Jăng 18

1Ma-ngkơi jơ tơs sŏng lơ̆gay jơno gư̆n, Yang Jesu swà tơlôh î lơ̆gay cro bơtê mơ̆n găn ma năy dà Ketrôn, mà anẵu dô dî dubă buơn, Kơnràñ băl lơ̆gay cro bơtê mơ̆n swà mơ̆t nơ̆m gư̆n. 2Jơ gư̆n, Juđa, cro tơblơ̆ dră Kơnràñ, kŭng gư̆t anẵu dô, bơh Yang Jesu thăư trôh tơmƀù nơ̆m anẵu dô î lơ̆gay cro bơtê mơ̆n. 3Bơh gư̆n, Juđa trôh anẵu gư̆n, bơlăm băl du tơmpôl cro lĭñ băl î cro lĭñ bơh anẵu cro gơnoăr dơng ăn jơno duh-khoai gư̆m bơh lơ̆gay cro Pharisi, iyà băl đeng, arẵu oềs gư̆m pàs-đao. 4Dơ̆ gư̆n, bơh Yang Jesu gư̆t lai kơp bră ndăng tơmtom trôh ma mơ̆n, gư̆n tơm tô̆ tơlôh makin, Kơnràñ lùp ƀòn gô: “Ƀòn ông jôi cro găy?” 5Ƀòn gô kla dẵư Kơnràñ lah: “Jesu, cro Nasaret.” Kơnràñ tơs î ƀòn gô: “Să tơm ăñ dô.” (Jơ gư̆n, Juđa, cro tơblơ̆ dră Kơnràñ kŭng ndăng ñă băl î ƀòn gô.) 6Tîrơ̆ gư̆n, tơm tô̆ Kơnràñ tơs î ƀòn gô: “Să tơm ăñ dô,” gừn ƀòn gô rîc wăl ma-ngkơi î blă nơ̆m teàh ù. 7Ma-ngkơi gư̆n, Kơnràñ lùp te ƀòn gô: “Ƀòn ông jôi cro găy?” Sŏng gư̆n ƀòn gô tơs lah: “Jesu, cro Nasaret.” 8Yang Jesu kla dẵư lah: “Ăñ sŏng tơs î ƀòn ông lah să tơm ăñ dô. Tîrơ̆ gư̆n, dilah ƀòn ông ndăng jôi ăñ gừn lơi cĕ ma lơ̆gay ƀòn dô swà.” 9(Rơ̆ la lơi dî tơlôh iyŏ ngăn jơno mà Kơnràñ sŏng tơs lah: “Bơh lơ̆gay cro Bàp sŏng jao ma Kon, Kon ơ̆ lơh tơngroh du hôi cro găy nơ̆m khà ƀòn gô.”) 10Dơ̆ gư̆n, tơm tô̆ ndăng tom du ƀĕ pàs, Simôn Pier tă gô makin sŏng gư̆n ưm rơndôh cro dŏng bră cro gơnoăr dơng ăn jơno duh-khoai gư̆n păc tĕ tua ma cro dô dê. Sơnăn cro dŏng bră la Malcu. 11Tîrơ̆ gừn Yang Jesu pơđơ Pier: “Prăp cĕ pàs-đao nơ̆m dua-đao! Wan mà Bàp dờp ma ăñ, amơh ăñ digơlăn ơ̆ kă ñô gô?”

12Ma-ngkơi gư̆n, tơmpôl lĭñ gư̆m cro kwăng ăt-bồ băl î tơmpôl lĭñ cro Juđa dê kơ̆p jư Yang Jesu gừn căp Kơnràñ wăl. 13Lai ngăn, ƀòn gô bơlăm Kơnràñ trôh Anne, bơh ông gư̆n la bàp cro-ua Kaiphe dê, mà Kaiphe la cro gơnoăr dơng ăn jơno duh-khoai nơ̆m năm gư̆n. 14(Pơnah nde, Kaiphe la cro sŏng bơyê pơjô̆ cro Juđa lah ngăn la niem rlo tơm tô̆ du hôi cro sơ̆t ala ma lơ̆gay lang bol.)

