Jăng 17

1Yang Jesu tơs lơ̆gay jơno gư̆n sŏng gư̆n lăng măt lêh cŭngsî trồ, Kơnràñ tơs: “Khoai Bàp, jơ sŏng trôh. Dăn lơh gơklŏ ma Kon Bàp dê, lơi Kon digơlăn lơh gơklŏ ma Bàp, 2bơh Bàp sŏng dờp ma Kon dî gơnoăr cŭngsî kơp jơi poăc-să, lơi cro găy mà Bàp sŏng jao ma Kon, gừn Kon dờp ma lơ̆gay cro gư̆n jơno jîng miek miek. 3Hôm dô la jơno jîng miek miek, gư̆n la lơi lơ̆gay cro gư̆n dăn gư̆t Bàp, Yang Tơm Trồ tơpăt-durư̆ng nư̆ng du hôi, gư̆m Yang Dŏng-Klàs Jesu, la Bơtao Bàp sŏng pơđơ swà trôh. 4Kon sŏng lơh gơklŏ Bàp nơ̆m ù, lơh sŏng lơ̆gay bră mà Bàp sŏng jao ma Kon lơi Kon lơh jăt. 5Ơ Bàp, jơ dô dăn Bàp lơh gơklŏ ma Kon sađàp măt Bàp î jơno gơklŏ mà Kon ờs tom dî sơđàp Bàp lai jơ tom nơ̆m dunya. 6Kon sŏng tơs tơlôh sơnăn Bàp ma lơ̆gay cro mà Bàp sŏng jao ma Kon nơ̆m nhòng dunya. Ƀòn gôtrê ma Bàp, Bàp jao ƀòn gô ma Kon, gư̆m ƀòn gô sŏng prăp jư jơno Bàp. 7Jơ dô, ƀòn gô sŏng gư̆t lah jơh lơ̆gay kơp jơno Bàp sŏng dờp ma Kon la bơh Bàp, 8bơh Kon sŏng dờp ma ƀòn gô lơ̆gay jơno mà Bàp dờp ma Kon, ƀòn gô dưñ lơ̆gay jơno gư̆n gư̆m gư̆t ngăn lah Kon trôh bơh Bàp, gừn ƀòn gô don lah să tơm Bàp sŏng pơđơ Kon. 9Kon hôi-dăn ma ƀòn gô. Kon ơ̆ hôi-dăn ma dunya, mơya la ma lơ̆gay cro mà Bàp sŏng jao ma Kon, bơh ƀòn gô gôtrê ma Bàp. 10Jơh lơ̆gay jơno Kon la jơno Bàp; kŭng gư̆ptî jơno Bàp la jơno Kon, gừn Kon dî gơklŏ nơ̆m nhòng ƀòn gô. 11Kon ơ̆ ăm nơ̆m dunya te, mà ƀòn gô ăm nơ̆m dunya, hôm Kon trê ma Bàp. Khoai Bàp Sang-Goh, dăn prăp jư ƀòn gô nơ̆m sơnăn Bàp mà Bàp sŏng dờp ma Kon, lơi ƀòn gô digơlăn jîng dul, gư̆ptî Ƀòn Mơ̆n. 12Ndăng jơ Kon hôm ăm î ƀòn gô, Kon prăp jư ƀòn gô nơ̆m sơnăn Bàp mà Bàp sŏng dờp ma Kon. Kon sŏng lăng jư ƀòn gô gư̆n-jîng ơ̆ du hôi cro găy nơ̆m khà ƀòn gô kŏng roh-rùi, nư̆ng cro kon jơno roh-rùi dê, lơi jơno Sră-Goh dî tom iyŏ ngăn. 13Mơya jơ dô, Kon trê ma Bàp, gừn kon tơs lơ̆gay jơno dô nơ̆m dunya lơi ƀòn gô dî jơno sơhờp-sờhơn Kon dê dî wêl-tăl nơ̆m ƀòn gô. 14Kon sŏng dờp jơno Bàp ma ƀòn gô, gừn dunya tơcao ƀòn gô tài bơh ƀòn gô ơ̆ trê ma dunya, kŭng gư̆ptî Kon ơ̆ trê ma dunya. 15Kon ơ̆ hôi-dăn lơi Bàp tă iyà ƀòn gô tơlôh bơh dunya, mơya lơi Bàp lăng jư ƀòn gô pleh bơh cro bờk-mơsăk. 16Ƀòn gô ơ̆ gôtrê ma dunya, kŭng gư̆ptî Kon ơ̆ gôtrê ma dunya. 17Dăn Bàp lơh lơhiê ƀòn gô î jơno-tơpăt, jơno tơs Bàp la jơno-tơpăt. 18Bàp sŏng pơđơ Kon mơ̆t nơ̆m dunya tîgay, gừn Kon kŭng pơđơ ƀòn gô mơ̆t nơ̆m dunya gư̆ptî gư̆n. 19Tài bơh ƀòn gô Kon sŏng lơh dêh sơlôh jîng sang-goh, lơi să ƀòn gô kŭng dî sơlôh jîng sang-goh nơ̆m jơno-tơpăt. 20Mơya Kon ơ̆ nư̆ng hôi-dăn ma lơ̆gay cro dô, mà hôm ma cro găy don anẵu Kon bơh jơno ƀòn gô dê te, 21lơi jơh lơ̆gay ƀòn gô sơlôh jîng dul, gư̆ptî Bàp ăm nơ̆m Kon gư̆m Kon ăm nơ̆m Bàp, lơi ƀòn gô kŭng ăm nơ̆m Ƀòn Mơ̆n, lơi dunya don lah Bàp sŏng pơđơ Kon trôh. 22Jơno gơklŏ mà Bàp sŏng dờp ma Kon, gừn Kon kŭng dờp ma ƀòn gô, lơi ƀòn gô digơlăn la dul, gư̆ptî Ƀòn Mơ̆n la dul; 23Kon ăm nơ̆m ƀòn gô, gừn Bàp ăm nơ̆m Kon lơi ƀòn gô dî wêl-tăl sơlôh jîng dul, lơi dunya gư̆t lah Bàp sŏng pơđơ Kon swà trôh, gư̆m Bàp sŏng kơñ-kơloh ƀòn gô gư̆ptî Bàp sŏng kơñ-kơloh Kon. 24Ơ Bàp, cro găy mà Bàp sŏng jao ma Kon, Kon kơñ lah Kon ăm sơgăy gừn ƀòn gô kŭng ăm sơgư̆n î Kon lơi lăng jơno gơklŏ Kon dê, la jơno gơklŏ Bàp sŏng dờp ma Kon, bơh Bàp sŏng kơñ-kơloh Kon lai jơ mon bơjîng dunya. 25Ơ Bàp Tơpăt-Durư̆ng, bulah dunya ơ̆ gư̆t Bàp, mơya Kon gư̆t Bàp; gư̆m lơ̆gay cro dô gư̆t lah Bàp sŏng pơđơ Kon trôh. 26Kon sŏng tơs sơnăn Bàp ma ƀòn gô, gừn Kon rơp tơs te, lơi jơno kơñ-kơloh mà Bàp sŏng kơñ-kơloh Kon ăm nơ̆m ƀòn gô, gư̆m Kon kŭng ăm nơ̆m ƀòn gô.”