Bră 15

1Sŏng gư̆n, du pơnah cro năy bơh Juđe swà jư, bơtău lơ̆gay oh mi lah: “Dilah oh mi ơ̆ kŏng koh kato jăt jơno ờs dơm Môise dê, gừn oh mi ơ̆ tom dî dŏng-klàs.” 2Tîrơ̆ la, ma-ngkơi jơ tơlôh jơno ơ̆ du nùs băl gư̆m jơno tơmbơkai ơ̆ êt nhòng Pol î Ƀanaƀa băl î du pơnah cro năy, gư̆n-jîng oh mi pơđơ Pol î Ƀanaƀa băl î du pơnah cro nde nhòng ƀòn gô lơi swà tơmtom lơ̆gay cro gơnoăr bơtău dơng î cro kwăng kra nơ̆m Jerusalem gôtrê bơh jơno sơlô̆ng-sơlăng dô. 3Gừn, tơmpôl cro dî Hîh Jư̆m Goh pơđơ swà găn băl lơgơ Phenesi î lơgơ Samari, tơs tơnggư̆t nê̆-năn jơno don jăt Yang lơ̆gay lang bol bơdih, gừn ƀòn gô sŏng iyà wăl jơno sơhờp-sờhơn dơng ma lơ̆gay kơp oh mi. 4Jơ gư̆n, dơ̆ sŏng trôh nơ̆m Jerusalem, ƀòn gô dî wă-rẵu bơh hîh jư̆m goh, lơ̆gay cro gơnoăr bơtău dơng î lơ̆gay cro kwăng kra, ơ̆ dî nư̆ng tîgư̆n, ƀòn gô tơs sơđah gư̆t nhẵư jơno mà Yang Tơm Trồ sŏng lơh băl î mơ̆n. 5Mơya tom nhẵư hê cro sŏng don năy gôtrê mađah cro Pharisi ñă atẵy, tơs lah: “Păl lơh gơnoăr koh kato ma tơmpôl ƀòn gư̆n î tơs bơtău ƀòn gô păl prăp jư jơno-bơlăm Môise.” 6Tîrơ̆ la, lơ̆gay cro gơnoăr bơtău dơng î lơ̆gay cro kwăng kra bơjư̆m wăl lơi swì lăng bơh jơno bră dô. 7Jơ gư̆n, ma-ngkơi jơ ƀòn gô tơmbơkai khăi lờt, Pier ñă atẵy tơs î ƀòn gô lah:

“Ơ ƀòn ông, ơ oh mi, oh mi kŭng gư̆t lah bơh lơ̆gay nge dơ̆ sơm nơ̆m nhòng oh mi, Yang Tơm Trồ sŏng săc-rwơh lang bol bơdih kơnơm bơh yôi ăñ lơi kơnău Jơno Niem Yang gư̆m don. 8Yang Tơm Trồ, Bơtao gư̆t nùs-nhơ̆m, sŏng lơh cư̆ng ma ƀòn gô, tơm tô̆ dờp Yang Hwîng Goh ma ƀòn gô, kŭng gư̆ptî ma ƀòn mơ̆n; 9î Kơnràñ ơ̆ tom sơntu ƀòn mơ̆n î ƀòn gô, tơm tô̆ lơh nùs ƀòn gô dî sang lơhiê tài bơh jơno don. 10Tîrơ̆ gừn no-gwơh jơ dô oh mi lòng Yang Tơm Trồ, tơm tô̆ tơngdẵu nơ̆m ngkău lơ̆gay cro bơtê du yô ngăl mà lơ̆gay ông-pang ƀòn mơ̆n î ƀòn mơ̆n kŭng ơ̆ digơlăn añ dơi? 11Tơblơ̆ wăl, ƀòn mơ̆n don lơi dî dŏng-klàs tài bơh jơno sơmah Yang Jesu dê, mà ƀòn gô kŭng jăt dubă gư̆ptî gư̆n.”