15Jơ gư̆n, Simôn Pier gư̆m du hôi cro bơtê nde swà jăt Yang Jesu. Mơya cro bơtê gư̆n ờs gư̆t î cro gơnoăr dơng ăn jơno duh-khoai, gư̆n jîng cro gư̆n swà î Yang Jesu mơ̆t nhòng ƀlang gơlăng cro gơnoăr dơng ăn jơno duh-khoai. 16Hôm Pier ndăng ñă ăm anẵu mpông đah makin, gư̆n jîng cro bơtê năy, la cro tom ờs gư̆t î cro gơnoăr dơng ăn jơno duh-khoai, tơlôh swà tơs î cro-ua jư mpông, sŏng bơlăm Pier mơ̆t. 17Ma-ngkơi gư̆n, cro-ua dŏng bră, la cro jư mpông, tơs î Pier lah: “Ơ̆-iyŏ ông kŭng ăm nơ̆m khà tơmpôl cro bơtê cro dô dê ơ̆?” Ông kla dẵư lah: “Ơ̆-iyŏ ăñ.” 18Jơ gư̆n, cro dŏng bră gư̆m tơmpôl lîng ndăng ñă sơgư̆n, sơ̆n lêh du ƀù oềs rnga bơh brê lơngềt, gư̆m ƀòn gô ndăng ăm răm. Pier kŭng ăm băl î ƀòn gô, ñă sơgư̆n gừn ăm răm.

19Tơm jơ gư̆n, cro gơnoăr dơng ăn jơno duh-khoai lùp Yang Jesu bơh lơ̆gay cro bơtê Kơnràñ gư̆m bơh jơno bơtău pơđơ Kơnràñ dê. 20Yang Jesu kla dẵư ông gư̆n lah: “Ăñ sŏng tơs dubă loh-lang ma kơp cro. Ăñ bơtău pơđơ nơ̆m hîh jư̆m miek î nơ̆m hîh duh-khoai, la anẵu kơp cro Juđa bơjư̆m băl î găp, gư̆m ăñ ơ̆ tơs jơno găy ndăp-ndơ ơ̆. 21Ngglơh ông lùp ăñ? Lùp cĕ lơ̆gay cro sŏng kơnău jơno mà ăñ sŏng tơs î ƀòn gô. Lăng tò, lơ̆gay cro gư̆n gư̆t ăñ sŏng tơs jơno găy.” 22Tơm tô̆ Kơnràñ tơs gư̆p tîgư̆n, gừn du hôi cro nơ̆m mpôl cro lĭñ ndăng ñă sơgư̆n pah Yang Jesu du tê, tơs lah: “Ông kla dẵư cro gơnoăr dơng ăn jơno duh-khoai tîgư̆n ya?” 23Yang Jesu kla dẵư gô: “Dilah ăn tơs tìs, sơđah cĕ anẵu tìs gư̆n. Hôm dilah la iyŏ, ngglơh mê lơh ăñ?” 24Sŏng gư̆n tơm tô̆ hôm ndăng kŏng căp, Anne pơđơ iyà Kơnràñ swà trôh ma cro gơnoăr dơng ăn jơno duh-khoai Kaiphe.

25Jơ gư̆n, Simôn Pier hôm ndăng ñă gư̆n ăm răm să. Tîrơ̆ gừn, cro tơs î ông: “Ơ̆-iyŏ ông kŭng ăm nơ̆m khà tơmpôl cro bơtê cro gư̆n dê ơ̆h?” Ông tơm khan gừn kla dẵư lah: “Ơ̆-iyŏ ăñ.” 26Du hôi cro nơ̆m khà lơ̆gay cro dŏng bră cro gơnoăr dơng ăn jơno duh-khoai dê la găp ƀòn î cro mà Pier sŏng păc tĕ tua, tơs lah: “Ơ̆-iyŏ ăñ sŏng tơmpơl ông ăm nơ̆m buơn băl cro gư̆n ơ̆?” 27Tîrơ̆ la Pier tơm khan du dơ̆ te sŏng gư̆n ia ndro ƀăt jai gư̆n.

