Jăng 19

1Tîgư̆n, ƀăt nơ̆m jơ gư̆n, Pilat pơđơ kơ̆p Yang Jesu î pơng lơh Kơnràñ. 2Tơmpôl lĭñ tañ du-lăm sơgơn bơh î lẵu. Ƀòn gô tơngđoa sơgăl Kơnràñ, î tơngcù ma Kơnràñ du bơlah ao rơnjai dà pơcăñ. 3Ƀòn gô swà sơđàp Kơnràñ gừn tơs lah: “Dăn còp-să Bơtao lang bol Juđa!” sŏng gư̆n pah Kơnràñ bea păy tê. 4Du dơ̆ te, Pilat swà tơlôh gừn tơs î ƀòn gô lah: “Lăng dô, ăñ iyà cro dô ma ƀòn ông lơi ƀòn ông gư̆t lah ăñ ơ̆ jôi tom jơno tìs-glài găy nơ̆m anẵu amî dô.” 5Sŏng gư̆n Yang Jesu swà tơlôh makin, đoa sơgơn lẵu î cù ao rơnjai. Pilat tơs î ƀòn gô lah: “Lăng cĕ ma cro dô!” 6Tîrơ̆ la, nơ̆m jơ lơ̆gay cro gơnoăr dơng ăn jơno duh-khoai gư̆m tơmpôl cro lĭñ tơmpơl Kơnràñ, ƀòn gô dreo dơng lah: “Pư̆ng cĕ gô cŭng sî pư̆ng, pư̆ng cĕ gô cŭng sî pư̆ng!” Pilat pơđơ ƀòn gô lah: “Ƀòn ông kơ̆p cĕ dêh cro dô gừn pư̆ng điñ, tài bơh ăñ ơ̆ jôi tom tơmpơl tồi-glài găy anẵu cro dô.” 7Cro Juđa kla dẵư î ông: “Ƀòn hî dî jơno-bơlăm gư̆m lơh-jăt jơno-bơlăm gư̆n, gừn gô păl sơ̆t bơh gô tơs dêh mơ̆n la Kon Yang Tơm Trồ.” 8Bơh gư̆n, tơm tô̆ Pilat kơnău jơno dô, ông gư̆n sơlơ kơ̆mbrit-kơ̆mbròt rlo te, 9ông swà mơ̆t te nơ̆m gơlăng cro kwăng cahrña gừn tơs î Yang Jesu: “Mê trôh bơh anẵu găy?” Mơya Yang Jesu ơ̆ e ma ông gư̆n jơno kla dẵư ơ̆. 10Bơh gư̆n, Pilat tơs î Kơnràñ: “Mê ơ̆ kla dẵư ăñ ya? Mê ơ̆ gư̆t lah ăñ dî gơnoăr hồ klàs mê, gừn kŭng dî gơnoăr pư̆ng điñ mê nơ̆m sî pư̆ng ya?” 11Yang Jesu kla wăl dẵư ông gư̆n lah: “Ông ơ̆ tom dî bulah gơnoăr găy gôtrê î ăñ, dilah gơnoăr gư̆n sŏng ơ̆ dî dờp ma ông bơh cŭngsî trồ. Tài bơh tîgư̆n, cro kơ̆p jao ăñ ma ông tom glài kơjơ̆ rlo.” 12Bơh jơno tơs gư̆n, Pilat jôi jơno hồ klàs Kơnràñ, mơya cro Juđa dreo dơng, lah: “Dilah kwăng dơng hồ gô gừn kwăng dơng ơ̆-iyŏ la bơyô Sesa dê. Cro găy tơngyơng dêh să mơ̆n lơh bơtao la tơmdră î Sesa.” 13Bơh gư̆n, ma-ngkơi jơ kơnău nhẵư jơno dô, Pilat pơđơ bơlăm Yang Jesu tơlôh makin sŏng gư̆n ông nggui nơ̆m kơgề cahrña nơ̆m anẵu dî sơnăn la “Toa Bờt Lô̆”; gư̆n nơ̆m dẵư Heƀrơ la “Gaƀatha”. 14(Jơ gư̆n la nge rcăng ma Jơno Bơjư̆m-Sa Swà-Găn. Dơ̆ gư̆n la pơngăp jơ dơ̆ pro.) Ông gư̆n tơs î cro Juđa lah: “Lăng hă, bơtao ƀòn ông dê!” 15Mơya ƀòn gô dreo dơng: “Iyông gô lêh cŭngsî! Iyông gô lêh cŭngsî! Pư̆ng điñ gô nơ̆m cŭng sî pư̆ng!” Pilat lùp ƀòn gô: “Ăñ pư̆ng điñ bơtao ƀòn ông dê yơh?” Lơ̆gay cro gơnoăr dơng ăn jơno duh-khoai kla dẵư lah: “Nư̆ng Sesa, ƀòn hî ơ̆ tom bơtao nde.” 16Tîrơ̆ la, nơ̆m jơ gư̆n, ông gư̆n jao Kơnràñ ma ƀòn gô lơi kŏng pư̆ng điñ nơ̆m sî pư̆ng, sŏng gư̆n ƀòn gô kơ̆p Yang Jesu gừn iyà swà.