12Jơ gư̆n, du tơmpôl jơnư̆m ăm rngăp î iet Ƀanaƀa î Pol tơs wăl gư̆t nhẵư têl phadêh î bră phadêh-phadai mà Yang Tơm Trồ sŏng lơh nhòng tơmpôl lang bol bơdih bơh ƀòn gô. 13Bơh gư̆n, ma-ngkơi jơ ƀòn gô tơs sŏng, gừn Jakơ kla wăl dẵư, lah:

“Ơ ƀòn ông, ơ lơ̆gay oh mi dăn iet kơnău ăñ dô. 14Simôn sŏng sơđah nê̆ tîgay Yang Tơm Trồ lai ngăn sŏng lăng swì lơi săc-rwơh bơh kơp lang bol bơdih du lang bol ma sơnăn Kơnràñ. 15Jơno dô kŭng iyŏ ngăn î nhẵư jơno kơp cro gơnoăr-hwơr gư̆ptî sŏng dî cêh:

16‘Ma-ngkơi lơ̆gay bră gư̆n, Ăñ rơp blăc wăl,

sŏng gư̆n Ăñ rơp băt tơngñă wăl kơjang Dabit dê, la kơjang sŏng kŏng blă rlăm nteàh;

Ăñ rơp băt tơngñă wăl lơ̆gay jơno kŏng blă rlăm yo gô dê gư̆m mhơ̆ wăl gô,

17Lơi ma pơnah hôm wăl kon-mơnùs dê digơlăn jôi lăng Yang,

ƀăt gư̆m lơ̆gay kơp lang bol bơdih, mà nơ̆m lơ̆gay lang bol gư̆n sơnăn Ăñ dî răc-dăn bơh anẵu ƀòn gô.

Yang tơs tîdô, tơm tô̆ lơh lơ̆gay bră dô, 18la jơno dî gư̆t trôh bơh rai yo ƀua.’

19Gư̆n-jîng, ăñ swì lăng lah bư̆ng lơh mơrêh-mơrăñ ma tơmpôl cro bơh lơ̆gay lang bol bơdih blăc trê wăl î Yang Tơm Trồ, 20mơya, păl cêh sră ƀăn tơngkah ƀòn gô pleh wĭc jơno sơmơ̆-sơmĭñ rồp-ràk dê, jơno bĭc ăm lai, rlău brê sơ̆t lơhăp î mham. 21Tài bơh kơp rai mađàp ƀua, nơ̆m kơp ƀòn dơng, jơno-bơlăm Môise ờs dî khăi cro bơtău jơno-bơlăm gư̆n, kơnơm dî đŏk nơ̆m hîh jơnư̆m nơ̆m kơp nge Saƀat.”

22Ma-ngkơi gư̆n, lơ̆gay cro gơnoăr bơtău dơng î cro kwăng kra, băl î du Hîh Jư̆m Goh, tơmpơl păl pơđơ tơmpôl cro dî săc-rwơh nhòng tĕdơ ƀòn gô lơi trôh nơ̆m Antiôt băl î Pol gư̆m Ƀanaƀa, gừn Juđa dî sơnăn la Ƀasaƀa î Sila, rơ̆ la tơmpôl cro ăt-bồ nơ̆m lơ̆gay oh mi. 23Tơm jơ cêh sră pơyoa swà kơnơm bơh tê ƀòn gô: “Lơ̆gay cro gơnoăr bơtău dơng, lơ̆gay cro kwăng kra, lơ̆gay oh mi, pơyoa ma lơ̆gay cro don Yang nơ̆m lơ̆gay bơlao Antiôt, Siri î Silisi, rơ̆ la ma oh mi rôh lŏ, tơmpôl cro bơh kơp lang bol bơdih. Niem să ông mò oh mi! 24Bơh dơ̆ dô, ƀòn hî sŏng kơnău gư̆t lah, nhẵư hê cro năy tơm tô̆ swà tơlôh bơh nhòng ƀòn hî sŏng lơh sơlô̆ng-sơlăng oh mi rôh lŏ bơh î lơ̆gay jơno bơtău lơh mơrêh-mơrăñ nùs oh mi rôh lŏ, mà tơmpôl ƀòn dô gừn ƀòn hî hôm dahrăư e gơnoăr găy, 25gư̆n-jîng jơno niem ñư̆k ma ƀòn hî la ma-ngkơi jơ du nùs băl, săc-rwơh nhẵư hê cro, gừn pơđơ ƀòn gô swà trôh nơ̆m anẵu oh mi rôh lŏ, băl î Ƀanaƀa î Pol, bea hê oh mi kơloh ngăn ƀòn mơ̆n dê, 26la bea hê cro sŏng phi jơno jîng mơ̆n bơh sơnăn Yang ƀòn mơ̆n, la Yang Dŏng-Klàs Jesu. 27Gư̆n-jîng, ƀòn hî sŏng pơđơ Juđa î Sila, la tơmpôl cro kŭng bơtău sơđah jơno cêh dô bơh î jơno tơs. 28Bơh iyŏ ngăn lah Yang Hwîng Goh î ƀòn hî sŏng tơmpơl ơ̆ bơtăl te jơno găy dî ăn lơh kơjơ̆ oh mi rôh lŏ sî nư̆ng lơ̆gay jơno ma-ngkơi dô: 29păl pleh wĭc lơ̆gay jơno ăn duh-khoai ma rồp-ràk, mham, rlău sơ̆t lơhăp, gư̆m jơno bĭc ăm lai, oh mi rôh lŏ rơp lơh niem, tơm tô̆ jư sătan mơ̆n bơh lơ̆gay jơno gư̆n. Dăn oh mi rôh lŏ dî pran kơl dăng yơ.”

