̆, lơ̆gay cro don gừn dî sơnăn la tơpăt-durư̆ng 40Gừn, păl gư̆t kơhea, kơ̆mbrit jơno sŏng dî tơs nơ̆m lơ̆gay sră cro gơnoăr-hwơr digơlăn tơngtrôh ma oh mi:

41‘Ơ tơmpôl cro tơngyŏ-tơnghiel mờc-bơsah năy, ngơ lăng cĕ, sŏng gư̆n kơ̆mbrit-kơ̆mbròt î kŏng tơngroh sơ̆t cĕ;

Bơh Ăñ ndăng lơh du bră nơ̆m rai ƀòn mê,

du bră mà ƀòn mê nên-nôn ngăn ơ̆ don, bulah cro găy gư̆n tơs tơnggư̆t ma ƀòn mê.’”

42Jơ gư̆n, tơm tô̆ bea hê ông ndăng tơlôh swà, lang bol răc-dăn lơi dî bơtău ma mơ̆n lơ̆gay jơno gư̆n nơ̆m nge Saƀat pơnjăt te. 43Jơ gư̆n, tơm tô̆ brê bơjư̆m băl sŏng lờt, khăi cro Juđa î tơmpôl cro ngăc-ngăr gung duh-khoai cro Juđa sŏng swà jăt Pol î Ƀanaƀa, tơm tô̆ bea hê răk-sa î ƀòn gô, gừn răc-dăn ƀòn gô kư̆ ăm te nơ̆m jơno sơmah Yang Tơm Trồ dê.

44Bơh gư̆n, nơ̆m nge Saƀat poh mhăy, gôlơh gư̆ptî du ƀòn dơng tơng bơjư̆m wăl lơi iet jơno niem Yang dê. 45Mơya tơm jơ lăng tơmpơl tơmpôl jơnư̆m, tơmpôl cro Juđa bîng nùs tơmngañ, gừn tơmdră wăl lơ̆gay jơno bơh Pol tơs, bơh î bră tơngñŏ tơnghiel ông. 46Kla wăl dubă khơ̆n-sa, băl Pol î Ƀanaƀa sŏng tơs lah: “Jơno dî păl la Jơno Niem Yang Tơm Trồ dê păl dî bơtău ma ƀòn mê lai ngăn. Bơh đăl gư̆t lah ƀòn mê khan lơi căư bơh jơno niem dô gừn swì lăng dêh sătan mơ̆n ơ̆ dî păl î jơno jîng miek miek, gư̆n-jîng ngơ lăng cĕ, ƀòn hî ndăng blăc lêh ma lơ̆gay lang bol bơdih. 47Bơh Yang sŏng e gơnoăr pơđơ ma ƀòn hî tîdô lah:

‘Ăñ sŏng ăn kon gư̆ptî jơno ang ma lơ̆gay lang bol bơdih,

lơi kon jîng ma jơno dŏng-klàs trôh nơ̆m dơ̆t-lŭi ple-ù.’”

48Jơ gư̆n, tơm tô̆ kơnău tîrơ̆, tơmpôl cro bơdih sơhờp-sờhơn gư̆m jong-rơ Jơno Niem Yang dê, gừn lơ̆gay tơmpôl găy sŏng dî lơh nên ma jơno jîng miek miek gừn don jăt. 49Bơh gư̆n, jơno niem Yang dê dî lam kơp lơ̆gay anẵu nơ̆m lơgơ. 50Mơya cro Juđa pơjô̆ lơ̆gay cro-ua ngăc-ngăr jơno Yang dî tien pơndrơ băl î lơ̆gay cro gơnoăr bră dơng nơ̆m ƀòn dơng. Sŏng gư̆n du jơno kơ̆p rôn-bơklơ̆n ndôh ñă tơmdră wăl Pol î Ƀanaƀa, ƀòn gô tơmprơh bea hê tơlôh bơh ƀòn dơng ƀòn gô dê. 51Jơ gư̆n, ma-ngkơi jơ pàs buh anẵu kơ̆mpang jư̆ng lơi tơmdră wăl ƀòn gô. Bea hê swà trôh nơ̆m Ikôni. 52Hôm lơ̆gay cro bơtê dî bîng-jut jơno sơhờp-sờhơn î Yang Hwîng Goh.