Bră 18

1Ma-ngkơi lơ̆gay bră gư̆n, tơm tô̆ sơntơm swà gung bơh Athen ông swà trôh nơ̆m Kôrintô. 2Gừn tơm tô̆ lăng swì tơlôh du hôi cro Juđa năy, sơnăn Akwila, ƀòn tơm anẵu lơgơ Pôntu, mhăy trôh bơh Itali băl î bo-ua mơ̆n la Ƀerissin, bơh Klôdơ sŏng e gơnoăr pơđơ ma lơ̆gay cro Juđa păl tơlôh bơh nơ̆m Rôma, gừn ông trôh tơmtom ƀòn gô, 3mà bơh dî rgê băl nơ̆m bră lơh, ông sŏng ăm î lơh bră băl î ƀòn gô. Tài bơh ƀòn gô kŭng la lơ̆gay cro rgê sî kơmang kơjang swì lăng jăt gơnoăr bră lơh. 4Jơ gư̆n, kư̆ kơp nge Saƀat, ông bơtău tơngkah nơ̆m hîh jơnư̆m, ông mơ̆ndơm-mơ̆nieng băl cro Juđa gư̆m î cro Grek. 5Mơya tơm tô̆ băl Sila î Timôthe bơh Maseđoan swà jư, gừn Pol dưñ lơ̆ nùs tua ma jơno Yang, jơh nùs lơh cư̆ng ma cro Juđa gôtrê bơh Yang Jesu la Yang Dŏng-Klàs. 6Mơya, dơ̆ ƀòn gô tơmdră î tơngyŏ-tơnghiel ông, gừn ma-ngkơi jơ tơtôh ao, ông tơs î ƀòn gô lah: “Dăn mham ƀòn mê gôtôh wăl cŭngsî găl ƀòn mê! Hôm ăñ ơ̆ tom glài găy ơ̆h! Bơh tô̆ dô trôh ma-ngkơi, ăñ rơp trôh î lơ̆gay lang bol bơdih.” 7Tơm tô̆ sŏng tơlôh bơh nơ̆m gư̆n ông swà trôh nơ̆m hîh du hôi cro duh-khoai Yang Tơm Trồ năy, sơnăn la Tit Justus, mà hîh cro dô ăm mađah pô̆ng hîh jơnư̆m. 8Bulah tîrơ̆, Krispus, cro kwăng ăt-bồ hîh jơnư̆m, sŏng don Yang, băl î lơ̆gay cro nơ̆m hîh nhă mơ̆n, gư̆m khăi cro Kôrintô, ma-ngkơi jơ kơnău jơno Yang, gừn don î kŏng lơh ƀaptem. 9Jơ gư̆n, Yang tơs î Pol nơ̆m du jơno e sơđah lai nơ̆m brê tơmăng, lah: “Bư̆ng kơ̆mbrit, tơblơ̆ wăl, păl kư̆ pơnjăt tơs, gừn bư̆ng ăm-ƀơt. 10Tài bơh, Ăñ ăm băl î kon gừn ơ̆ tom cro găy rơp e tê lơh nơ̆m kon lơi lơh bờk-mơsăk kon ờ, bơh tom khăi ngăn cro ăn lơi ma Ăñ nơ̆m ƀòn dơng dô.” 11Bơh gư̆n la, ông ăm wăl anẵu gư̆n du năm pro kơnnhe, bơtău jơno niem Yang Tơm Trồ dê nhòng tơmpôl ƀòn gô.

12Mơya tơm tô̆ Galiôn dî pồ lơh jîng cro kwăng dơng lơgơ Acai, gừn cro Juđa du nùs băl î găp ndôh ñă tơmdră wăl Pol î iyà ông nơ̆m hîh cahrña, 13tơs lah: “Cro dô mơ̆ndơm lang bol duh-khoai Yang Tơm Trồ tìs jơno-bơlăm.” 14Mơya tơm tô̆ Pol sơmơn pẵư dẵư, Galiôn sŏng tơs î cro Juđa lah: “Ơ hơh, nhẵư hê cro Juđa năy, dilah dô iyŏ ngăn la jơno lơh tìs jơno bơlăm hala bră lơh tìs sơloah bờk-mơsăk, gừn lơh jăt jơno gư̆n, digơlăn ăñ sŏng ăt-ăl î ƀòn mê, 15hôm dilah dô la lơ̆gay bră tơmbơkai bơh jơno tơs, têl sơnăn î jơno bơlăm dêh ƀòn mê dê, gừn sătan ƀòn mê rơndăp dêh. Ăñ ơ̆ kơñ lơh kwăng cahrña ma nhẵư jơno bră tîdô ờ.” 16Sŏng gư̆n ông tơmprơh ƀòn gô tơlôh bơh hîh kwăng cahrña. 17Mơya, ma-ngkơi jơ kơ̆p Sôthen, la cro ăt-bồ hîh jơnư̆m, lơ̆gay ƀòn gô pơng lơh ông mađàp hîh cahrña, mà ơ̆ tom bră găy nơ̆m khà gư̆n la bră dî păl kơlôi gôtrê bơh Galiôn.

