Bră 2

1Tơm tô̆ nge Bơjư̆m-Sa Prăm-Jư̆t sŏng trôh lờt, lơ̆gay ƀòn gô bơjư̆m băl î găp nơ̆m du-anẵu. 2Nisơna, du jơno kơ̆ntàs bơh cŭng trồ tơlôh ndrăm, gôlơh gư̆ptî ayua cal khôm kơdăng dî khôm trôh, gư̆m gô tơmơ̆t bîng lơ̆gay nơ̆m du-lăm hîh anẵu ƀòn gô ndăng ăm nggui. 3Gừn lơ̆gay lơm-piet gôlơh gư̆ptî du lơ̆m oềs jîng tơlôh î ƀòn gô, tơm jơ sŏng prai durư̆ng, gừn gô răp ăm cŭngsî kơp hê cro nơ̆m ƀòn gô. 4Jơh lơ̆gay ƀòn gô dî bîng-jut Yang Hwîng Goh gư̆m sơntơm tơs î lơ̆gay jơno tơs lơgơ nde, jăt gư̆p Yang Hwîng Goh dờp e ma ƀòn gô tơs.

5Bơh jơ gư̆n tom lơ̆gay cro Juđa ndăng ăm nơ̆m Jerusalem, jơh lơ̆gay cro don kơ̆mbrit bơh kơp lơgơ lơ̆gay nơ̆m lang bol nteàh trồ dê. 6Tơm tô̆ kơ̆ntàs dẵư gư̆n makin, tơmpôl khăi trôh tơm ƀù gư̆m kŏng ndrăt-ndròt bơh kơp hê cro kŭng kơnău ƀòn gô tơs bơh î jơno tơs lơgơ tơm mơ̆n dê. 7Jơh lơ̆gay cro lang bol kŭng hal-apàl gư̆m dưñ lơh phadêh-phadai, tơs lah: “Lăng năy, tom iyŏ jơh lơ̆gay cro ndăng tơs gư̆n la lang bol Galile ờ ơ? 8Amơh lơh ƀòn mơ̆n kơnău kơp cro nơ̆m ƀòn gô tơs î jơno tơs dêh mơ̆n dê nơ̆m lơgơ mà ƀòn mơ̆n dî bơda teh? 9Cro Pathe, cro Medi, cro Elamit, lơ̆gay cro ăm nơ̆m anẵu Mesôpôtami, Juđe, tom băl gư̆m Kapadôs, Pôntu, Asi, 10kŭng gư̆ptî Phirigi, Pamphili, Ejiptơ, lơ̆gay bơlao gôtrê Liƀi en Siren, gư̆m lơ̆gay cro năc Rôma trôh còp-să, 11lơ̆gay cro Juđa băl î cro don jăt gung duh-khoai cro Juđa, cro Kret gư̆m cro Arap, ƀòn mơ̆n kŭng kơnău ƀòn gô tơs î jơno tơs ƀòn mơ̆n dê bơh lơ̆gay bră dơng mang Yang Tơm Trồ dê.” 12Jơh lơ̆gay ƀòn gô kŭng hal-apàl gư̆m tơmpơl kălkê wơng, cro dô tơs î cro tò lah: “Jơno dô tom gơtha la amơh teh?” 13E du pơnah nde tơngyŏ-tơnghiel sŏng tơs lah: “Nhẵư hê cro rơ̆ la ndăng kŏng mañơ̆l alăk lơnguơ̆t!”

14Mơya ma-ngkơi jơ ñă atẵy, Pier î jư̆t-dul hê cro gơnoăr bơtău dơng sŏng pẵư dẵư gư̆m tơs î ƀòn gô lah: “Ơ ƀòn ông, cro lang bol Juđa gư̆m jơh lơ̆gay cro găy ndăng ăm nơ̆m Jerusalem, bră dô păl sơlôh jîng jơno ờs dờm gôtrê băl î oh mi rôh lŏ, gừn dăn pẵư cĕ tua iet jơno ăñ dô. 15Bơh lơ̆gay cro dô ơ̆-iyŏ kŏng mañơ̆l gư̆ptî oh mi rôh lŏ kơlôi, tài bơh ndăng la jơ dơ̆ păy nhòng nge. 16Mơya, dô la jơno sŏng dî tơs tơnggư̆t bơh cro gơnoăr-hwơr Jôel lah:

17‘Yang Tơm Trồ tơs lah: “Bră rơp sơlôh trôh nơ̆m lơ̆gay nge dơ̆t-lŭi,”

“Ăñ rơp tôh Hwîng Nùs Ăñ nơ̆m cŭngsî kơp poăc-să,

kon klo gư̆m kon ua ƀòn kon dê rơp tơs hwơr,

tơmpôl cro pơnu ƀòn kon dê rơp tơmpơl jơno sơđah tơnggư̆t lai,

gư̆m lơ̆gay cro kra ƀòn kon dê rơp bĭc tơmpơl jơno bơbì.