28Bơh gư̆n, ƀòn gô bơlăm Yang Jesu bơh anẵu Kaiphe trôh gơlăng cro kwăng dơng. (Jơ gư̆n, dơ̆ hôm ơm ngăn, ƀòn gô ơ̆ swà mơ̆t nơ̆m gơlăng cro kwăng dơng lơi ƀòn gô klàs kŏng sơmơ̆-sơmĭñ, mà kơnơm tîgư̆n ƀòn gô digơlăn Bơjư̆m-Sa Swà-Găn.) 29Gư̆n jîng, Pilat sŏng swà tơlôh tơmtom ƀòn gô gừn tơs lah: “Lơ̆gay ƀòn ông iyà jơno kơ̆p glài găy tơmdră wăl cro dô?” 30Ƀòn gô kla dẵư gư̆m tơs î ông: “Dilah cro dô ơ̆ tom lơh jơno bờk-mơsăk, gừn iyŏ ngăn ƀòn hî sŏng ơ̆ jao gô ma cro kwăng ăt-bồ.” 31Bơh gư̆n, Pilat tơs î ƀòn gô lah: “Ƀòn ông bơlăm cro dô trê sŏng cahrña gô jăt jơno bơlăm ƀòn ông dê.” Cro Juđa tơs î ông gư̆n lah: “Ơ̆ tom dî gơnoăr e ma ƀòn hî tơngsơ̆t kơp cro găy ơ̆.” 32(Rơ̆ la lơi dî tơlôh iyŏ ngăn jơno Yang Jesu, mà Kơnràñ sŏng tơs lơi sơđah bơh jơno sơ̆t gư̆p tîgay Kơnràñ sơmơn păl kŏng.)

33Tîrơ̆ la Pilat swà te mơ̆t nhòng gơlăng cro kwăng cahrña, gừn pơđơ hôi Yang Jesu trôh sŏng ông gư̆n tơs î Kơnràñ: “Mê tom iyŏ la Bơtao lang bol Juđa?” 34Yang Jesu kla dẵư wăl lah: “Ông tơs dêh mơ̆n jơno gư̆n hala cro găy nde sŏng tơs ma ông bơh ăñ?” 35Pilat kla dẵư lah: “Ăñ tom iyŏ la cro Juđa ơ̆? Lang bol tơm ông dê gư̆m cro gơnoăr dơng ăn jơno duh-khoai jao mê ma ăñ. Mê sŏng lơh jơno găy?” 36Yang Jesu kla dẵư lah: “Lơgơ ăñ dê ơ̆ gôtrê nơ̆m dunya dô, Dilah lơgơ ăñ dê gôtrê nơ̆m dunya dô, gừn ngăn lơ̆gay cro dŏng bră ăñ dê sŏng tơmlơh lơi ăñ ơ̆ kŏng kơ̆p jao ma cro Juđa. Mơya jơ dô lơgơ ăñ dê ơ̆ ăm anẵu dô.” 37Sŏng gư̆n Pilat tơs î Kơnràñ lah: “Gư̆n tom iyŏ mê la bơtao?” Yang Jesu kla dẵư: “Ông tơs lah ăñ la bơtao. Ăñ sŏng dî bơda tài bơh jơno dô, gư̆m ăñ sŏng trôh nơ̆m dunya kŭng tài bơh jơno gư̆n, rơ̆ la lơi lơh cư̆ng ma jơno-tơpăt, cro găy gôtrê bơh jơno-tơpăt gừn iet jơno tơs ăñ dê.” 38Pilat tơs î Kơnràñ lah: “Jơno-tơpăt la jơno găy?” Tơs sŏng jơno gư̆n, ông gư̆n swà tơlôh te tơmtom cro Juđa gư̆n tơs î ƀòn gô: “Ăñ ơ̆ jôi tơmpơl jơno tìs-glài găy nơ̆m anẵu cro dô. 39Mơya, jăt jơno ờs dơm ƀòn ông dê gừn ăñ hồ khăt-gơboh ma ƀòn ông du hôi cro nơ̆m nhòng nge Bơjư̆m-Sa Swà-Găn. Tîgư̆n, ƀòn ông tom kơñ ăñ hồ khăt-gơboh Bơtao cro Juđa ma ƀòn ông ya?” 40Tîrơ̆ gừn ƀòn gô dreo dơng lah: “Ơ̆-iyŏ cro dô, mà la Ƀaraƀa.” Jơ gư̆n, Ƀaraƀa la du hôi cro kơntô̆ng.