Jăng 21

1Sŏng bơh lơ̆gay bră gư̆n, Yang Jesu rang sơđah te sătan mơ̆n ma lơ̆gay cro bơtê anẵu Dàlîng Tiberias. Kơnràñ sŏng rang sơđah sătan mơ̆n tîdô lah: 2Nhẵư hê cro bơtê ăm băl î găp — Simôn Pier, Thôma, dî sơnăn la Didim, Nathanael, cro Kana nơ̆m lơgơ Galile, băl î lơ̆gay kon klo Seƀeđe dê, î bea hê cro nde nơ̆m tơmpôl cro bơtê Kơnràñ dê. 3Simôn Pier tơs î ƀòn gô lah: “Ăñ swà lơh ka.” Ƀòn gô tơs î ông: “Ƀòn hî kŭng swà băl î mê.” Ƀòn gô swà gừn lơbà mơ̆t nơ̆m du-lăm ahẵu, mà ƀòn gô ơ̆ kơ̆p dî jơno găy nơ̆m tơmăng gư̆n. 4Jơ gư̆n, tơm tô̆ brê-ang lờt, Yang Jesu ñă ăm nơ̆m mằ dàlîng, bulah tîgư̆n, lơ̆gay cro bơtê ơ̆ gư̆t lah gư̆n la Yang Jesu. 5Tîrơ̆ gừn Yang Jesu tơs î ƀòn gô lah: “Ơ ƀòn kon, ơ̆ tom ka găy lơi sa ya?” Ƀòn gô kla dẵư Kơnràñ lah: “Ơ̆.” 6Mơya Kơnràñ tơs î ƀòn gô lah: “Treh cĕ sơnñol mađah ma ahẵu, gừn ƀòn mê rơp kơ̆p dî ka.” Tîgư̆n, ƀòn gô treh sơnñol mà ơ̆ tom tăl pran lơi kơtô̆k sơnñol cŭngsî bơh khà ka khăi oañ. 7Ma-ngkơi gư̆n, cro bơtê năy, la cro mà Yang Jesu kơloh, tơs î Pier lah: “Rơ̆ la Yang.” Bơh gư̆n, ma-ngkơi jơ Simôn Pier kơnău lah rơ̆ la Yang, gừn pùc ao tĕdơ să mơ̆n (bơh gô ndăng ăm săkôh), sŏng gư̆n sơndŏng nơ̆m dàlîng. 8Hôm lơ̆gay cro bơtê nde gừn swà nơ̆m ahẵu (bơh ƀòn gô ơ̆ ăm wĭc mamằ, wĭc nư̆ng bea-rhieng kudê), hwa băl î sơnñol bîng ka. 9Ma-ngkơi gư̆n, nơ̆m jơ ƀòn gô tơlôh bơh nơ̆m ahẵu hao mamằ, ƀòn gô tơmpơl oềs rnga ndăng oềs sa, ka î ƀăñ ndăng khơng nơ̆m cŭngsî. 10Yang Jesu tơs î ƀòn gô lah: “Iyà cĕ dư̆ng-iè nơ̆m khà ka mà oh mi mhăy kơ̆p dî trôh madô.” 11Gư̆n-jîng, Simôn Pier swà gừn hwa sơnñol mamằ, bîng du-rhieng prăm-jư̆t păy-lăm ka dơng. Gừn bulah dî khăi ngăn ka, sơnñol kŭng ơ̆ tĕ. 12Yang Jesu tơs î ƀòn gô lah: “Swà cĕ madô sa ndrư̆m”. Pơnah nde, ơ̆ cro găy nơ̆m lơ̆gay cro bơtê khơ̆n lùp Kơnràñ: “Ông la mơ̆t cro?” Ƀòn gô sŏng gư̆t lah rơ̆ la Yang Jesu. 13Yang Jesu lơbà swà trôh sŏng gư̆n dưñ ƀăñ gừn dờp ma ƀòn gô, î ka kŭng tîgư̆n. 14Dô la dơ̆ păy Yang Jesu rang sơđah sătan mơ̆n ma lơ̆gay cro bơtê, bơh tơm tô̆ Kơnràñ dî jîng wăl bơh anẵu sơ̆t.

