Bră 14

1Jơ gư̆n, bră tom tơlôh nơ̆m anẵu Ikôni rơ̆ la băl î găp ƀòn gô swà mơ̆t nơ̆m hîh jơnư̆m cro Juđa dê gừn bơtău gư̆ptî rơ̆ tien gơs khăi ngăn cro, gư̆m cro Juđa băl î cro Grek don jăt. 2Mơya lơ̆gay cro Juđa ơ̆ don sŏng pơjô̆ î lơh nùs tua tơmpôl cro bơdih kơlôi bờk tơmdră wăl î lơ̆gay oh mi. 3Bơh rơ̆, ƀòn gô ăm wăl nơ̆m gư̆n du tô̆ tơnge, bơtău dubă khơ̆n-sa gôtrê bơh Yang, la Bơtao cư̆ng-tang ma jơno Yang jơno sơmah Kơnràñ dê bơh î bră lơh lơ̆gay têl phadêh î bră phadêh tom tơlôh kơnơm bơh tê ƀòn gô. 4Mơya lang bol nơ̆m ƀòn dơng kŏng tơmcơlah jîng bea, gừn du pơnah gừn jăt cro Juđa, hôm du pơnah nde jăt lơ̆gay cro gơnoăr bơtău dơng. 5Mơya, nơ̆m dơ̆ bơyê jơno kơ̆p rôn-bơklơ̆n tơmpôl cro bơdih dê gư̆m î cro Juđa băl î tơmpôl kwăng ăt-bồ ƀòn gô dê, dî gôjîng lơi kơ̆p rôn-bơklơ̆n î kơdăng lô̆ ƀòn gô, 6gừn ma-ngkơi jơ gư̆t jơno gư̆n, gừn ƀòn gô pleh trôh ma lơ̆gay ƀòn dơng Likaôni, Listrơ, Derbơ î bơlao ƀòn tĕdơ, 7sŏng nơ̆m gư̆n, ƀòn gô bơtău pơnjăt te Jơno Yang.

8Nơ̆m Listrơ, du hôi cro kwèt-kwe năy ndăng nggui, î kơ̆mpang jư̆ng kwèt-kwe bơh tơm tô̆ hôm nơ̆m ăm klô̆ng mơi mơ̆n, mà amî gư̆n hôm dahrăư dơ̆ găy lơbà swà. 9Amî dô iet Pol bơtău, mà tơm tô̆ ông lăng nê̆ nê̆ ma amî dô gừn tơmpơl lah, amî dô dî jơno don lơi dî sămƀeah. 10Ông tơs dơng dẵư lah: “Mê ñă tơpăt cĕ bơh î kơ̆mpang jư̆ng mê dê.” Sŏng gư̆n amî dô ñă sơndŏng cŭngsî gừn lơbà swà. 11Ơ̆ dî nư̆ng tîgư̆n, tơm tô̆ lang bol lăng tơmpơl jơno mà Pol sŏng lơh, ƀòn gô pẵư dẵư, tơs bơh î jơno tơs cro Likaôni mơ̆n dê, lah: “Lơ̆gay yang, dưñ cù rồp-să kon-mơnùs, sŏng swà jư î ƀòn mơ̆n.” 12Ƀòn gô kŭng sơnăn Ƀanaƀa la “yang Juƀite,” hôm Pol la “yang Hermes” bơh ông la cro lăm bơtău. 13Ƀăt jai gư̆n, cro dŏng bră yang Juƀite dê, la hîh duh-khoai ăm đah mađàp ƀòn dơng, ma-ngkơi jơ iyà lamău î kơwang bơkao trôh mpông; ông gư̆n kơñ ăn jơno duh-khoai băl î lang bol. 14Mơya tơm tô̆ kơnău tîrơ̆, gừn lơ̆gay cro gơnoăr bơtău dơng, rơ̆ la Ƀanaƀa î Pol, ma-ngkơi jơ sŏng crề ao sătan mơ̆n, ƀòn gô rơndôh mơ̆t nơ̆m bơlao tơmpôl jơnư̆m, gừn dreo dơng, 15gừn tơs lah: “Ơ lơ̆gay oh mi, ngglơh oh mi lơh lơ̆gay bră dô? Ƀòn hî kŭng la lơ̆gay cro dî băl nùs-nhơ̆m gư̆ptî oh mi, ndăng tơs tơnggư̆t Jơno Yang ma oh mi, lơi tơmblăc oh mi bơh nhẵư jơno ơ̆ kwơ dô lơi trê wăl ma Yang Tơm Trồ jîng miek, Bơtao mon bơjîng trồ, ù gư̆m dàlîng băl î lơ̆gay jini-jơno nơ̆m gư̆n, 16la Bơtao mà nơ̆m kơp rai mađàp ƀua, sŏng lơi ma lơ̆gay kơp lang bol lơbà swà jăt gung dà dêh ƀòn gô dê. 17Mơya bulah tîrơ̆, Kơnràñ ơ̆ lơi prŏi cư̆ng-tang bơh sătan Kơnràñ, tơm tô̆ ờs e lơnge ma oh mi, bơh î bră e dà mih bơh trồ băl î ple-bơkao tơlôh niem, lơh nùs oh mi sa hơm wêl-tăl î jơno sa gư̆m sơhờp-sờhơn.” 18Gừn tơm tô̆ sŏng tơs lơ̆gay jơno dô, ƀòn gô nư̆ng cơkhă dî lang bol bư̆ng ăn jơno duh-khoai ma ƀòn gô.

