Bră 16

1Jơ gư̆n, ông kŭng swà jư trôh nơ̆m Derbơ sŏng gư̆n trôh nơ̆m Listrơ, gừn lăng năy, nơ̆m gư̆n tom du hôi cro bơtê năy sơnăn la Timôthe, kon klo du hôi cro-ua don-duh Juđa dê, mơya bàp la cro Grek, 2mà cro pơnu gư̆n dî lơ̆gay oh mi rôh lŏ lơh cư̆ng niem nơ̆m Listrơ î Ikôni. 3Pol kơñ cro pơnu dô tơlôh swà băl î mơ̆n, gư̆n-jîng ma-ngkơi jơ dî dưñ lăñ gô, ông lơh gơnoăr koh kato ma gô, bơh jơno kwơ cro Juđa dê ndăng ăm nơ̆m lơ̆gay anẵu gư̆n, tài bơh ƀòn gô gư̆t lơ̆ lah bàp gô dê la cro Grek. 4Jơ gư̆n, tơm tô̆ ƀòn gô swà gung găn lơ̆gay ƀòn dơng, ƀòn gô tơs wăl ma lơ̆gay cro don Yang păl prăp jư lơ̆gay sră jơno bơtău sŏng dî lơh nên bơh lơ̆gay cro gơnoăr bơtău dơng î lơ̆gay cro kwăng kra nơ̆m Jerusalem. 5Gừn, lơ̆gay Hîh Jư̆m Goh dî pran-kơdăng nơ̆m jơno don, gừn kơp nge sơlơ khăi bơh khà cro don Yang.

6Dơ̆ rơ̆, ƀòn gô swà găn lam lơgơ gôtrê bơlao Phirigi î Galati, bơh sŏng kŏng Yang Hwîng Goh cơkhă bơtău jơno Yang nơ̆m lơgơ Asi. 7Ma-ngkơi gư̆n, dơ̆ sŏng trôh en Misia, ƀòn gô grat swà mơ̆t nơ̆m lơgơ Ƀithini, Mơya Hwîng Yang Jesu dê kŭng ơ̆ e gơnoăr ƀòn gô mơ̆t. 8Tîrơ̆ la, ƀòn gô lơi găn Misia, ƀòn gô swà jư trôh Trôas. 9Du jơno e tơnggư̆t lai tơng sơđah î Pol nơ̆m brê tơmăng; du hôi cro Maseđoan tò ndăng ñă gư̆m hôi ông, lah: “Ma-ngkơi jơ swà găn trôh Maseđoan dăn păl tơmdŏng ƀòn hî.” 10Tîrơ̆ la, tơm jơ gư̆n ông sŏng tơmpơl jơno e tơnggư̆t rơ̆, ƀòn hî sơbăc-sơbăng jôi gung lơi swà trôh Maseđoan, bơh crăp wăl băl lah Yang Tơm Trồ sŏng hôi-săc ƀòn hî tơs bơtău Jơno Niem ma ƀòn gô.

