Dao Ao Dai Literal Text
Cumh Pâuz 5
Six naih ah lanh munh, bux hipđ ayx A-na-ni, cloon nănh nyăngz au Săpc-phi-la, maic stiz nyăngz ah tootz nib, nănh songđ tanb wax đomc ah phănc nyanh nzâyz taih zaub nongc (nănh nyăngz au lauf pâyz), năngx naih wa ah phănc, songđ nzâyz ninyh tăpx ănz wax đomc cumh pâuz munh nyăngz staux sinh. Six Pi-tê coong: “A-na-ni lex, wâyc săngh laix Sax-tanx bix yămz pong mâyh nyăngz nyâuđ, ayx tuz mâyh puv maoh jaf Zâu Singx-Lingh, bix cănh zaub ah phănc wax đomc maic nib nyăngz nyanh nongc? Max zeengx maic wax zanyf, wax cuyb nib max zâyf săngh mâyh nyăngz haz? Nzof tauv maic blătc wax đomc nyanh max zâyf lauf săngh mâyh nyăngz haz? Săngh laix mâyh bix nyâyh nâyx đomc dlayc ănz mâyh nyăngz nyâuđ? Nây max zâyf mâyh jaf bamh munh, six jaf Zâu Tênb-Huungh.” Tăng wa A-na-ni mungv wax đomc wac tuz, nănh songđ siv setc glinyf wa nib, muif lanh numđ nâyx đomc dlayc yâuc numđ cumh nzav nzongf. Wax đomc munh gunx munh songđ nyoongz quef, pêuz nănh zeengz nzâyz ninyh plopx.
Cox blătc pôz săngx huđ cah njaf, nănh nyăngz au zef nzac taih, max zeengx pâyz ah yac setb taih nyăngz dlayc. Pi-tê songđ coong ănz wax tauh munh nzif, coong: “Mâyh oix zuc coong phunz yaz pâyz, nyâuh maic wax tootz nib, six tuz buc nâyf nyanh yah?” Wax tauh munh nzif tauz: “Hiđ, tuz buc nâyf lêc.” Six Pi-tê coong ănz nănh: “Săngh laix nyâuh bix tinyh ênz stâyv Zâu nyăngz Singx-Lingh? Phanv mangc, plopx mâyh nyăngz langh wax đomc munh nyăngz staux lauf tauv lâyc jeengh cah đangc nzof, stiz six năngx ênz mâyh ninyh plopx timb.” Wax tauh munh nzif songđ toongx sangf glinyf nzac Pi-tê wa staux sinh ninyh bix tayc. Wax zanyf, wax đomc munh gunx munh nzac lauf phătc, songđ zeengz nănh nyăngz stayđ ninyh plopx ănz nănh nyăngz langh cah sinh. Njinh jiux pangx cloon muif lanh mungv numđ nâyx đomc dlayc nyăngz munh lauf tinyh đoih cumh nzav nzongf.
Wax zanyf, naih đuungx huungđ jix caox njingc cloon njic hoouđ tuz ayx setb taih tăng wax đomc cumh pâuz munh nyăngz pu, yămz songx munh mungh tongx, stiz songđ tinyh đoih hoopđ stimz căpx dlonf yămz wa Sa-lô-môn njiuh. Six max naih mănv nzađ cloon stiz songc ayx ah peob, six songx munh lauf tinyh đoih tanv stiz. Wax zanyf, munh yâuc cun taih zen Zâu cun đuungx, naih munh pha cloon munh nzif hongđ nzongf, ayx tuz munh lôx năngx ênz wax đomc săngh gumc nyăngz munh, phâyx sic, phâyx zâuv, taih tăpx ănz wa jau sinh, phunz tauv Pi-tê yăngh pitb, bix nănh nyăngz bah cloiz năngx tuz clăngv zuc stiz tix lanh. Wax đomc dlanyh yămz stătx wa Yê-lu-sa-lem nyăngz munh, yâuc tinyh đoih ênz wax đomc săngh gumc nyăngz munh, cloon zuc manđ yootz ayx wax đomc munh taih, stiz muif lanh yâuc tuz zany gongx nzuf.
