Skip to content
BibleKenya

Dao Ao Dai Literal Text

Cumh Pâuz 4

Stiz năngx jinh đangh coong ănz songx munh wax zanyf, wax đomc stayb munh, cloon jămđ bongc Zâu Tênb-Huungh nyăngz pyau wax đomc peengz, cloon Sa-đu-si munh pungb nzac taih, stiz senz numđ nhlenx nzongf, wâyc wa iz lanh munh jinh đangh nzaox songx munh coong tauv Zâu Yê-su tăng tayc săngh taih nyăngz jau. Stiz songđ toopz zoz wa iz lanh munh muf ănz nzauh, zu tauv nyâyc noib, wâyc wax zanyf guungh nzămc nzof. Six yămz wa naih munh đuungx numđ wax đomc wac songđ zen, zen nyăngz munh pha cox naih pyaz tinb lanh.

Tauv nyâyc noib, stiz wax đomc ayx côx munh, cloon wax đomc munh côx, cloon wax đomc nzaox gâyf stênx steengb, taih căpx dlonf yămz wa Yê-lu-sa-lem, cloon An-natx stayb munh pyây, cloon Ca-ya-phatx, Yô-hanx, cloon A-lek-san-đê cloon stayb munh pyây nyăngz pyau munh tauv laiv. Stiz ênz wa iz lanh munh taih yămz wa mungh toongx, yâuc naic coong: “Păngc laiv huungđ lokc jangx, max six tim mănv nyăngz manyh, nyâuh bix ayx nâyx đomc cumh pâuz?” Wax zanyf Pi-tê tuz Zâu Singx-Lingh pong nyâuđ, songđ tauz ănz stiz, coong: “Yetx stong ayx côx cun pec stingx nyăngz munh cloon yetx stong munh côx lex, năngđ coong nâyx noib buz zuc stămđ tauv wâyc ayx gongx dlayc phunz ah lanh gumc munh, păngc luungđ nănh bix tuz zany gongx, nây six nyâuh tinyh đoih cloon lomc I-sa-la-ên nyăngz munh, lauf tinyh đoih pâyz tauv, coong tim Na-sa-leetx nyăngz Zâu Yê-su Jix-Tuz nyăngz manyh, six nyâuh zoz tingz ănz săpc đăngc zax wax Tauh, Zâu Tênb-Huungh yâuc ayx phunz tăng tayc săngh taih wax Tauh, nây six păngc Nănh bix nâyx tauh munh tuz zanyf gongx stâuđ yămz nyâuh nây cah đangc. Nănh six ah nomz njăuz zuc nyâuh ayx pyau stangc nyăngz munh nzêmh, yâuc pênx ănz wa pyau joongz, năngx nongc sen quaix wax nomz njăuz. Max naih njâuv pôz nyăngz jau yămz pitc tauh munh, wâyc yămz nây guungh đi, max naih pitc nomz manyh tuz sađ phunz guungh đi munh, phunz pănh năngx hayh păngc wa bix tuz njâuv.”

Phătc Pi-tê cloon Yô-hanx naih nyâuđ pungx stimz coong, yâuc wâyc pâyz coong stiz iz lanh six max tuz hoođ đăngc nyăngz munh, cungb toongh hangh munh, stiz songđ nyâyh ganc, stiz lauf pâyz coong, wa iz lanh munh cah đangc six cloon Zâu Yê-su yămz. Yâuc wâyc phătc wax lanh munh pha tuz zany gongx, cloon stiz iz lanh stâuđ wa, stiz songđ max naih laiv huungđ jau tauz. Êu wa iz lanh munh setb huyđ tinc ninyh blătc, stiz songđ tinyh đoih sangv, coong: “Pănh cayx ayx laix ănz nâyx đomc munh heh? Wâyc phătc tăng stiz bix nâyx đomc jix caox njingc setb taih năngđ nâyx, Yămz nây Yê-lu-sa-lem nyăngz munh yâuc muif lanh tuz phătc, pănh senz mayv coong ayx laix. Six wâyc, max phunz nâyx đomc cumh pâuz tuz ayx ninyh quăng, yămz songx munh cah njaf, pănh oix zuc zăpx stiz max tuz nongc wax nomz manyh, nzaox phunz laiv tauh.” Tăng wa, stiz êu wa iz lanh munh taih, songđ setb lanyf zăpx stiz coong, max tuz tim Zâu Yê-su nyăngz manyh coong max six nzaox toix laiv huungđ. Six Pi-tê cloon Yô-hanx tauz ănz stiz, coong: “Ha nyâuh cănh nyâyh mungv jađ. Yămz Zâu Tênb-Huungh nyăngz cah đangc, six hoopđ zuc mungv nyâuh max six Zâu Tênb-Huungh? Wâyc buz mayv ayx tuz max coong, buz phătc cloon numđ nyăngz dlayc.” Tăng wa stiz zef huukb timb, songđ pungx wa iz lanh, wâyc lov max tuz luungđ jau nongc phunz stiz phađ wa iz lanh, yâuc wâyc songx munh, wâyc zuc munh muif lanh phătc wax đomc dlayc setb taih, songđ tanv Zâu Tênb-Huungh. Nzof wax tauh munh pha, tuz nây jix caox njingc setb taih zany gongx wax tauh, six stâyx săpc đuungx nyăngv.