11Tîrơ̆ gư̆n, dơ̆ sŏng jư ahẵu bơh Trôas, ƀòn hî swà tơpăt trôh Samôtras, gừn nge ma-ngkơi trôh Neapôli. 12Bơh rơ̆, trôh Philip, mà dô la ƀòn dơng dơng mang ngăn nơ̆m bơlao Meseđoan, du lơgơ gôtrê ƀòn Rôma dê, gừn ƀòn hî kư̆ ăm nơ̆m anẵu ƀòn dơng dô nhẵư nge. 13Bơh sơgư̆n, nơ̆m nge Saƀat, ƀòn hî tơlôh đah makin mpông ƀòn dơng, đah bơ dà, anẵu mà ƀòn hî kơlôi la anẵu hôi-dăn. Gừn ma-ngkơi jơ nggui nteàh ƀòn hî răk-sa î lơ̆gay cro-ua ndăng bơjư̆m wăl anẵu gư̆n. 14Du hôi cro-ua tò sơnăn la Lidi, cro kă-brău bơtơi dà bơưa brông bơh ƀòn Thiatirơ, bơh dî nùs duh kơ̆mbrit Yang Tơm Trồ, ndăng kơñ êt kơnău, la cro mà Yang sŏng pẵư nùs lơi êt nê̆ lơ̆gay jơno ndăng dî tơs bơh Pol. 15Bơh jơ gư̆n, tơm jơ mò sŏng kơñ lơh ƀaptem, băl î lơ̆gay hîh nhă mơ̆n, mò răc-dăn ƀòn hî lah: “Dilah ƀòn ông swì tơmpơl ăñ la don-tơpăt î Yang, gừn dăn păl ăm wăl, mơ̆t nơ̆m hîh ăñ.” Mò pơjèa-pơjăl ƀòn hî. 16Pơnjăt ma rơ̆, bră sơlôh tơmtom tơm tô̆ ƀòn hî ndăng swà gung trôh anẵu hôi-dăn, du hôi cro-ua dê̆ tò ndăng kŏng hwîng cà Phi tôn lơh, tơmtom ƀòn hî, mà mò ờs ndăng lơh khăi ngăn công nha ma pơnhơm mơ̆n î bră lăng tơs poah. 17Tơm tô̆ swà jăt bơh ma-ngkơi Pol î ƀòn hî, mò gư̆n dreo dơng lah: “Lơ̆gay cro dô la lơ̆gay cro dê̆-gơna Yang Tơm Trồ dê Dơng Rlo Lơ̆, mà ƀòn gô ndăng bơtău tơs ma ƀòn mê du-lăm gung dŏng-klàs.” 18Dơ̆ gư̆n, mò lơh tîgư̆n nơ̆m khăi jŏ nge. Mơya tài bơh kŏng mơrêh-mơrăñ dơng ngăn, gư̆n-jîng tơm tô̆ blăc wăl î hwîng gư̆n, Pol pơđơ: “Nơ̆m sơnăn Yang Dŏng-klàs Jesu, ăñ pơđơ ma mê tơlôh bơh ua-drôh dô.” Sŏng gư̆n gô tơlôh băl tơm jơ gư̆n.

19Mơya tơm jơ lơ̆gay cro pơnhơm mò gư̆n dê tơmpơl lah, tô̆ lơwah kă-brău mơ̆n dê sŏng roh, gừn ma-ngkơi tơm jơ kơ̆p Pol î Sila, ƀòn gô hwa bea hê trôh nơ̆m anẵu drà ƀòn dơng trôh anẵu lơ̆gay tơmpôl cro kwăng. 20Dơ̆ iyà bea hê trôh sơđàp lơ̆gay cro kwăng dơng lờt, ƀòn gô tơs lah: “Nhẵư cro dô ndăng lơh pơjô̆ nùs ƀòn dơng ƀòn mơ̆n, bơh la lang bol Juđa. 21Gư̆n-jîng ƀòn gô ndăng bơtău tơs lơ̆gay jơno ờs dơm mà ơ̆ dî gơnoăr ma ƀòn mơ̆n dî gơnoăr dưñ hala lơh jăt, tài bơh la lang bol Rôma.” 22Gừn mpôl khăi du nùs ñă atẵy tơmdră wăl bea hê, gư̆n-jîng ma-ngkơi jơ crề tĕ ao ƀòn gô, lơ̆gay cro kwăng dơng e gơnoăr pơđơ pơng lơh ƀòn gô î mư̆ng we. 23Bơh sơgư̆n, dơ̆ sŏng pơng băm bea hê khăi lờt, ƀòn gô kơ̆p tơmơ̆t bea hê nơ̆m hîh jam, pơđơ ma cro ăt-bồ hîh jam lăng ƀòn gô dubă căk-cê, 24mà cro ăt-bồ gư̆n, tơm tô̆ sŏng lăñ gơnoăr gư̆ptî gư̆n, sŏng tơng-gron ƀòn gô nơ̆m hîh ñô̆ng ngglăm, gư̆m cơ-khwà jư̆ng ƀòn gô nơ̆m anôh. 25Bulah tîgư̆n, pơngăp nggùl măng, ndăng tơm jơ hôi-dăn, Pol î Sila đas-sờ jong-rơ Yang Tơm Trồ, hôm lơ̆gay cro ăm jam nde gừn êt kơnău ƀòn gô. 26Bơh jơ gư̆n, nisơna du jơno wăñ ù dơng ngăn sơlôh trôh, tien gơs mơnang hîh jam rơnggô wăñ-lơnggơh, gư̆n lơ̆gay tơnăng mpông jai gư̆n dî tơpẵư hwơng, gư̆m săy-srê̆ lơ̆gay cro prŏi tơpŏ rlôs. 27Tîrơ̆ la, tơm tô̆ cro ăt-bồ hîh jam ndrăt lôh, lăng tơmpơl lơ̆gay mpông hîh jam sŏng pẵư hwơng, gư̆n-jîng tă đao mơ̆n makin, ông mơñ bi srăp sătan bơh tôn-lah lơ̆gay cro ăm jam sŏng toat pôn lơ̆. 28Mơya Pol dreo dơng dẵư, lah: “Bư̆ng lơh bờk să mơ̆n, bơh lơ̆gay ƀòn hî hôm ndăng ăm nơ̆m dô.” 29Tîrơ̆ la, ma-ngkơi jơ pơđơ dưñ oềs đeng, ông gư̆n kađa cơplŏk mơ̆t nhòng, gư̆m bơh kŏng ntơ-să kơ̆mbrit, ông cơdơn krô̆ng sơđàp măt Pol î Sila, 30gừn ma-ngkơi jơ lơboh ƀòn gô tơlôh makin, ông tơs lah: “Ơ kơnràñ, jơno găy anẵu ăñ păl lơh nên lơh jăt, lơi e ma ăñ digơlăn dî dŏng-klàs?” 31Tîrơ̆ la, ƀòn gô tơs lah: “Păl don anẵu Yang Jesu, gừn ông rơp dî dŏng-klàs — ông gư̆m cro hîh nhă ông dê.” 32Gừn ƀòn gô bơtău jơno Yang ma ông băl î jơh lơ̆gay cro nhòng hîh ông. 33Gư̆m nơ̆m jơ gư̆n nhòng brê tơmăng, ma-ngkơi jơ iyà ƀòn gô swà băl î mơ̆n, ông rao lơhiê ma ƀòn gô anẵu sồt-rmañ, sŏng gư̆n ông kŏng lơh ƀaptem jai — ông băl î lơ̆gay cro hîh nhă mơ̆n. 34Bơh sơgư̆n, tơm tô̆ sŏng lơboh ƀòn gô mơ̆t nơ̆m hîh mơ̆n, ông pồ kaƀang jơno sa sơđàp ƀòn gô gư̆m nùs sơhờp-sờhơn ngăn băl î lơ̆gay cro nhòng hîh, bơh sŏng don dờp Yang Tơm Trồ.