17Tơm tô̆ păl tî dêh sî pư̆ng, Kơnràñ swà trôh nơ̆m anẵu dî sơnăn la “Anẵu Katîng Kơdò Găl”, anẵu gư̆n nơ̆m jơno tơs Heƀrơ dî sơnăn la “Gôgôtha.” 18Cro pư̆ng điñ Kơnràñ nơ̆m anẵu gư̆n, băl î Kơnràñ la bea hê cro nde, ăm mađah ma î mađah eo, hôm Yang Jesu ăm nhòng. 19Jơ gư̆n, Pilat kŭng cêh du jơno sŏng gư̆n iyông cŭng sî pư̆ng. Jơno cêh dî cêh lah: JESU CRO NASARET, BƠTAO LANG BOL JUĐA. 20Bơh gư̆n, khăi cro Juđa đŏk jơno cêh dô bơh anẵu mà Yang Jesu kŏng pư̆ng điñ la en ƀòn dơng. Jơno dî cêh bơh î jơno tơs Heƀrơ, jơno tơs Latin î jơno tơs Grek. 21Gư̆n-jîng, lơ̆gay cro gơnoăr bơlăm-găl ăn jơno duh-khoai cro Juđa tơs î Pilat lah: “Dăn bư̆ng cêh la ‘Bơtao lang bol Juđa,’ mà cêh la ‘Cro tơs lah “Ăñ la Bơtao lang bol Juđa”.’” 22Pilat kla dẵư lah: “Jơno ăñ cêh lờt gừn ăñ cêh sŏng.”

23Sŏng gư̆n, nơ̆m jơ tơmpôl lĭñ pư̆ng điñ Yang Jesu nơ̆m sî pư̆ng, ƀòn gô dưñ ôi-ao Kơnràñ sŏng gư̆n tơmpà jîng puôn pơnah — kơp cro lĭñ du pơnah — î ao rơnjai. Ao gư̆n ơ̆ tom têl gung sĩh, la du blah bơtơi ơ̆ têl gung sĩh bơh cŭngsî trôh nteàh. 24Gư̆n-jîng, ƀòn gô tơs î găp lah: “Bư̆ng crề tơngtĕ ao, mơya tă khà cĕ bơh ao gư̆n, lăng ao gư̆n rơp gôtrê ma cro găy.” Rơ̆ la lơi jơno Sră-Goh dî tơlôh iyŏ ngăn lah:

“Ƀòn gô tơmpà ma găp ôi-ao ăñ,

tă khà dưñ ao ăñ.”

Bơh gư̆n la, tơmpôl lĭñ sŏng lơh gư̆p tîgư̆n.

25Jơ gư̆n, tơmpôl cro ñă en sî pư̆ng Yang Jesu la mơi Kơnràñ î oh ua amî-ua mơi Kơnràñ dê, rơ̆ la Mari bo-ua Kơleôƀa, băl î Mari Madơlen. 26Tîrơ̆ la, tơm tô̆ Yang Jesu lăng tơmpơl mơi mơ̆n î cro bơtê mà Kơnràñ kơloh ñă en gư̆n, gừn Kơnràñ tơs î mơi lah: “Ơ mò, lăng tò, kon klo mò dê!” 27Sŏng gư̆n Kơnràñ tơs î cro bơtê lah: “Lăng tò, mơi mê dê!” Bơh jơ gư̆n, cro bơtê gư̆n iyà mò trê nơ̆m hîh gô.