Tăng wa stiz iz lanh tuz pungx setb taih, songđ ninyh pongh stiz wax đomc zen Zâu nyăngz yâuf pez, yâuc lănv nzuf muif huungđ, coong wax đomc stayb munh cloon wax đomc munh côx coong ănz stiz nyăngz wac. Mungv tuz, stiz songđ hoopđ stimz setb stingb huungv staox Zâu Tênb-Huungh ninyh cloo Zâu coong: “Zâu lex, Mâyh six zuyx guungh, zuyx nib, zuyx coiđ, cloon muif huungđ yămz wa wax Tauh, Mâyh yâuc nongc Zâu Singx-Lingh, coong quaix Mâyh nyăngz pâuz nyăngz nzetx, six buz nyăngz claof jex Đa-witx huungh coong:

‘Săngh laix manf côkz munh bix numđ nhlenx,

săngh laix manf stingx munh bix ta max săngh nongc nyăngz zux ix?

Guungh đi muif tauh huungh njăpc nyâuđ,

ayx quanz lub wax đomc yâuc tinyh đoih songc nyâuđ,

nzeengz Zâu yâuc nzeengz Mâyh nongc yâuh oonz taih wax Tauh.’

Wâyc zuc, njinh Hê-lôtx cloon Boon-ti-atc Phi-latx, cloon wax đomc pitc stingx munh cloon I-sa-la-ên munh, tinyh đoih songc nyâuđ yămz nâyx nomz dlanyh nzeengz Mâyh nyăngz đăngb zeengh pâuz, Mâyh nongc yâuh oonz taih wax Tauh, Zâu Yê-su, Nongc ayx muif huungđ Mâyh nyăngz puf tauh cloon Mâyh tingc taih quaix đangc nyăngz zux ix tuz setb taih. Zâu lex, nâyx zanyf, joođ zah mangc nănh stiz huukb nyăngz wac, yâuc joođ sađ phunz Mâyh nyăngz pâuz hayh naih nyâuđ pungx stimz nzônh Mâyh nyăngz wac Mâyh stuungb Mâyh nyăngz puf staox taih, nongc zany gumc, phunz jix caox njingc cloon njic hoouđ nyăngz cumh pâuz tuz ayx setb taih, păngc Mâyh nyăngz đăngb zeengh pâuz nyăngz manyh, six Zâu Yê-su.” Stiz cloo Zâu tuz wax zanyf, stiz căpx dlonf wax nomz tinc songđ đănz tongf, stiz songđ muif lanh tuz Zâu Singx-Lingh pong nyâuđ, yâuc naih nyâuđ pungx stimz nzônh Zâu Tênb-Huungh nyăngz wac.

Wax zanyf, zen nyăngz munh hongđ nzongf tinyh đoih songc ah nomz stimz nyâuđ. Max naih mănv stunx stiz nyăngz luungđ six cănh nyăngz, muif huungđ six săngh tinyh đoih nyăngz nzuf. Wax đomc cumh pâuz munh naih jab lub nzongf, ayx zanyx manyf coong tauv Zâu Yê-su săngh taih nyăngz jau, yâuc tuz pôz lub nzongf yămz stiz tinyh đoih. Wâyc nây, yămz stiz cah njaf max naih mănv sămv luungđ, wâyc stiz mănv naih nib tâyc max six naih pyau, maic tuz buc laiv nyanh stiz yâuc nzâyz taih, tăpx ănz wax đomc cumh pâuz munh nyăngz staux sinh, wax đomc nyanh six âyz laiv lanh sămv nongc nyăngz yâuc phunz wax lanh.

Tăng wa Yô-sepx, nănh tuz wax đomc cumh pâuz munh hipđ ayx Ba-na-batc (nâyx nomz bux nyăngz âyz gâyf six coong Oonz Nyâuđ nyăngz Toonz), nănh six ah lanh Lê-wi munh, yămz wa Sai-batc steengb stâyv, maic Nănh nyăngz njingh, songđ nzâyz nyanh taih tăpx ănz wax đomc cumh pâuz munh nyăngz staux sinh.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.