Bră 1

1Ơ ông Theôphil, nơ̆m sră dơ̆ sơm ăñ sŏng lơh tơlôh pơnah cêh bơh lơ̆gay jơno ma Yang Jesu sŏng sơntơm lơh nên gư̆m bơtău tơngkah, 2trôh dî nge Kơnràñ dî hao trê lêh cŭng trồ, dơ̆ sŏng dờp e gơnoăr bơh Yang Hwîng Goh ma lơ̆gay cro gơnoăr bơtău dơng ma Kơnràñ sŏng săc-rwơh, 3kŭng la lơ̆gay cro mà Kơnràñ sŏng trôh sơđah să tơm Kơnràñ ndăng jîng ma ƀòn gô. Ma-ngkơi jơ Kơnràñ sŏng kŏng gleh-glăr, băl î khăi cư̆ng-tang, bơh sŏng sơđah să î ƀòn gô nơ̆m puôn-jư̆t nge gư̆m tơs lơ̆gay jơno bơh lơgơ Yang Tơm Trồ dê. 4Tơm tô̆ bơjư̆m băl î ƀòn gô, Kơnràñ sŏng pơđơ ma ƀòn gô ơ̆ dî tơlôh bơh Jerusalem, mơya păl ăm cang jơno hăư Bàp dê, “la jơno mà oh mi sŏng kơnău bơh ăñ, 5lah Jăng sŏng lơh ƀaptem î dà, mơya oh mi rơp dî ƀaptem î Yang Hwîng Goh ơ̆ hôm jŏ ma-ngkơi lơ̆gay nge dô.”

6Tîrơ̆ gư̆n, tơm tô̆ du nùs băl swà trôh, ƀòn gô lùp Kơnràñ lah: “Ơ Yang, iyŏ ngăn kơnràñ bơtao wăl lơgơ ma Israel nơ̆m jơ dô ơ?” 7Mơya, Kơnràñ tơs î ƀòn gô lah: “Jơno ăn lơi ma oh mi la dî gư̆t ơ̆-iyŏ la tô̆ jơ hala tô̆ tơnge ma Bàp sŏng lơh nên jăt gơnăp-gơnoăr Kơnràñ dê. 8Mơya, oh mi rơp dưñ lăñ gơnăp-gơnoăr tơm jơ Yang Hwîng Goh jư cŭng să mơ̆n, gư̆m oh mi rơp la lơ̆gay cro lơh cư̆ng ăñ dê nơ̆m Jerusalem, nhòng lơ̆ lơgơ Juđe, lơgơ Samari gư̆m trôh dî lŭi-dơ̆t ple-ù.” 9Ma-ngkơi jơ tơs lơ̆gay jơno rơ̆, dơ̆ ƀòn gô kŭng ndăng lăng, gừn Kơnràñ dî hao lêh cŭngsî, gừn du tơnăng tô̆ tơmbàk thơ̆t Kơnràñ bơh măt ƀòn gô. 10Nơ̆m jơ ƀòn gô ndăng ngơ lăng nê̆ lêh cŭng trồ tơm jơ Kơnràñ trê cŭng trồ, gừn lăng năy, bea hê cro-klo cù jơno lơmŏng bẵu trôh ñă en ƀòn gô. 11Ƀòn gô tơs lah: “Ơ nhẵư hê cro Galile năy, ngglơh ƀòn amî ñă ngơ lăng lêh cŭngsî trồ? Yang Jesu dô, Bơtao sŏng dî hao trê lêh cŭngsî trồ bơh ƀòn amî, kŭng rơp trôh dubă gư̆ptî ma ƀòn amî sŏng tơmpơl Kơnràñ swà trê lêh cŭngsî trồ.”