28Ma-ngkơi gư̆n, bơh Yang Jesu gư̆t la lơ̆gay bră dî lơh sŏng wêl-tăl lờt, gư̆n-jîng lơi jơno Sră-Goh dî tơlôh iyŏ ngăn, gừn Kơnràñ tơs lah: “Ăñ tơhiê.” 29Du-lăm lîng ăn bîng dà sràt dî ăn anẵu gư̆n, gư̆n-jîng, bơh î jơno kăt sî mbơlong sî proh du lăm kơnsồp iyrù bîng dà sràt, ƀòn gô ăñ nơ̆m iyôi Kơnràñ. 30Gư̆n, dơ̆ Yang Jesu lièp dà sràt rơ̆, gừn Kơnràñ tơs lah: “Lơ̆gay bră dî lơh sŏng!” Sŏng gư̆n cun găl nteàh, Kơnràñ ha-ău nhim.

31Tơmjăt bơh gư̆n, bơh nge gư̆n la nge rcăng, gư̆n-jîng lơi lơ̆gay ƀùc ơ̆ ăm miek nơ̆m cŭng sî pư̆ng lơ̆ nge Saƀat (bơh nge Saƀat rơ̆ la du-nge dơng mang), cro Juđa dăn î Pilat lơi dî lơh tơmpă katîng jư̆ng lơ̆gay cro gư̆n sŏng gư̆n lơ̆gay ƀùc digơlăn dî iyà trê. 32Gư̆n-jîng, tơmpôl lĭñ swà gừn pơng tơmpă katîng jư̆ng cro dơ̆ sơm, sŏng gư̆n cro dơ̆ bea, la tơmpôl cro kŏng pư̆ng điñ băl î Kơnràñ. 33Mơya tơm tô̆ trôh anẵu Yang Jesu, ƀòn gô tơmpơl Kơnràñ sơ̆t lờt, gư̆n-jîng ơ̆ pơng tơmpă jư̆ng Kơnràñ. 34Mơya, du hôi cro nơ̆m tơmpôl lĭñ wơ̆t ma pô̆ng dà Kơnràñ bơh î tà, khơñ ngăn mham î dà hua tơlôh. 35Cro sŏng tơmpơl bră gư̆n sŏng lơh cư̆ng wăl, î jơno lơh cư̆ng cro dô la ngăn. Cro gư̆n gư̆t lah mơ̆n tơs jơno ngăn, lơi oh mi rôh lŏ kŭng don. 36Bơh lơ̆gay jơno gư̆n sŏng tom tơlôh lơi lơh tơlôh iyŏ ngăn jơno Sră-Goh: “Ơ̆ tom du-lăm katîng găy Kơnràñ dê rơp kŏng pă.” 37Du anẵu nde nơ̆m Sră-Goh tơs wăl lah: “Ƀòn gô rơp ngơ lăng Bơtao mà ƀòn gô wơ̆t.”

38Ma-ngkơi bơh lơ̆gay bră gư̆n, Jôsep cro Arimathe, la du hôi cro bơtê Yang Jesu dê (mơya ămpôn ndăp bơh kơ̆mbrit cro Juđa), ông dăn î Pilat lơi iyà ƀùc Yang Jesu swà trê, Pilat e gơnoăr. Gư̆n, ông trôh gừn iyà ƀùc Kơnràñ swà. 39Nikôđem kŭng trôh — ông la cro bơh lai trôh tơmtom Yang Jesu nơ̆m brê tơmăng — iyà băl î mơñà kơlhô ƀôhơ̆ î kơ̆mbui sî kơlhô, pơngăp du-rhieng kì Rôma. 40Tîgư̆n ƀòn gô iyà ƀùc Yang Jesu swà gừn pùc ƀùc bơh î bơtơi tơme băl î sơnăm ƀôhơ̆, rơ̆ la lơh jăt jơno ờs dơm cro Juđa dê lơi tăp ƀùc. 41Pơnah nde, nơ̆m anẵu mà Kơnràñ kŏng pư̆ng điñ tom du buơn miê, gừn nơ̆m buơn miê tom du mơ̆ntô ƀùc mhăy, mà nơ̆m gư̆n hôm dahrăư cro găy dî tăp. 42Gư̆n-jîng, tài bơh nge rcăng cro Juđa dê î bơh mơ̆ntô ƀùc gư̆n ăm en, gư̆n-jîng ƀòn gô tăp ƀùc Yang Jesu nơ̆m anẵu gư̆n.