Bră 17

1Bơh sơgư̆n, ma-ngkơi jơ găn lêh ƀòn dơng Amphipôlit î Apôlôni, ƀòn gô swà trôh ƀòn dơng Tesalônika, anẵu tom du-lăm hîh hôi-dăn cro Juđa dê. 2Gừn jăt ờs dơm Pol dê, ông mơ̆t bơjư̆m băl î ƀòn gô, gư̆m nơ̆m păy nge Saƀat, ông tơm bơyê băl î ƀòn gô swì jăt Sră-Goh. 3Tơm tô̆ tơs gơtha wêl-tăl gư̆m tơs nê̆-năn lah Yang Dŏng-Klàs păl kŏng jơno sơòs-gleh gư̆m jîng wăl bơh anẵu sơ̆t lah: “Yang Jesu dô, Bơtao mà ăñ bơtău tơs ma oh mi rôh lŏ, la să tơm Yang Dŏng-klàs.” 4Nhẵư hê nơ̆m tơmpôl ƀòn gô dî dờp jơno bơtău pơđơ gư̆m công nha jăt Pol băl î Sila, gư̆m lơ̆gay du pơnah khăi cro Grek duh-khoai Yang Tơm Trồ băl ơ̆ êt lơ̆gay cro-ua kơnhơ̆p màng-ryŭ. 5Mơya, bơh lơ̆gay cro Juđa tơlôh nùs ƀoah tơcao, gư̆n-jîng tơm tô̆ sŏng hôi jà nhẵư hê cro bờk-mơsăk tò anẵu gung ƀòn dơng, tơm ƀù du tơmpôl khăi lang bol, ƀòn gô lơh sơlô̆ng-sơlăng ƀòn dơng dô. Ma-ngkơi jơ rơndôh mơ̆t nơ̆m hîh Jasôn, ƀòn gô jôi lăng bea hê lơi lơboh trôh sơđàp lang bol. 6Mơya tơm tô̆ jôi ơ̆ tơmpơl bea hê ông, ƀòn gô hwa Jasôn makin băl î nhẵư oh mi năy sơđàp cro kwăng dơng ƀòn dơng, dreo dơng, lah: “Nhẵư hê cro lơh sơlô̆ng-sơlăng lơgơ dunya dô, ƀòn gô kŭng ndăng tom măt anẵu dô, 7la nhẵư hê cro mà Jasôn gư̆m lơ̆gay tơmpôl dô sŏng wă-rẵu. Ƀòn gư̆n ndăng lơh bră tơmdră wăl lơ̆gay gơnoăr pơđơ Sesa dê, tơm tô̆ tơs tom du bơtao nde, la Jesu.” 8Tîrơ̆ la, ƀòn gô lơh ma mpôl khăi lang bol gư̆m lơ̆gay cro kwăng dơng ƀòn dơng ndrăm-ndròm tơm tô̆ kơnău nhẵư jơno rơ̆. 9Gừn ma-ngkơi jơ dưñ priè bơđoan lăñ nên-nôn bơh Jasôn gư̆m lơ̆gay cro hôm wăl, lơ̆gay cro kwăng dơng hồ ma ƀòn gô swà.