18Tien gơs nơ̆m lơ̆gay nge gư̆n, lơ̆gay dê̆ klo, dê̆ ua Ăñ jê,

Ăñ rơp tôh Hwîng Nùs Ăñ, gừn ƀòn gô rơp tơs hwơr.

19Ăñ rơp dờp lơ̆gay têl phadêh cŭngsî trồ yơng

gư̆m lơ̆gay jơno têl phadêh nteàh mblàt ù,

mham î oềs băl î jơ̆ndrôh phô̆.

20Măt tơnge rơp sơlôh gôjîng ñô̆ng,

hôm mătkhe gừn gôjîng mham,

lai matô̆ trôh nge dơng î dơng mang Yang dê.

21Gừn lơ̆gay kơp cro găy hôi-dăn sơnăn Yang gừn rơp dî dŏng-klàs.”’

22Ơ oh mi, la lơ̆gay cro Israel, dăn iet kơnău lơ̆gay jơno dô: Yang Jesu cro Nasaret la cro dî Yang Tơm Trồ lơh cư̆ng î oh mi rôh lŏ bơh î lơ̆gay bră gơnăp-gơnoăr, gơnoăr phadêh î têl phadêh mà bơh Kơnràñ, Yang Tơm Trồ sŏng lơh nên nhòng oh mi rôh lŏ, gư̆ptî sătan oh mi rôh lŏ sŏng gư̆t. 23Bơtao gư̆n kŏng phi jao, jăt jơno rơndăp tăp sên sŏng dî lơh nên î jơno gư̆t lai Yang Tơm Trồ dê, oh mi rôh lŏ sŏng tơngsơ̆t tơm jơ pư̆ng cŭngsî sî pư̆ng kơnơm bơh tê lơ̆gay cro ơ̆ lơh jăt jơno bơlăm. 24Kơnràñ la Bơtao mà Yang Tơm Trồ sŏng lơh jîng wăl, ma-ngkơi jơ tơlôh klàs bơh jơno gleh-glăr jơno sơ̆t dê, bơh gô ơ̆ tom dî gơnoăr kơ̆p jư Kơnràñ nteàh gơnoăr gô. 25Bơh bơtao Dabit tơs bơh Kơnràñ lah:

‘Ăñ tơmpơl miek Yang ăm sơđàp măt ăñ,

bơh Kơnràñ ăm mađah ma ăñ, lơi ăñ ơ̆ kŏng tơblơ̆ nùs.

26Lơi bơh rơ̆, nùs ăñ sơhờp-sờhơn î lơm-piet ăñ hơn-sờ.

Mơya rlo ma sơrơ̆, să-jăn ăñ kŭng rơp ăm bơdê nơ̆m jơno cang-kơnơm.

27Bơh Kơnràñ rơp ơ̆ lơi căư hwîng-soan ăñ nơ̆m anẵu lơgơ lang-ƀùc,

kŭng rơp ơ̆ lơi e ma Bơtao Sang-Goh Kơnràñ lăng tơmpơl jơno ôm-lề.

28Kơnràñ sŏng rang sơđah ma ăñ gung jơno jîng;

Kơnràñ rơp lơh ma ăñ bîng-jut jơno sơhờp-sờhơn băl î jơno niem-lơhơn môh măt Kơnràñ dê.’

29Ơ ƀòn ông, ơ oh mi rôh lŏ bơh î jơno lơh nên, jơno digơlăn tơs î oh mi rôh lŏ gôtrê bơh ông-pang Dabit, rơ̆ la ông sơ̆t sŏng gừn sŏng dî iyà tăp; mơ̆ntô ƀùc ông dê ndăng ăm nhòng ƀòn mơ̆n trôh dî nge dô. 30Mơya, bơh la cro gơnoăr-hwơr gư̆m bơh gư̆t lah Yang Tơm Trồ sŏng pồ tơngñă du jơno hăư î gô lơi ăn du hôi kon so gôtrê mađah nŏk-noi gô nơ̆m sơban gô, 31gư̆n-jîng ma-ngkơi jơ tơmpơl lai bră dô, bơtao sŏng tơs bơh jơno jîng wăl Bơtao Krist dê, lah:

‘Kơnràñ ơ̆ kŏng lơi căư nơ̆m lơgơ lang ƀùc,

să-jăn Kơnràñ kŭng ơ̆ tơmpơl jơno ôm-lề.’

