Bră 3

1Jơ gư̆n, mơ̆t nơ̆m jơ dơ̆ sơ̆n, la jơ hôi-dăn, Pier î Jăng swà lêh nơ̆m hîh jư̆m. 2Du hôi cro năy, kŏng kwèt-kwe bơh nơ̆m nhòng klô̆ng mơi mơ̆n, sŏng dî tung trôh, la cro mà kơp nge cro nde ăn lơi nơ̆m anẵu mpông hîh duh-khoai dê, anẵu dî sơnăn la Mpông Niem, lơi dăn priè e gời bơh lơ̆gay cro swà mơ̆t nơ̆m hîh duh-khoai, 3mà tơm tô̆ tơmpơl Pier î Jăng mơñ swà mơ̆t nơ̆m hîh duh-khoai, gô răc-dăn dờp e priè e gời. 4Mơya ma-ngkơi jơ băl î Jăng, lăng nê̆ nê̆ ma gô, Pier tơs lah: “Lăng cĕ ma ƀòn hî!” 5Bơh gư̆n gô lăng nê̆ nê̆ ma bea hê ông, kơp kơñ dưñ-lăñ dư̆ng iè jơno găy bơh ƀòn gô. 6Mơya, Pier tơs lah: “Màh băl î priè, ơ̆ tom jơno găy nơ̆m anẵu ăñ, mơya jơno mà ăñ dî, ăñ e ma mê dô. E sơnăn Yang Dŏng-Klàs Jesu cro Nasaret, lơbà swà cĕ.” 7Tơm tô̆ sŏng jư kadăm bơkhê gô nơ̆m tê ma, ông pồ đăư gô ñă atẵy; Ƀăt jai gư̆n, kơ̆mpang jư̆ng î klăc măt ka gô dê dî tơhoa kơdăng wăl. 8Ma-ngkơi jơ ñă plŏk sơndŏng, gô ñă kơđư̆ng gư̆m sơntơm lơbà swà; sŏng gư̆n gô mơ̆t nơ̆m hîh duh-khoai băl î ƀòn gô, gư̆m swà gư̆m sơndŏng gư̆m jong-rơ Yang Tơm Trồ. 9Lơ̆gay lang bol lăng tơmpơl gô lơbà swà î jong-rơ Yang Tơm Trồ. 10Sŏng gư̆n ƀòn gô đăl gư̆t amî gư̆n, lah gô ờs la cro nggui dăn miek priè e gời nơ̆m anẵu Mpông Niem hîh duh-khoai dê; gư̆n-jîng ƀòn gô kŏng dưñ lơh hal-apàl î ndrăt-ndròt bơh bră sŏng gô tom tơlôh ma gô.

11Jơ gư̆n, tơm tô̆ amî gư̆n ndăng tơte jăt Pier î Jăng, lơ̆gay lang bol bîng jơno ndrăt-ndròt, băl î găp hoa găp tơplŏk trôh anẵu ƀòn gô nơ̆m anẵu mpông kơwưng, anẵu dî sơnăn la Mpông Kơwưng Salômôn. 12Mơya tơm tô̆ tơmpơl tîgư̆n, Pier kla wăl dẵư î lang bol lah: “Ơ oh mi, la cro lang bol Israel, ngglơh oh mi rôh lŏ e lơh phadêh bơh bră dô teh? Ngglơh oh mi rôh lŏ lăng ƀòn hî nê̆ nê̆ gôlơh gư̆ptî ƀòn hî sŏng lơh amî gư̆n lơbà swà tài bơh gơnăp-gơnoăr hala bră lơh dêh sătan ƀòn hî dê. 13Yang Tơm Trồ Abraham dê, Yang Tơm Trồ Isăk dê, î Yang Tơm Trồ Jakôp dê, la Yang Tơm Trồ ông-pang ƀòn mơ̆n dê, sŏng jong-rơ Yang Jesu, cro dê̆-gơna Kơnràñ dê, Bơtao mà oh mi rôh lŏ sŏng lơboh gư̆m khan lơi căư sơđàp măt cro kwăng dơng Pilat tơm jơ ông gư̆n sŏng lơh nên hồ-toh Kơnràñ makin. 