Jăng 20

1Tơm ang drư̆m nge dơ̆ sơm nơ̆m poh, tơm tô̆ brê hôm ñô̆ng rhin-rhin ang, Mari Madơlen swà trôh nơ̆m mơ̆ntô ƀùc gừn tơmpơl ne-lô̆ kŏng tơlơ̆ bơh nơ̆m mơ̆ntô ƀùc. 2Gư̆n-jîng, mò tơplŏk swà gừn trôh băl î Simôn Pier băl î cro bơtê năy, la cro Yang Jesu kơloh, sŏng gư̆n mò tơs wăl ma ƀòn gô lah: “Cro sŏng iyà Yang tơlôh bơh nơ̆m mơ̆ntô ƀùc, gừn ƀòn hî ơ̆ gư̆t ƀòn gô ăn Kơnràñ anẵu găy.” 3Bơh gư̆n la Pier î cro bơtê năy tơlôh makin gừn swà trôh nơ̆m mơ̆ntô ƀùc. 4Bea hê ƀòn gô tơplŏk swà băl, mà cro bơtê năy tơplŏk khơñ rlo ma Pier î trôh lai nơ̆m mơ̆ntô ƀùc. 5Ma-ngkơi jơ cun nteàh lăng nê̆, cro gư̆n lăng tơmpơl kơp bơtơi tơme hôm sơgư̆n, mơya ơ̆ mơ̆t nơ̆m nhòng. 6Bơh sơgư̆n, Simôn Pier, jăt ma-ngkơi cro gư̆n, kŭng trôh anẵu, ông swà mơ̆t nơ̆m mơ̆ntô ƀùc. Ông lăng tơmpơl kơp bơtơi tơme hôm ăm sơgư̆n, 7hôm bơtơi dî pùc nơ̆m găl Kơnràñ gừn ơ̆ ăm băl î kơp bơtơi tơme, mà dî kơbồt wăl ăn dêh du-anẵu. 8Bơh gư̆n, jơ gư̆n, cro bơtê năy, la cro swà trôh lai nơ̆m mơ̆ntô ƀùc, kŭng lơbà mơ̆t, cro gư̆n lăng tơmpơl gừn don. 9Bơh ƀòn gô hôm dahrăư wơng jơno Sră-Goh bơh bră Kơnràñ păl jîng wăl bơh anẵu sơ̆t. 10Sŏng gư̆n, bea hê cro bơtê blăc trê wăl nơ̆m hîh mơ̆n.

11Hôm Mari gừn ăm ñă ñim makin mơ̆ntô ƀùc. Sŏng gư̆n mò gư̆m ñim, gư̆m cun ngơ lăng nơ̆m mơ̆ntô ƀùc. 12Mò tơmpơl bea hê cro gơndrơh cù ao bẵu nggui nơ̆m anẵu ăn ƀùc Yang Jesu, du hôi ăm mađah găl, î du hôi ăm mađah jư̆ng. 13Lơ̆gay cro gơndrơh gư̆n lùp mò lah: “Ơ mò, ngglơh mò ñim?” Mò kla dẵư ƀòn gô lah: “Bơh cro iyà Yang ăñ swà ha-ău thơ̆t, gừn ăñ ơ̆ gư̆t ƀòn gô ăn Kơnràñ anẵu găy.” 14Tơs nhẵư jơno gư̆n sŏng, mò tơmblăc să ma-ngkơi gừn tơmpơl Yang Jesu ñă ăm sơgư̆n, mà mò ơ̆ gư̆t lah gư̆n la Yang Jesu. 15Yang Jesu tơs î mò lah: “Ơ mò, ngglơh mò ñim? Mò ndăng jôi cro găy?” Bơh mò tôn-lah gư̆n la cro lơh buơn, gư̆n-jîng mò tơs lah: “Ơ ông, dilah ông iyà Kơnràñ swà, dăn tơs ma ăñ anẵu mà ông ăn Kơnràñ, sŏng gư̆n ăñ rơp iyà Kơnràñ swà.” 16Yang Jesu hôi mò lah: “Mari.” Tơm tô̆ tơmblăc wăl, mò tơs î Kơnràñ bơh î dẵư Heƀrơ lah: “Raƀôni” (jơno tơs gư̆n dî gơtha lah: “Cro Bơtău”). 17Yang Jesu tơs î mò lah: “Bư̆ng tơmpơ̆p să ăñ, bơh ăñ hôm dahrăư trê băl î Bàp; mơya swà tơmtom cĕ oh mi rôh lŏ ăñ gư̆m tơs î ƀòn gô la ‘ăñ rơp swà băl î Bàp ăñ kŭng la Bàp oh mi rôh lŏ, gư̆m Yang Tơm Trồ ăñ kŭng la Yang Tơm Trồ oh mi rôh lŏ.’” 18Mari Madơlen swà, tơs wăl ma lơ̆gay cro bơtê lah: “Ăñ tơmpơl sŏng Yang,” î lơ̆gay jơno Kơnràñ sŏng tơs ma gô.