32Yang Tơm Trồ sŏng lơh Yang Jesu dô jîng wăl, lơ̆gay ƀòn hî la cro cư̆ng-tang ma jơno gư̆n. 33Gư̆n-jîng, tơm tô̆ sŏng dî pồ ăm mađah ma Yang Tơm Trồ î dưñ-lăñ jơno hăư bơh Yang Hwîng Goh bơh Bàp, gừn Kơnràñ sŏng tôh jư nteàh bră tîdô, la jơno mà oh mi rôh lŏ ndăng tơmpơl î kơnău.

34Bơh Dabit hôm dahrăư swà hao cŭngsî trồ, mơya sătan ông tơs lah:

‘Yang tơs î Yang ăñ lah: “Nggui cĕ mađah ma Ăñ,

35trôh dî jơ Ăñ lơh lơ̆gay cro bờk-mơsăk Mê dê gôjîng kơnơl ăn jư̆ng Mê dê.”’

36Gư̆n-jîng, du hîh nhă Israel păl gư̆t dubă nê̆-năn lah Yang Tơm Trồ sŏng pồ Kơnràñ lơh jîng Yang î Bơtao Dŏng-Klàs, rơ̆ la Yang Jesu dô, cro mà oh mi rôh lŏ sŏng pư̆ng điñ.”

37Tơm tô̆ kơnău tîrơ̆, ƀòn gô jê-kơkua ngglăm nùs, sŏng gư̆n tơs î pier gư̆m lơ̆gay cro gơnoăr bơtău dơng hôm wăl lah: “Ơ lơ̆gay oh mi, jơno ƀòn hî păl lơh dô?” 38Gư̆n-jîng Pier tơs î ƀòn gô lah: “Păl mbư̆ng lơi căư glài gư̆m Kơp hê cro nơ̆m oh mi rôh lŏ păl kŏng lơh gơnoăr ƀaptem e sơnăn Yang Dŏng-Klàs Jesu lơi dî jơno hồ-toh tồi-glài mơ̆n dê, sŏng gư̆n oh mi rôh lŏ rơp dưñ-lăñ pơnah e gời la Yang Hwîng Goh. 39Bơh jơno hăư gư̆n la ăn lơi ma oh mi rôh lŏ, ma kon so oh mi rôh lŏ dê î ma lơ̆gay kơp cro ăm wĭc, rơ̆ la kơp cro găy mà Yang la Yang Tơm Trồ ƀòn mơ̆n iyŏ ngăn sŏng hôi-săc.” 40Bơh î khăi jơno nde te, ông sŏng lơh cư̆ng gư̆m mơ̆ndơm-mơ̆nieng ƀòn gô, lah: “Lơi cĕ mơ̆n dî hồ klàs bơh sơ nŏk-noi bờk-mơsăk dô.” 41Gừn, ma-ngkơi jơ dưñ-lăñ jơno tơs ông dê, ƀòn gô kŏng lơh ƀaptem; pơngăp păy-rbô hwîng-soan dî tơmơ̆t nơ̆m Hîh Jư̆m Goh nơ̆m nge gư̆n. 42Jơ gư̆n, ƀòn gô kư̆ pơnjăt ăm nơ̆m jơno bơtău lơ̆gay cro gơnoăr bơtău dơng dê î nơ̆m jơno bơjư̆m dubă băl, nơ̆m jơno pêh ƀăñ gư̆m nơ̆m jơno hôi-dăn.

43Jơno kơ̆mbrit-kơ̆mbròt tôh cŭngsî kơp cro, gư̆m khăi jơno phadêh-phadai băl î têl phadêh lơh tơlôh bơh lơ̆gay cro gơnoăr bơtău dơng. 44Lơ̆gay tơmpôl cro don gừn bơjư̆m wăl nơ̆m du-anẵu î ngui băl lơ̆gay jơno; 45ƀòn gô brău srăy-brê î jini-jơno mơ̆n, sŏng gư̆n tơmpà jơno gư̆n ma lơ̆gay cro, jăt gư̆ptî jơno kơñ ngui kơp hê cro dê amơh tîgay, 46kơp nge kư̆ pơnjăt du nùs băl ăm nơ̆m hîh duh-khoai, gư̆m pêh ƀăñ nơ̆m kơp du-lăm hîh, ƀòn gô sŏng tơmpà jơno sa nơ̆m jơno sơhờp-sờhơn î nùs-nhơ̆m tơpăt-ngăn, 47jong-rơ Yang Tơm Trồ gư̆m dî nùs lơbăn-niem î lơ̆gay lang bol, hôm Yang ờs ndăng bơtăl te lơ̆gay cro dî dŏng-klàs tơmơ̆t nơ̆m hîh jơnư̆m gư̆n kơp nge.