14Mơya oh mi rôh lŏ sŏng khan lơi căư Bơtao Sang-Goh î Tơpăt-Durư̆ng, kơp kơñ hồ-toh ma mơ̆n du hôi cro tơngsơ̆t cro. 15Mơya oh mi rôh lŏ sŏng tơngsơ̆t Bơtao-Tơm Reah Jơno Jîng, la Bơtao mà Yang Tơm Trồ sŏng lơh jîng wăl bơh anẵu sơ̆t, mà ƀòn hî la cro lơh cư̆ng ma jơno dô. 16Gừn tài bơh jơno don nơ̆m anẵu sơnăn Kơnràñ, amî gư̆n, cro mà oh mi rôh lŏ kŭng tơmpơl î gư̆t, gừn sơnăn Kơnràñ sŏng lơh jîng pran-kơdăng. Jơno don gư̆n kơnơm bơh anẵu Kơnràñ sŏng e ma amî gư̆n jơno pran-kơdăng wêl-tăl tîgư̆n ƀăt sơđàp măt lơ̆gay oh mi rôh lŏ. 17Jơ dô, ơ oh mi rôh lŏ, ăñ gư̆t lah oh mi rôh lŏ sŏng lơh bră nơ̆m jơno ơ̆ tăl gư̆t wơng, gừn tơmpôl kwăng ăt-bồ oh mi dê kŭng gư̆p tîrơ̆. 18Mơya lơ̆gay jơno mà Yang Tơm Trồ sŏng tơs lai bơh dẵư jơh lơ̆gay cro gơnoăr-hwơr, lah Bơtao Dŏng-Klàs Kơnràñ dê păl kŏng gleh-glăr, gừn Kơnràñ sŏng lơh gôjîng iyŏ ngăn tîrơ̆. 19Bơh gư̆n, păl tơcao mbư̆ng glài, î blăc trê wăl, lơi tồi-glài oh mi rôh lŏ dê dî so-jut, 20lơi tô̆ tơnge niem mhăy trôh bơh jơno sơđah măt Yang dê; gừn Kơnràñ pơđơ Bơtao sŏng dî lơh nên ma oh mi rôh lŏ, la Yang Dŏng-Klàs Jesu, 21la Bơtao păl ăm wăl nơ̆m lơgơ cŭngsî trồ trôh dî tô̆ tơnge bơjîng mhơ̆ wăl lơ̆gay jini-jơno, la jơno mà Yang Tơm Trồ sŏng tơs bơh yo ƀua bơh dẵư lơ̆gay cro gơnoăr-hwơr sang-goh Kơnràñ dê. 22Ngăn tîrơ̆, Môise sŏng tơs lah: ‘Yang la Yang Tơm Trồ ƀòn mơ̆n dê rơp pồ tơngñă ma oh mi rôh lŏ du hôi cro gơnoăr-hwơr gư̆ptî ăñ bơh nơ̆m nhòng lơ̆gay oh mi mơ̆n dê. Oh mi rôh lŏ rơp iet kơnău gô jăt jơh lơ̆gay jơno găy mà gô tơs băl î oh mi rôh lŏ. 23Mơya jơno rơp tom tơlôh ma cro găy dilah ơ̆ iet kơnău cro gơnoăr-hwơr gư̆n, gừn cro rơ̆ rơp kŏng tơngroh bơh lang bol.’ 24Tîrơ̆ gừn, jơh lơ̆gay cro gơnoăr-hwơr bơh Samuel î lơ̆gay cro trôh ma-ngkơi gô, bulah ƀòn gô pẵư dẵư tơs, gừn ƀòn gô kŭng tơs tơnggư̆t bơh lơ̆gay nge dô. 25Oh mi rôh lŏ la kon so lơ̆gay cro gơnoăr-hwơr dê gư̆m jơno hăư-băl mà Yang Tơm Trồ sŏng lơh nên î ông-pang mơ̆n, tơm tô̆ tơs î Abraham, lah: ‘Gừn bơh du hôi kon so mê dê, jơh lơ̆gay nŏk-noi nơ̆m ù teàh rơp dî lơnge.’ 26Lai ngăn î oh mi rôh lŏ, ma-ngkơi jơ pồ tơngñă Cro Dê̆-Gơna mơ̆n, Yang Tơm Trồ sŏng pơđơ Bơtao gư̆n trôh e lơnge ma oh mi rôh lŏ bơh î bră sơwăy tơmblăc kơp du hôi cro klàs bơh sơ jơno bờk-mơsăk mơ̆n dê.”