12Tîrơ̆ gừn, bơh cŭng yồ dî sơnăn la ôlibe, ƀòn gô trê wăl trôh Jerusalem, ma yồ gư̆n ăm en Jerusalem, pơngăp dî swà gung nơ̆m du-nge Saƀat. 13Dơ̆ ƀòn gô sŏng trê trôh, ƀòn gô swà lêh cŭngsî adô̆ yơng anẵu ƀòn gô ndăng ờs ăm, băl gư̆m Pier, î Jăng, băl Jakơ î Andre, Philip î Thôma, Ƀathelemi î Mathiơ, Jakơ kon klo Alphe gư̆m Simôn Selôt băl î Juđe, kon Jakơ dê. 14Jơh lơ̆gay ƀòn gô kŭng dubă băl ngăc-ngăr nơ̆m jơno hôi-dăn băl lơ̆gay cro-ua, băl î Mari, mơi Yang Jesu dê, gư̆m î oh klo Kơnràñ dê.

15Nơ̆m lơ̆gay nge rơ̆, ma-ngkơi jơ ñă atẵy ăm nhòng tĕdơ lơ̆gay oh mi mơ̆n (khà khăi lơ̆gay cro nơ̆m anẵu dô la pơngăp du-rhieng bea-jư̆t hê), Pier tơs lah: 16“Ơ oh mi, lơ̆gay cro oh mi, dô la jơno kơ̆p kơñ krañ-cê dî iyŏ ngăn nơ̆m Sră-Goh, la jơno ma Yang Hwîng Goh sŏng tơs lai bơh dẵư bơtao Dabit bơh Juđa, cro sơlôh jîng cro bơlăm gung ma tơmpôl kơ̆p Yang Jesu. 17Bơh gô sŏng dî kờp băl î ƀòn hî gư̆m sŏng lăñ pơnah mơ̆n bơh gơnoăr bră dô.” 18(Tîrơ̆ gừn, gô sŏng tăc dubă ƀlang srăy bơh priè tơnge bră lơh bờk-mơsăk dê, gư̆m ma-ngkơi tơm jơ kŏng blă kơsrơ̆p găl nteàh, gô bơcah klô̆ng, hôm lơ̆gay pròc gô kŏng tơđô̆ng tơlôh makin. 19Bră dô sơlôh jîng jơno ờs dờm gôtrê băl î jơh lơ̆gay cro ăm nơ̆m Jerusalem. Bơh rơ̆, ƀlang srăy gư̆n dî hôi jăt î jơno tơs tơm ƀòn gô dê la “Hakeldama”, gơtha la “Ƀlang Srăy Mham”.) 20“Bơh nơ̆m sră Tơs-crih sŏng dî cêh bơh bră rơ̆ lah:

‘Lơi cĕ ƀlang srăy gô kŏng rngăp-rnghêm,

kŭng bư̆ng tom cro găy ăm jîng lơh bră nơ̆m gư̆n,’ gư̆m

‘Lơi cĕ cro nde dưñ lăñ gơnoăr bră gô dê.’

21Bơh tîrơ̆, păl cang dî lơ̆gay cro sŏng dubă băl î ƀòn hî nơ̆m miek kơp tô̆ jơ ma Yang Jesu swà trê nhòng ƀòn hî, 22sơntơm bơh gơnoăr lơh ƀaptem Jăng dê trôh dî nge ma Kơnràñ dî hao lêh cŭngsî bơh ƀòn mơ̆n — du hôi nhòng lơ̆gay cro rơ̆ păl sơlôh jîng cro cư̆ng-tang bơh jơno jîng wăl Kơnràñ dê băl î ƀòn hî.” 23Ƀòn gô pồ ăn bea hê cro, Jôsep dî sơnăn la Ƀarsaƀa, cro gừn dî sơnăn măt la Justus, î Mathia. 24Tơm tô̆ hôi-dăn, ƀòn gô tơs lah: “Khoai Yang, să tơm Kơnràñ, la Bơtao gư̆t nùs tua lơ̆gay cro dê, dăn nư̆ng sơđah dul nhòng bea hê cro dô mà Kơnràñ sŏng săc-rwơh la mơ̆t cro 25lơi e dưñ-lăñ gơnoăr bră nơ̆m bră lơh dô dê băl î gơnoăr bră cro gơnoăr bơtău dơng ma cro Juđa sŏng lơi căư lơi swà trôh anẵu gô dê.” 26Ƀòn gô tă khà bơh bea hê cro rơ̆, gư̆m khà dî nơ̆m Mathia, rơ̆ la ông dî săc tơmơ̆t băl î jư̆t-dul hê cro gơnoăr bơtău dơng.