19Tơmjăt bơh gư̆n, tơm tô̆ brê mhău ñô̆ng nơ̆m nge gư̆n, la nge dơ̆ sơm nơ̆m poh, gừn lơ̆gay mpông anẵu mà lơ̆gay cro bơtê ăm kŏng kơl wăl bơh kơ̆mbrit cro Juđa, gừn Yang Jesu trôh î ñă ăm nhòng ƀòn gô gư̆m Kơnràñ tơs î ƀòn gô lah: “Lơngăp-lơnge ma oh mi.” 20Tơs jơno gư̆n sŏng, Kơnràñ sơđah ma ƀòn gô tơmpơl bea ƀĕ tê î pô̆ng dà mơ̆n. Jơ gư̆n, lơ̆gay cro bơtê dî jơno sơhờp tơm tô̆ tơmpơl Yang. 21Ma-ngkơi gư̆n, Kơnràñ tơs te î ƀòn gô lah: “Lơngăp-lơnge ma oh mi. Bàp sŏng pơđơ ăñ tîgay, gừn ăñ kŭng pơđơ oh mi gư̆p tîgư̆n.” 22Gừn ma-ngkơi jơ tơs jơno gư̆n, Kơnràñ khôm nhim nơ̆m ƀòn gô gư̆m tơs î ƀòn gô lah: “Dưñ-lăñ cĕ Yang Hwîng Goh. 23Dilah tơmpôl cro găy oh mi hồ glài, gừn glài ƀòn gô dî hồ-toh, dilah tơmpôl cro găy mà oh mi iyà jư wăl, gừn glài ƀòn gô kŏng jư wăl.”

24Mơya Thôma, du hôi nơ̆m jư̆t-bea cro bơtê, gô dî sơnăn la Didim, ơ̆ ăm băl î ƀòn gô tơm tô̆ Yang Jesu trôh. 25Gư̆n-jîng, lơ̆gay cro bơtê nde tơs î ông lah: “Ƀòn hî tơmpơl sŏng Yang.” Mơya ông tơs î ƀòn gô lah: “Dilah ăñ ơ̆ tơmpơl têl điñ nơ̆m tê Kơnràñ, î ăn kon tê ăñ nơ̆m têl điñ, kŭng gư̆ptî tơmpơ̆p tê ăñ nơ̆m pô̆ng dà Kơnràñ, gừn ăñ nên-nôn ngăn rơp ơ̆ don.”

26Pham nge ma-ngkơi lơ̆gay cro bơtê Kơnràñ ăm wăl nơ̆m hîh, î Thôma ăm băl î ƀòn gô. Tơm tô̆ lơ̆gay mpông dî kơl bơkhê, Yang Jesu trôh gừn ñă ăm nhòng sŏng gư̆n Kơnràñ tơs lah: “Lơngăp-lơnge ma oh mi.” 27Tơmjăt te, Kơnràñ tơs î Thôma lah: “Ăn cĕ kon tê mê sơdô mà lăng kơ̆mpang tê ăñ. Î dưñ cĕ tê mê tơmpơ̆p nơ̆m pô̆ng dà ăñ. Bư̆ng lơh kơdăng nùs, mơya păl don.” 28Thôma kla dẵư gừn tơs î Kơnràñ lah: “Ơ Yang ăñ î Yang Tơm Trồ ăñ.” 29Yang Jesu tơs î ông lah: “Tài bơh mê tơmpơl sŏng ăñ, gư̆n-jîng mê don. Lơnge ma lơ̆gay cro găy ơ̆ tơmpơl mà don.”

30Sŏng gư̆n, Yang Jesu kŭng lơh khăi gơnoăr phadêh nde sơđàp măt lơ̆gay cro bơtê Kơnràñ, mà lơ̆gay bră gư̆n gừn ơ̆ dî cêh nơ̆m sră dô; 31hôm lơ̆gay jơno dô dî cêh wăl la lơi oh mi rôh lŏ don lah Yang Jesu la Yang Dŏng-Klàs, Kon Yang Tơm Trồ, î lơi oh mi rôh lŏ dî jơno jîng tơm jơ don anẵu sơnăn Kơnràñ.