30Bơh gư̆n la, ma-ngkơi jơ dî pơđơ swà, ƀòn gô swà jư trôh nơ̆m Antiôt; gừn tơm tô̆ bơjư̆m tơmpôl jơnư̆m wăl lờt, ƀòn gô dờp sră pơyoa. 31Jơ gư̆n, tơm tô̆ đŏk sră pơyoa sŏng, lơ̆gay cro don Yang dî sơhờp-sờhơn bơh jơno mơ̆ndơm-mơ̆nieng gư̆n. 32Gư̆m Juđa băl î Sila, să tơm ƀòn gô kŭng la tơmpôl cro gơnoăr-hwơr, sŏng mơ̆ndơm-mơ̆nieng lơ̆gay oh mi rôh lŏ bơh î du jơno Yang gư̆m lơh ƀòn gô pran-kơdăng. 33Dơ̆ gư̆n, ma-ngkơi jơ ăm nơ̆m gư̆n du tô̆ tơnge, ƀòn gô dî lơ̆gay oh mi rôh lŏ lơboh tơngăc trê î tơmpôl cro sŏng dî pơđơ î ƀòn gô dubă lơngăp-lơnge. 34[Mơya Sila tơmpơl păl ăm wăl băl î ƀòn gô, gư̆n-jîng Juđa sŏng swà gung du hôi gô.] 35Hôm Pol î Ƀanaƀa kư̆ pơnjăt te ăm nơ̆m Antiôt, ƀăn mơntău î tơs tơnggư̆t jơno Yang, băl î khăi cro nde.

36Pơnjăt ma rơ̆, nơ̆m du khà nge lơh nên, Pol tơs î Ƀanaƀa lah: “Ngăn, ƀòn mơ̆n păl trôh còp-să lơ̆gay oh mi rôh lŏ, tơm tô̆ blăc trê wăl nơ̆m kơp ƀòn dơng mà ƀòn mơ̆n tơs bơtău jơno Yang, lơi lăng ƀòn gô amơh tîgay.” 37Mơya Ƀanaƀa kŭng kơñ bơlăm Jăng dî sơnăn la Mak, swà băl. 38Hôm Pol tơmpơl ơ̆ dî păl lơi bơlăm gô swà băl, rơ̆ la gô sŏng swà tơlôh bơh ƀòn gô bơh lơgơ Pamphili, gừn ơ̆ swà băl î ƀòn gô nơ̆m gơnoăr duh bră. 39Jơ gư̆n, du jơno tơmbơkai dơng tom tơlôh, tien gơs ƀòn gô kŏng tơmcơlah găp, ơ̆ dî nư̆ng tîgư̆n, Ƀanaƀa iyà Mak jăt gô hao nơ̆m ahẵu trôh nơ̆m Ciprơ. 40Hôm Pol, dơ̆ sŏng săc-rwơh Sila, gừn swà gung, ma-ngkơi jơ dî lơ̆gay oh mi rôh lŏ jao phi nơ̆m jơno sơmah Yang dê. 41Bơh gư̆n, ông swà lam lơ̆gay lơgơ Siri î Silisi, rơndăp tăp sên lơ̆gay Hîh Jư̆m Goh.