15Sŏng gư̆n tơm tô̆ ƀòn gô sa ndrư̆m, Yang Jesu tơs î Simôn Pier lah: “Simôn, kon Jăng dê, mê kơloh ăñ rlo lơ̆gay jơno dô ya?” Ông tơs î Kơnràñ lah: “Ơ Yang, ời, Kơnràñ gư̆t lah ăñ kơloh Kơnràñ.” Kơnràñ tơs î ông lah: “Rong-siem cĕ lơ̆gay belàt ăñ jê.” 16Kơnràñ tơs te î ông dơ̆ bea lah: “Simôn, kon Jăng dê, mê kơloh ăñ ya?” Ông kla dẵư Kơnràñ lah: “Ơ Yang, ời, Kơnràñ gư̆t lah ăñ kơloh Kơnràñ.” Kơnràñ tơs î ông lah: “Rong-siem cĕ lơ̆gay belàt ăñ jê.”

17Kơnràñ tơs î ông dơ̆ păy lah: “Simôn, kon Jăng dê, mê kơloh ăñ ya?” Pier moat-jrum bơh Kơnràñ lùp gô trôh păy dơ̆ lah: “Mê kơloh ăñ ya?” Ông tơs î Kơnràñ lah: “Ơ Yang, Kơnràñ gư̆t lơ̆gay bră; Kơnràñ gư̆t lah ăñ kơloh Kơnràñ.” Yang Jesu tơs î ông lah: “Rong-siem cĕ lơ̆gay belàt ăñ. 18Iyŏ ngăn, iyŏ ngăn, ăñ tơs î mê, tơm tô̆ mê hôm pơnu, sătan mê cù dêh ôi-ao î swà anẵu găy mê kơñ swà, mơya tơm tô̆ mê kra, mê rơp tơlang drăng tê mơ̆n, gừn cro nde rơp tơngcù ôi-ao ma mê sŏng gư̆n bơlăm mê trôh anẵu mà mê ơ̆ kơñ swà.” 19Kơnràñ tơs jơno gư̆n, lơi sơđah jơno sơ̆t amơh tîgay mà ông rơp lơh jơno gơklŏ Yang Tơm Trồ. Tơs jơno gư̆n sŏng, Kơnràñ tơs î ông lah: “Swà jăt cĕ ăñ.” 20Tơm tô̆ tơmblăc wăl, Pier tơmpơl cro bơtê mà Yang Jesu kơloh swà jăt ma-ngkơi, la cro nơ̆m jơ sa jơno mhău sơ̆mbîng sî să Kơnràñ sŏng lùp lah: “Ơ Yang, cro găy la cro tơmdră Kơnràñ?” 21Gư̆n-jîng, tơm tô̆ tơmpơl cro gư̆n, Pier tơs î Yang Jesu lah: “Ơ Yang, gư̆n cro dô rơp amơh?” 22Yang Jesu tơs î ông lah: “Dilah ăñ kơñ cro gư̆n kư̆ ăm wăl trôh jơ ăñ trôh, gừn tom jơno găy î mê? Mê swà jăt cĕ ăñ.” 23Bơh gư̆n la jơno dô lam kơnău nhòng lơ̆gay oh mi rôh lŏ lah cro bơtê gư̆n rơp ơ̆ sơ̆t. Mơya Yang Jesu ơ̆ tơs î ông lah cro gư̆n rơp ơ̆ sơ̆t, mơya la: “Dilah ăñ kơñ cro gư̆n kư̆ ăm wăl trôh dî jơ ăñ trôh, gừn tom jơno găy î mê”.

24Dô la cro bơtê lơh cư̆ng bơh lơ̆gay bră dô, î la cro cêh wăl lơ̆gay bră gư̆n, mà ƀòn mơ̆n gư̆t lah jơno lơh cư̆ng cro gư̆n la tơpăt ngăn. 25Rlo te, kŭng tom khăi bră nde mà Yang Jesu lơh, bơh lơ̆gay bră gư̆n, dilah cêh lơ̆ kơp bră, gừn ăñ kơlôi lah lơ̆gay dunya tien gơs ơ̆ tăl anẵu lơi ăn prăp kơp sră dî cêh.