10Mơya, ƀăt jai gư̆n nơ̆m brê tơmăng, lơ̆gay oh mi lơboh băl Pol băl î Sila swà trôh nơ̆m Ƀere. Mà bea hê cro dô, tơm tô̆ trôh anẵu, gừn swà mơ̆t nơ̆m hîh jư̆m cro Juđa dê. 11Bơh jơ gư̆n, lơ̆gay cro ăm nơ̆m dô gừn gư̆t jơno rlo lơ̆gay cro ăm nơ̆m Tesalônika, ƀòn gô sŏng dưñ-lăñ jơno Yang băl î lơ̆gay nùs khơ̆n-sa, tơm tô̆ kơp nge lăng swì Sră-Goh, lăng lơ̆gay jơno rơ̆ tom iyŏ gư̆ptî gư̆n hala ơ̆h. 12Gư̆n-jîng, khăi cro nơ̆m pơnah ƀòn gô sŏng don, ƀăt băl du pơnah cro-ua Grek gôtrê mađah cro kơnhơ̆p-mơ̆nda î ơ̆ êt cro-klo. 13Mơya tơm tô̆ cro Juđa nơ̆m Tesalônika kơnău gư̆t lah jơno Yang Tơm Trồ dê kŭng ndăng dî bơtău bơh Pol nơ̆m anẵu Ƀere, gừn ƀòn gô kŭng trôh anẵu dô, bơtrôt gư̆m lơh nggua-nggàc lang bol. 14Tîrơ̆ la, nơ̆m dơ̆ gư̆n, lơ̆gay oh mi khơñ ngăn lơboh Pol swà tơlôh trôh nơ̆m bơlao dàlîng, tơm jơ bea hê ông Sila î Timôthe gừn ờs ăm wăl nơ̆m gư̆n. 15Hôm tơmpôl cro bơlăm gung Pol sŏng lơboh ông trôh nơ̆m anẵu ƀòn dơng Athen gừn ma-ngkơi jơ dưñ sră pơyoa ma Sila î Timôthe lah, bea hê păl trôh băl î ông khơñ khơñ, gừn ƀòn gô blăc trê wăl.

16Bơh jơ gư̆n nơ̆m Athen, nơ̆m jơ Pol ăm cang ƀòn gô, nùs-nhơ̆m ông kŏng mơrêh-mơrăñ bơh đah nhòng nùs mơ̆n, tơm tô̆ tơmpơl nơ̆m ƀòn dơng dô tom bîng-jut jơno rồp-ràk. 17Tîrơ̆ la ông tơmbơkai î cro Juđa gư̆m lơ̆gay cro duh-khoai Yang Tơm Trồ nơ̆m hîh jơnư̆m, băl î lơ̆gay cro dî tô̆ lơwah tơmtom nơ̆m kơp nge anẵu ƀòn dơng drà. 18Mơya du pơnah cro gôtrê mađah tơmpôl lơ̆gay cro jăk-sai mađah tơmpôl Epikurien î mađah tơmpôl Stocien kŭng tơmbơkai î ông. Du pơnah tơs lah: “Cro khăi dẵư dô kơñ tơs jơno găy teh?” Hôm pơnah nde gừn tơs lah: “Gôlơh gư̆ptî ông gư̆n la cro tơs bơtău gôtrê bơh nhẵư hê yang cro bơdih,” bơh ông ndăng tơs tơnggư̆t jơno niem gôtrê bơh Yang Jesu î jơno jîng wăl. 19Ơ̆ dî nư̆ng tîgư̆n, ma-ngkơi jơ jư kơ̆p ông wăl, ƀòn gô lơboh trôh nơ̆m Tơmpôl Jơnư̆m Areôpa, tơs lah: “Ƀòn hî digơlăn gư̆t jơno mhăy ƀrăk dô, jơno bơtău ndăng dî ông bơtău la jơno găy teh? 20Bơh ông iyà trôh nhẵư jơno gôlơh phadêh ngăn nơ̆m tua ƀòn hî. Gư̆n-jîng ƀòn hî kơñ gư̆t lơ̆gay jơno rơ̆ gơtha la jơno găy.” 21(Jơ gư̆n, lơ̆gay cro Athen gư̆m lơ̆gay cro jîng ăm bơdơh nơ̆m anẵu gư̆n ơ̆ ăn nùs tua nơ̆m bră nde găy rlo la tơs wăl bră hala kơnău bră mhăy phadêh.) 22Bơh gư̆n, tơm tô̆ dî ăm ñă nhòng tơmpôl jơnư̆m Areôpa, Pol tơs lah:

“Ơ oh mi la cro Athen, ăñ tơmpơl oh mi duh kơ̆mbrit ngăn jơno Yang jăt dubă wêl-tăl kơp jơno. 23Bơh tơm tô̆ swà bơcoñ gừn tơmpơl lơ̆gay tơmpôl cro duh-khoai oh mi dê, ăñ tien gơs tơmpơl tom du kaƀang duh-khoai mà nơ̆m gư̆n dî klă bơnga-cêh lah: ‘Duh-khoai Hwîng Ơ̆ Gư̆t Sơnăn.’ Tîrơ̆, hwîng mà oh mi duh-khoai tơm tô̆ ơ̆ gư̆t sơnăn, rơ̆ la Bơtao ăñ ndăng tơs bơtău ma oh mi. 24Yang Tơm Trồ, Bơtao Hwîng sŏng mon bơjîng dunya gư̆m lơ̆gay jơno nơ̆m gư̆n, la Yang trồ î ù dê, Kơnràñ ơ̆ ăm jîng nơ̆m lơ̆gay hîh duh-khoai bơh tê kon-mơnùs mon bơjîng. 25Kơnràñ kŭng ơ̆ dî dŏng bră bơh kơ̆mpang tê kon-mơnùs, gôlơh gư̆ptî Kơnràñ păl kơp kơñ du jơno găy, tài bơh să tơm Kơnràñ dờp e ma lơ̆gay jơi jơno jîng, jơno nhim băl î lơ̆gay jơno nde. 26Ơ̆ dî nư̆ng tîgư̆n, bơh du hôi cro, Kơnràñ sŏng mon bơjîng tơlôh lơ̆gay lang bol nŏk-noi kon-mơnùs jîng ăm nơ̆m ple-ù, ma-ngkơi jơ lơh nên ñăm lơ̆gay năm kơnnhe î tơ-nhal bơlao ƀòn lơgơ anẵu ăm jîng ƀòn gô dê, 27lơi jôi lăng Yang Tơm Trồ, amơh gư̆t dî êt ngăn ƀòn gô digơlăn gư̆t dî Kơnràñ, sŏng gư̆n jôi tom Kơnràñ. Bulah iyŏ ngăn Kơnràñ ơ̆ tom ăm wĭc î kơp du hôi cro nơ̆m ƀòn mơ̆n. 28Bơh nơ̆m Kơnràñ, ƀòn mơ̆n jîng, tơngwăñ gư̆m hôm miek, kŭng gư̆ptî nhẵư hê cro nơ̆m lơ̆gay cro jăk-sai oh mi dê sŏng tơs, lah: ‘Bơh ƀòn mơ̆n kŭng la kon so Kơnràñ dê.’ 29Tîrơ̆ gừn, bơh la kon so Yang Tơm Trồ dê, ƀòn mơ̆n ơ̆ dî păl kơlôi lah, Bơtao sang-goh gừn gôlơh gư̆ptî lơ̆gay rồp-ràk bơh î màh, hala priè hala lô̆, tài bơh jơno jăk rgê î khu tơngoh-kơlôi kon-mơnùs dê. 30Gư̆n-jîng, tơm tô̆ Yang Tơm Trồ sŏng lơi căư kơp rai prŏi jơno wơng gư̆t gư̆n, jơ dô Kơnràñ ƀăn pơđơ ma kon-mơnùs, lơ̆gay cro ăm lam kơp anẵu, păl tơcao mbư̆ng glài. 31Bơh Kơnràñ sŏng băt tơngñă du-nge, mà nơ̆m nge gư̆n, Kơnràñ rơp cahrña dunya nơ̆m jơno tơpăt-durư̆ng bơh Cro mà Kơnràñ sŏng săc-rwơh. Tơm tô̆ lơh nên cư̆ng-tang nên-nôn ngăn ma lơ̆gay cro bơh î bră lơh ma Cro gư̆n jîng wăl bơh anẵu sơ̆t.”

32Jơ gư̆n, tơm tô̆ kơnău bơh jơno jîng wăl cro sơ̆t dê, du pơnah tơngyŏ-tơnghiel ông; mơya pơnah nde gừn tơs lah: “Ƀòn hî kŭng rơp iet ông gôtrê bơh bră dô du dơ̆ te.” 33Bơh gư̆n, Pol tơlôh bơh nhòng tơmpôl ƀòn gô. 34Mơya nhẵư hê cro năy sŏng tơmklăc băl ông gừn don, nơ̆m khà gư̆n tien gơs tom Diônisius, du hôi cro kwăng jơnư̆m Areôpa, du hôi cro-ua sơnăn la Damari, gư̆m lơ̆gay cro nde băl î ƀòn gô.