35Jơ gư̆n, trôh ang ndrư̆m, lơ̆gay cro kwăng dơng pơđơ nhẵư cro lĭñ jư cơkhă swà, tơs lah: “Hồ cĕ lơ̆gay cro gư̆n hă.” 36Tîrơ̆ la, cro ăt-bồ hîh jam tơs wăl lơ̆gay jơno rơ̆ e ma Pol, lah “Lơ̆gay kwăng dơng sŏng pơđơ cro tơs lah; Ƀòn ông dî hồ lờt. Tîrơ̆ gừn, jơ dô, ma-ngkơi jơ swà tơlôh, dăn bea hê ông swà gung lơngăp-lơnge.” 37Mơya Pol tơs î ƀòn gô lah: “Ma-ngkơi jơ lơh nên pư̆ng bơbư̆k ƀòn hî, la lơ̆gay cro sŏng dî gơnoăr lang bol Rôma, mà ơ̆ cahrña, ƀòn gô sŏng rơmbư̆ng tơmơ̆t ƀòn hî nơ̆m hîh jam, gừn tô̆ dô ƀòn gô rơmhòc sơbê̆ ƀòn hî tơlôh ya. Ngăn ơ̆ dî ờ! Ala tîrơ̆ gư̆n, să tơm ƀòn gô, ma-ngkơi jơ trôh nơ̆m dô, păl bơlăm ƀòn hî tơlôh.” 38Tîrơ̆ la, lơ̆gay cro lĭñ cơkhă jư tơs wăl lơ̆gay jơno gư̆n ma mpôl cro kwăng dơng, sŏng gư̆n ƀòn gô kơ̆mbrit-kơ̆mbròt tơm tô̆ kơnău lah bea hê la cro lang bol Rôma. 39Dơ̆ swà trôh lờt, lơ̆gay cro kwăng kôh-kồt dăn ƀòn gô, gư̆m ma-ngkơi jơ bơlăm tơlôh makin, lơ̆gay cro kwăng dăn ƀòn gô swà wĭc bơh dî ƀòn dơng mơ̆n. 40Tîrơ̆ la, tơm tô̆ sŏng tơlôh bơh hîh jam, bea hê mơ̆t nơ̆m hîh Lidi dê, gư̆m ma-ngkơi jơ tơmtom lơ̆gay oh mi, bea hê mơ̆ndơm-mơ̆nieng ƀòn gô, gừn tơlôh swà.