18Hôm Pol, trôh dî tô̆ dô ờs hôm ăm nơ̆m khăi nge te, sŏng gư̆n tơngăc lơ̆gay oh mi, ông hao nơ̆m ahẵu trôh nơ̆m lơgơ Siri, băl î ông la Prissil î Akwila, ma-ngkơi jơ sŏng kàc dêh găl mơ̆n nơ̆m Senkre, bơh ông sŏng tom jơno sràt-să. 19Jơ gư̆n, ƀòn gô swà jư trôh nơ̆m Ephesô, gừn ông lơi ƀòn gô ăm wăl nơ̆m gư̆n, hôm sătan ông, tơm tô̆ sŏng swà mơ̆t nơ̆m hîh jơnư̆m, ông tơmbơkai î cro Juđa. 20Mơya tơm tô̆ ƀòn gô răc-dăn ông ăm wăl nơ̆m du tô̆ tơnge te, gừn ông tơm khan ơ̆ kơñ. 21Mơya, ma-ngkơi jơ tơngăc ƀòn gô î tơs lah: “Ăñ rơp blăc trôh wăl î oh mi du dơ̆ te dilah Yang Tơm Trồ kơñ.” Gừn ông jư bơh ahẵu swà tơlôh bơh Ephesô.

22Gừn dơ̆ sŏng hao mamằ anẵu Sesare, sŏng gư̆n swà hao gừn lùp còp-să Hîh Jư̆m Goh, gừn ông swà jư trôh nơ̆m Antiôt. 23Ma-ngkơi jơ nơ̆m du pơngăp tô̆ tơnge, ông swà gung, du dơ̆ te swà găn lơ̆gay lơgơ Galati î Phirigi, lơh ma jơh lơ̆gay cro bơtê kơđư̆ng-bơkhê.

24Jơ gư̆n, du hôi cro Juđa năy, sơnăn Apôlôs, ƀòn tơm anẵu Aleksandri, du hôi cro jăk tơmpẵu, sŏng swà jư trôh nơ̆m Ephesô, la du hôi cro wơng gư̆t bơh Sră-Goh. 25Ông ờs sŏng dî ƀăñ mơntău bơh jơno niem Yang, bơh nùs tua ngăc-ngăr, ông bơtău gư̆m ƀăn mơntău iyŏ ngăn lơ̆gay jơno gôtrê bơh Yang Jesu, mơya nư̆ng gư̆t gơnoăr lơh ƀaptem Jăng dê gời. 26Ơ̆ dî nư̆ng tîgư̆n, ông sơntơm tơs bơtău dubă khơ̆n-sa nơ̆m hîh jơnư̆m, mơya ma-ngkơi jơ kơnău ông, Prissil î Akwila sŏng iyà ông trê gừn tơs nê̆-năn ma ông dubă iyŏ ngăn rlo te gôtrê bơh jơno niem Yang Tơm Trồ dê. 27Jơ gư̆n, bơh ông kơp kơñ pẵư ơnàng găn lêh lơgơ Acai, gư̆n-jîng ma-ngkơi tơm jơ mơ̆ndơm-mơ̆nieng ông, lơ̆gay oh mi cêh sră pơyoa ma lơ̆gay cro bơtê lơi wă-rẵu ông, mà tơm jơ trôh anẵu, ông sŏng tơmdŏng khăi ngăn ma lơ̆gay cro găy sŏng don kơnơm bơh jơno sơmah. 28Bơh ông tơmdră dubă pran-kơdăng nê̆-năn î cro Juđa, tơm tô̆ lăng lơh jăt nơ̆m Sră-Goh rang sơđah Yang Jesu la Yang Dŏng-Klàs.