19Mơya, tơmpôl cro Juđa bơh Antiôt î Ikôni trôh, ma-ngkơi jơ mơ̆ndơm lang bol sŏng gư̆n kơ̆ndang lô̆ Pol, ƀòn gô hwa ông tơlôh makin ƀòn dơng, bơh tôn-lah ông sŏng sơ̆t lờt. 20Mơya, dơ̆ lơ̆gay cro bơtê kơwang tĕdơ ông, gừn ma-ngkơi jơ ñă atẵy, ông swà mơ̆t nơ̆m ƀòn dơng, sŏng gư̆n nge ma-ngkơi, ông swà băl î Ƀanaƀa trôh nơ̆m Derbơ. 21Ơ̆ dî nư̆ng tîrơ̆, tơm tô̆ sŏng tơs tơnggư̆t Jơno Yang nơ̆m ƀòn dơng gư̆n î cro bơtê sơlơ̆ khăi cro, ƀòn gô blăc trê wăl nơ̆m Listrơ, sŏng gư̆n trôh nơ̆m Ikôni, î nơ̆m Antiôt. 22Kư̆ pơnjăt te lơh bơkhê nùs lơ̆gay cro bơtê, mơ̆ndơm-mơ̆nieng ƀòn gô, kơđư̆ng nùs nơ̆m jơno don, lah: “Tơmtom khăi jơno gleh-glăr la jơno păl dî păl ngăn ma ƀòn mơ̆n lơi mơ̆t nơ̆m lơgơ Yang Tơm Trồ dê.” 23Jơ gư̆n, ma-ngkơi jơ jao gơnoăr bră lơ̆gay cro kwăng kra ma ƀòn gô nơ̆m kơp Hîh Jư̆m Goh, dơ̆ sŏng hôi-dăn băl î bră ăt sa, bea hê phi jao lơ̆gay ƀòn gư̆n ma Yang, la Bơtao mà ƀòn gô sŏng ăn nùs don. 24Gừn ma-ngkơi jơ swà găn nơ̆m Pisidi ƀòn gô swà trôh nơ̆m Pamphili. 25Dơ̆ bơtău jơno Yang nơ̆m anẵu Perje sŏng, ƀòn gô swà jư lêh Attali. 26Bơh anẵu gư̆n, ƀòn gô hao nơ̆m ahẵu trôh nơ̆m Antiôt, la anẵu ƀòn gô sŏng dî jao phi nơ̆m jơno sơmah Yang Tơm Trồ dê ma gơnoăr bră lơh mà ƀòn gô sŏng lơh sŏng. 27Jơ gư̆n, tơm tô̆ sŏng trôh anẵu î bơjư̆m Hîh Jư̆m Goh wăl, ƀòn gô tơs wăl gư̆t nhẵư bră Yang Tơm Trồ sŏng lơh băl î ƀòn gô gư̆m Kơnràñ sŏng pẵư mpông jơno don ma lơ̆gay lang bol bơdih. 28Pơnjăt ma rơ̆, ƀòn gô ăm wăl î lơ̆gay cro bơtê du tô̆ tơnge ơ̆ jŏ.