Wax zanyf, stayb munh pyây cloon lêpc nănh wax đomc muif lanh munh (six Sa-đu-si wax huungđ munh) tinyh đoih nyoongz quef yâuc numđ nhlenx nzongf, stiz songđ zoz wax đomc cumh pâuz munh, ênz stiz ninyh ănz wa tômx songx nzauh. Six tauv đamx munf, naih Zâu nyăngz ah tauh stinz munh taih coib wa nzauh jeengh, ênz stiz setb cungh ngwaic ninyh, yâuc bux coong: “Ninyh gôh, ninyh stâuđ yămz wa bongc Zâu Tênb-Huungh nyăngz pyau, coong bux songx munh tauv nâyx đomc muif zâux săngh mengc nyăngz wac.” Tuz numđ năngđ nâyx, tauv guungh gwăngz stiz songđ ninyh yămz wa bongc Zâu Tênb-Huungh nyăngz pyau nzaox munh. Six, stayb munh pyây, cloon lêpc nănh wax đomc munh taih tauv, stiz songđ ênz wax đomc cun dlayc munh, six I-sa-la-ên munh nyăngz songx munh côx tinyh đoih taih căpx dlonf, songđ paiđ peengz ninyh wa nzauh ênz wax đomc cumh pâuz munh taih. Six wax đomc peengz ninyh tauv tinc yâuc max phătc naih wax đomc cumh pâuz munh yămz wa nzauh, stiz songđ phunb đangz lauf lănv bux, coong: “Buz phătc nzauh jeengh omz wa gongb gongx, nzof jămđ nzauh peengz lauf sâuđ wa jeengh cah đangc, six tauv buz coib jeengh, buz yâuc max phătc naih mănv yămz wa cah njaf tiny.” Wax zanyf, stiz numđ wax đomc wac, songđ njinh cun bongc Zâu Tênb-Huungh nyăngz pyau wax tauh peengz pyây cloon wax đomc stayb munh, songđ tinyh đoih nyâyh ganc tauv stiz numđ lănv wax đomc jau, nyâyh max pâyz ayx laix bix năngđ nâyx. Tăng wa, naih ah lanh munh, taih tauv bux ănz stiz coong: “Phanv mangc, nyâuh zoz ănz nzauh wax đomc munh, nâyx zanyf jinh đangh stâuđ yămz wa bongc Zâu Tênb-Huungh nyăngz pyau cah njaf, nzaox songx munh!” Tăng wa, wax tauh peengz pyây ênz cloon wax đomc peengz ninyh zoz stiz ênz lauf, six max ayx huđ ănz, wâyc stiz cumh nzav songx munh, wangb stiz zuc zoz njăuz ôx. Tauv ênz wax đomc cumh pâuz munh lauf, phunz stiz yămz wa cun dlayc munh nyăngz cah đangc, tăng wa stayb munh pyây songđ naic stiz, coong: “Buz six zăpx nyâuh coong, max phunz nyâuh nongc nâyx nomz manyh nzaox naz nzec, mangc jađ, nyâuh ayx phunz Yê-lu-sa-lem naih pong nyâuh nzaox wax huungđ gâyf, nyâuh six oix ayx phunz wax tauh munh nyăngz samđ njămh quaix buz cah zâyc ninyh mah.” Six Pi-tê cloon wax đomc cumh pâuz munh tauz coong: “Oix zuc mungv Zâu Tênb-Huungh, max zâyf mungv munh. Pănh claof jex nyăngz Zâu Tênb-Huungh ayx phunz Zâu Yê-su săngh taih, Nănh six nyâuh zoz tingz ănz săpc đăngc zax tayx tayc wax Tauh. Zâu Tênb-Huungh zanyb Nănh ayx năngx lub quaix, yămz Nănh nyăngz byaoh wax phanx, yâuc ayx Njâuv Zâu, nongc phunz I-sa-la-ên munh nhlimc stoif yâuc tuz quanyf stoif. Buz six ayx zanyx manyf phunz nâyx đomc dlayc, Zâu Singx-Lingh, six Zâu Tênb-Huungh sađ phunz mungv nănh nyăngz wac wax đomc munh, wax Tauh.”
Six numđ nâyx đomc wac, stiz senz numđ nhlenx nzongf yâuc oix tayx wax đomc cumh pâuz munh. Six naih ah lanh Pha-li-si munh nyoongz quef yămz wa huyđ cah njaf, bux hipđ ayx Ga-ma-li-ên, ayx nzaox gâyf stênx steengb, yâuc tuz songx munh tinyh đoih zanyb, nănh êu ênz wax đomc cumh pâuz munh setb cungh ngwaic ninyh tix cay. Nănh songđ coong ănz stiz:
“I-sa-la-ên nyăngz yâuf pez lex, nyâuh oix zuc năngx cayb bôngh nyâuh cayx ayx ănz nâyx đomc munh nyăngz jau. Wâyc cah đangc, nây lauf naih, Tu-đatc, cănh tanv nănh ayx lub, naih wax đomc munh pha ninyh lêpc nănh cox stâyx pez lanh, six tauv nănh zuc tayx tayc, zuc hox lêpc nănh wax đomc munh tinyh đoih lauf cănh đanv nzuf, yâuc cănh taux wa jac. Blătc nâyx tauh zef naih ah tauh, Yu-đatc, Ga-li-lê munh, toix staox munh huv wax nzêuh, lauf cănh hox munh lêpc nănh. Wax tauh munh lauf zuc tayc, nzof zuc hox lêpc nănh wax đomc munh lauf tinyh đoih zuc đanv nzuf. Nâyx zanyf yaz oix coong quinb nyâuh năngđ nâyx: Oix zuc pyenv gâyh nâyx đomc munh năngx côz, phanv dluyh nănh stiz, wâyc zuc năngđ coong nâyx đomc zux ix cloon nâyx đomc jau six tăng bamh munh taih, nănh six cănh zuc paic nzuf, six năngđ coong wax huungđ tăng Zâu Tênb-Huungh taih, nyâuh six mayv ayx tuz hingh nănh stiz, hoođ max hoođ, nyâuh lôx năngx cănh ayx phunz nyâuh căn Zâu Tênb-Huungh tinyh nzeengz.” Tăng wa, stiz songđ mungv nănh. Stiz êu ênz wax đomc cumh pâuz munh taih, bopc tuz, stiz songđ setb lanyf cangđ max phunz nongc Zâu Yê-su nyăngz manyh nzaox, nzof stiz songđ pungx muf.
Năngđ nâyx, wax đomc cumh pâuz munh phunb đangz muf gâyh đutb wax đomc cun dlayc munh, yâuc numđ nyađ wâyc stiz năngx tuz payh, zuc tanyđ zâuđ wâyc Zâu Yê-su nyăngz manyh. Stiz muif noib yămz bongc Zâu Tênb-Huungh nyăngz pyau, yâuc yămz ah sênz pyau tauv ah sênz pyau, stiz nzaox yâuc nzônh Cuđ Jenx max setc tiny coong — Zâu Yê-su six Zâu Jix-Tuz.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.